Te Papa ra Ainei Taau Au Pure “mei te Atinga Kakara Ra”?
“Kia ana atu taku pure ki mua ia koe mei te atinga kakara ra.”—SALAMO 141:2.
1, 2. Eaa ta te tutungianga akakakara i akatutu maira?
KUA akaue atu te Atua ra ko Iehova i te peroveta ko Mose kia akapapa i te atinga kakara i te tapenakara akamori anga a to Iseraela. Kua umuumuia i taua apinga tau i te Atua tetai kairo anga kakara e a tuanga. (Exodo 30:34-38) Kua riro ia ei tetai kakaraanga reka tikai.
2 Na te Ture koreromotu i o atura te iti tangata Iseraela ki roto i oronga mai te tutungianga i te akakakara anga i te au ra. (Exodo 30:7, 8) E puapinga taka ke ainei to taua akakakara anga ra? Ae, no te mea kua imene te tata taramo: “Kia ana atu taku pure ki mua ia koe [e te Atua e Iehova] mei te atinga kakara ra; te apai anga o toku rima ki runga mei te atinga kai aiai ra.” (Salamo 141:2) I te puka o Apokalupo ra, kua akataka mai te apotetoro ko Ioane i te aronga takapini i te terono o te Atua i te rangi ra e e au kapu auro ki i te rakau kakara ta ratou. E, te tuatua ra taua tataanga akauruia ra e ko taua rakau kakara, “koia te pure a te aronga tapu ra.” (Apokalupo 5:8) No reira, te akatutu maira taua tutungianga i te rakau kakara reka ra i te au pure arikiia tei orongaia ra e te au tavini o Iehova i te ao e te po.—1 Tesalonia 3:10; Ebera 5:7.
3. Eaa te ka tau kia tauturu ia tatou kia ‘teateamamao i ta tatou au pure ei akakakara ki mua i te Atua’?
3 Me ka arikiia mai ta tatou au pure e te Atua ra ka tika tatou kia pure kiaia na roto i te ingoa o Iesu Karaiti. (Ioane 16:23, 24) Inara akapeea e raukai ia tatou kia akameitaki mai i te tu o ta tatou au pure? E mea tika, na te akamanako anga i etai au akatauanga Tuatua Tapu ka tau kia tauturu ia tatou e teateamamao ra i ta tatou au pure ei akakakara ki mua ia Iehova.—Maseli 15:8.
E Pure ma te Akarongo
4. Eaa te pirianga o te akarongo ki te pure arikiia ra?
4 Me ka kake atu ta tatou au pure ki te Atua ei kakara reka, ka tika tatou kia pure ma te akarongo. (Ebera 11:6) Me kitea e te aronga pakari Kerititiano ra tetai tangata maki i te pae vaerua tei ariki ra i ta ratou tauturu i te pae Tuatua Tapu, e “e ora taua maki ra i te pure akarongo” na ratou ra. (Iakobo 5:15) Te au pure akarongo ra e mea marekaia ki to tatou Metua i te rangi, e pera katoa oki te apii i te Tuatua a te Atua ra ma te pure. Kua akakite te tata taramo i tetai tu manako meitaki i tana imene anga: “E akatika atu au i oku puke rima ki taau au akauenga, taku i inangaro nei; ka akamaara rai au i taau ra au akonoanga. E akakite mai koe kiaku i te akono meitaki e te karape: te irinaki nei oki au i taau ra au akauenga.” (Salamo 119:48, 66) ‘E akatotoa atu tatou i to tatou au rima’ na roto i te pure taakaaka e te akono anga akarongo na te raveanga i ta te Atua ra au akauenga.
