“Kia Rekareka Koe i te Vaine o Toou Ou Anga”

“Kia rekareka koe i te vaine o toou ou anga . . . Eaa oki koe, e taku tamaiti, i taurekarekaʼi ki te akaturi, e i takavekave ei ki runga i te vaine ke?”​—MASELI 5:18, 20.

1, 2. Eaa i karangaia ai e kua akameitakiia te aroa akainangaro i rotopu i te tane e te vaine?

KARE te Pipiria e akama ana i te tuatua no runga i te au pirianga ainga. Ia Maseli 5:18, 19, te tatau ra tatou: “Kia akameitakiia taau vai puna: e kia rekareka koe i te vaine o toou ou anga ra. Kia riro aia mei te aili te inangaro! e mei te iale te manea! kia mataora ua rai koe i nga u nona; e kia mareka tamou koe i tona inangaro.”

² Te tuatua “vai puna” i konei, te tuatua ra te reira i te tumu no te akamerengoanga no te pirianga ainga. Kua akameitakiia te reira no te mea te aroa akainangaro e te mataora rekarekaia i rotopu i nga tokorua akaipoipo e apinga aroaia mei te Atua. Teia pirianga vaitata ra, kia akatupu anake uaia i roto i te akanoonooanga o te akaipoipoanga. No reira te Ariki ko Solomona o Iseraela taito, tetai tangata tata o Maseli, i ui ei: “Eaa oki koe, e taku tamaiti, i taurekarekaʼi ki te akaturi, e i takavekave ei ki runga i te vaine ke?”​—Maseli 5:20.

3.(a) Eaa te tikaanga tangi tikai no te manganui o te au akaipoipoanga? (e) Eaa to te Atua manako no te akaturianga?

³ I to raua ra akaipoipoanga, kua akono tetai tane e tetai vaine i tetai tia ngateitei kia aroa tetai i tetai e kia vai tiratiratu ua. Noatu rai, e manganui te au akaipoipoanga tei akapueurikirikiia e te akaturi. Ko te tikaanga, i muri ake i te uriurianga e 25 akarakaraanga, kua taopenga tetai tangata kimikimi e “e 25 patene o te au vaine e e 44 patene o te au tane kua akaturi ana ki tetai tangata ke.” Te akakite maira te apotetoro ko Paulo: “Kare ainei kotou i kite e, kare te aronga tuatua-tika kore e noo i te basileia o te Atua? Auraka e vavare: kare te kanga, e te akamori idolo, e te akaturi, e te akavaine, e te aronga sodoma, . . . e noo i te basileia o te Atua.” (1 Korinetia 6:9, 10) Kare e ekokoanga no runga i te reira. E ara kino tikai te akaturi i roto i te mata o te Atua, e ka tau te aronga akamori mou kia paruru mei te tu tiratiratu kore i roto i te akaipoipoanga. Eaa te ka tauturu ia tatou kia ‘akameitakiia te akaipoipo, e kia viivii kore oki te roi’?​—Ebera 13:4.

Kia Matakite i te Ngakau Pikikaa

4. Eaa tetai au mataara e o manako kore atura tetai au Kerititiano akaipoipo i roto i tetai pirianga akainangaro i vao ake i te akaipoipoanga?

⁴ No runga i te tu akono tau kore i teia tuatau nei, e manganui te au tangata tei, ‘ki te mata i te akaturi, kare oki e tivata i te rave i te ara.’ (2 Petero 2:14) E akakoro ana ratou i te aruaru i te au pirianga akainangaro i vao ake i te akaipoipoanga. I roto i tetai au enua e maata te au vaine tei akamata i te angaanga, e te angaanga kapitianga ki te au vaine e te au tane, kua akatupu te reira i tetai ngai ruperupe no te au akainangaro anga tau kore i roto i te opati. E pera katoa, no te au ngai pukapukaanga i runga i te Internet kua rauka katoa ua i te au tangata akama tikai i te akamata atu i te au akapirianga oa vaitata i runga i te komupiuta. E manganui te au tangata akaipoipo tei topa ana i roto i taua au ereere ra ma te kite kore e eaa te tupu nei kia ratou.

5, 6. Akapeea tetai vaine Kerititiano i te taii atu anga i roto i tetai turanga kino, e eaa ta tatou ka kite mai mei te reira?

