Au Mapu Mataora i te Angaanga na Iehova

“Noatu ko te tamaiti ka kitea i te tu o tana au ravenga, me e viivii kore tona tu akono e te tika.”​—MASELI 20:11, New International Version.

1. Eaa etai mea meitaki te tuatuaia ra i te Puka Tapu no Samuela?

PENEI e toru ki te rima ua mataiti a Samuela ou ra i akamataʼi aia i te “angaanga” i te puakapa o Iehova i Silo ra. Ko tetai angaanga nana ko te akatuera i “te au pa o te are o Iehova.” Te karanga ra te Puka Tapu e “Tupu atura taua tamaiti ra ko Samuela, e i akaperepereia mai e Iehova e te tangata katoa.” I tona tupu ake anga, nana i akaoki mai i to Iseraela ra ki te akamori mou. Kua tavini aia i te Atua “i te au rā o tona oraanga katoa.” Noatu e “kua ruaine e kua inaina” kua raurau ua atu aia i te au tangata kia “mataku ia Iehova, e . . . kia tavini kiaia ma te tuatua mou.” Kare ainei i te mea meitaki roa kia tuatua akameitaki mei te reira te au tangata ia koe mei ta te Puka Tapu i tuatua no Samuela ra?​—1 Samuela 1:24; 2:18, 26; 3:15; 7:2-4, 15; 12:2, 24.

2. Eaa ta te aronga rikiriki e apii ra i te au uipaanga o te au tangata o Iehova i teia tuatau nei?

² Me ko koe tetai e Kite no Iehova me kare te aere ra koe ki ta ratou uipaanga Kerititiano, e akara koe i roto i te Are Uipaanga Patireia i te ngai e apiiiaʼi teia apiianga. Ka kite koe i te au tangata no te au mataiti ravarai. Penei e au tangata etai “kua ruaine e kua inaina.” E au metua katoa oki tetai papaki, e au mapu, e tamariki rikiriki, e pera katoa te au pepe i roto i nga rima. Te apii ra ainei te aronga rikiriki roa? Ae, e ui atu ki te aronga tei apaiia maira ki taua au uipaanga ra ia ratou e mea riki ra. Ka akakite papu atu ratou kia koe e, mei to ratou au mataiti mua, mairai kua apii ratou kia akangateitei i te Atua, kia aroa i tona au tangata, e kia manako ariki i te au ngai te akamoriia ra aia. I te topa anga te tuatau, kua kite te aronga rikiriki i te au tuatua mou meitaki ra. E manganui te au mapu, kua tupu akera te kite e te manako ariki, riro maira ei tuanga no te ‘au mapu tane e te au paretenia, te au tangata ruaine e te au tamaroa’ ta te tata salamo i raurau ra kia “akapaapaa i te ingoa o Iehova, tona anake ra te ingoa teitei roa.”​—Salamo 148:12, 13, NW.

3. Eaa i tuke ei te akara anga a te aronga ou i te oraanga tei kite i te Puka Tapu, i ta te aronga kare ra i kite?

³ Me ko koe tetai peretana mapu te apai putuputu maira toou nga metua ia koe ki te reira au uipaanga, ko koe tikai tetai tei akameitakiia. E manganui te au mapu te taitaia ra no te au manamanata o teianei ao. Penei te mataku ra tetai papaki e ka akapouia e te tangata te enua nei. Kua kite koe e kare te Atua e tuku kia tupu te reira, e kare aia e akatika kia akakino ua atu te tangata i teia paraneta manea. Kare aia e tuku kia tupu te reira, ka rave te Atua mei ta te Puka Tapu i tuatua ra e, “ka akakino i te aronga te akakino ra i te enua nei.” Kua kite koe e te taputou maira te Puka Tapu e tuatau meitaki te vai maira ki mua i roto i to te Atua ao ou te vaitata ra.​—Apokalupo 11:18, NW; Salamo 37:29; 2 Petero 3:13.

Toou Uaorai Akarongo

4. Eaa te apainga te ka tukuia ki runga i te au mapu tei kite i to te Atua mataara, e i akapeea a Samuela ou ra i riro ei ei akaraanga meitaki no te reira?

