Ka Rauka ia Koe te Rekareka i te Au Pirianga Oa Roa

TE VAIRA te au arairai anga i te au pirianga oa. E tika, kua akakite te Puka Tapu e i teia “tuatau openga” kare e aroa, e inangaro natura, e te tiratiratu. (2 Timoteo 3:1-5; Mataio 24:12) Kua apai mai teia au turanga ma ratou ra i tetai mate o te maromaroa kare rava e tupu akaou. Kua karanga tetai tangata e: “Toku ngai tangata te aite ra ki te araka o Noa. Me kare koe i tetai tokorua, kare koe e aere ki runga.” Kare te katoa anga o te apa e tukuia ki runga i te tangata maromaroa okotai ra. I etai au ngai o teianei ao, te au akaaoanga i te au pirianga oa roa ka kapiti mai te au mea mei te au tangata e neke putuputu ra, te au ngutuare tangata e pururu ra, te au oire tuke e te kino, e te kitea ra te topa anga o te taime va.

Tetai tangata e noo ra i roto i te oire o teia tuatau penei e maata atu tana au tangata ka aravei i roto i te epetoma i ta tetai tangata o te 18 anere mataiti i kite i roto i te mataiti me kore i tona oraanga katoa! Tera ra, te au pirianga oa i teia tuatau te maata anga o te taime e tutu ua te reira. E manganui te akao ra ia ratou uaorai ki roto i tetai pirianga tangata putuputu e te tauta ra kia rauka tetai tuatau mataora. Ka tau tatou kia akatika, ra, te akanavenave anga puapinga kore ma te au tangata tau kore te aite ra ki te taangaanga anga i te au rakau taratara ei apinga akaka anga. Te karanga ra a Koheleta 7:5, 6: “E mea meitaki kia akarongo i te akamura a te tangata pakari ra, i te akarongo i te peʼe a te aronga neneva ra. Mei te rakau taratara e patapatatā i raro ake i te pani ra, koia te kata o te neneva ra: e mea puapinga kore katoa oki te reira.” No tetai tuatau poto ka riro te au rakau taratara ei tau anga ai marama e te maniania, inara kare te reira e rava no te akamaana ia tatou. Pera katoa, te au oa maniania e te kata ua penei ka akaanga ke ia tatou i tetai ua ake taime, inara kare ratou e akakore i te maromaroa katoa e te akamerengo i to tatou anoano no te au oa mou tikai.

E tuke te noo anga takake mei te tu maromaroa. I etai au taime te anoano ra tatou i te noo anga takake no te akaoraora ia tatou uaorai i reira e maata atu ei ta tatou ka oronga atu ei oa. Me kiteia te maromaroa, ka anga viviki ua te manganui ki etai tu tamataora anga uira. Kua kite mai tetai kimikimi anga e ko tetai tupu anga matauia i te maromaroa koia oki ko te akarakara anga tivi. Inara, kua taopenga te aronga kimikimi e na te akarakara roa anga i te tivi ko tetai ia o te au mea kino rava atu ta tatou ka rave me maromaroa tatou. Ka akamaata atu te reira i te kope, te manako roi ua, e te manako maani ua, te riroanga mai ei tupau kino no te aravei tikai anga i tetai atu au tangata.

E tikai, ka riro te noo anga takake ei mea puapinga maata me taangaanga anake tatou i to tatou taime ma te tau tikai. Penei ka rave tatou i teia na te tatauanga, te tataanga reta, te maani anga apinga, e te akaangaroianga. Te noo anga takake tau tikai ka kapiti mai te pureanga ki te Atua, te apiianga i te Puka Tapu, e te manakonakoanga i te reira. (Salamo 63:6) E au ravenga teia no te akapiri vaitata ki te Atua ko Iehova, te ka riro mai ei Oa maata rava atu no tatou.

