Kimianga i te Au Poe Uunaia

I TE 1848 kua kiteaia te auro i runga i to Sutter’s Mill i California, U.T.M. I te tae anga ki te 1849 e tauatini ua atu tei akaputu ki te reira ngai te manakoanga kia apinganui, e kua akamata te oro anga auro maata rava atu i roto i te tuatua enua o te Unaite Teite. I roto i te mataiti, kua tupu te ngai tuku anga vaitata, ko San Francisco, mei tetai taoni meangiti ki tetai oire e 25,000. Kua riro te manakonakoanga o te apinganui viviki ei manu ririnui.

Kua kite te Ariki ko Solomona o Iseraela taito e akapeea te au tangata maroiroi i te ko anga i te au poe uunaia, e kua tuatua aia no runga i teia i tona tata anga e: “Kia kapiki nui koe i te [marama, NW] e kia akateitei i to reo kia rauka te [kite papu] ra; Kia kimi pu tikai koe iaia mei te ario ra, e kia makitoro marie koe iaia, mei te [au poe] uunaia ra: Ei reira koe e kite ei i te mataku ia Iehova, e e rauka ia koe te kite i te Atua.”​—Maseli 2:3-5, akaaite NW.

E manganui taau au mea ka rauka i te rave ma te auro e te ario, inara e maata atu taau ka rauka mei te marama e te kite papu. Ka tauturu teia ia koe i te tuku i te au pau anga tika, te rapakau i te au manamanata, te manuia i te akaipoipoanga, e te kite i te mataora. (Maseli 2:11, 12) Ma te aiteite rai, ka tauturu te kite e te pakari tika tikai ia koe kia kite i Tei Anga ia koe ra, te marama i tana au akakoro anga, e te akarongo e te akamareka iaia. Kare te auro e oronga atu i tetai o teia au mea nei kia koe.

E tika tikai te au tuatua a te Puka Tapu: “E tapoki anga te pakari mei te moni katoa ra ei tapoki anga, inara ko te mea maata i te kite ra koia oki ko teia: ka akono te pakari i te oraanga o tei rauka ra.” (Koheleta 7:12, New International Version) Koi moemoea ei te manganui i te apinganui viviki, mei teaa atura te pakari no te akatuera i te Puka Tapu i te ko atu i te kite papu, te marama, te kite, e te pakari ei apinganui tika tikai.