Akapeea i te Akono Meitaki Tikai i te Ra Tataki Tai

“E APII mai ia matou i te tatau i to matou puke rā, kia riro to matou ngakau ki te pakari.” (Salamo 90:12) Ko teia te pure akaaka a te tangata tata Pipiria ko Mose. Eaa tikai tana e pati ra? Ka tau ainei tatou i te akono i tetai patianga akamori anga mei teia rai?

I roto i te irava 10, kua aue a Mose no te poto roa i te tuatau o te oraanga tangata. I tetai atianga akaou mai, kua tata aia i te tuatua a Iobu, tei karanga e: “Ko te tangata ta te vaine e anau nei, e iti ua ona puke rā, e te ki oki i te pekapeka.” (Iobu 14:1) Te kiteia ra e kua kite meitaki tikai a Mose i te tu poto ua o te oraanga apa ua o te tangata nei. No reira, kua akamanako aia i te oraanga i te ra tataki tai ei apinga aroa akaperepereia. I te aratakianga i teia pati akatenga ki te Atua, kua akakite a Mose i tona inangaro kia akapou meitaki i te toenga o tona oraanga, na roto i te mataara te ka akamareka i Tei Anga mai iaia. Kare ainei e ka kimi katoa rai tatou kia akapou meitaki i to tatou au ra? Ko te reira ta tatou tautaanga me ka inangaro tatou i to te Atua ariki anga i teianei.

Te vai ra tetai tumu anga akaou mai tei akakeu roa ai ia Mose raua ko Iobu, tetai tumu anga te ka tau kia akakeu katoa ia tatou. Kua akara teia nga tangata tu-Atua roa ai ki mua ki tetai tutakianga no te tuatau ki mua​—tetai oraanga ki runga nei i te enua i raro i te au turanga meitaki atu. (Iobu 14:14, 15; Ebera 11:26) I taua taime ra, kare roa te au angaanga a tetai e tipu poto ia e te mate. Kua akakoro Tei Anga mai ia tatou e ka noo ua atu rai te aronga tiratiratu e tuatau ua atu i runga i tetai enua parataito. (Isaia 65:21-24; Apokalupo 21:3, 4) Ka rauka katoa rai teia manakonakoanga noou me ‘tatau koe i toou puke ra, kia riro toou ngakau ki te pakari.’