⁵ E akamanako ana i akapeea tetai Kerititiano, ka kapiki tatou e ko Mary i te taiianga i roto i tetai turanga tei akatupu iaia kia vaitata i te rave i te akaturi. Tana tane, kare i te Kite no Iehova, kare e akaari maata ana i te inangaro ki tona pamiri. Te maaraara ra ia Mary i tetai atianga i te au mataiti i topa akenei i tona araveianga i tetai taeake angaanga o tana tane. E tangata maru ua aia, e i tetai atianga i muri mai, kua akakite katoa mai aia i tona inangaro i roto i te au irinakianga akonoanga a Mary. “E tangata meitaki tikai aia, e e tuke tikai mei taku tane,” i karanga ai aia. Kare i roaia ana kua tupu te au manako akainangaro i rotopu ia Mary e te taeake angaanga o tana tane. “Kare e te akaturi nei au,” te akamanako ra aia, “e e inangaro to tera tangata i roto i te Pipiria. Penei ka rauka iaku i te tauturu iaia.”

⁶ I mua ake ka arataki ei tona pirianga akainangaro ki te akaturi, kua rako tangata mai a Mary. (Galatia 5:19-21; Ephesia 4:19) Kua akamata tona akava ngakau i te angaanga, e kua akamata aia i te akatikatika i te reira manamanata. Te akatutu maira te tupuanga o Mary e “e pikikaa maata to te ngakau i te au mea katoa nei, e kua kino takiri.” (Ieremia 17:9) Te ako maira te Pipiria ia tatou: “Maata roa atu i te au mea katoa kia tiakiia, ko te paruruanga i toou ngakau, no roto mai oki i reira te au tumu o te ora.” (Maseli 4:23, NW) Akapeea tatou i te raveanga i te reira?

‘Kua Pipini Iora te Tangata Pakari’

7. Me te tauturu ra i tetai tangata ma te au manamanata no te akaipoipoanga, i te aruanga i teea ako a te Tuatua Tapu te ka riro ei paruruanga?

⁷ “Ko te manako ra e te tu ra aia, kia matakite aia ko te inga aea,” i tata ei te apotetoro ko Paulo. (1 Korinetia 10:12) E te karanga ra a Maseli 22:3 e: “E kite mamao te tangata pakari i te kino, e kua pipini iora.” E kia irinaki maata roa e, ‘Kare tetai apinga e tupu kiaku,’ e meitaki ake koe kia akamanako i te au turanga te ka taki atu ki te au manamanata. Ei akaraanga, e kopae i tetai tangata, e tane me kore e vaine, te ka aere ua mai ki konei ia koe i te tua mai i tona au manamanata ngata tikai i roto i tona akaipoipoanga. (Maseli 11:14) E akakite koe ki tera tangata e e meitaki atu kia uriuriia te au manamanata no te akaipoipoanga ki tona tokorua, e ki tetai Kerititiano pakari e tane ki te tane e vaine ki te vaine te inangaro maira kia puapinga tona akaipoipoanga, me kore ki te aronga pakari. (Tito 2:3, 4) E akanoo ana te aronga pakari i roto i te au putuputuanga o te Au Kite o Iehova i tetai akaraanga meitaki no runga i te reira. Me inangaro tetai tangata pakari i te tuatua muna ua ki tetai tuaine Kerititiano, ka rave aia i te reira i te ngai tangata​—mei te Are Uipaanga Patireia.

8. Eaa te matakite anga te umuumuia ra i roto i te ngai angaanga?

⁸ I roto i te ngai angaanga, e i tetai ngai ke atu, e matakite i te au turanga penei ka akatupu i tetai pirianga. Ei akaraanga, te noo roa anga e te angaanga kapiti ra ki tetai tane me kore ki tetai vaine ko te akamataanga te reira no tetai timataanga. Ei tane me kore ei vaine akaipoipo, ka tau koe kia akataka meitaki na roto i taau tuatua e toou tu e kare oou inangaro i roto i tetai ke. Ei tangata e aruaru ra i te akamorianga tau i te Atua, kare rava koe e inangaro i te akakeu i te inangaro na te akameameaanga me kore na te tu tau kore i toou kakau anga e toou akamanea anga. (1 Timoteo 4:8; 6:11; 1 Petero 3:3, 4) Te tukuanga i te au tutu o toou tokorua akaipoipo e taau tamariki i roto aere i te ngai angaanga ka riro ei akamaaraanga tikai kia koe e ki tetai ke e e puapinga maata toou pamiri kia koe. E tauta e auraka rava e akamaroiroi atu​—me kore e akatika ua atu​—te au akavareanga akainangaro mei tetai ke.​—Iobu 31:1.

