Akapeea Koe me Akariro i Etai Ei Au Oa

“E MEA PUAPINGA TE OA OKOTAI I TE ORAANGA; E MANGANUI TE RUA; E TAKI TAI UA AKE TE TORU.”​—Henry Brooks Adams.

TE AKAKITE maira taua tuatua e taki tai ua ake te au oa tikai. E putuputu te taime kua rongoia te au tuatua “Kare aku tangata kia uri atu,” “Kare e rauka iaku te irinaki i tetai,” me kare “Ko taku puakaoa toku oa meitaki” mei te au tangata maromaroa te kimi ra i tetai pirianga oa.

Kia akariro i etai e kia akono i te au pirianga oa tamou e akaaoanga ia. Te akaari maira tetai tare anga i te makete e “i Marike ua e 25 patene o te katoa anga o te aronga mamaata te mamae ra i te ‘maki maromaroa’ e . . . i Varani kua kite e apa o te au tangata i te takake anga kino pakari.” Te tupu maata o te au karapu no te oaoa e te au chat room i runga i te komopiuta e te maata o te au akakite anga i roto i te nuti pepa a te aronga kimi au tokorua te akakite maira e te anoano ra te tangata i te aravei anga tetai e tetai.

Te akakino ra te maromaroa kare ua i te turanga manako o tetai tangata pera katoa tona turanga i te pae kopapa, i na Dr. David Weeks ei, e tangata apii i te roro. “E maata taku aronga maki ma te au tu mataku apiapi e te taitaia te ka akatakaia e kua maromaroa. Te vaira te au kapiti anga i rotopu i te pakari tikai o te taitaia e te pakari tikai o te tu maromaroa.”

Kua akakoro te takake anga e te pueu anga i roto i te oraanga pamiri i te au tangata ravarai kia noo ua e ko ratou ua. Kua taopenga mai tetai tare anga tei raveia i Peritane i te akamata anga o te 21 anere mataiti, e maata atu i te 30 patene o te katoa anga o te enua ka riro ki roto i te ngutuare tangata okotai.

Kua totou te au Tuatua Tapu akauruia e ka maata te manako iaia uaorai i “taua tuatau openga ra.” (2 Timoteo 3:​1-5) I te akaraanga e manganui te inangaro ra i te au apinga materia, mei te are me kare te motoka, me kare ta ratou au angaanga e i te tatanuanga i te au pirianga ma tetai atu au tangata. I akakite ei te tangata tata ko Anthony Storr e: “Koi kore ei e manako atu i te tokorua e te tamariki, kua akanooia to ratou au oraanga ki roto i te opati.”

E PUAPINGA MAATA RAVA TE AU OA TIKAI

Te tu meitaki o toou oraanga tei runga ua ia i te tu o toou au pirianga oa. E putuputu te taime te aronga e noo ra no ratou uaorai kare e mataora ana no te mea kare o ratou oa ei tua i ta ratou au apinga me kare to ratou au manako. E tika tikai te au tuatua a Iesu Karaiti: “E mea meitaki i te oronga atu i te rave mai.” (Angaanga 20:35) Te akatangi anga i teia tuatua mou, kua tata te tangata atu pee Engarani ko George Byron e: “Pouroa te katoatoa te ka tu i te rekareka, ka tau kia tua aere i te reira.”

Eaa ra te oa? Te akataka ra tetai tikitinari i te oa e ko “tetai te piri ra ki tetai no te inangaro me kore te manako teitei.” Ka tauturu tetai oa tikai i te akatika i toou au manako ki te au mea meitaki. Ka rauka katoa iaia i te akamaroiroi e te akamatutu ia koe i te tuatau te anoanoia ra. Ka rauka iaia te kapiti atu ki toou mamae anga. Kua tuatua te Ariki ko Solomona: “E aroa mairai te taunga i te au tuatau katoa ra, i anau maira te taeake no te tuatau e tumatetengaʼi ra.” (Maseli 17:17) Koi ngere ei te au apinga materia i to te reira puapinga no tetai tuatau, ka tupu ua atu te pirianga oa tikai e ka ruperupe ma te maata o te tuatau.

Kua raurau te au Tuatua Tapu i te au Kerititiano kia “maora katoa” i to ratou inangaro anga. (2 Korinetia 6:13) Te vaira te pakari no te aere atu ki tetai atu. Ia Koheleta 11:​1, 2, ka tatau tatou: “E titiri i taau kai ki runga i te vai; e manganui akera te rā i topa, rauka akaou atura ia koe. E apai ua atu te tuanga ki nga tangata toko itu, e ki e toko varu ua atu; kare oki koe i kite i te kino te ka tupu ki runga i te enua nei.” Akapeea teia kaveinga e tau ei ki te pirianga oa? Me kua tatanu koe i te au pirianga oa ma te au tangata e manganui, ka aere mai etai ia ratou ka tauturu ia koe me tupu mai te au manamanata.

E paruru anga te au oa tikai kia koe i tetai atu mataara. “E meitaki te putaputa no te taunga,” i akakite ei a Maseli 27:6. Noatu e maata te au tangata ka akapaapaa ia koe, ko te au oa tikai ua te ka tou tika i te apa kino e ka oronga atu i te ako anga tau na roto i te tu aroa.​—Maseli 28:23.

