E mea puapinga te apii i te Pipiria inara kare i te mea māmā ua. Penei kua manako koe me ka rauka ia koe te apii tamou i te Pipiria. Eaa tatou ka tauta ua atu ei? Eaa te ka akakeu ia koe kia aruaru noatu te arairai anga?

1. Eaa i puapinga ai te apii i te Pipiria?

“E mea ora oki te tuatua a te Atua, e te ririnui.” (Ebera 4:12) Te akakite maira te reira i to te Atua au manako no tatou. Ka oronga mai te reira i te kite, te pakari mou e te manakonakoanga. Te mea puapinga rava, ka tauturu te Pipiria ia koe kia riro ei oa no Iehova. Me apii koe i te Pipiria, ka akameitaki mai te reira i toou oraanga.

2. Eaa i puapinga ai kia kite i te meitaki o te tuatua mou Pipiria?

Ka aite te au tuatua mou Pipiria mei te au poe akaperepereia. No reira te Pipiria i akamaroiroi ei ia tatou kia “oko i te tuatua-mou, e auraka rava e oko akaouia atu.” (Maseli 23:23) Me akamanako tatou i te puapinga o te tuatua mou Pipiria, ka tauta pakari tatou i te apii tamou​—noatu te manamanata.​—E tatau ia Maseli 2:4, 5.

3. Akapeea a Iehova me tauturu ia koe kia apii ua atu?

Ei Oa e Tei Anga mana katoatoa, ka tauturu a Iehova ia koe kia kite iaia. Ka oronga mai aia i “te inangaro e te rave, mei tana i anoano ra.” (E tatau ia Philipi 2:13.) No reira, me anoano koe i te tauturu no te apii e te taangaanga i taau e apii ra, ka tauturu mai aia. Me anoano koe i te maroiroi kia akakoromaki i te manamanata e te patoi anga, ka tauturu mai aia. E pure putuputu kia Iehova kia apii tamou koe i te Pipiria.​—1 Tesalonia 5:17.

KIMI OONU

4. Akanoo i taau apii Pipiria ei mea puapinga

Tetai taime e maata roa te angaanga kare e taime no te apii i te Pipiria. Eaa te ka tauturu? E tatau ia Philipi 1:10, e oti uriuri i teia au uianga:

• Eaa toou manako i “te au mea e maata ua atu te meitaki” i te oraanga?

• Akapeea koe me akanoo i taau apii Pipiria ei mea puapinga?

1. A. Me akaki koe i te pakete ki te one e oti te toka, kare te reira e o

2. E. Me taru koe i te toka na mua, ka o te one ki roto. Pera rai, me rave koe na mua “te au mea e maata ua atu te meitaki,” ka rava te tuatau no tetai angaanga ke

Ka akamerengo te apii Pipiria i to tatou anoano i te pae vaerua​—kia kite e te akamori i te Atua. E tatau ia Mataio 5:3 (NW), e oti uriuri i teia uianga:

• Akapeea tatou e puapinga ai me akanoo i te apii Pipiria ei mea mua?

5. Akakoromaki i te patoi anga

VITIO: Akameitakiia no Tei Akakoromaki (5:22)

• I roto i te vitio, eaa te tu o te au oa e te ngutuare o Francesco i tona akakite anga i tana e apii ra?

• Akapeea aia i puapinga ai no tana akakoromaki anga?

E tatau ia 2 Timoteo 2:​24, 25, e oti uriuri i teia au uianga:

• Eaa te manako o toou ngutuare e te au oa ia koe e apii ra?

• I roto i teia au irava, eaa toou manako me kare tetai e rekareka ia koe e apii ra i te Pipiria? Eaa ra?

6. Irinaki ia Iehova no te tauturu

VITIO: Tauturu a Iehova ia Tatou Kia Taui (3:56)

• I roto i teia vitio, eaa te au taui anga ta Jim i rave no te akamareka ia Iehova?

• Eaa taau i mareka i tona akaraanga?

E tatau ia Ebera 11:6, e oti uriuri i teia au uianga:

• Eaa ta Iehova ka rave no te aronga tei “kimi tikai iaia” ​—kia kite iaia e te akamareka iaia?