5. Eaa ta tatou ka tau kia rave me te ngere ra tatou i te pakari?
5 Mei te mea rai e te ngere ra tatou i te pakari umuumuia kia akono atu i tetai timataanga. Penei kare i papu ana ia tatou e te akatupuia ra i teianei tetai totou akatakaia no te Pipiria. Auraka e tuku i teianei kia akatinamou kore tatou i te pae vaerua, e pure ra tatou no te pakari. (Galatia 5:7, 8; Iakobo 1:5-8) Inara, kare tatou e tau kia manako atu i te Atua ra kia pau mai ia tatou na roto i tetai tu takake ra. Ka tau tatou kia akaari i te ngakau tae o ta tatou au pure na te raveanga i tana e manako maira i tona au tangata katoa kia rave. Ka umuumuia tatou kia rave i tetai apii anga patu i te akarongo i te au Tuatua Tapu ra ma te tauturu a te au puka tei orongaia maira na roto i “te tavini akono meitaki e te pakari.” (Mataio 24:45-47; Iosua 1:7, 8) Ka anoano katoaia tatou kia tere ki mua i te kite na te pirianga ki roto i te au uipaanga o te au tangata o te Atua ra na tetai tumu anga putuputu.—Ebera 10:24, 25.
6. (a) Eaa ta tatou ka tau kia kite no to tatou tuatau e te akatupu anga o te au totou Pipiria ra? (e) Kapiti atu i te pure anga no te akatapu anga i te ingoa o Iehova, eaa ta tatou ka tau kia rave?
6 I teianei tuatau, te aruaru ra tetai papaki Kerititiano i te au manako e te au angaanga te akakite maira e kua kore ta ratou matakite e te noo nei tatou i teianei i te oonu anga ki roto i te “tuatau openga ra.” (Daniela 12:4) Ka tau tikai te au oa irinaki ra kia pure e kia akaka akaou mai me kare kia akaketaketa mai i to ratou akarongo i te au akakite anga Tuatua Tapu e kua akamata ke ana to Karaiti parutia i te 1914 i ta Iehova ra akanoo anga iaia ei Ariki i te rangi e te tutara nei aia i rotopu i tona au enemi. (Salamo 110:1, 2; Mataio 24:3) Ka tau tatou katoatoa kia kite e ko taua au tupu anga totouia maira ko te akapou anga i te akonoanga pikikaa koia—“Babulonia Maata”—te aere atuanga a Satani ei ia Goga o Magoga e ta i te au tangata o Iehova ra, e ta te Atua Mana Katoatoa ra akaora anga ia ratou i te tamaki o Aramakito ra ka rauka kia akamata vivikiia ma te poitirere oki e ka rauka kia rokoia mai i roto i tetai tuatau poto ua te katoatoa ra. (Apokalupo 16:14, 16; 18:1-5; Ezekiela 38:18-23) No reira e pure tatou no ta te Atua ra tauturu kia vai ara ua tatou i te pae vaerua. Kia pure akatenga tatou katoatoa no te akatapu anga i te ingoa o Iehova, no tona Patireia kia tae mai. Ae, kia akonoia tona anoano i te enua nei, mei tei te rangi katoa ra, e kia akono tamou marie tatou i te akarongo e oronga akakite anga e ko ta tatou au pure no te ngakau tae mai. (Mataio 6:9, 10) E tika oki, kia na mua te aronga katoatoa te inangaro ra ia Iehova i te kimi i te Patireia e te tuatua tika nona ra e kia rave i te tuanga maata katoa i te tutuanga i te tuatua meitaki i mua ake ka tae mai ei te openga.—Mataio 6:33; 24:14.
E Akapaapaa e Akameitaki ia Iehova
7. Eaa te akamanako maata ra ia koe no ta Davida pure i tataia ra tetai tuanga ia 1 Paraleipomeno 29:10-13?
7 Ko tetai tu puapinga maata kia teateamamao i ta tatou ‘au pure ei akakakara’ na te akakiteanga i te akapaapaa no te ngakau mai e te akameitaki oki ki te Atua. Kua oronga te Ariki ra ko Davida i taua tu pure ra i tana oronga anga tauturu e te au tangata katoa oki o Iseraela ra ki te patu anga i te iero o Iehova ra. Kua pure a Davida: “Kia akameitakiia koe, e tuatau e tuatau ua atu, e te Atua o to matou metua o Iseraela, e Iehova. Tei ia koe, e Iehova, te maata, e te mana, e te kakā, e te autu, e te tapunui: to runga i te rangi ra, e to runga i te enua, noou anake ïa; tei ia koe te au, e Iehova, e ko koe tei teitei ei upoko i te au mea katoa nei. No ko na mai ia koe na te apinga e te akangateitei, e ko koe tei tutara ki rungao i te au mea katoa; e tei to rima i te akamaata mai, e te oronga mai i te maroiroi ki te tangata katoa nei. E teianei, e to matou Atua, te akameitaki nei matou ia koe, e te akapaapaa nei i toou ingoa kakā.”—1 Paraleipomeno 29:10-13.
