E Taangaanga Meitaki i Toou Oraanga

TEI roto te papa i te are, i runga i te roi, te mate ra i te maki cancer. Tei roto tana tamaiti i te are angaanga, te tama ra aia i te au apinga rakau a te papa. Iaia e mou ra i te au apinga, kua akamanako aia no runga i te au mea umere tei raveia e tona papa no ratou. Noatu e tei te pae ua mai te are angaanga i te are, kua kite aia e kare tona papa e tomo akaou i roto i reira, kare e mou akaou i te au apinga tana i taangaanga karape ana. Kua pati taua tuatau ra.

Kua akamanako te tamaiti i te tuatua irava ia Koheleta 9:10: “Ko tei kitea e koe ta to rima e rave ra, ka rave ma to ririnui ra; kare oki e angaanga, kare e kimianga, kare oki e kite, kare oki e pakari, i roto i te vaarua taau e aere na.” Kua kite meitaki aia i taua tuatua irava. E manganui te au taime i tona taangaanga anga i te reira i te apiianga i etai i te tuatua mou o te Pipiria e tei roto i te tu rave angaanga kore ra te mate. I teianei te tupaki ra te mana o ta Solomona tuatua i tona ngakau​—e mea tau kia akono tatou i te ora anga ki tona ki anga e kia rekareka tatou i te au ra te ka rauka ia tatou no te mea ka tae mai te tuatau kare e rauka ia tatou i te rave i te reira.

Kia Rekareka i te Oraanga

I roto i te puka o Koheleta, kua raurau mai te ariki pakari ko Solomona ra i tona aronga tatau kia kimi i te rekareka anga i roto i te oraanga. Ei akatauanga, te akakite maira te pene 3 e: “Kite akera au e, kare atu e meitaki i taua au mea ra, mari ra kia rekareka te tangata e kia takinga-meitaki i te ora anga nei. Kareka ra kia kaikai anake ra te tangata e kia inu, e kia rave aia i te meitaki no tana katoa ra au angaanga; e mea o maiia mai ïa e te Atua.”​—Koheleta 3:12, 13.

Kua akauruia a Solomona e te Atua kia ripiti i teia manako: “I na taku i kite nei: e mea meitaki, e te tau oki i te tangata nei, kia kaikai, e kia inu, e kia rave aia i te meitaki i te au angaanga katoa tana i rave i raro ake i te rā nei, e kia ope rava ake ona puke rā i o maiia mai e te Atua nona ra: ko tana oki teia tuanga.”​—Koheleta 5:18.

Mei te reira katoa oki, kua raurau aia i te aronga mapu: “Ka rekareka, e tenana tangata ou, i toou na ou anga, e kia rekareka oki to ngakau i te au rā o toou na ou anga [me kore, te vaine anga]; e aere ua koe na te au arataa na toou uaorai ngakau, e aruaru oki ta to mata e inangaro ra.” (Koheleta 11:9a) Mei teaa ra te meitaki kia rekareka no te ririnui maata e te maroiroi o te mapu ra!​—Maseli 20:29.

‘E Akamaara i Tei Anga ia Koe’

E tika, kare a Solomona e tuatua nei e e meitaki te aruaru i te au mea pouroa te ka akareka i to tatou ngakau me kore te au mata. (Akaaite ia 1 Ioane 2:16.) Te taka meitaki ra teia i tana i tata i muri mai: “E apaiia ra koe e te Atua ki te akavaanga i taua au mea katoa [te au puapinga penei ka akamerengo i toou au anoano] ra, kia kite mai oki koe.” (Koheleta 11:9e) Noatu e eaa to tatou mataiti, e mea tau kia maara tatou e te akara maira te Atua i ta tatou e rave ra i roto i to tatou oraanga e ka akava ia tatou ma te tau tikai.

