“Ka Aru Mai ei Iaku”

“I kapikiiaʼi oki kotou; i mate katoa oki te Mesia uaorai no kotou; e kua vaoo oki i te akaraanga na kotou, kia aru kotou i tona takainga vaevae.”​—1 PETERO 2:21.

1, 2. Eaa ra ta Iesu akaraanga apa kore ei orometua i kore ei e teitei roa no tatou kia aru atu?

KO IESU KARAITI te Orometua maata rava atu tei aaere i te enua nei. Pera katoa oki, e apa kore ua aia, kare rava i rave ara ana i tona tuatau katoa i orai ei tangata. (1 Petero 2:22) Inara, kua riro ainei te aiteanga, e ko to Iesu akaraanga ei orometua e teitei rava no tatou no te au tangata apa ua nei kia aru atu? Kare rava ia.

² Mei ta tatou i akara i te atikara i mua akenei, te tango no ta Iesu ra apiianga ko te aroa. E ko te aroa tetai mea ka rauka ia tatou katoatoa kia tatanu. E putuputu te Tuatua a te Atua i te raurau mai ia tatou kia tupu e kia akameitaki mai i to tatou aroa no etai ke ra. (Philipi 1:9; Kolosa 3:14) Kare a Iehova e umuumu mai ana mei tana au mea ora i tei kore e rauka ia ratou kia rave. Ko te tika, i te mea “ko te Atua oki te aroa” e kua anga mai ia tatou i tona uaorai tu, ka rauka kia tuatuaia e kua anga aia ia tatou kia akaari i te aroa. (1 Ioane 4:8; Genese 1:27) No reira me tatau tatou i ta te apotetoro ko Petero au tuatua i tataia i ta tatou irava tumuanga, penei ka akono tatou ma te irinaki anga autu. Ka rauka ia tatou kia aru vaitata i to Karaiti takainga vaevae. Ko te tika, ka rauka ia tatou kia aru i ta Iesu uaorai akauenga: “Ka aru mai ei iaku.” (Luka 9:23) E akamanako tatou akapeea tatou i te aru anga i te aroa ta Karaiti i akaari, te mea mua no te au tuatua mou tana i apii, e i reira no te au tangata tana i apii ra.

Tatanuanga i te Inangaro no te Au Tuatua Mou ta Tatou i Apii

3. Eaa ra tetai papaki i kite ei i te apii ei mea ngata, inara eaa te akamaroiroi anga te kitea ra ia Maseli 2:1-5?

³ Kia inangaro i te au tuatua mou ta tatou i apii atu ia etai ke ra, ka tika katoa tatou uaorai kia inangaro i te apiianga i taua au tuatua mou ra. I te ao o teianei tuatau, kare taua tu inangaro ra e aere ngoie ua mai. Te au tumu mei te ngere ra i te apiianga e te au ravenga kikino te akatupuia ra ki roto i te au mapu te akaruke maira i te aronga e manganui ma te tu reka kore i te apiianga. Inara, e mea umuumuia, kia apiiia mai tatou mei ko mai ia Iehova ra. Te tuatua ra a Maseli 2:1-5 e: “E taku tamaiti, kia āriki mai koe i taku nei tuatua, e kia vaio marie i taku au akauenga ia koe; Kia ariu mai koe i to taringa ki te pakari, e kia kimi marie to ngakau i te kite ra; Kia kapiki nui koe i te kite, e kia akateitei i to reo kia rauka te kite ra; Kia kimi pu tikai koe iaia mei te ario ra, e kia makitoro marie koe iaia, mei te apinga uunaia ra: Ei reira koe e kite ei i te mataku ia Iehova, e e rauka ia koe te kite i te Atua.”

4. Eaa te aiteanga e kia “kimi marie” i te ngakau, e eaa te tumu manako te ka tauturu ia tatou kia rave i te reira?

⁴ E akara i nga irava 1 ki te 4, te raurau putuputuia ra tatou kia tauta kare “kia āriki” anake e “kia vaio marie” mari katoa ra “kia kimi pu tikai” e “kia makitoro marie.” Inara, eaa te ka akakeu ia tatou kia rave pouroa i teia? Inara, e akara i te takiota tuatua “kia kimi marie to ngakau i te kite ra.” Te tuatua ra tetai angaanga kimi kimianga e ko teianei akamaroiroi anga “kare i te patianga no te manako anga anake; e akauenga ia no tetai tu akono: e ariki anga tikai i te au apiianga ra.” E na teaa e akariro ia tatou kia ariki e kia inangaro i te apii i ta Iehova e apii maira ia tatou? Na to tatou manako anga i te au mea. Ka tau tatou kia akamanako i ‘te kite tikai i te Atua ra’ ei “ario” e ei “apinga uunaia ra.”