8. (a) Eaa te au tuatua akapaapaa ia Salamo 148 ki te 150 tei akatukia tikai i toou ngakau? (e) Me ka manako kapiti tatou i te au manako taikuia ra ia Salamo 27:4, eaa ta tatou ka rave?
8 Mei teaa ra te au akakite anga manea i te akapaapaa e te akameitaki anga! Penei kare e aite atu ta tatou au pure i te akataka anga, inara ka rauka kia aite atu te manako anga ngakau ra. Te ki ra te puka a Salamo ma te au pure e te au akameitaki anga e te akapaapaa anga oki. Te kitea ra te au iki anga tuatua akapaapaa ia Salamo 148 ki te 150. Te akakiteia ra te akameitaki anga i te Atua i roto i te au taramo e manganui. “Okotai aku mea anoano ia Iehova ra,” ta Davida i imene. “Ko taku ï[a] e umuumu ua nei; kia noo rai i roto i te are o Iehova e ope roa ake oku puke rā i te ora anga nei, kia akara au i te meitaki o Iehova, e kia ui marie au ki roto i tona nao.” (Salamo 27:4) Kia rave tatou kia rotai ma taua au pure ra na te raveanga totomapu i te au angaanga katoatoa i roto i te au uipa anga a Iehova ra. (Salamo 26:12) Na te raveanga i teia e te tamanako anga ki runga i te Tuatua a te Atua ra i te au ra tataki tai ka oronga mai kia tatou i te au tumu e manganui kia akavaitata atu kia Iehova ra ma te akapaapaa e te akameitaki anga no te ngakau maira.
E Kimi Taakaaka i ta Iehova Tauturu
9. Akapeea ta te Ariki ko Asa pure, e eaa te tupu anga?
9 Me te tavini ra tatou ia Iehova ma te ngakau katoa ei Au Kite nona, ka papu ia tatou e te akarongo maira aia i ta tatou au pure no te tauturu. (Isaia 43:10-12) E akamanako ana ia Asa Ariki o Iuda ra. Te 10 au mataiti mua o tona 41 mataiti tutara anga (te 977-937 M.T.N.) kua akairoia na te au. I reira kua noniia a Iuda e tetai vaeau e tai mirioni tangata i raro ake ia Zerah koia tetai tangata Etiopia. Noatu rai e maata roa atu ratou ra, kua aere atura Asa e tona au tangata kia aravei atu i taua aronga noni ra. Inara, i mua ake i te tamaki anga, kua pure akatenga a Asa. Kua akakite aia i to Iehova ra mana kia akaora. I te patianga tauturu, kua tuatua te ariki ra: “Te irinaki nei oki matou ki runga ia koe, e no toou ingoa e aere atu ei matou e tamaki i teianei aronga maata. Ko koe to matou Atua, e Iehova; auraka ta te tangata kia tupu i taau ra.” Kua tupu te autu takiri i ta Iehova akaora anga ia Iuda no tona ingoa maata ra. (2 Paraleipomeno 14:1-15) Me ka akaora te Atua ra ia tatou i tetai timataanga me kare ka akamaroiroi ia tatou kia akakoromaki i te reira, kare e ekoko anga e te akarongo maira aia i ta tatou au pati anga no tana tauturu anga.
10. Me kare tatou i kite e akapeea me akono i tetai tu taitaia, akapeea ka raukai i te pure a te Ariki ko Iehosaphata i te tauturu mai?