• Eaa ta teia e akakite maira i to Iehova manako me kite aia e te apii ra koe i te Pipiria?

APIIANGA

Noatu kare i te mea māmā, ka mataora toou oraanga me apii koe i te Pipiria. E irinaki ia Iehova, e nana e akameitaki mai ia koe.

Uriurianga

• Eaa koe ka akaperepere ei i te au tuatua mou Pipiria?

• Akapeea koe me akapapu i “te au mea e maata ua atu te meitaki”?

• Eaa koe ka pati tauturu ei kia Iehova no te apii i te Pipiria?

KIMI KIMI

Akamanako i te au ravenga e a tei tauturu i te tangata kia akapou meitaki i to ratou taime.

“Akapeea Koe me Akapou Meitaki i Toou Taime” (E Ara!, Peperuare 2014)

Akara akapeea a Iehova te tauturu anga i tetai vaine kare tana tane i mārama ana i tona anoano no te akamareka i te Atua.

Akamaroiroi a Iehova ia Tatou Kia Rave i ta Tatou Apainga (5:05)

Akara akapeea tetai tane i puapinga ai mei te akaraanga o tana vaine.

Akava Au i te Tuatua Mou (6:30)

E akaapaia ana te Au Kite o Iehova no tei akatakake i te ngutuare tangata. E tika ainei te reira?

“E Akatakake Ana Ainei te Au Kite o Iehova i te au Ngutuare Tangata me te Akamatutu ra i te Reira?” (Web atikara)

E maata ta tatou ikianga i te au rā. Ka riro te reira ei kino me kore ei meitaki no tatou e to tatou pirianga oa kia Iehova. Ei akaraanga, penei ka akamanako tatou i te ngai ka noo, akapeea me akono i te ngutuare, e me ka akaipoipo e me kare. Me tuku tatou i te au ikianga meitaki, ka mataora te oraanga e ka akamareka tatou ia Iehova.

1. Akapeea koe me taangaanga i te Pipiria kia tuku i te au ikianga meitaki?

I mua ake ka tuku ei i tetai ikianga, e pure no ta Iehova tauturu e e akara matatio i te Pipiria kia kite i tona manako. (E tatau ia Maseli 2:​3-6.) I tetai au ngai, kua taka meitaki ta Iehova akaue anga. Me akarongo tatou ki te reira, e iki anga meitaki rava ïa.

Akapeea me kare e akaue anga taka meitaki mei te Pipiria? Ka arataki rai a Iehova ia koe “na te arataa e tau ei kia aere koe ra.” (Isaia 48:17) Akapeea ra? Penei te vaira te au kaveinga ei arataki ia koe. E tuatua mou te au kaveinga Pipiria te akakite maira i te au manako ngakau o te Atua. Ka kite tatou i to te Atua manako me tatau tatou i te Pipiria. Me kite tatou i tona manako, ka tuku tatou i te au ikianga te ka akamareka iaia.

2. Eaa te au tika taau ka akamanako i mua ake ka tuku ei i tetai ikianga?

Karanga te Pipiria: “Te akara meitaki ra te tangata akono ra i tona takainga.” (Maseli 14:15) Tera te aiteanga, i mua ake ka tuku ei i te ikianga, e akamanako meitaki tatou i te reira. Ia koe e akamanako ra i tetai iki anga, e ui kia koe uaorai: ‘Eaa te au kaveinga Pipiria no te reira? Eaa te iki anga te ka akamaru iaku? Eaa ta te katoatoa ka manako i taku ikianga? Tei puapinga rava atu, ka rekareka ainei a Iehova i te reira?’​—Deuteronomi 32:29.

E tika anga to Iehova kia akakite mai i te meitaki e te kino kia tatou. Me kite tatou i tana au ture e te au kaveinga ma te aru i te reira, te akatupu ra tatou i tetai akava ngakau meitaki. Ka kite to tatou akava ngakau i te tika e te tarevake. (Roma 2:​14, 15) Ka tauturu to tatou akava ngakau tereniia kia tuku i te au ikianga meitaki.

KIMI OONU

3. Na te Pipiria e arataki ia koe

VITIO: Na te au Kaveinga Pipiria e Arataki ia Koe (5:54)

• Eaa te tu rangatira?