Tei roto te au oa piri vaitata meitaki i te au apinga aroa takitai ua ake te ka akatupu i te akakeu anga papu ki runga ia koe. Ia Angaanga pene 10, ka tatau tatou i tetai tupu anga i roto i te oraanga o tetai opita vaeau Roma ko Korenelio, tei akakiteia e tetai angera e kua akarongoia tana pure. Te tapapaanga i te atoro anga a te apotetoro ko Petero, kua “akaputuputuia mai [e Korenelio] tona kopu-tangata e te au oa tikai nona ra.” Ko te au oa vaitata o Korenelio tetai o te aronga Kenitara mua tei kore i peritome tei takave i te tuatua meitaki e kia akatainuia e te vaerua tapu, ma te manakonakoanga e kia tutara ma Karaiti i roto i to te Atua Patireia. Mei teaa atu tetai akameitaki anga no te au oa piri vaitata o Korenelio!​—Angaanga 10:​24, 44.

Akapeea, i reira, koe i te akariro anga i etai ei au oa? Te pau maira te Pipiria e maata ta te reira e akakite ra no runga i te pirianga oa, i te ako anga tau. (Akara i te pia i raro ake.)

TE NGAI KA RAUKA IA KOE TE AKARIRO I ETAI EI AU OA TIKAI

Te ngai meitaki no te akariro i etai ei oa tikai koia ko te putuputuanga Kerititiano. Te mea mua, ka rauka ia koe te akono i tetai tuatau kia riro ei oa kia Iehova, Tei Anga e te Metua i te rangi ra noou, e ma Iesu Karaiti, toou Akaora. “Kia oronga te tangata i tona uaorai ora no tona au taunga, kare rava e tangata aroa maata atu i te reira,” i na Iesu ei, te pati maira ia koe kia riro ei oa nona. (Ioane 15:​13, 15) Na te akariro anga ia Iehova raua ko Iesu Karaiti ei oa, ka papu ia koe e ka ‘ooia mai koe e raua ki roto i te are piro kore.’ Ae, te aite anga o te pirianga oa ma Iehova raua ko Iesu ko te ora mutu kore.​—Luka 16:9; Ioane 17:3.

Akapeea e raukai ia koe to raua pirianga oa pumaana? Te au umuumu anga kia riro ei manuiri i roto i to Iehova are puakapa e ko tetai ei oa nona te akakiteia maira i roto ia Salamo 15. E akara i te reira i roto i te Pipiria, e tatau i nga irava e rima o taua tata taramo. Pera katoa, kua karanga a Iesu Karaiti: “Ko kotou toku oa, kia akono kotou i te au tuatua katoa taku i akaue atu ia kotou na.”​—Ioane 15:14.

Ae, na te apiianga kia tau ki te akava ngakau e te taangaangaanga i te arataki anga mei te Tuatua a te Atua, te Pipiria, te akaari ra koe e te inangaro ra koe e kia riro ei oa no Iehova e Iesu. E raukai teia, kia aere putuputu katoa koe ki te au uipaanga Kerititiano, i reira te akakiteia ra te kite no runga i te Atua ko Iehova. E rave tiratiratu ua atu koe i te akarongoanga kia Iehova, e ka piri vaitata koe kiaia e tana Tamaiti.

I te au uipaanga ka matau katoa koe i tetai au tangata tataki tai te inangaro ra ia Iehova e te akaari ra i te au ua o te vaerua​—te inangaro, te rekareka, te au, te akakoromaki, te takinga meitaki, te meitaki, te akarongo, te maru, e te akono meitaki​—i to ratou oraanga. (Galatia 5:​22, 23) Me te tauta pakari ra koe i te akariro i etai ei oa e te akakore anga i te tu maromaroa, e aere putuputu ki te au uipaanga Kerititiano i te au epetoma ravarai. Te rave anga i te reira te tuku ra ia koe ki roto i tetai ngai tau no te tatanu anga i te pirianga oa mutu kore ma to te Atua iti tangata akameitakiia.

EI AU OA E TUATAU UA ATU

E apinga aroa meitaki te pirianga oa tikai no ko mai i te Atua ko Iehova. Te tupu maira mei tona tu peretana e te tutu. No tona tu inangaro ra e te oronga ua, kua akaki aia i te enua ma te au mea ora kite kia ratou ka rauka ia koe te akatupu i tetai pirianga oa. E kapiti atu ma te au taeake Kerititiano. E akamaroiroi ia ratou. E aaere ma ratou i roto i te angaanga orometua. E pure putuputu ma e no ratou katoa. I reira te aru ra koe ia Iehova e tana Tamaiti, ko Iesu Karaiti.

E apinga aroa te pirianga oa te ka rauka i te katoatoa te oronga e kia rauka mai. A te tuatau ki mua, tei ia koe te tuatau no te maora i toou au oa. Ka rauka ia koe i te akariro i etai ei oa ma te au mirioni te ora nei i teianei, e pera katoa ma te aronga i te au uki i topa te moe ra i roto i te mate, te tapapa ra i te tuakaouanga e “kore rava te mate.” (Apokalupo 21:4; Ioane 5:​28, 29) E tauta pakari i teianei kia akaoaoa, e kia akariro i etai ei oa i te aronga te inangaro ra ia Iehova. E aruaru i te pirianga oa ma te Atua ko Iehova e Iesu Karaiti na te akarongoanga ki te Tuatua akauruia a te Atua. I reira, e tuatau ua atu, kare rava koe e maromaroa akaou.