10 Me kare tatou e kite e akapeea te akono i tetai tu taitaia, ka rauka ia tatou kia irinaki e ka akarongo mai a Iehova i ta tatou au pati anga no te tauturu. Kua akatutuia mai teianei i te tuatau o te Ariki Iudea ra ko Iehosaphata, tei akamata ra tona tutara no te 25 mataiti i te 936 M.T.N. I te akakoko angaia Iuda e nga nuku kapitiia o Moabi, e Amona, e te maunga ra ko Seira, kua pati a Iehosaphata: “Kare ainei koe e akava ia ratou, e to matou Atua? kare oki o matou nei ririnui, kia tamaki atu i teianei aronga maata, e aere mai e tamaki ia matou nei; kare oki matou i kite i te ravenga kia rave: tei runga ia koe ra to matou mata.” Kua pau atu a Iehova ra i taua pure taakaaka ra, na te tamakianga no Iuda na te taanga i te au pupu enemi ra ma te akaoripu anga ia ratou kia ta atu ratou tetai i tetai. Ei tetai tupu anga, kua mataku to te au pa enua takapini ra, e kua tupu te au i Iuda ra. (2 Paraleipomeno 20:1-30) Me ngere tatou i te pakari te umuumuia ra kia akakore atu i te taitaia ra, mei ia Iehosaphata ka rauka ia tatou kia pure: ‘Kare oki matou i kite i te ravenga kia rave: tei runga ia koe ra to matou mata, e Iehova.’ Penei na te vaerua tapu e akariro kia maara tatou i te au tumu Tuatua Tapu tei umuumuia ra kia akakore atu i te manamanata, me kare penei na te Atua e tauturu mai ia tatou i tetai mataara tei runga roa atu i te manakoanga tangata nei.—Roma 8:26, 27.
11. Eaa ta tatou ka kite no te pure mei ta Nehemia au rave anga i te pae ma te au patu o Ierusalema ra?
11 Penei ka tau tatou kia tamou marie i te pure no ta te Atua tauturu. Kua aue a Nehemia, kua akatae roimata, kua akakore i te kai, e kua pure oki no etai ra no te akakino angaia te patu o Ierusalema e te tu kino oki o te au tangata o Iuda ra. (Nehemia 1:1-11) I te akara anga kua kake atu tana au pure ki te Atua ra mei te kakara reka ra. I tetai ra kua ui atu te Ariki Peresia ko Aretekasaseta kia Nehemia maromaroa ra: “Eaa taau e pati mai?” Kua ripoti atura Nehemia, “Pure atura au i te Atua no te rangi.” Kua pauia mai taua pure poto e te muteki ra, no te mea kua akatikaia a Nehemia kia akatupu i te anoano o tona ngakau na te aereanga ki Ierusalema kia patu akaou i tona patu tei akakinoia ra.—Nehemia 2:1-8.
E Tuku na Iesu e Apii ia Koe Akapeea me Pure
12. I taau uaorai au tuatua, akapeea koe me akataka i te au tumu maata o ta Iesu pure akara anga ra?
12 To te au pure katoatoa tei tataia i te au Tuatua Tapu, ko tei apii maata mai ko te pure akaraanga tei orongaia mai ei kakara reka na Iesu Karaiti ra. Te tuatua ra ta Luka Evangeria: “Kua tuatua maira kiaia tetai [a Iesu] pipi nana, E te Atu, e apii mai ia matou nei i te pure, mei ia Ioane i apii katoa atu i tana au pipi. Kua karanga atura aia kia ratou.” E na ko kotou kia pure: “E to matou Metua i te ao ra, kia tapu toou ingoa. Kia tae toou basileia. Kia akonoia toou anoano i te enua nei; Mei tei te ao katoa na. O mai i te kai e tau ia matou i teianei rā. E akakore mai i ta matou ara; te akakore nei oki matou i ta tei ara katoa ia matou nei. Auraka e akaruke ia matou kia timataia mai.” (Luka 11:1-4; Mataio 6:9-13) E akamanako ana tatou i teianei pure, kare e kia tuatua uaia mari ra te manakoia ra kia riro ei tetai arataki anga.
13. Akapeea koe me akataka i te puapinga maata o te au tuatua, “E to matou Metua . . . , Kia tapu toou ingoa”?
13 “E to matou Metua . . . , kia tapu toou ingoa.” Te karanga anga ia Iehova ei Metua ko tetai tuanga takake ia no tona au tavini akatapuia. Ei au tamariki te papa ua ra kia aravei atu i tetai metua aroa ma tetai ua atu manako taitaia, ka tau tatou kia akapou taime i te pure anga tapunui putuputu e te ngateitei ki te Atua ra. (Salamo 103:13, 14) Ka tau ta tatou au pure kia akaata mai i to tatou manako no te akatapu anga i te ingoa o Iehova no te mea te anoano ra tatou kia kite i te tama atuanga i te au akakino anga katoatoa tei akaputuia ki runga i te reira. Ae, te anoano ra tatou i te ingoa o Iehova kia akataka keia e kia mouia ei mea tapu, me kare kia akatapuia.—Salamo 5:11; 63:3, 4; 148:12, 13; Ezekiela 38:23.