• Eaa a Iehova i oronga mai ei i te tu rangatira?

• Eaa tana i oronga mai kia taangaanga meitaki tatou i te tu rangatira?

Kia kite i tetai akaraanga o te kaveinga Pipiria, e tatau ia Ephesia 5:​15, 16. E oti uriuri akapeea koe me “taporoporo marie i te tuatau” kia . . .

• tatau putuputu i te Pipiria.

• riro mai ei tokorua akaipoipo, tamaiti, tamaine meitaki.

• aere ki te au uipaanga putuputuanga.

4. Tereni i toou akava ngakau kia tuku i te au ikianga meitaki

VITIO: “Ei Akava-Ngakau Meitaki to Kotou” (5:13)

• I roto i te vitio, eaa te au takainga ta te tuaine i rave no te tereni i tona akava ngakau kia tuku i te ikianga te ka akamareka ia Iehova?

Eaa tatou ka kore ei e tuku na tetai ke e rave i ta tatou ikianga? E tatau ia Ebera 5:14, e oti uriuri i teia au uianga:

• Koi māmā ua ai na tetai ke e tuku i te ikianga, eaa ta tatou ka akataka meitaki?

• Eaa te ka tauturu ia tatou kia rauka te akava ngakau meitaki e kia tuku i te au ikianga tau?

5. Akangateitei i te akava ngakau o tetai ke

Tukeke ta te tangata au ikianga. Akapeea tatou me akangateitei i te akava ngakau o tetai ke? Akamanako e rua turanga:

Turanga 1: Kua neke tetai tuaine tei reka i te peni i tona mata ki tetai putuputuanga kare te au tuaine e reka ana i te reira.

E tatau ia Roma 15:1 e 1 Korinetia 10:​23, 24, e oti uriuri i teia au uianga:

• Kia tau ki te irava, eaa ta te tuaine ka akamanako? Eaa taau ka rave me e taeake toou tei mareka kore i taau e rave ra noatu e te mareka ua ra koe?

Turanga 2: Kua kite te taeake kare te Pipiria e patoi ana i te inu tau ua i te kava, inara kua iki aia kia kore e inu. Kua patiia aia ki tetai kaikai anga e kua kite aia i te au taeake e inu kava ra.

E tatau ia Koheleta 7:16 e Roma 14:1, 10, e oti uriuri i teia au uianga:

• Kia tau ki te irava, eaa ta te taeake ka akamanako? Eaa taau ka rave me kite koe i tetai e rave ra i tetai apinga kare toou akava ngakau e mareka ana?

Eaa te au takainga te ka taki atu ki te au ikianga meitaki?

1. E pati tauturu kia Iehova i taau ka rave.​—Iakobo 1:5.

2. E kimi kimi i te Pipiria e te au puka Pipiria no te au kaveinga. Penei e uiui atu ki te au Kerititiano pakari.

3. Akamanako i te ka tupu mei taau ikianga kia tau ki toou akava ngakau e to tetai ke.

APIIANGA

Ka tuku tatou i te au ikianga meitaki me rauka to Iehova manako ma te akamaara e me ka tauturu te reira e me ka takino i tetai ke.

Uriurianga

• Akapeea koe me tuku i te au ikianga te ka akamareka ia Iehova?

• Akapeea koe me tereni i toou akava ngakau?

• Akapeea koe me akangateitei i te akava ngakau o tetai ke?

KIMI KIMI

Akapeea koe me tuku i te au ikianga te ka akamatutu i toou pirianga oa ki te Atua?

“Rave i te Ikianga ei Akangateitei i te Atua” (Te Punanga Tiaki, Aperira 15, 2011)

E kimi maata atu i te mārama akapeea a Iehova me ako mai ia tatou.

Arataki a Iehova i Tona Iti Tangata (9:50)

Akara eaa tei tauturu i tetai tangata kia tuku i te ikianga ngata.

Akapapu a Iehova i Tei Meitaki (5:46)

Apii kia kite akapeea me akamareka ia Iehova me kare e arataki anga taka meitaki no te reira.

“E Anoano Ua Ana Ainei Koe i te Akauenga Pipiria?” (Te Punanga Tiaki, Titema 1, 2003)