‘E Noo ki to Vaine ra, e Inangaro Koe Iaia’

9. Eaa te au tupuanga te ka akatupu i tetai pirianga akainangaro ou ei timataanga?

⁹ I te paruruanga i te ngakau, e maata atu te inangaroia ra e kia kopae ua i te au turanga kino. Tetai akapirianga akainangaro ki tetai tangata i vao mai i te akaipoipo, penei e akakiteanga te reira e kare tetai tane e tetai vaine e akono ana i te au inangaro o tetai e tetai. Penei e akaruke uaia ana te vaine me kore e aviri uaia ana te au tane. I na, teia tetai tangata​—me kua araveiia i te angaanga me kore i roto rai i te putuputuanga Kerititiano​—i te akaraanga kua tu aia i te au tu tikai te ngere ra i roto i to tetai tokorua. Kare i roa kua tupu te akapirianga, e kua riro te reira pirianga ou ei timataanga tikai tei aka angaanga i te patoi. Te akapapu maira teia au tupuanga kikite i te tikaanga o te tuatua a te Pipiria: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore.”​—Iakobo 1:14.

10. Akapeea te au tane e te au vaine i te akaketaketaanga i to ratou pirianga?

¹⁰ Kareka ra kia akara atu ki vao i te akaipoipoanga i te akamerengo i to ratou au anoano​—me no te inangaro, no te akataeakeanga, me kore no te tauturu i tetai tuatau akaaoanga​—kia tauta te au tane e te au vaine kia akaketaketa i tetai pirianga inangaro ki to ratou tokorua. E no reira, e noonoo kapiti korua, e e akapiri vaitata atu ki tetai e tetai. E akamanako ana e eaa te apinga i akatupu ei i toou akainangaro. E tauta kia kite akaou mai koe i te tu maanaana taau i kite mai i roto i te tangata tei riro mai ei tokorua noou. E akamanako ana i te au tuatau mataora i rekareka ana korua. E pure ki te Atua no runga i te manamanata. Kua pati akatenga te tata taramo ko Davida kia Iehova: “E anga ana koe i te ngakau mā i roto iaku nei, e taku Atua, e akaou ana oki koe i te vaerua tika tikai i roto iaku nei.” (Salamo 51:10) E tauta kia ‘noo ki to vaine ra e inangaro koe iaia e kia ope roa te au rā o toou na ora anga ta te Atua i oronga mai noou i raro ake i te rā nei.’​—Koheleta 9:9.

11. Eaa te tuanga ta te kite, te pakari, e te kite meitaki e akono ra i roto i te akaketaketaanga i te tatua no te akaipoipoanga?

¹¹ Auraka oki e akangaropoinaia te akaketaketaanga i te tatua no te akaipoipoanga, ko te puapinga o te kite, te pakari, e te kite meitaki. Te akakite maira a Maseli 24:3, 4: ‘E patuia te are i te pakari; e e akatinamouia i te kite meitaki: E ki oki te au pia ra i te kite ki te au apinga memeitaki katoa i inangaroia ra.’ Kapitiia mai i roto i teia au apinga memeitaki te kiteaia ra i roto i tetai ngutuare tangata mataora ko te au tu aere mei te aroa, te tiratiratu, te mataku i te Atua, e te akarongo. Kia rauka te reira te inangaroia ra te kite i te Atua. Ka tau te nga tokorua akaipoipo i reira kia riro ei aronga apiipii pakari tikai no te Pipiria. E eaa te puapinga i te pakari e te kite meitaki? Te akono meitaki anga i te au manamanata i te au ra ravarai te umuumuia ra te pakari, te tu kite i te taangaanga i te kite mei te Tuatua Tapu. Tetai tangata kite meitaki te marama ua ra i te au manako e te au manako ngakau o tona tokorua. (Maseli 20:5) “E taku tamaiti, e akono mai i toku nei pakari, ” i karanga ai a Iehova, na roto ia Solomona. “E ariu mai i to taringa ki toku nei kite.”​—Maseli 5:1.

Me e “Pekapeka” Tetai

12. No teaa ra e kare i te mea poitirere e ka kite mai te au tokorua akaipoipo i te au manamanata?

¹² Kare roa e akaipoipoanga apa kore. Te akakite ua maira te Pipiria ki te au tane e te au vaine e ka “pekapeka ra to te reira i te kopapa nei.” (1 Korinetia 7:28) Ka rauka te au apiapi, te maki, te takinga kinoanga, e tetai au tumu ke mai i te akateiaa i tetai akaipoipoanga. Inara, me tupu mai ana te au manamanata, ka inangaroia korua kia kimi kapiti atu i te au pauanga ei nga tokorua akaipoipo tiratiratu te kimi ra i te akamareka ia Iehova.