5, 6. (a) Penei eaa te ka tupu i muri akera, e akapeea e raukai ia tatou te arai atu i te reira? (e) Eaa tatou ka tau ei kia kapiti atu ki te apinganui no te kite ta tatou i rauka i te Pipiria?

⁵ Kare i te mea ngata kia ariki i taua manako ra. Ei akatauanga, te “kite i te Atua” taau i apii ana penei te kapiti ra i te tuatua mou e te akakoro ra a Iehova e kia noo te au tangata tiratiratu ki runga i te enua Parataito e mutu kore ua atu. (Salamo 37:28, 29) I toou kite mua anga i taua tuatua mou ra, kare e ekoko anga kua manako koe i te reira ei apinganui tikai tei akaki ra i to manako e te ngakau ma te manakonako anga e te rekareka. Akapeea i teianei? I te tuatau kua topa kua meangiti mai aina toou ariki anga no taau apinganui ra? E tauta, i reira, kia rave e rua mea. Te mea mua, e akaou i toou arikianga, koia oki, e akaou putuputu i toou manako e eaa koe i manako maatai i te tuatua mou taki tai ta Iehova i apii maira ia koe, noatu rai i te au mea mua taau i apii mai i te au mataiti e manganui kua topa atura.

⁶ Te rua, e kapiti tamou marie atu ki taau apinganui. No te mea, me ka rokoia ake e ka ko ake koe i tetai poe okomaata, ka tauru ua ainei koe i te reira ki roto i to pute e ka aere ke atu ei ma te mareka anga? Ka ko akaou ainei koe kia kite me te vaira etai atu i reira? Te ki ra te Tuatua a te Atua i te au poe e te au nugget no te tuatua mou. Noatu eaa te maata tei kitea ra e koe, ka rauka kia kite akaouia e koe kia maata atu. (Roma 11:33) Me ka kitea e koe tetai manako ou no te tuatua mou, e ui kia koe uaorai: ‘Eaa te akariro ra i te reira ei apinganui? Te oronga maira ainei te reira kiaku i te kite oonu ki roto i to Iehova tu peretana me kare ki tana au akakoro anga? Te oronga maira ainei te reira i etai aratakianga tau te ka tauturu mai iaku kia aru i te takainga vaevae o Iesu ra?’ Na te tamanakoanga ki runga i aua uianga ra ka tauturu ia koe kia patu i toou inangaro no te au tuatua mou ta Iehova i apii atura ia koe.

Akaarianga i te Inangaro no te Au Tuatua Mou ta Tatou e Apii Ra

7, 8. Eaa etai au raveanga e raukai ia tatou te akaari kia etai atu e te inangaro ra tatou i te au tuatua mou ta tatou i apii mei te Pipiria? Oronga mai i te akaraanga.

⁷ Ia tatou e apii ra ia etai ke, akapeea e raukai ia tatou te akaari atu e te inangaro ra tatou i te au tuatua mou ta tatou i apii maira mei te Tuatua a te Atua ra? I te aruanga i ta Iesu akatauanga, ka rauka ia tatou kia irinaki katoa ki runga i te Pipiria i ta tatou tutuanga e te apiianga. I teia tuatau nei, kua akamaroiroiia te au tangata o te Atua takapini i teianei ao kia taangaanga maata atu i te Pipiria i ta ratou angaanga orometua i te ngai tangata. Ia koe e akono ra i taua manako ra, e kimi i te au ravenga kia akakite ki te tangata ngutuare e te puapingaia ra koe uaorai i taau e tua aere ra mei te Pipiria mai.​—Mataio 13:52.