Au Akaraanga Puka Tapu o te Au Pirianga Oa

I te mea e meitaki i te akaoaoa atu ma te au tangata e manganui, te akamaara maira te Puka Tapu ia tatou e “te vai nei ra te oa e piri meitaki tona i to te taeake.” (Maseli 18:24) Te anoano pouroa ra tatou i tetai au oa piri vaitata tei manako mai tikai ia tatou, tei riro ra to ratou au pirianga oa ei oronga mai i te rekareka, te maroiroi, e te au kia tatou. Koi riro ei teia au tu pirianga oa mou tikai ei mea matau koreia i teia tuatau, te kitea tikaiia ra etai au akaraanga taito i roto i te Puka Tapu. Ei akaraanga, kua vai te pirianga oa puapinga maata i rotopu ia Davida raua ko Ionatana. Eaa ta tatou ka apii mai mei te reira? Eaa ra to raua pirianga i roaʼi?

Ei akaraanga mua, e aiteite ua to Davida e to Ionatana au inangaro puapinga. Tei maata rava atu, aiteite ua to raua tu akono oonu i te Atua ko Iehova. I te kiteanga i te akarongo o Davida no te Atua e tana au angaanga i te paruru anga i te iti tangata o Iehova, “piri rava akera te ngakau o Ionatana ki te ngakau o Davida, aroa aturā Ionatana iaia mei te mea ko tona uaorai vaerua.” (1 Samuela 18:1) Te aroa kapiti no te Atua, i reira, ka tauturu i te tapeka i te au oa tetai e tetai.

E nga tangata matutu maroiroi a Ionatana raua ko Davida tei akono ra i te au kaveinga tu Atua. I reira i raukaʼi ia raua i te akangateitei i tetai e tetai. (1 Samuela 19:1-7; 20:9-14; 24:6) Ka akameitaki tikaiia tatou me e au oa tu Atua to tatou tei aratakiia e te au kaveinga Tuatua Tapu.

Kua riro tetai atu au tika ei akamaata i te pirianga oa o Davida raua ko Ionatana. E pirianga oa tika tikai to raua ma te va ua, e kua irinaki tetai i tetai. Kua tuku tiratiratu a Ionatana i to Davida au inangaro i mua ake i tona uaorai. Kare aia i vareae no te mea kua taputouia te taoonga ariki no Davida; mari ra, kua turu a Ionatana iaia i te pae o te manako ngakau e te pae vaerua. E kua ariki a Davida i tona tauturu. (1 Samuela 23:16-18) Na roto i te au tu tei tau i te Tuatua Tapu, kua akaari ua a Davida raua ko Ionatana i to raua pirianga no tetai e tetai. Kua akatumuia to raua pirianga tu Atua ki runga i te tu ariki e te aroa ngakau mou tikai. (1 Samuela 20:41; 2 Samuela 1:26) E mea pururu kore te reira no te mea kua akono meitaki nga tangata i te Atua. Na te taangaanga anga i teia au kaveinga ka tauturuia tatou kia patu e te akono i te au pirianga mou tikai.

Akapeea te Tatanu i te Au Pirianga Oa

Te kimi ra ainei koe i te au oa mou tikai? Kare koe e anoanoia kia akara mamao. Penei ka riro etai aronga taau e aravei putuputu ra ei au oa noou, e penei te anoano ra ratou i toou pirianga oa. I te au taeake Kerititiano tikai, e mea pakari i te taangaanga i te ako anga a te apotetoro Paulo kia “maora ua.” (2 Korinetia 6:11-13) Inara, auraka e manata me kare te au tauta anga ravarai e akatupu i tetai tapeka anga oonu. I te maata anga o te taime ka pou te tuatau te akatupu anga i tetai pirianga oa, e kare te au pirianga ravarai e aiteite te oonu. (Koheleta 11:1, 2, 6) E tika, e rekarekaʼi i te au pirianga tae tikai, ka anoanoia kia kore tatou e manako ia tatou uaorai, e ka anoanoia tatou kia aru i te ako anga a Iesu: “E te au mea katoa ta kotou i anoano ia etai ke ra, na reira katoa kotou ia ratou: ko ta te ture ïa, e ta te au peroveta.”​—Mataio 7:12.