⁴ I te akamata anga, penei kua aruaru toou nga metua i te mataara no te tuatua mou Kerititiano. Kua aere koe ki te au uipaanga Kerititiano no te mea kua apai raua ia koe, e penei kua rave katoa koe i te angaanga i te Atua no te mea ko ta raua katoa ia i rave. Inara, i te topa anga te tuatau, kua riro te raveanga e te akarongoanga ia Iehova ei rekarekaanga noou uaorai. Na te metua vaine o Samuela ou ra i akamata iaia i te mataara tika, inara kua aru aia uaorai i te reira. Ka tatau tatou: “Noatu ko te tamaiti ka kitea i te tu o tana au ravenga, me e viivii kore tona tu akono e te tika.”​—Maseli 20:11, NIV.

5. (a) Eaa te puapinga maata o te Puka Tapu ra? (e) Eaa ta Paulo i akakite kia Timoteo no te puapinga o te Tuatua a te Atua tei tataia ra?

⁵ Te akakite maira te au Tuatua Tapu eaa ta te Atua e anoano ra ia tatou. Te akakite marama maira kia tatou akapeea te akamareka iaia, ma te orongaanga i te akakiteanga maata e eaa te ka akatupu kia meitaki tatou. Kua akakite te apotetoro ko Paulo ki tona tauturu mapu kia Timoteo: “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra. Kia apa kore te tangata o te Atua, ma te tau tikai i te au angaanga memeitaki katoa ra.”​—2 Timoteo 3:16, 17.

6. Eaa ta te puka a Maseli i tuatua no te puapinga o te kite e te pakari no ko mai i te Atua ra?

⁶ Te akakite katoa maira te Puka Tapu kia tatou e “akarongo i te ako e kia pakari.” Te karanga ra kia “vaio marie” i ta te Atua akauenga, kia “kapiki nui koe i te kite,” e kia “kimi pu tikai” koe i te kite oonu mei te apinga [nui] uunaia ra. Me aru koe i teia akauenga, ei reira “koe e kite ei i te mataku ia Iehova, e e rauka ia koe te kite i te Atua.” Ka kite katoa oki tatou i teianei ako: “E tenana, e akarongo mai iaku, e te au tamariki e; e ao oki to te aronga e akono mai i toku nei au aerenga. E akarongo mai i te ako, kia pakari, auraka rava e anga ke i te reira. E ao to te tangata e akarongo mai iaku ra . . . Ko tei kite mai iaku ra, kua kite ïa aia i te ora, e akaperepereia mai oki aia e Iehova.” Te manako maata ra ainei koe i te Puka Tapu e te tuku ra i te reira tu tauta anga i te apiianga i te au apinga tana e tuatua ra?​—Maseli 2:1-5; 8:32-35.

Kia Rauka te Kite

7. Eaa te au apinga puapinga maata ta tatou ka tau kia apii?

⁷ Te kite ra tetai papaki o te au mapu i te au tuatua no te tarekareka, me kare ka rauka ua ia ratou i te akakite kia koe i te au mea ravarai no ta ratou pupu akatangi imene e akaperepere ra. Kua kite ratou e e ngoie ua te kite i te reira au apinga e ka maara katoa oki no te mea te manako ra ratou i te reira. Inara ko te uianga puapinga maata rava, Eaa ta ratou i kite no te Atua? E tamanako ana i tana i rave. Na te Atua i anga i te ao katoa e pini ua ake. Kua totouia e ia eaa ta te tangata ka rave e eaa te ka tupu i mua roa atu i te tupu anga. Kare te Puka Tapu i akakite anake i te Atua mari ra te apii ra ia tatou e akapeea e raukai ia tatou i te akamareka iaia. Te akakite katoa maira e akapeea e mataoraʼi te oraanga i teianei e akapeea e raukai te ora mutu kore ki roto i tana ao ou no te tuatua tika. Kare ainei te reira i te mea maata roa atu te puapinga i to te kiteanga koai tei re i te tarekareka poro me kare te apiianga kia kite i te ingoa o te aronga akatangi imene ta te au tangata kare ra e roa atu ka ngaropoina?​—Isaia 42:5, 9; 46:9, 10; Amosa 3:7.

