E Oraanga Ou no to Tatou Ai Tupuna

TE APII ra ainei te Tuatua a te Atua, koia te Puka Tapu, e te aere maru ra te katoatoa ki te oraanga te tere atura ki roto i te ngai vaerua i te mate anga? Kare. Te oronga maira te Puka Tapu i tetai manakonako anga meitaki no te oraanga i muri ake i te mate, inara kare i te tu ta te manganui e manako ana.

E tamanako ana e eaa ta te Puka Tapu e karanga ra no runga i to tatou tupuna mua, ia Adamu ra. Kua anga a Iehova iaia “i te one-pueu o te enua nei.” (Genese 2:7) Tei ia Adamu te tuatau kia ora e tuatau ua atu ma te mataora i runga i te enua nei. (Genese 2:16, 17) Inara, kua meameaau aia i Tei Anga aroa ra iaia, e tei tupu ra ko te mate.

Kua aere a Adamu ki ea i te mate anga? Kua karanga atura te Atua kiaia: “[Ka] oki ua atu koe ki raro i te one; no reira mai oki koe: e one-pueu oki koe, e ka riro akaou rai koe ei one-pueu.”​—Genese 3:19.

Tei ea ra a Adamu i mua ake ka angaʼi a Iehova iaia mei te one pueu ra? Kare ua. Kare aia i vai ana. No reira te karanga anga a Iehova e ka “oki [a Adamu] ki raro i te one,” te tuatua ua ra aia e ka riro akaou mai a Adamu ei ora kore, mei te one pueu rai. Kare a Adamu i ‘tikoti atu’ kia riro mai ko te metua mua o te au vaerua tupuna o tetai ao. Kare aia i aere atu ki tetai oraanga o te meitaki i te rangi ra kare katoa ki tetai mamaeanga mutu kore i tetai ngai tamamae anga. Ko te tikoti anga tana i maani ua koia oki mei te ora ki te ora kore, mei tetai turanga vai ua ki tetai turanga kare e vai ana.

Akapeea ra te toenga o te au tangata? Ka kore katoa ainei te au uanga a Adamu i te vai ua anga i te mate anga? Te pau ra te Puka Tapu e: “Te aere nei [te au tangata e te au animara] katoa ki te ngai okotai; no te one-pueu anake nei ratou, e te oki anake nei ratou ki te one-pueu ra.”​—Koheleta 3:19, 20.

Te Turanga o te Mate

Ae, e ora kore tei mate, kare e rauka i te akarongo, te akara, te tuatua, me kare te manako. Ei akatauanga, te karanga ra te Puka Tapu e: “Kua kite oki te aronga e ora nei e ka mate ratou: kare ra a te aronga i mate ra e tuatua i kitea . . . To ratou aroa, e to ratou riri, e to ratou vareae, kua kore anake ïa.” Te tuatua katoa ra te Puka Tapu e: “Kare oki e angaanga, kare e kimianga, kare oki e kite, kare oki e pakari, i roto i te vaarua taau e aere na.”​—Koheleta 9:5, 6, 10.

No reira, kia tau ki te Tuatua a te Atua ra, ko te au tangata e ora ra, kua kite ratou e ka mate. Inara, me tupu te mate, kare ratou e kite i tetai mea. Kare ratou e tu i te pae i to ratou kopapa, te akaraanga e eaa te raveia ra i reira. I roto i te ngai kore kare e tarekareka e kare te mamae, kare katoa te rekareka e kare e mii. Kare tei mate ra e kite te patianga te ora. E oonu to ratou tu kite kore i tetai ua atu moe.

Kua kite a Iobu, e tavini no te Atua i te au tuatau taito ra, e kare te au tangata e ora ua atu ana i muri ake i te mate. Kua marama katoa aia e me kore te akao anga a te Atua, kare e manakonako anga no te oki akaou mai ki te ora. Te karanga ra a Iobu e: “Ko te tangata nei ra, te mate nei ïa, e popo ua iora: te mate nei oki te tangata, e teiea iora ïa? Kua pera rai [aia] nei, te moe nei ki raro, e kare e tu mai.” (Iobu 14:10, 12) Kare rai a Iobu i manako e me mate aia ka piri atu aia ki tona ai tupuna i roto i tetai ao o te au vaerua.

Te Manakonako Anga o te Tuakaou Anga

I te mea e kua kore tei ora ra i te vai anga i te mate anga, e uianga pakari tikai ta Iobu i ui ra i te akamata anga aia i te ui e: “Kia mate te tangata nei, ka ora akaou ainei aia?” Kua oronga mai a Iobu uaorai i teia pau anga: “E tapapa rai au i oku puke rā i akonoia ra e kia ope, e tae rava atu ki toku tu ke anga ra. Naau [e Iehova] e kapiki mai, e naku e io atu kia koe: e tangi rai koe ki te angaanga a to rima ra.”​—Iobu 14:14, 15.