⁸ Ei akatauanga, i muri ua ake i te takinoanga a te au takino anga tamataku i New York City, te tatau aere ra tetai tuaine Kerititiano ia Salamo 46:1, 11 ki te au tangata tana i aravei i tana angaanga orometua. Kua ui atu aia na mua ki te au tangata e te akapeea ra ratou i te akonoanga i te tupu anga o taua tumatetenga ra. Kua akarongo marie atura aia ki ta ratou pauanga, e kua akatika atu aia i te reira, e kua tuatua atu: “Te inangaro nei au kia tua atu i tetai tuatua tapu kia koe tei akapumaana maira iaku i teia tuatau ngata nei?” E tokoiti ua tei kore i ariki mai, e e manganui te au uriuri anga manako meitaki tei tupu mai. I te tuatuaanga ma te aronga mapu ra, e putuputu taua tuaine ra i te tuatua atu: “Kua apii au i te Pipiria no etai 50 mataiti i teianei, e kite koe eaa kare rava au i kite i tetai manamanata okotai tei kore e rauka i teia puka i te tauturu kia takore atu.” Na te taangaanga anga i te araveianga ngakau tae, ka akaari tatou ki te au tangata e te manako maata ra tatou e te inangaro ra i ta tatou i apii mei te Tuatua mai a te Atua.​—Salamo 119:97, 105.

9, 10. Eaa ra i puapinga maatai kia taangaanga i te Pipiria i te pauanga i te au uianga no to tatou au irinakianga?

⁹ Me ui mai te au tangata kia tatou i te au uianga no to tatou au irinaki anga, tei ia tatou tetai ikianga i te tika kia akakite e te inangaro ra tatou i te Tuatua a te Atua. I te aruanga i ta Iesu akaraanga, auraka tatou e akatumu i ta tatou au pauanga ki runga i to tatou uaorai kite. (Maseli 3:5, 6) Kareka ra, ka taangaanga tatou i te Pipiria i te pauanga. Te mataku ra ainei koe e penei ka ui mai tetai kia koe i te uianga kare e rauka ia koe i te pau? E akamanako i nga takainga papu e rua ka rauka ia koe kia rave.

¹⁰ E rave i te ka rauka ia koe kia teateamamao. Kua tata te apotetoro ko Petero: “Ka akatapu ra kotou i te Atua ra ia Iehova i to kotou ngakau; e kia tika ua rai ia kotou kia akakite atu ki te tangata katoa e ui mai ia kotou i te manako i roto ia kotou na, ma te maru e te kauraro marie atu.” (1 Petero 3:15) Te papa ra ainei koe i te paruru i toou au irinakianga? Ei akatauanga, me te anoano ra tetai kia kite eaa koe i kore ei e o atu ki roto i etai peu me kare tetai ravenga, auraka e merengo ua i te tuatuaanga, “Te patoi ra ia i taku akonoanga.” Ko taua tu pauanga penei ka akakite e te tuku ra koe na etai ke e tuku i taau ikianga e no reira no roto koe i tetai akonoanga ke ei mema no te reira. Penei e meitaki atu kia tuatua, “kare te Tuatua a te Atua, te Pipiria e akatika i te reira” me kare, “ka akamareka kore te reira i taku Atua.” I reira e oronga i tetai akataka anga tau no taua tumu.​—Roma 12:1.

11. Eaa te apinga kimikimianga penei ka tauturu ia tatou kia papa i te pau i te au uianga no te au tuatua mou o te Tuatua a te Atua ra?

¹¹ Me ka manako ngakau koe e kare koe i papa, eaa i kore ei e akapou taime i te apiianga i te puka Reasoning From the Scriptures me tei roto te reira i toou reo?a E iki i etai au tumu tuatua penei ka tu mai, e ka tamou manako ei i etai tumu Tuatua Tapu. E vaio i taau puka Reasoning e taau Pipiria kia vaitata mai. Auraka e ekoko i te taangaanga ia raua roai, na te tuatua anga e e apinga kimikimi taau e ka inangaro koe i te taangaanga ei tauturu kia kimi i te pauanga Pipiria i aua uianga ra.

12. Akapeea tatou i te akono anga atu me kare tatou i kite i te pauanga ki tetai uianga Pipiria?

¹² E tauta kia kore e manamanata tau kore ua. Kare tei tetai tangata apa ua nei te au pauanga katoatoa. No reira me uiia atu tetai uianga kare e rauka ia koe i te pau, ka rauka ua ia koe i te pau atu na teia tu: “Te akameitaki nei au ia koe no te ui anga i taua uianga mareka ra. Ko te tika, kare au i kite tikai i te pauanga, inara te papu nei iaku e te akakite maira te Pipiria i teia tumu. E mea inangaro naku te kimikimi anga i te Pipiria, no reira ka akarakara au i taau uianga e ka oki akaou mai kia koe.” Ko taua aravei anga tau ra e te akaaka penei ka akapapa i te aerenga no tetai atu uriuri anga manako.​—Maseli 11:2.

