Ka Anoano Tatou i te Au Oa Mou Tikai
TE RAVE ra a Jenny raua ko Sue i tetai pukapuka anga akatutuia. Kua pura te au katakata anga, kua marama te nga mata—te au mea ravarai i to raua tu te akaari maira i te inangaro maata i roto i ta tetai e tuatua ra. Noatu e tuke te ngai no reira mai raua, te taka ua ra e e aiteite to raua au inangaro e e akangateitei maata to raua i tetai e tetai.
I tetai atu ngai, te angaanga kapiti ra a Eric raua ko Dennis i tetai tuanga angaanga, e mea tei raveia i te au mataiti i aereia mai. Te maru ua ra to raua noonoo anga, e e ngoie ua i te kata. I te pukapuka anga e tupu atura ki tetai au tumu manako pakari, kua oronga va ua raua i te au manako ki tetai e tetai. E akangateitei to raua i tetai e tetai. Mei ia Jenny rai raua ko Sue, e nga oa mou tikai a Eric raua ko Dennis.
Penei ka akamaana teia au akatutu anga i toou ngakau, te akariroanga ia koe kia manako i toou uaorai au oa. I tetai tua, penei ka akariro te reira ia koe kia inangaro i teia au tu pirianga oa. Ka rauka katoa ia koe te reira!
Te Tumu ka Anoano Ei Tatou i te Au Oa Mou Tikai
E puapinga te au pirianga oa meitaki no to tatou oraanga i te pae manako e te pae kopapa. Me kite ra tatou i te maromaroa, kare te aite anga e te vaira etai mea tarevake ia tatou. Te karanga ra etai aronga kimikimi i te tu maromaroa e e kaki anga, e akakite anga natura e te anoano ra tatou i te pirianga taeake. Mei tera te tu, i te kai e akameangiti ra me kore e akakore ra i te matepongi, ka riro te tu pirianga oa tau ei akameangiti mai i te maromaroa me kore te akangaro atu i te reira. Tera katoa tetai, te au oa meitaki tei akariro ia tatou ei mea puapinga kare te reira i te mea raukanga ngata.
Kua angaia te au tangata ma te anoano o te pirianga taeake. (Genese 2:18) Te karanga ra te Puka Tapu i tetai oa mou tikai, me kore taeake, e ‘i anau maira no te tuatau e tumatetengaʼi ra.’ (Maseli 17:17) No reira, ka rauka i te au oa ngakau tae i te pati i tetai e tetai no te tauturu me anoanoia te reira. Inara te aiteanga o te pirianga oa e maata atu ia i te rauka ua anga tetai no te kimi tauturu atu me kore ra ei taeake i te ngai angaanga me kore no te kangakanga atu. Ka akakeu te au oa meitaki i te tu meitaki tikai o tetai e tetai. Te karanga ra a Maseli 27:17 e: “Na te auri i akakina i te auri; e na te tangata e akakina i te mata o tona taunga.” Mei tetai potonga auri tei akakina ra i tetai tipi tei maaniia ki taua apinga auri rai, ka autu tetai oa i te akakinaanga i te tu kite e te tu pae vaerua o tetai e tetai. Me riro mai te au mii anga ei akataitaia ia tatou, ka riro te mata tangi e te akamaroiroi anga Tuatua Tapu o tetai oa ei mea akamatutu anga.
I roto i te Puka Tapu, te akapiriia ra te pirianga oa ki te tu aroa, te tu akamatau, te tu muna, e te pirianga taeake. Penei ka piri mai te au tangata tupu, te au oa angaanga, e te vai atura ki roto i te au pirianga oa. No etai pae te tare katoa ra i te au kopu tangata ei tetai o to ratou au oa piri vaitata. Inara, no te manganui i teia tuatau, te au oa mou tikai e ngata te reira kia kitea e no te akono atu. Eaa te tumu? Ka rauka ainei ia koe i te rekareka i te au pirianga oa mou tikai e te roa?