² Te akakite maira te Pipiria i tetai tuatua tika taka meitaki ua i te na ko anga e: “Ko tei kapiti katoa i tona aerenga ki to te aronga pakari ra, ka pakari katoa ïa: ko tei kapiti ra ki te aronga neneva ra, e mate ïa.” (Maseli 13:20) Kare teia irava e tuatua ra no runga i tetai kapitianga poto ua. Ko te tuatua, “kapiti katoa i tona aerenga,” te akataka maira te reira i te tu pirianga rave matauia. I te tuatua anga no runga i teia irava, akakite tetai tataanga no runga i te Pipiria e: “Ko te aaere kapiti e tetai tangata, te o maira te inangaro e te pirianga ki tera tangata.” Kare ainei koe e akatika e e aru ana tatou i te tu o te aronga e inangaro ana tatou? Ae, no te mea e piri ana to tatou manako ki te aronga e inangaro ana tatou, ka piri mai rai to ratou tu meitaki me kore to ratou tu kino ki runga ia tatou.