Aroa no te Au Tangata ta Tatou ka Apii

13. Eaa tatou i tau ei kia manako papu no runga i te aronga ta tatou e tutu atura?

¹³ Kua akakite a Iesu i te aroa no te au tangata tana i apii ra. Akapeea tatou me aru iaia i teianei tu? Auraka tatou e akatupu i te tu akono manako kore ki te au tangata takapini ia tatou. E tika ra, te vaitata maira “te tamaki i taua rā maata o te Atua mana katoatoa ra,” e manganui to roto i te au tangata e pirioni ua atura te ka akapouia. (Apokalupo 16:14; Ieremia 25:33) Inara, kare tatou i kite e koai ma te ka ora e koai ma te ka mate. Te vaira taua akavaanga ra i te tuatau ki mua e na ta Iehova i akataoonga ra, na Iesu Karaiti e rave. Kia oti rava te akavaanga, te manako atura tatou i te aronga tataki tai e ka rauka kia riro ei tavini no Iehova.​—Mataio 19:24-26; 25:31-33; Angaanga 17:31.

14. (a) Akapeea tatou me akara matatio ia tatou uaorai e me te manako tangi ra tatou i te au tangata? (e) Na teea au tu tau tatou i te akaari anga i te tu tangi e te inangaro atu ia etai ke ra?

¹⁴ No reira, mei ia Iesu rai, ka kimi tatou kia tangi atu i te au tangata. Penei ka ui tatou kia tatou uaorai: ‘Te manako ngakau ra ainei au no te au tangata tei akavareia ra e te au pikikaa kikite e te au akavare anga a te au akonoanga o teianei ao, te au poritiki, e te aronga okooko ra? Me te akara anga manako kore ua maira ratou ki ta tatou tuatua e apai atura kia ratou, te kimi ra ainei au kia kite e eaa ratou i manako perai? Te kite ra ainei au e ko au me kare etai ke te tavini tiratiratu ra ia Iehova i teianei, mei te reira katoa i mua ana? Kua akono ainei au kia tau taku aravei anga? Me kare te kopae ke atura ainei au ia ratou mei te mea rai kare o ratou manakonako anga?’ (Apokalupo 12:9) Me kite mai te au tangata i to tatou tu tangi tikai, e maata atu te tikaanga e ka akarongo mai ratou i ta tatou i tuatua atu. (1 Petero 3:8) Penei ka akakeu katoa te tu tangi ia tatou kia maata atu te manako anga i te au tangata ta tatou ka aravei i te angaanga orometua ra. Penei ka tata tatou i ta ratou au uianga e te au manako. Me oki akaou atu tatou, penei ka akakite atu tatou kia ratou e kua akamanako ana tatou i ta ratou au tuatua i te aravei anga i mua atura. E akakite atu kia ratou e me e apinga rapurapu tetai te anoanoia ra i taua atianga ra, penei ka rauka ia tatou te oronga atu i tetai tauturu tau.

15. Eaa tatou i tau ei kia akara i te meitaki o te au tangata, e penei akapeea tatou i te rave anga i te reira?

¹⁵ Mei ia Iesu ra, ka kimi tatou i te meitaki i te au tangata. Penei e metua takaua te rave ra i te tauta anga kia akono oki i tana tamariki. Penei ko tetai tangata te tauta ngata ra i te turu i tona pamiri. Tetai tangata ruaine te akaari ra i te manako anga i te au tumu pae vaerua. Te kite ra ainei tatou i taua au tumu ra i roto i te au tangata ta tatou e aravei ra e te akapaapaa atura ia ratou kia tau ki to ratou turanga? I te raveanga i te reira, te akaketaketa ra tatou i te turanga matauia i rotopu ia tatou e penei ka akatuera i te aerenga no te akakite anga i te Patireia.​—Angaanga 26:2, 3.