13. I roto i teea au ngai ka tau tetai tane e tetai vaine i te akarakara meitaki ia raua uaorai?

¹³ Akapeea me kua akataitaiaia tetai akaipoipoanga no te tu e akono ana te nga tokorua i tetai e tetai? I te kimianga i tetai pauanga te inangaroia ra te tautaanga. Ei akatauanga, penei kua o takiri mai te tu tuatua akakino i roto i to raua akaipoipoanga e i teianei kua akatutuia i roto i te reira. (Maseli 12:18) Mei tei uriuriia i roto i te atikara i mua ake, ka akatupu teia i te au tupuanga kino pakari. Te karanga maira tetai materi Pipiria: “E mea meitaki kia noo ua ki te enua motutaa, i te noo ki o te vaine tamaki e te rotoriri.” (Maseli 21:19) Me ko koe tetai vaine i roto i te reira tu akaipoipoanga, e ui koe kia koe uaorai, ‘No toku tu, e ngata ainei no taku tane i te inangaro i te noonoo mai kiaku?’ Te akakite maira te Pipiria i te au tane: “E aroa kotou i ta kotou au vaine ra, auraka e rotoriri atu ia ratou.” (Kolosa 3:19) Me e tane koe, e ui koe kia koe uaorai, ‘No toku tu manako tangi kore, te akakeu ra ainei teia i taku vaine i te kimi i te akapumaana i tetai ngai ke?’ E tika, kare e kotoeanga no te pirianga ainga tau kore. Inara, ko te tikaanga e ka tupu mai te reira tumatetenga e tumu meitakiia i te uriuri tika ua i te au manamanata.

14, 15. Eaa ra te akara atu anga ki vao ake i te akaipoipo e kare i te pauanga ki te au manamanata i roto i te akaipoipo?

¹⁴ Te kimianga i te pumaana i roto i tetai akainangaro anga i vao ake i te akaipoipo, kare e ko te pauanga te reira ki te au manamanata i roto i te akaipoipo. Ka taki atu taua akapirianga kiea? Ki tetai akaipoipoanga ou e te meitaki atu? Penei ka akapera tetai pae i te manakoanga. ‘Ko te tikaanga,’ te manakonako ra ratou, ‘te au tu tikai taku e inangaro ra i tetai tokorua, te kite nei au roto i teia tangata.’ Inara e tarevake taua akamanakoanga, no te mea ko te tangata e akaruke ra i tona tokorua​—me kore te akamaroiroi ra ia koe kia akaruke koe i toou​—kare ona akangateitei no te tu tapu o te akaipoipoanga. Kare e tau i te akamanako i te reira pirianga kia riro mai ei akaipoipoanga meitaki atu.

¹⁵ A Mary, tei taikuia i mua atu ana, kua akamanako meitaki tikai i te au tupuanga o tana angaanga, kapiti mai te manakoanga e ka akangere aia iaia uaorai me kore i tetai tangata ke atu i to te Atua akaperepereanga. (Galatia 6:7) “Iaku e akara matatio ra i toku au manako no te taeake angaanga no taku tane,” i karanga ai aia, “kua kite mai au e me ka rauka i teia tangata i te kite mai i te tuatua mou, te tapu ra au i te reira kia tupu. E akatupu ana te angaanga tarevake i te kino maata ki te katoatoa tei o atu i roto i te reira e ka akaturori ke i tetai atu!”​—2 Korinetia 6:3.

Te Akakeuanga Pakari Rava Atu

16. Eaa te au tupuanga a muri ake no te tu akono viivii?

¹⁶ Te akamatakite maira te Pipiria: “Te topata ua maira oki te meli na te vaa o te vaine akaturi; e maata ua atu te pateka o tona vaa i to te manongi ra: E kavakava ra tona openga mei te au; mei te koke matarua ra te kokoi.” (Maseli 5:3, 4) Te au tupuanga a muri ake no te tu akono viivii e mamaeanga tikai e ka riro ei mateanga. Kapitiia mai i roto i te reira ko tetai akava ngakau taitaia, te au maki no te pirianga ainga, e te manako ngakau taitaia tikai o te tokorua o tetai tangata tiratiratu kore. Ka kore ei e tumu meitaki teia e auraka e aru i te reira mataara te ka taki atu ki te tu tiratiratu kore i roto i te akaipoipoanga.