8. Eaa nga akaraanga meitaki tei akanooia e Iosia raua ko Iesu?

⁸ I te 15 mataiti anga te Ariki mapu ko Iosia ra, “kua akamata aia i te kimi i te Atua o tona tupuna ko Davida.” E 12 a Iesu, i kiteaʼi aia “te noo ra i rotopu i te au orometua” i te iero o Iehova, “te akarongo atura e te ui atura kia ratou.”a Noatu eaa toou mataiti, kua akatupu ainei koe i te anoano tikai kia kite i te au mea ta te Atua ra i rave e ka rave mei ia Iosia raua ko Iesu rai?​—2 Paraleipomeno 34:3; Luka 2:46.

9. (a) Eaa te manamanata te tupu ra ki te aronga ou e manganui? (e) Na teaa e akangoie mai i te tatauanga e te apiianga, kua kite ainei a koe uaorai me e tika te reira?

⁹ Inara, penei ka karanga koe: ‘E rave anga ngata te apii.’ E manganui te au mapu, e te ruaine katoa oki, kare i rava ana ta ratou tatau kia riro ei te tatauanga e mea ngoie ua. Ko te maata atu taau tatau, ko te riro anga ia kia ngoie ua te tatauanga. Ko te maata atu taau apii, ka ngoie atu te kiteanga. Ka kapiti atu koe i te au manako ou ki te au apinga taau kua kite ke ana, e ka akariro kia ngoie ua i te marama e pera katoa kia maaraia.

10. (a) Akapeea e maata atu ei taau e rauka mai mei te au uipaanga Kerititiano ra? (e) Eaa te tupuanga taau i kite no te reira tu?

¹⁰ Eaa te ka tauturu ia koe kia maata atu te kite i te Atua? Penei ka tau koe kia putuputu atu te aere ki te au uipaanga Kerititiano. Ka rauka ainei ia koe i te teateamamao na mua e ka o atu ei i te paupau anga? Ei akatauanga, e rauka ainei ia koe kia oonu atu te kite i teia apiianga nei na te akaraanga i te au irava Tuatua Tapu tei akakite uaia maira te ngai e kare ra i tataia? Kua tata ainei koe i tetai tuatua me kare e rua tuatua ki te pae mai ei akamaara ia koe eaa ta teia au irava tatakitai e topiri maira ki te parakarapa me kare ki te apiianga? E ravenga ainei naau te kapiti atu e tai ua o teia au irava i te pauanga ei akakite i toou ariki anga no te uriuri i te Tuatua Tapu ra? Ko tetai tangata pakari no te putuputuanga tei putuputu i te aere ki te au uipaanga no te au mataiti e manganui kua karanga e: “Kua kite au i te tu ngata i te tamou i toku manako ki runga i te apiianga kare ra au i teateamamao tikai, inara e mea rekareka tikai naku te aru i te apii taku i apii marie ra.”

11. Akapeea e maata atu ei taau e rauka mai no te au tuatua mei te Puka Tapu maira, e eaa i puapingaʼi te reira?

¹¹ Me akarongo atu koe ki te au tuatua no te Puka Tapu, te tata ra ainei koe i etai tataanga poto ua ei tauturu ia koe i te akataka i peea te akanoonoo anga i te reira e kia tamou ki toou manako i te au mea i tuatuaia maira? Te akaaite atura ainei koe i taau i akarongo ana ki taau kua kite i mua ana, no reira e ngoie uaʼi toou kite e kia meitaki atu ei akamaara anga? I pure a Iesu e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Kare ainei e ko te kite te ka arataki ki te ora ko te kite meitaki ia te ka rauka ia koe? E tamanako i ta te Puka Tapu tuatua no te reira: “Ko Iehova oki tei oronga mai i te pakari: no roto i tona vaa te kite e te karape. Kia o mai te pakari ki roto i to ngakau na, e kia riro te kite ei mea mataora i to [meta] ra; Na te akono meitaki e tapapa ia koe i reira; e na te kite e tiaki ia koe.”​—Maseli 2:6, 10, 11.

