Te Angaanga Ainei te Atua na Roto i te Au Mataara “Mingi” Ra?

“DEUS ESCREVE CERTO POR LINHAS TORTAS” (“TE TATA TIKA RA TE Atua na runga i te au raini mingi ra”) i na tetai tuatuaanga i Brazil. Te akakite maira e te rave ra te Atua i te au mea tika i te au taime katoa inara i tetai taime na roto i tetai tu kare e tano roa ana ki te tangata. Ei akatauanga, mei tetai tangata i te take o tona oraanga i mate ra, te karanga ra te manganui e, ‘Kua kapiki maira te Atua iaia ki te rangi.’ Me kua mamae tetai tangata mei tetai manamanata kopapa me kare tetai tumatetenga, kua karanga tetai papaki, ‘Na te anoano ia o te Atua.’ No reira, me kua akaapaia te Atua no te mate, te au manamanata kopapa, e tetai ua atu au tumu no te mii, te akakite maira taua tuatuaanga e kua ‘tata mingi’ te Atua, kua rave aia i te au mea na roto i tetai tu kare e marama ana te tangata.

Eaa ra te tumu e manganui te au tangata akonoanga i irinaki e na te Atua te apainga no te mate e te au manamanata? Kua akatumuia teia au irinaki anga ki runga i te marama kore o tetai au irava Pipiria. Ka akara poto ana tatou i tetai ia ratou.

● “Naai i anga i te vaa tangata nei? e koai tei akariro iaia ei murare, e ei turi, e ei matapuera, e ei matapo? kare ainei ko au ko Iehova?”​—Exodo 4:11.

Kua akaaite ainei teia e na te Atua te apa no te au tangata tei tuia i te au mamae anga tuke ke? Kare. Kare teia e rotai ana ma te tu o te Atua. Te akakite maira te Pipiria e: “E mea meitaki anake oki ta te Atua i anga.” (1 Timoteo 4:4) Kare nona te apa me anau ia mai i tetai ei matapo, e murare, me kare ei turi. E inangaro ua tona i te meitaki no te au mea tana i anga mai, no te mea koia te Tumu o “te au mea memeitaki i o maiia ra, e te au mea tika ravarai.”​—Iakobo 1:17.

Ko to tatou nga metua mua, ko Adamu raua ko Eva, tei iki kia patoi i te Atua, e kua ngaro to raua tu tiama e to raua rauka anga kia anau mai i te tamariki tiama. (Genese 3:1-6, 16, 19; Iobu 14:4) I te akaipoipo anga ta raua anaunga e te anau maira i te tamariki, kua tupu maata mai te au apa, e kapiti katoa te au manamanata kopapa, tei kiteia i roto i te au tangata. Noatu e kare te Atua ko Iehova i akatupu mai i teia, kua akatika aia i te reira kia tupu. No reira, kua rauka iaia i te tuatua e nana i “anga” te murare, te turi, e te matapo.

● “Ko tei aupeupe ra, kare ïa e rauka i te akatika.”​—Koheleta 1:15.

Ko te Atua ainei tei anga i te au mea aupeupe nei? Kare. Te akakite maira a Koheleta 7:29 e: “Kua anga te Atua i te tangata ma te tiratiratu, kua kimi ra ratou i te au ravenga e manganui.” Te akataka maira te Contemporary English Version i teia irava e: “Kua tiratiratu tatou i te anga mai anga te Atua ia tatou, inara i teianei e viivii to tatou au manako.” I te mea kare i rave i te au akauenga tuatua tika a te Atua, e manganui te tane e te vaine tei iki i ta ratou uaorai au parani, manako anga, rave anga, me kore mataara​—ki to ratou mamae.​—1 Timoteo 2:14.

E pera katoa, mei ta Paulo i akakite maira, no te ara a te tangata, “kua akariroia oki te au mea angaia nei ei puapinga kore ua.” (Roma 8:20) E “kare ïa e rauka [i te angaanga a te tangata] i te akatika” i teia turanga. Na to te rangi ua e akakore atu i te au angaanga aupeupe e te puapinga kore i te enua nei.

