Te Au Puapinga o te Ngakau Maru

KUA kite takere ana te taineti vairakau i teia tuatau nei e ka akatupu te riri akatere koreia i te kino ki te kopapa tangata. Tere atu i te au anere mataiti i topa, kua karanga The Journal of the American Medical Association (JAMA) e: “Kua mate tetai tangata no tona tu riririri ua, e kua karangaia te reira, penei, e ngakau paruparu tona, tei kore i rauka i te akakoromaki i te mamae tei akatupuia e tona tu manako. Kare tetai i manako ana e tupu anga roa teia o te tu neneva, e na te reira uaorai i akatupu i teia.”

Kare te au tuatua i runga ake nei i te mea poitirere ki te aronga apii i te Tuatua a te Atua, te Pipiria. E 29 anere mataiti i topa i mua ake ka tuatua ei a JAMA no runga i te kino o te tu riririri ua, kua akauruia te Ariki ko Solomona kia tata e: “Tei te maki kore o te ngakau, ko to te kopapa ïa ora.” (Maseli 14:30) Te tika nei teia au tuatua i teia ra.

Na te akono anga i te tu maru, ka ora atu tatou i te au maki e manganui e putuputu te taime te piri atura ki te taitaia, mei te toto kake, te katu mamae, e te au manamanata i te pae te rave anga i te akaea anga. Inara, kapiti mai i te akameitaki atu i te oraanga kopapa, ra, ka puapinga to tatou pirianga ki tetai atu me tauta tatou i te “akapakia te makitakita, e akaruke i te riri otooto.” (Salamo 37:8) Kua akapiri vaitata ua te au tangata kia Iesu no tona tu maru e te manako ngakau tae tikai no ratou. (Mareko 6:31-34) Pera katoa, ka riro tatou ei tumu no te akaangaroianga ki tetai atu me tatanu tatou i te ngakau maru.​—Mataio 11:28-30.