Kia Tupu te Manako Ariki

12. Eaa etai au apinga meitaki maata ta te Atua ra i rave no tatou?

¹² Te manako ariki ra ainei tatou i ta te Atua i rave no tatou? Nana i anga i te enua manea e kua akateateamamao i te reira no te oraanga. Nana i anga mai i to tatou nga metua mua ra, na reira i raukai kia anauia mai tatou. Nana i akanoonoo kia rauka te tauturu a to tatou ngutuare tangata e pera katoa to te putuputuanga aroa ra. (Genese 1:27, 28; Ioane 13:35; Ebera 10:25) Kua tono mai aia i tana uaorai Tamaiti anau mua ki te enua kia apii ia tatou kia maata atu te kite Iaia uaorai e kia oronga i te oko e raukai te ora mutu kore. Te manako ariki ra ainei koe i te reira au apinga aroa meitaki? Te akakeu ra ainei te reira ia koe kia ariki i tana patianga kia apii no runga iaia e kia tavini atu iaia?​—Mataio 20:28; Ioane 1:18; Roma 5:21.

13. Eaa koe i manako ei e te akamanako maira te Atua i te au tangata tatakitai ra?

¹³ Te manako ra i te au tangata Tei Anga mai ra i te ao katoa e pini ua ake. Kua karanga aia ia Aberahama ko “toku oa,” e kua tuatua aia no Mose e: “Kua kite au ia koe i toou ingoa.” (Isaia 41:8; Exodo 33:12) Te akakite maira te puka Apokalupo e e puka akatutuanga ta te Atua me kare “buka o te ora” tei roto i reira te au ingoa o te au tavini tiratiratu ra “mei te akatumuanga o teianei ao.” Ka tauruia ainei toou ingoa ki reira?​—Apokalupo 3:5; 17:8; 2 Timoteo 2:19.

14. Akapeea e meitaki mai ei toou oraanga na te aruanga i ta te Atua ra au kaveinga?

¹⁴ Te meitaki ra ta te Atua au kaveinga. Na te raveanga i te au mea na tana mataara e takore atu i te au manamanata e manganui​—te akaturi, te apinga akakona, te kona kava, te nui inangaro koreia, te maki opi, te ta ua, te ta kia mate, e te papaanga roa no etai atu mea kino. Na te aruanga i tona mataara e tauturu ia koe kia kitea te au oa tau tikai e kia noo ma te oraanga rekareka. Kare ainei te reira i te mea meitaki kia raveia? (1 Korinetia 6:9-11) Noatu rai ko tetai tangata ou tei akapapu takere i tona manako kia rave angaanga na to te Atua mataara ka rauka maata atu iaia te maroiroi no te rave i te tika. Te karanga ra te Puka Tapu: “Te tangata tiratiratu ra, e tiratiratu katoa [ta Iehova].” Te akapapu katoa maira kia tatou e kare aia “e akaruke i tona aronga tiratiratu ra” kare oki “e akaruke i tona au tangata.”​—Salamo 18:25; 37:28; 94:14; Isaia 40:29-31.

Aere Ki Mua i te Tavinianga i te Atua

15. Eaa te apiianga ta Solomona i oronga ki te au mapu ra no te Atua?

¹⁵ Te akanooia ra ainei taau akakoroanga ki roto i te ao taito te mate atura me kare ki roto i te ao ou no te tuatua tika? Te akarongo ra ainei koe ki te Atua, me kare te akarongo ra ainei koe ki te aronga pakari o teianei ao te patoi ra iaia? Te riro ra ainei te tamataora, te apii teitei, me kare te angaanga akapou taime, ki mua atu i te Atua e tana angaanga? Na te Ariki pakari ko Solomona i tata i te puka Puka Tapu katoa a Koheleta ei akakite e eaa te mea tau kia raveia na mua i to tatou oraanga. Kua taopenga aia e: “E tenana e akamanako i Tei anga ia koe i to [mapu, NW] anga ra, kare i tae ki te au ra kino ra, e kare i tae ki te au mataiti, e karangaʼi koe ra e, Kare rava oku e mataora anga. E akarongo ana tatou i te akaotianga o taua au tuatua katoa nei; Ko te Atua te mataku atu, e akono oki i tana au akauenga: ko ta te tangata katoa ïa e pini ua ake.”​—Koheleta 12:1, 13.