14. Eaa te aite anga e kia pure “Kia tae toou basileia”?
14 “Kia tae toou basileia.” Te Patireia ko te tutara anga a Iehova tei raveia na roto i te kavamani Mesia i te rangi i roto i nga rima o tana Tamaiti e te “aronga tapu” tei taokotaiia ra ma Iesu. (Daniela 7:13, 14, 18, 27; Apokalupo 20:6) Kare e roaia “ka tae” kia takore atu i te aronga patoi katoatoa i to te Atua ra tu ngateitei i te enua katoa nei. (Daniela 2:44) Ei reira ka raveia to Iehova ra anoano i te enua nei, mei tei te rangi katoa ra. (Mataio 6:10) Mei teaa ra te rekareka ta te reira te ka apai mai ki te au mea ora katoatoa te tavini tiratiratu ra i Tei Ngateitei i te Ao Katoa e Pini Ua Ake!
15. Eaa te aite anga e kia pati ia Iehova no “te kai e tau ia matou i teianei rā”?
15 “O mai i te kai e tau ia matou i teianei rā.” Ko te patianga ia Iehova no te kai “i teianei rā” te akakite maira e kare tatou e pati i te au kai kia maata mari ra kia tau ua na tatou no te ra taki tai. Noatu rai e te irinaki ra tatou i te Atua kia oronga mai, ka angaanga katoa tatou e ka rave i te au mea tau te vai maira kia tatou kia raukai te kai e etai atu au apinga umuumuia ra. (2 Tesalonia 3:7-10) Inara, ka tau tatou kia akameitaki i Tei Oronga mai na tatou mei te rangi ra, no tona aroa, pakari, e te mana ei turu mai.—Angaanga 14:15-17.
16. Akapeea e raukai ia tatou ta te Atua akakoreanga ara?
16 “E akakore mai i ta matou ara; te akakore nei oki matou i ta tei ara katoa ia matou nei.” I te mea e apa ua tatou e te ki i te ara, kare e rauka ia tatou kia akono ki katoa i ta Iehova ra au turanga apa kore ua. No reira, ka tau tatou kia pure no tana akakoreanga ara i runga i te tumuanga no to Iesu ra atinga oko. Inara me te anoano ra tatou kia oronga mai “Tei Akarongo maira i te pure” i te puapinga o taua atinga i ta tatou au ara ra, ka tika tatou kia tataraara e kia mareka oki i te ako tana te ka oronga mai kia tatou. (Salamo 65:2; Roma 5:8; 6:23; Ebera 12:4-11) Pera katoa oki, ka rauka anake ia tatou kia manako atu i ta te Atua ra akakore anga ara mei ia matou i “akakore i ta tei ara ia matou nei.”—Mataio 6:12, 14, 15.
17. Eaa te aiteanga o te au tuatua, e “Auraka e akaruke ia matou kia timataia mai”?
17 “Auraka e akaruke ia matou kia timataia mai.” I etai taime te tuatua ra te Pipiria e ko Iehova te rave ra i te au apinga me te tuku ua ra aia kia raveia. (Ruta 1:20, 21) Kare te Atua e timata ia tatou kia rave i te ara. (Iakobo 1:13) Kua akamata mai te timataanga kia rave kino ma te Tiaporo ra, to tatou kopapa ara nei, e teianei ao oki. Ko Satani Tei Timata te tauta ra kia akariro ia tatou kia rave ara ki te Atua ra. (Mataio 4:3; 1 Tesalonia 3:5) Me pati tatou e, “Auraka e akaruke ia matou kia timataia mai,” te pati ra tatou i te Atua e auraka e tuku ia tatou kia topa me ka timataia mai tatou kia akarongo kore iaia. Ka rauka iaia te arataki ia tatou kia kore tatou e tuku ua e kia kore oki e rauka ia Satani, koia te rave “kino” ra.—Mataio 6:13; 1 Korinetia 10:13.
