I roto i te puka a Maseli e manganui te au irava te tu anake ra ei au tuku anga tuatua ako maro, inara e tuanga a Maseli 27:23 no tetai pupu irava: “Ka akara meitaki ana kia kite koe i te tu i to anana mamoe, e akono meitaki oki i taau au puakatoro: Kare oki te apinga maata e vaoo ngata mai; e te korona, ka riro ainei ki te au uki katoa? Te kao ra te ngangaere, e te kitea maira te rakau tupu ou, e kua akaputuputuia te rakau rikiriki o te maunga. Te au punua mamoe ra, ei kakau ïa noou ra; e te puakanio toa ra, ei oko ïa i te kainga noou. E rava te u o te puakanio ua ei kai naau, ei kai oki na to ngutuare katoa ra, e ei kai oki na to au tavini vaine katoa ra.”​—Maseli 27:23-27.

Kua rauka i tetai tiaki angaanga maata e te akono tetai tumu tauturu irinakiia​—ko Iehova. Akapeea? Te oronga maira te Atua i te au atianga e te reva tukeke te ka akatupu ua mai i te au ngangaere kia rava ei angai i te anana. (Salamo 145:16) Me taui te au atianga, kua ngaro te au ngangaere matie i te au ngai akaaka, penei e maata te reira i te au ngai teitei, te ngai ka rauka i te tiaki akono ra i te neke atu i tana animara ki reira.