APII 05

E Karere te Pipiria no ko Mai i te Atua

Printed Edition

Kua oronga mai a Iehova i tetai apinga aroa—e 66 puka rikiriki koia oki te Pipiria. Ka manako ra koe: ‘Noea mai te Pipiria? Naai i tata i te reira?’ Ei pau i teia au uianga, ka uriuri tatou akapeea te Pipiria a te Atua i tae mai ei kia tatou.

1. Me na te tangata i tata i te Pipiria, eaa i karangaia ai na te Atua te reira?

Kua tataia te Pipiria e te 40 tangata no tetai 1,600 mataiti te roa, mei te 1513 M.T.N. ki te 98 T.N. E tukeke te turanga o te aronga tata. Noatu te reira, kua rotai te karere Pipiria. Akapeea ra? Na te Atua i Tata i te Pipiria. (E tatau ia 1 Tesalonia 2:13.) Kare te aronga tata i tata i to ratou manako. Mari ra, kua tata ratou i “tei tuatua i ta te vaerua tapu i tuku mai.”a (2 Petero 1:21) Kua taangaanga te Atua i tona vaerua tapu kia akauru, e kia akakeu ia ratou kia tata i tona manako.—2 Timoteo 3:16.

2. Koai ka puapinga mei te Pipiria?

Ko “te pa enua katoa, e te au kopu, e te au reo, e te au iti-tangata,” ka rauka ia ratou te nuti meitaki mei te Pipiria. (E tatau ia Apokalupo 14:6.) Kua inangaro te Atua kia puapinga te tangata ravarai i te karere o te Pipiria e kua uriia ki to ratou reo. Ka rauka i te katoatoa te Pipiria. Noatu te ngai e noo ra e te reo e tuatuaia ra.

3. Akapeea a Iehova te paruru anga i te Pipiria?

Kua tataia te Pipiria ki runga i te kiri manu e te peapa raupo. Kua tata rima e kua kopi putuputuia e te aronga tei akaperepere i te Pipiria. Noatu kua tauta tetai aronga mana i te takore i te Pipiria, kua paruru tetai pae i te reira. Kare a Iehova e akatika i tetai kia tāpu iaia mei te karangaranga anga mai kia tatou. Karanga te Pipiria: “Te tuatua a to tatou Atua, e tu ïa e rimua.”—Isaia 40:8.

KIMI OONU

Apii akapeea te Atua te akauru anga i te tangata kia tata i te Pipiria, te paruru i te reira, e kia rauka i te katoatoa.

4. Akakite mai te Pipiria koai te Tata

Akatangi i te VITIO. E oti e tatau ia 2 Timoteo 3:16, e te uriuri i te uianga ka aru mai.

VITIO: Naai i Tata i te Pipiria?—Potonga Ua (2:48)

Me na te tangata i tata i te Pipiria, eaa i karangaia ai e Tuatua ïa na te Atua?
I toou manako ka rauka ainei i te Atua i te tuku mai i tona manako ki te aronga tata?

Akakite te pu i tona manako ki te tekeretere, taipu te tekeretere i te reira ki runga i tetai pepa. — Na te tekeretere i tata i te reta, no ko mai te manako i te tangata nana te reta. Kua tata te tangata i te Pipiria, no ko mai te manako i te Atua

5. Vai ua te Pipiria noatu te patoi anga

Me na te Atua te Pipiria, ka akono rai aia i te reira kia kore e takoreia. I te au mataiti i aereia mai, kua tauta te aronga mana no te takore i te Pipiria. Kua uuna te au arataki akonoanga i te reira. Noatu te arairaianga e te tamatakuanga a tetai pae, e maata tei paruru i te Pipiria. Teia tetai, akatangi i te VITIO, e oti uriuri i te uianga ka aru mai.