“E Apii i te Tamaiti”

TE UMUUMU ra te tanutanu anga manuia kia maata atu te ruru anga i te ua ki runga i te one e kia oki mai a tetai nga marama toko iti ua no te kokoti. E maata te angaanga ka o atu i te akateateamamao anga i te one, te ruruanga i te ua, e te pipianga e te akonoanga i te au tiare kia tupu ki te pakari anga.

Te akatutu maira teia tupu anga i te tika anga o ta Maseli 22:6, te na ko maira: “E apii i te tamaiti i te arataa e tikaʼi iaia kia aere ra; e kia pakari aia ra, kare e akaruke i taua arataa ra.” E tika, e mea puapinga tikai te apiianga a te metua i te akono anga ma te manuia i te tamariki.

Inara, i roto i teia ao tau kore, e manganui te au metua kare e akarongo ana i teia ako. Me aru ratou i te kite o teianei ao, koia oki ka tau te tamariki i te akono i to ratou uaorai au manamanata, e maata te taime kua akarukeia te tamariki kia paruru ia ratou uaorai. Kua akaruke mai taua mataara paruru koreia i te au mapu ou ki te au mana kino o te aronga tau kore e te kaveinga kore.​—Maseli 13:20.

Mei teaa te meitaki no te metua kia apii i te au kaveinga meitaki i roto i ta ratou tamariki, na roto i te apiianga tu-Atua i te ou anga! A naea? I “te tamariki anga mairai” i na te apotetoro ko Paulo ei. Ko te reira te tu o te tamaiti ou ra ko Timoteo. Kua akakeu tona metua vaine, ko Eunike, e tona tupuna vaine ko Loi i “te tuatua tapu” ki roto ia Timoteo e kua “apii” aia e ‘kua kite oki aia i tona kite i kite ei aia ra.’ Te openga? Kua riro taua apiianga ei mea puapinga te akariro anga iaia kia ‘pakari e tae ua atu ki te ora.’​—2 Timoteo 1:5; 3:14, 15.

Mei teia tuatau rai, te metua tei kore i “roiroi i te takinga-meitaki” ka kokoti mai ratou i te au mea puapinga tikai me “kore [ratou] e akaparuparu.” (Galatia 6:9) Te tuatua maira te Ariki ko Solomona e: “E rekareka maata ïa te metua o te tangata tuatua-tika ra.”​—Maseli 23:24.