I te au tuatua ke ra, noatu rai e ka pati a Iobu na roto i te turanga vai kore ua, kare te Atua e akangaropoina iaia. E akarongo to Iobu e te vaira te tuatau ka “kapiki” mai te Atua ra a Iehova iaia kia oki mai ki te ora na roto i tetai akatu anga.

Kua akaari mai te Tamaiti a te Atua ra, a Iesu Karaiti, e e tika tikai to Iobu manakonako anga i roto i te tuakaou anga. Kua akapapu mai a Iesu e ka akatuia mai tei mate ra. Akapeea ra? Na te raveanga aia i te reira! Kare oki aia i reira i te akatu mai ia Iobu, inara i runga i te enua nei kua akatuia mai a Iesu i te tamaiti a tetai vaine takaua mei te oire ko Naina. Kua akatu katoa mai a Iesu ki te ora te tamaine 12 mataiti a tetai tangata ra ko Iairo te ingoa. E kua akatu aia i tona oa ko Lazaro, tei mate e a ra.​—Luka 7:11-15; 8:41, 42, 49-56; Ioane 11:38-44.

Kapiti atu ki teia au temeio tei raveia, kua tuatua a Iesu i tetai akatuakaou anga maata i te tuatau ki mua. Kua karanga aia e: “Te vaitata mai nei oki te ora, e akarongo ei te aronga katoa i roto i te rua i tona reo, E kua aere mai ki vao.” (Ioane 5:28, 29) I muri mai, ko te apotetoro ko Paulo, ta Iehova ra i taangaangaia i te akatu i tetai mapu tane, kua akakite katoa mai i te irinaki i roto i tetai akatuakaou anga i te tuatau ki mua. Kua karanga aia: “Te irinaki nei au ki te Atua, . . . e e tuakaouanga to tei mate, te aronga tuatua-tika e te aronga tuatua-tika kore.”​—Angaanga 20:7-12; 24:15.

Kare teia au papa anga Tuatua Tapu no te tuakaouanga ki tetai tuatau ki mua e tuatua ra no te oraanga te aere atura ki te ngai vaerua. Te tou ra ratou ki te tuatau me oki akaou mai te mirioni tei mate ra ki te ora na roto i te au kopapa tangata i runga i te enua nei. Kare teia aronga akatuakaouia mai ki te enua nei ei au tangata kare o ratou manako no to ratou oraanga i mua ana. Kare ratou e anau akaouia ei au tamariki varevare. Mari ra, ko taua au tangata rai ratou i to ratou mate anga, te rauka anga taua au manako e te tu tangata. Ka kiteaia ratou e ratou uaorai e ki etai ke atu. Mei teaa ra te rekareka no te reira i te kapiti akaouanga teia au tangata ki to ratou au oa e te ngutuare tangata ra! E mei teaa ra te mataora i te aravei anga i to tatou ai tupuna!

Akatuakaou Anga ki te Ora i te Rangi Ra

Kare ainei a Iesu i karanga ana e ka aere tetai ki te rangi? Ae, i karanga ana aia. I te aiai i mua ake ka tukunaʼi aia ki te mate, kua karanga aia: “Manganui te nooanga tikai i te are o taku Metua ra: . . . Te aere nei au e akamanea i tetai ngai no kotou. E kua oti anake i te akamaneaia e au ra, ka oki mai au, e arataki ia kotou ki oku ra; ei reira katoa kotou, i te ngai e nooia e au ra.” (Ioane 14:2, 3) Te tuatua ra a Iesu ki tana au apotetoro tiratiratu ra, inara kare te aiteanga o tana tuatua e ka aere pouroa te au tangata meitaki ki te rangi.

Kua akaari mai a Iesu e ko ratou te ka akatuia ki te rangi ra ka aravei atu i te au umuumu anga ke atu i te akono ua anga i tetai oraanga meitaki. Ko tetai atu umuumu anga kia kite oki ia Iehova e tona au akakoro anga. (Ioane 17:3) Ko tetai atu umuumu anga kia akaari i te akarongo na roto i te atinga oko o Iesu Karaiti e kia akarongo ki te Atua. (Ioane 3:16; 1 Ioane 5:3) Inara ko tetai umuumu anga ke atu kia “anau akaouia” ei Kerititiano papetitoia tei ikiia i te vaerua tapu o te Atua. (Ioane 1:12, 13; 3:3-6) Tetai atu umuumu anga no te oraanga i te rangi koia oki kia tamou marie mei ia Iesu rai, na te vai tiratiratu anga ki te Atua e tae ua atu ki te mate.​—Luka 22:29; Apokalupo 2:10.