Umuumuia te Tu Akaaka i te Akaarianga i te Aroa

16. Eaa ra i puapinga maatai kia vai maru e te akangateitei atu i te aronga ta tatou e tutu atura?

¹⁶ Na te aroa i te au tangata ta tatou e apii ra e akakeu ia tatou kia akono i te akamatakite anga pakari a te Pipiria: “E akaparau anga tei te kite, kareka te aroa, e tamaata ïa i te meitaki.” (1 Korinetia 8:1) E maata to Iesu kite, inara kare aia i akanengonengo. No reira ia koe e tua aere ra i toou au irinaki anga, e kopae ke i te tu taumaro anga me kare te reva tu teitei. Ko to tatou akakoro anga kia itae i te au ngakau e kia akavaitata mai i te au tangata ki te au tuatua mou ta tatou e inangaro maata ra. (Kolosa 4:6) Kia maara, i ta Petero ako anga i te au Kerititiano ra kia tika ua rai ia ratou kia akakite atu ki te tangata katoa, kua kapiti atura aia e ka tau tatou kia rave i te reira “ma te maru e te kauraro marie atu.” (1 Petero 3:15) Me te maru ra tatou e te kauraro marie ra, ka maata atu ta tatou akavaitata anga mai i te au tangata ki te Atua ta tatou e tavini ra.

17, 18. (a) Akapeea tatou i te akono anga atu ki te au tu akaapa mai no to tatou au tu tau ei au orometua? (e) Eaa ra i korei e umuumuia te au reo taito no te Pipiria no te aronga e apii ra i te Pipiria?

¹⁷ Kare e umuumuia kia akakite ki te au tangata i to tatou kite me kare te kite apiianga. Me kare tetai papaki i toou ngai e akarongo mai ki tetai kare ra i rauka iaia te turanga teitei i te apii me kare te au taoonga, auraka e tuku i ta ratou tu akono kia akamaroiroi kore ia koe. Kare a Iesu i akarongo atu ki te patoi anga e kare aia i aere ki te au apiianga teitei a te au rapi ra i tona tuatau; kare katoa aia i tupou atu ki te au akaapaanga matauia na te tautaanga kia akakite ki te au tangata i tona ra apiianga maata.​—Ioane 7:15.

¹⁸ E maata roa atu te puapinga o te tu akaaka e te aroa ki te au orometua Kerititiano i tetai ua atu tu kite apiianga. Na Tei Apii Maata, ko Iehova ra, i akatau ia tatou no te angaanga orometua. (2 Korinetia 3:5, 6) E noatu eaa ta tetai papaki o te au orometua o Kerititome ka tuatua, kare tatou e umuumuia kia apii i te au reo taito o te Pipiria ra kia tau ei kia riro ei au orometua no te Tuatua a te Atua ra. Kua akauruia e Iehova te Pipiria kia tataia i roto i te au tu taka meitaki, e vaitata ka rauka kia kite te au tangata ravarai i tana au tuatua mou okomaata ra. Te vai taui koreia ra taua au tuatua mou ra noatu me kua uriia ki roto i te au anere ua atu au reo. No reira ko te kite i te au reo taito ra, noatu ra te puapinga ra i etai atianga, kare i te mea umuumuia. Pera katoa, ko te akaparau i te kite i te au reo ra ka rauka kia akariro i tetai kia ngere i te tu te umuumuia ra no te au Kerititiano mou koia​—te tu tau kia apiiia.​—1 Timoteo 6:4.

19. I roto i teea tu i riro ei ta tatou angaanga orometua ei tavini anga?

¹⁹ Kare e ekoko anga e ko ta tatou angaanga orometua Kerititiano e angaanga te umuumuia ra te tu akono akaaka. Te putuputu ra tatou uaorai i te aravei atu i te patoianga, te tu manako kore mai, noatu ko te takinga kinoanga. (Ioane 15:20) Tera ra, na te raveanga tiratiratu i ta tatou angaanga orometua, te rave ra tatou i tetai tavini anga puapinga maata. Me ka rave akaaka tamou marie tatou i te tavinianga ia etai ke ra i teianei angaanga, te aru ra tatou i te aroa ta Iesu Karaiti i akaari atu ki te au tangata. E akamanako: Me ka tutu atu tatou ki tetai tauatini au tangata akarongo kore me kare patoi mai e taeria ei tetai tangata okotai mei te mamoe rai te tu, kare ainei te reira i te tauta anga tei puapingaia ra? No teaa! No reira na te raveanga tamou marie i te angaanga, auraka e unui ki muri, te tavini tiratiratu ra tatou i te aronga mei te mamoe rai te tu tei kore i taeria ake e tatou. Kare e ekoko anga e ka akapapu a Iehova raua ko Iesu e kia kitea te aronga e manganui atu o taua aronga okomaata taki tai ra e kia tauturuia i mua ake ka tae mai ei te openga.​—Hagai 2:7.