● “E akamaara i te au angaanga a te Atua: e tika iaai kia akatika i tana i akamingi ra?”​—Koheleta 7:13.

Na tetai atu au tuatua, kua ui mai te Ariki ko Solomona e: ‘Naai i rotopu i te tangata e akatika i te au kino e te au ara ta te Atua i akatika’? Kare okotai, no te mea e tumu rai tetai i akatikai te Atua ko Iehova i teia au mea kia tupu.

No reira, kua akamaroiroi maira a Solomona e: “E rekareka i te rā meitaki ra; e akamaaraara ra i te rā e tumatetengaʼi ra: kua tuku vaitataia teia e te Atua ki vaitatao i tera, kia kore te tangata e kite i tei vaitata i te iri mai ki runga iaia ra.” (Koheleta 7:14) Ka tau tetai tangata kia ariki i te ra meitaki e kia akaari atu i tana ariki anga na te akaari atu anga i te tu meitaki. Ka tau aia kia akamaara i te ra meitaki ei apinga aroa no te Atua maira. Inara akapeea me ka apai mai te ra i te tumatetenga? Ka tau tetai tangata kia “akamaara” me kore kia kite e, kua akatika te Atua kia tupu te tumatetenga. Eaa aia i akaperai? Te tuatua nei a Solomona e: “Kia kore te tangata e kite i tei vaitata i te iri mai ki runga iaia ra.” Eaa te aiteanga o teia?

I te mea e kua akatika te Atua ia tatou kia aro i te rekareka e te manamanata ka akamaara ia tatou e kare tatou e kite eaa ta te tuatau ki mua ka apai mai. Ka tupu te manamanata ki runga i te aronga tuatua tika e te kino. Kare e tuke. Ka tauturu teia ia tatou kia maara i te puapinga o te irinakianga, kare ia tatou uaorai, mari ra i te Atua, te akamaaraanga e “ko te Atua oki te aroa.” (1 Ioane 4:8) Noatu e kare tatou e marama tikai i tetai apinga i teia taime nei, ka papu tikai tatou e i muri ake i te au mea i te tupu anga, ko te au mea ta te Atua i akatika ka tau rai te akakoroanga no te au tangata katoa.

Ko te au mea tana i akatika kare te reira e akatupu i te mamae mutu kore no te aronga ngakau tika. Kua akataka meitaki maira te apotetoro Petero i teia i te tuatua anga no runga i te mamae o te aronga irinaki i tona tuatau: “Ko te Atua ra nona te aroa ua katoa nei, ko tei kapiki ia tatou no tona ra kakā mutu kore ia Iesu Mesia nei, kia roa iti ake to kotou mate, kia akameitaki rava aia ia kotou, kia tauturu mai, kia akamaroiroi mai, e kia akatinamou ia kotou.”​—1 Petero 5:10.

Te Tuatau Tau kia Akatika i te Au Mea Katoa

Te oronga maira a Iehova i te maroiroi kia akakoromaki i to tatou au timataanga nei. Kua taputou oki aia e kia ‘akaou te au mea ravarai.’ (Apokalupo 21:5) Ae, ko tona akakoroanga ia kia akaoki tona Patireia i te rangi ra i te oraanga meitaki ki te aronga tei mamae i te au maki e ka akaaere i te tuakaouanga o te mate. Ko taua kavamani katoa ra ka takore atu i te mataara o tei mingi ra​—ko Satani te Tiaporo. (Ioane 5:28, 29; Roma 16:20; 1 Korinetia 15:26; 2 Petero 3:13) Mei teaa ra te akameitakianga no te au tangata mataku i te Atua takapini i te enua nei me tae mai te tuatau tau no te Atua kia akatika i te au mea katoa nei!

[Akameitakianga no te Tutu i te kapi 28]

Job Hearing of His Ruin/​The Doré Bible Illustrations/Dover Publications