E Rave kia Rotai ma Taau Au Pure
18. Akapeea tatou me rave kia rotai ma ta tatou au pure no tetai akaipoipo anga mataora e te oraanga ngutuare mataora oki?
18 Kua o atu ki ta Iesu pure akaraanga te au tumu maata ra, inara ka rauka ia tatou kia pure no tetai ua atu tumu. Ei akatauanga, penei ka pure tatou i to tatou anoano no tetai akaipoipo anga mataora. Kia vai tamou marie te tu ma tae roa ki te pirianga akaipoipo, penei ka pure tatou no te akono meitaki. Inara i reira kia akono tatou kia rotai ma ta tatou au pure na te kopaeanga i te au puka akono tau kore e te tamataora anga oki. Kia manako tikai katoa tatou ‘kia akaipoipo kia tau ra i te Atu.’ (1 Korinetia 7:39; Deuteronomi 7:3, 4) Me oti te akaipoipoia, ka tau tatou kia rave rotai ma ta tatou au pure no te mataora na te akonoanga i ta te Atua ra apiianga. E me e tamariki ta tatou, kare e rava ua kia pure e kia riro ratou ei tavini no Iehova ra. Ka tika tatou kia rave i tei rauka katoa ia tatou i te tauru anga i te au tuatua mou a te Atua ra ki roto i to ratou manako na te apii Pipiria e na te aere putuputu anga ki te au uipaanga Kerititiano ma ratou katoa ra.—Deuteronomi 6:5-9; 31:12; Maseli 22:6.
19. Eaa ta tatou ka tau kia rave me te pure ra tatou no ta tatou angaanga orometua?
19 Te pure ra ainei tatou no te au akameitakianga i te angaanga orometua? I reira kia rave rotai tatou ma taua au pure ra na te raveanga kia rava te tuanga i te angaanga tutuanga Patireia. Me te pure ra tatou no te au tuatau kia tauturu atu i etai ke ra kia aere atu ki runga i te arataa ki te ora mutu kore, ka tau tatou kia akono i te rekoti meitaki no te aronga inangaro ra e kia mareka oki i te kapiti anga i te apii Pipiria i te ngutuare ki roto i ta tatou papaanga. Ka peea oki me ka anoano tatou kia rave i te angaanga tutuanga ei tetai painia? E rave tatou i reira i te au takainga kia rotai ma ta tatou pure na te akatere atuanga i te angaanga tutu aere e na te rave kapitianga i te angaanga orometua ma te au painia ra. Na te raveanga i taua au takainga ra ka akaari e te rave ra tatou kia rotai ma ta tatou au pure.
20. Eaa te akamanako anga ka akaraia i te atikara te ka aru mai?
20 Me te tavini tiratiratu ra tatou ia Iehova, ka rauka kia irinaki tatou e ka pau mai aia i ta tatou au pure te rotai ra ma tona anoano. (1 Ioane 5:14, 15) E tika tikai, e kua akakiteia mai etai tumu puapinga mei te akara matatio anga i etai o te au pure tei tataia i te Pipiria ra. I ta tatou atikara te ka aru mai ka akamanakoia etai atu kaveinga Tuatua Tapu no te aronga te anoano ra kia ‘teateamamao i ta ratou au pure ei akakakara ki mua ia Iehova.’
Akapeea Koe me Pau?
◻ Eaa tatou i tau ei kia pure na roto i te akarongo?
◻ Eaa te tuanga tau no te akapaapaa anga e te akameitakianga i roto i ta tatou pure anga?
◻ Eaa ka raukai ia tatou te irinaki anga kia kimi i ta Iehova ra tauturu na roto i te pure?
◻ Eaa etai tumu maata no te pure akaraanga ra?
◻ Akapeea ka raukai ia tatou kia rave rotai ma ta tatou au pure ra?
[Tutu i te kapi 12]
Mei te Ariki ko Iehosaphata rai, i etai taime penei ka tau tatou kia pure: ‘Kare oki matou i kite i te ravenga kia rave: tei runga ia koe ra to matou mata, e Iehova’
[Tutu i te kapi 13]
Te pure ra ainei koe kia rotai ma ta Iesu ra pure akaraanga?