Te vaira te tumu no taua au umuumu anga akangateitei ra. Ko ratou tei akatuia ki te rangi ra e angaanga maata ta ratou ka rave. Kua kite a Iehova e kare rava e rauka i te au kavamani a te tangata nei i te akatere autu atu i te au mea i runga i te enua nei. No reira kua akapapa aia i tetai kavamani i te rangi ra, me kare te Patireia, te ka tutara ki rungao i te au tangata. (Mataio 6:9, 10) Kua riro a Iesu ei Ariki no taua Patireia ra. (Daniela 7:13, 14) Ko etai tei ikiia mei te enua nei e kua akatuia ki te rangi ra ka tutara ma ia katoa ra. Kua akakite takere mai te Puka Tapu e ka riro mai teia aronga akatuia “ei ui ariki e ei kau taunga na to matou Atua: e e [ka] riro ia matou te au i teianei ao.”​—Apokalupo 5:10.

Ka rauka ainei i te maata anga o te au tangata i te aravei atu i te au umuumu anga no tetai tuakaou anga i te rangi ra? Kare. Kare ia ratou uaorai te akaapa anga, kare e tau te maata anga o te aronga e moe ra i roto i te mate. E manganui kare i rauka ana te tuatau i te apii i te tuatua mou no runga ia Iehova e tana au akakoro anga. I ora ana e kua mate atu ratou ma te kore e kite ia Iesu Karaiti me kare te Patireia o te Atua.

Kua kapiki a Iesu ia ratou te ka aere ki te rangi ra e “anana iti.” (Luka 12:32) I muri mai kua akaariia mai e ko te numero o ratou tei “okoia no roto i teianei ao” kia tutara ma Karaiti ra i te rangi e 144,000. (Apokalupo 14:1-3; 20:6) I te mea e e numero maata maata rava teia 144,000 i te noo anga te ‘manganui i te are ra’ ta Iesu i taiku ra, e meangiti ua me akaaiteia atu ki te pirioni ua atu tangata tei aere mai mei ia Adamu.​—Ioane 14:2.

Te Au Tupu Anga i Mua Ake te Tuakaou Anga ki te Enua Nei

Ka oki akaou tatou i te akara e eaa ta tatou i uriuri ana. Tei tau ki te Puka Tapu, ko ratou tei mate ra e ora kore i roto i te mate e tae roa atu ki te akatu angaia mai ratou e te Atua ra e Iehova. Ka akatuia mai tetai ki te oraanga i te rangi, ka tutaraʼi ratou ma Iesu Karaiti i roto i te kavamani o te Patireia ra. Te maata anga o te au tangata ra ka akatuia mai ki te enua nei, te riro anga mai ei au tangata no taua Patireia ra.

Na roto i te tuakaou anga i te enua nei, e akatupu ei a Iehova i tona akakoro anga no te enua. Kua anga a Iehova i te reira “kia tangataia.” (Isaia 45:18) E kainga tumu tikai no te au tangata. No reira, i imene ei te tata taramo ra: “Te au rangi ra, na Iehova ïa au rangi; kareka te enua nei, kua oronga mai aia na te tamariki a te tangata nei.”​—Salamo 115:16.

I mua ake ka akamataʼi te tuakaou anga ki te ora i runga i te enua nei, e taui anga maata te ka raveia. Penei ka akatika koe e kare te Atua i akakoro i te enua kia kiia e te tamaki, te taero, te kino, e te takino. Na te au tangata i akatupu mai i teia au manamanata kare e akaari i te akangateitei anga no te Atua e no tana au ture tika ra. No reira, na to te Atua Patireia e ‘mate ei te aronga i mate ei to te ao ra’​—ei takainga maata i te apai mai i tona anoano i te enua nei. (Apokalupo 11:18) Ka takore te Patireia i te au tangata kino pouroa, te akaruke anga i te aronga tuatua tika kia noo i runga i te enua e tuatau ua atu.​—Salamo 37:9, 29.

E Parataito i Runga i te Enua

Ko ratou tei akatuia mai i te enua ma ra e aronga ngakau maru, e au tangata te akono ra i te mea tika. (Akaaite ia Mataio 5:5.) I raro ake i te akaaere anga aroa o te Patireia o te Atua ra, ka noo mataora ua ratou i roto i te tinamou. Kua oronga mai te Puka Tapu i teia akara anga umere no te au turanga te ka autuia ra: “E [na te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”​—Apokalupo 21:4.

Ae, ka tauiia te enua ki roto i tetai parataito. (Luka 23:43) E akamanako ana eaa te aiteanga o te reira! Kare te au are maki e te au are neti anga o te aronga ruaine. I roto i te Parataito, ko ratou tei tuia e te au turanga o te ruaine ka akamaroiroiia e ka akameitaki akaouia. (Iobu 33:25; Isaia 35:5, 6) Kare te au are no te tanumanga akaou, te ngai tanumanga, e te au menema. Na roto i tona Patireia, na Iehova e “akakore rava i te mate e tuatau ua atu.” (Isaia 25:8) Ko te aiteanga tikai o taua au akameitaki anga e oraanga ou no tatou e no to tatou ai tupuna.

[Tutu i te kapi 7]

Ka riro taua aronga te ka akatuia i te enua nei ei au tangata no te Patireia