17. Eaa te tumu pakari rava atu kia akono tamou i te tu tiratiratu i roto i te akaipoipoanga?

¹⁷ Te tumu maata e mea tarevake te tu tiratiratu kore i roto i te akaipoipoanga koia oki ko Iehova, Tei Akamata i te akaipoipoanga e Tei Oronga i te inangaro no te pirianga ainga, te akaapa ra aia i te reira. Na roto i te peroveta ko Malaki, kua karanga Aia: ‘E akavaitata atura au ia kotou i te akava anga; e riro ïa au ei kite viviki ki runga i te aronga akaturi.’ (Malaki 3:5) No runga i ta Iehova e kite ra, te karanga ra a Maseli 5:21: “Tei mua oki i te mata o Iehova to te tangata nei aerenga, e te akamaaraara ra aia i tona katoa ra au aerenga.” Ae, “te vai ua nei ra te au mea katoa ma te maeu rava ki mua i tona mata, tei iaia te tuatua ia tatou nei.” (Ebera 4:13) Te akakeuanga pakari rava atu i reira no te akono tamou anga i te tu tiratiratu i roto i te akaipoipoanga, koia oki te kiteanga e noatu eaa te tu muna o tetai angaanga tiratiratu kore e eaa te meangiti i to te reira au tupuanga i te pae kopapa me kore ki runga i te au tangata, ko tetai ua angaanga viivii no te pirianga ainga te akakino ra i to tatou pirianga kia Iehova.

18, 19. Eaa ta tatou ka kite mai mei te tupuanga o Iosepha ma te vaine a Potiphara?

¹⁸ Te akaari maira te akaraanga o Iosepha, te tamaiti a te pateriareka ko Iakobo, e te inangaro kia noo au ua ma te Atua e akakeuanga ririnuiia. No te tu mareka o Potiphara, tetai opita maata no te akavaanga o Pharao, kua rauka ia Iosepha tetai turanga akaperepereia i roto i te ngutuare tangata o Potiphara. “E purotu oki a Iosepha i te tu, e te mata meitaki,” tetai tu tikai tei kitea meitakiia e te vaine a Potiphara. I te au ra ravarai, kua tauta aia i te akavare ia Iosepha, inara kare roa tana au tautaanga i puapinga ana. Eaa tei akakeu ia Iosepha kia patoi i tana au akameameaanga pouroa? Te akakite maira te Pipiria kia tatou: “Kare ra aia i akatika atu, e kua karanga atura ki te vaine a taua pu nona ra, I na oki toku pu, . . . e kare roa ana apinga i tāpu iaku, mari ra ko koe, ko te vaine nana uaorai: eaa oki au e tikaʼi kia rave i tenana kino maata, e te ara i te Atua?”​—Genese 39:1-12.

¹⁹ Kua akono tamou a Iosepha kare i akaipoipo, i te tu akono tau viivii kore na te kopaeanga i te akapiri atu ki te vaine a tetai tangata ke. “E inu i te vai i taau uaorai āriki,” te karanga maira a Maseli 5:15 ki te au tane akaipoipo, “e te vai taʼe ra no roto i taau uaorai puna.” E paruru i te akatupu manako kore anga i te au akapirianga akainangaro i vao ake i te akaipoipoanga. E tauta i te akaketaketa i te tatua no te inangaro i roto i toou uaorai akaipoipoanga, e angaanga pakari i te akatikatika i tetai ua atu manamanata ta korua paa ka aro atu no te akaipoipoanga. No reira, “kia rekareka koe i te vaine o toou ou anga ra.”​—Maseli 5:18.

Eaa Taau i Kite?

• Akapeea tetai Kerititiano i te o manako kore atu anga ki roto i tetai pirianga akainangaro?

• Eaa te au matakiteanga te ka tauturu i tetai kia kore e akatupu i tetai pirianga akainangaro i vao ake i te akaipoipoanga?

• Me te kite maira i te au manamanata, eaa ta tetai tokorua akaipoipo ka rave?

• Eaa te akakoroanga pakari rava atu kia akono tamou i te tu tiratiratu i roto i te akaipoipoanga?

[Tutu i te kapi 26]

Ma te tangi, ka riro te ngai angaanga ei ngai ruperupe no tetai akainangaro anga tau kore i roto i te opati

[Tutu i te kapi 28]

‘E ki oki te au pia ra i te kite ki te au apinga i inangaroia ra’