Koai te anoano ra i toou pirianga oa? I te pae i te aronga aiteite ua te mataiti ki toou, akapeea te aronga i raro ake me kore te au tangata pakarikari? Te au pirianga oa o Davida raua ko Ionatana, o Ruta raua ko Naomi, e Paulo raua ko Timoteo e tuke pouroa to ratou mataiti. (Ruta 1:16, 17; 1 Korinetia 4:17) Ka rauka ainei ia koe i te akatoro atu i toou pirianga oa ki te au vaine takaua e tetai atu aronga kare i akaipoipo? E akamanako, katoa atu, i te aronga ou ua ki to kotou ngai. Penei kua akaruke ratou i te pirianga o te maata anga me kore pouroa to ratou au oa i te nekeanga me kore i te tauianga i to ratou tu oraanga. Auraka e tiaki ia tetai atu kia kimi mai ia koe. Me e Kerititiano koe, e akatupu i te au pirianga oa roa na te taangaanga anga i te ako anga a Paulo: “Ei kapiti anga aroa mou to kotou ia kotou uaorai, i te aroa taeake ra; i te akangateitei anga tetai ki tetai.”​—Roma 12:10.

Ka rauka ia tatou i te akamanako i te au pirianga oa ei tu oronga anga. Kua karanga a Iesu e me oronga tatou, ka oronga mai te au tangata kia tatou. Kua akakite katoa aia e maata atu te mataora i te oronga i te rave mai. (Luka 6:38; Angaanga 20:35) Kua aravei ainei koe i te au tangata e tukeke te ngai i aere mai ei? Kua akapapu mai te au uruoaanga pa enua a te Au Kite o Iehova e ka riro te au tangata o te au peu tukeke ei akatupu i te au pirianga oa mou tikai e te roa me aiteite ua ta ratou akamori anga i te Atua.

Akono Meitaki Anga i te Au Pirianga Oa

Ma te maromaroa, ka akatupu te au oa tutu ua i te mamae ki tetai e tetai. Te urutoe kino, te irinaki anga pikikaaia, te tu ariki kore​—e au mea anake teia tei mamae tikai me kua akatupuia teia e tetai taau i manako ra e e oa mou tikai. Eaa te ka rauka i te raveia i teia au turanga nei?

E akanoo i tetai akaraanga meitaki. E rave i te au mea ravarai taau ka rauka no te kopae atu i te akatupu anga i te mamae tei kore i anoanoia. I etai au ngai e mea matauia i te au oa kia aviri i to tetai au apa ra. Inara te rave anga me kore te kanga anga kino kare te reira e akapiri vaitata ma te kapiti mai i te au oa, noatu e me te “katakata” ua ra ratou.​—Maseli 26:18, 19.

E angaanga pakari atu i te akono tamou i te au pirianga oa. I tetai au taime ka tupu mai te au mea marama koreia me e maata roa ta te au oa e tapapa ra mei tetai e tetai. Te oa tei maki ra me kore tei ngaro ra te manako no tetai manamanata kino papu kare e rauka i te akaari i te tu maana mei tei matauia. I taua au taime, i reira, e tauta kia marama e e turu atu.

E rapakau viviki atu i te au manamanata ma te takinga meitaki. Me ka rauka e rave atu i te reira i te ngai muna. (Mataio 5:23, 24; 18:15) E akapapu e kua kite toou oa e te inangaro ra koe i te akono tamou i tetai pirianga oa meitaki. Ka akakore te au oa tae tikai i te ara a tetai e tetai. (Kolosa 3:13) Ka riro ainei koe ei oa mei te reira rai​—e piri meitaki tona i to te taeake?

Te tatauanga e te manakoanga no runga i te au pirianga oa ko te akamata ua anga te reira. Me te kite ra tatou i te maromaroa, e rave atu tatou i tei tau, e kare tatou e maromaroa akaou. Me rave atu tatou i te reira, ka rauka ia tatou i te akatupu i te au oa mou tikai. I etai ia ratou, ka akatupu tatou i tetai tapeka anga mou tikai. Inara kare e rauka i tetai tangata i te apai i te ngai o te Atua, te Oa maata rava atu. Ko Iehova anake tei kite, tei marama, e te ka turu takiri ia tatou. (Salamo 139:1-4, 23, 24) Pera katoa, te mou ra tana Tuatua i tetai manakonakoanga umere no te tuatau ki mua​—tetai ao ou te ngai e raukaʼi te au oa mou tikai e tuatau ua atu.​—2 Petero 3:13.

[Au Tutu i te kapi 5]

Kua rekareka a Davida raua ko Ionatana i te pirianga oa mou tikai, e ka rauka rai ia tatou