20. Eaa etai au tu e apii ei tatou na te akaraanga?

²⁰ Te apiianga na te akatauanga ko tetai atu tu ia no te akaari i to tatou puareinga i te tavini atu ia etai ke ra. Ei akatauanga, te anoano nei tatou kia apii atu i te au tangata e ko te tavinianga ia Iehova, “te Atua kakā” ra, ko te aerenga meitaki rava atu ia, e te akakianga maata oki i te oraanga te ka rauka. (1 Timoteo 1:11) Ia ratou e akara maira i to tatou tu akono e ta tatou akonoanga i to tatou tangata tupu, te au oa apii, e te au oa angaanga, te kite ra ainei ratou e te mataora ra tatou e te akakiia ra? Aiteite katoa, te apii ra tatou i te aronga apiiia i te Pipiria e ko te putuputuanga Kerititiano e akapu anga no te aroa i roto i tetai ao anu, e te riri oki. Ka kite viviki ainei ta tatou e apii ra e te aroa ra tatou i te katoatoa i roto i te putuputuanga e te angaanga maata ra i te akaoraanga i te au ma tetai e tetai?​—1 Petero 4:8.

21, 22. (a) Na te akara matatio anga ia tatou uaorai no runga i ta tatou angaanga orometua ka taki atu ia tatou kia rave i teea au angaanga? (e) Eaa te ka uriuri manakoia i nga atikara o te itiu o Te Punanga Tiaki te aru mai nei?

²¹ Te tu akono puareinga i ta tatou angaanga orometua penei i etai taime, ka akakeu ia tatou kia akara akaou ia tatou uaorai. Na te rave tiratiratu anga i te reira, kua kitea e te manganui e tei roto ratou i te turanga kia akatotoa atu i ta ratou tavini anga na te raveanga i te angaanga orometua i te au tuatau ravarai me kare na te nekeanga ki te ngai e umuumu maataia maira. Kua iki etai atu kia apii i tetai reo ke kia tavini i tetai akaputu anga i reira tikai i to ratou enua kainga. Me te tuera maira taua turanga ra kia koe, e oronga i te akamanako anga matakite na roto i te pure. Ka apai mai te oraanga tavini anga i te rekareka maata, te merengo anga, e te au o te manako oki.​—Koheleta 5:12.

²² I te au tu ravarai, e rave ua atu tatou i te aru anga ia Iesu Karaiti na te patuanga i to tatou inangaro no te au tuatua mou ta tatou e apii ra e te aroa no te au tangata ta tatou e apii atura. I te akatupuanga e te akakiteanga i te aroa i roto i eia nga tu e rua ka tauturu ia tatou kia akanoo i te tango meitaki no te riroanga ei au orometua aiteite kia Karaiti. Inara, ka akapeea, e raukai ia tatou kia patu ki rungao i taua tango ra? I roto i te itiu o Te Punanga Tiaki te ka aru mai, ko etai papaanga atikara ka uriuri manako i etai o te au ravenga apiianga akatakaia ta Iesu i taangaanga ra.

[Tataanga Rikiriki i Raro]

Akapeea Koe me Pau?

• Eaa te akapapu anga tei ia tatou e kare ta Iesu akaraanga ei orometua i teitei roa no tatou kia aru?

• Akapeea tatou me akaari e te inangaro ra tatou i te au tuatua mou ta tatou i apii mei te Pipiria?

• Eaa ra i puapinga maatai kia vai akaaka ia tatou e tupu ra i te kite?

• Eaa etai au tu e raukai ia tatou i te akaari i te aroa no te au tangata ta tatou e tauta ra kia apii?

[Au Tutu i te kapi 16]

E rave i te ka rauka ia koe kia teateamamao

[Au Tutu i te kapi 16, 17]

Me te akono apinganui ra koe i “te kite o te Atua,” ka rauka ia koe te taangaanga meitaki i te Pipiria

[Tutu i te kapi 18]

Ka akaari tatou i te aroa no te au tangata na te akakiteanga i te tuatua meitaki kia ratou