Te Au Acrobat o te Au Pari Maunga

I TE pae tai opunga o te Tai Mate te vaira te oire taito e te ngai metepara takapini tei kapikiia ko Eni-gedi. Te au ara toka o te reira ngai e te au ngai tariva kua riro ei kainga tau no te au puakanio maunga o te Enua Taputouia, tei aiteite ki tei kiteaia ra i konei.

Ko teia manu vaevae ngaueue kore tetai i rotopu i te au mea umere o te au manu tei angaia. Ka akatuera ana tatou i te Pipiria no te akara vaitata i teia manu umere tikai.

“Te Au Maunga Teitei ra, no te Puaka-Nio Momoavao Ïa”

I imene ei te tata taramo. (Salamo 104:18) Kua tau meitaki te au puakanio maunga kia noo i te au ngai teitei! E paru tikai ratou, te aaereanga i te au ngai pukupuku ma te tu papu maata e te viviki tikai. No te mea na reira te maani angaia to ratou vaevae. Me akatueraia ka akamaata te reira i raro ake i te teiaa o te puakanio, te tu ngaueue kore anga te manu me kore te aaerenga na runga i te au akapapa anga toka oiti.

E parani maata katoa te au puakanio maunga. Ka rauka ia ratou i te rere mamao maata e te to ki rungao i tetai toka tariva tei rava te atea no te tuku e a vaevae katoatoa. Kua kite te tangata apii apinga ora ko Douglas Chadwick i tetai atu katiri puakanio maunga te taangaanga anga i tona parani kia kore e tano ki runga i tetai toka tariva tei oiti roa i te taanga mai. Kua karanga aia: “I muri ake i te kite anga atu i tetai toka tariva ke i etai 120 mita i raro ake, kua tuku te puakanio i tona nga vaevae mua e kua akaaere marie i tona papa na runga ake i tona katu na te pae i te mata toka mei te mea te rave ra te reira i tetai porotaka anga auira. I toku umere, kua rave te puakanio i teia e tae ua atu tona nga vaevae muri ki raro te to anga i te ngai i aere mai ei.” (National Geographic) No reira te au puakanio maunga i kapikiiaʼi “e au acrobat o te au pari maunga”!

‘Kua Kite Ainei Koe i te Tuatau e Anau ei te Au Puaka-Nio Momoavao?’

E au manu akama tikai te au puakanio maunga. E reka ake ratou i te noo mamao mei te au tangata. E tikai, e ngata i te au tangata i te akavaitata atu no te akara ia ratou i to ratou tu rerevao. No reira, Tei Akono i “te au puaka i runga i te au maunga ra e tausani ua atu” ka tau ei kia ui ki te tangata ko Iobu: “Kua kite ainei koe i te tuatau e anau ei te au puaka-nio momoavao?”​—Salamo 50:10; Iobu 39:1.

Na te tu kite i orongaia e te Atua e akakite ana ki te ua puakanio maunga te taime tikai e anau ei. Ka kimi aia i tetai ngai tinamou e ka anau okotai me kore e rua nga punua puakanio, te maata anga o te taime i te openga o Me me kore o Tiunu. I roto ua i nga mea ra ka rauka i te au punua puakanio i te takai i te au takainga ngaueue kore.

“Kia Riro Aia Mei te Aili te Inangaro! e Mei te Iale te Manea!”

Kua raurau te ariki kite pakari ko Solomona i te au tane: “E kia rekareka koe i te vaine o toou ou anga ra. Kia riro aia mei te aili te inangaro! e mei te iale te manea!” (Maseli 5:18, 19) Kare teia i raveia ei akameangiti i te au vaine. Mari ra, te tuatua ra a Solomona no te manea, te tu maru, e tetai atu au tu puapinga o teia au manu.

Ko te puakanio maunga to rotopu i te manganui ua atu “au mea ora” te oronga ra i te akakite anga maata i te tu kite pakari o Tei Anga. (Genese 1:24, 25) Kare ainei tatou e mataora ana e kua koropini te Atua ia tatou ma te au manu ora umere?

[Akameitakianga no te Tutu i te kapi 24]

Courtesy of Athens University