Mei teaa te neneva i te akamanako anga e ka rauka ia tatou i te akono i tetai oraanga manako nona uaorai e ka taroaroa i te akono i te Atua e tae ua atu ki to tatou au mataiti i muri iora! Penei ka tapotoia to tatou oraanga i tetai ua atu taime. Noatu e kare te reira e tupu, kare te tavini anga i te Atua e mea ngoie ua i te ruaine anga. Te kiteanga i teia tumu, kua tata a Solomona: “E tenana e akamanako i Tei anga ia koe i to ou anga ra, kare i tae ki te au rā kino ra, e kare i tae ki te au mataiti, e karangaʼi koe ra e, Kare rava oku e mataora anga.”​—Koheleta 12:1.

Te akatupu maira te tangata metua ra i tona kino. I roto i te au tuatua akatutu anga kua akataka mai a Solomona i muri maira i te au tu o te tangata metua. Kua ruketekete nga rima, kua paruparu nga vaevae, e kua iti mai te au nio. Kua inaina te rouru e te pururu anga. Kua tamanamanataia te moe te akaaraaraia anga etai ra i te tangi o tetai manu ra. Ko te au tu​—te kite, te akarongo anga, te amiri, te kakara, e te tongi anga​—te ngaro katoatoa ra. Te kopapa paruparu te akatupu ra i te mataku anga e ko te topaanga e e “matakuia” no etai i runga i te au apinga akaoro. Kare e roa atu kua mate te tangata.​—Koheleta 12:2-7.

E tumatetenga tikai te ruaine anga ki te aronga tei kore i ‘akamaara i Tei Anga ia ratou’ i to ratou mapu anga. No te mea kua kaimoumou ratou i to ratou oraanga, e ko taua aronga ra ‘kare e mataora anga’ i te au mataiti i muri iora. Penei kua kapiti katoaia mai te tu oraanga Atua kore ra ki te au manamanata e te au mamae o te ruaine anga. (Maseli 5:3-11) Ma te mii tikai, te akaraanga ki mua, kare taua aronga ra e kite atu i te tuatau i mua ko te vaarua ua ra.

Te Rekarekaanga i te Ruaine Anga

Kare te aite anga o teia e kare te aronga pakari e reka i te ora anga. I roto i te Pipiria, kua kapiti katoaia te “au rā roa oki, e te au mataiti ora” ra ki to te Atua ra akameitakianga. (Maseli 3:1, 2) Kua akakite a Iehova ki tona oa ko Aberahama: “Ka tae ra koe . . . kia ruaine roa koe ka tanumiaʼi.” (Genese 15:15) Noatu te au tu reka kore o te ruaine anga, kua kitea ia e Aberahama te au e te maru i tona ruaine anga, te akara anga i muri ma te merengo anga i roto i tetai oraanga i te akamori anga ia Iehova. Te akara katoa ra rai aia ma te akarongo ki tetai “oire tumu mou,” ki te Patireia o te Atua. (Ebera 11:10) No reira, “kua ruaineia te tangata, kua maata roa tona mataiti” kua mate aia.​—Genese 25:8.

No reira kua raurau atura a Solomona: “Rai ua atura to te tangata nei au mataiti i te noo anga, e kia rekareka aia i taua au mataiti katoa ra.” (Koheleta 11:8) Noatu e me e mapu me kore e ruaine tatou, te akapiri ia ra te rekareka anga mou ki to tatou pirianga ki te Atua.

Te akapae ke anga te tangata mapu i te au apinga toe a tona metua ra, kua maara iaia teia au mea nei. Kua akamanako aia no runga i te au tangata pouroa tana i kite tei tauta ana i te taangaanga meitaki i to ratou oraanga inara kare i kite i te mataora no te mea kare o ratou pirianga ki Tei Anga ra ia ratou. Mei teaa ra te tauanga i te akaraanga i te reira i muri ake te orongaanga i te akamaroiroi anga kia rekareka i te tuatau te ora ra tetai, kua tuatua poto ua mai a Solomona i te au tumu ma te au tuatua e: “E akarongo ana tatou i te akaotianga o taua au tuatua katoa nei; Ko te Atua te mataku atu, e akono oki i tana au akauenga: ko ta te tangata katoa ïa e pini ua ake”!​—Koheleta 12:13.