16. Akapeea te au mapu ou me itae atu no te au angaanga kia kapitiia mai?

¹⁶ Pouroa te au taeake Kerititiano pakari taau e kite na​—te aronga pakari, te au painia, te akaaere kotinga e te akaaere tapere—​e tamariki ratou i mua ana. Na teaa i taki ia ratou ki te au akameitakianga ta ratou e rekareka i teia tuatau nei? Kua inangaro ratou i te Atua e kua anoano i te tavini atu iaia. E manganui i o ratou ra tei rave i te angaanga e maata te taime kia rauka te kite e te marama, ia ratou e mapu ra. I apii ratou e i paupau katoa oki i te au uipaanga ra. Kua rave katoa ratou i te apii ia etai atu, e kua itae atu ratou i etai atu angaanga​—te painia, e te angaanga i Betela, me kare etai angaanga e puapingaʼi. Kare ratou i te ‘mapu ririnui,’ mari ra e manako tau e te manakonako to ratou mei toou rai. Inara, kua akono ratou kia tau ki te ako e: “Ta kotou au mea e rave ra, e rave ïa ma te ngakau katoa, mei te mea e na [Iehova], eiaa e na te tangata.”​—Kolosa 3:23; akaaiteia atu kia Luka 10:27; 2 Timoteo 2:15.

17. Eaa te ka tauturu i te au mapu kia tere ki mua i ta te Atua ra angaanga?

¹⁷ Akapeea koe? Te ariki tika ra ainei koe i te au mea na te Atua? Te iki ra ainei koe i te au oa no roto mai i te aronga te tuku ra i te au apinga vaerua ei mea mua? Te akamaroiroi ra ainei koe i etai atu kia piri atu kia koe i te angaanga Kerititiano? Te aru ra ainei koe i te aronga kua pakari atu i te angaanga Kerititiano, te aronga e tere atu te kite kia apii mai ia koe, kia tongi i to ratou rekareka, e kia akamaroiroiia e ta ratou au angaanga memeitaki? Te maaraara ra i tetai Kite te ra e vaitata e 20 mataiti i topa, i pati atu ei tetai tangata pakari iaia kia aere kapiti raua no te taime mua i te angaanga tutu aere. Ko te reira, e nana ei, te akaariu ke anga i tona oraanga: “Ko te taime mua te reira i aere ei au no toku inangaro, kare e no te mea kua raveia au e toku nga metua.”

18. Eaa etai apinga no te tamanakoanga i mua ake i te orongaanga ia koe uaorai no te papetito angaia?

¹⁸ Me te aere ra koe ki mua i te raveanga i te au angaanga na to te Atua mataara, kare koe e roa ka tamanako no te papetitoanga. E mea puapinga kia maara e kare te papetitoanga i tetai tika no te aere atu ki roto i te pakari anga o te tangata mapu ra. Kare te reira i te akakite anga e te pakari maira koe, kare katoa oki i te takainga tau kia rave koe no te mea kua rave toou au taeake i te reira. I mua ake ka pati ei koe kia papetitoia, e mea tau kia papa koe kia kite i te tumuanga no te tuatua mou e kia noo rotai ma te Tuatua a te Atua. E mea tau katoa kia kite koe e akapeea te tuaanga i te reira kite kia etai atu e kia marama e e tuanga maata ia no te akamori mou. (Mataio 24:14; 28:​19, 20) Ka tau katoa koe kia kite e i muri ake i te reira takainga puapinga ei Kerititiano ka manakoia koe kia akono rotai ma te kaveinga tuatua tika o te Puka Tapu no te tu viivii kore.b I roto i toou ngakau, kua tau koe kia akatapu i toou oraanga ki to Metua aroa i te rangi ra.​—Akaaiteia atu kia Salamo 40:8, 9.

19. Aea e tau ei te tangata kia papetitoia?

¹⁹ Ko te papetitoanga e takainga te ka rave koe me kua papu ngaueue kore toou manako e noatu eaa te ka tupu i toou oraanga, ka tavini ra koe i te Atua. E akairo te reira ki te katoatoa e kua tuku oti takiri koe i toou akatapuanga arairai koreia kia Iehova na roto ia Iesu Mesia kia rave i to te Atua anoano. Te maara ra i tetai tangata pakari Kerititiano te ra, vaitata e apa te anere mataiti i topa, i tona kite anga e: “E mea tika kia rave au i tetai apinga no te reira!” Ko Michelle, e Kite ou tei papetitoia i New­castle, i Peritane, i nga mataiti toko iti ua i topa, kua karanga aia e: “E 13 oku mataiti, i kite ei au e kia akatapu i toku oraanga e ka papetito ei; kare atu e apinga naku kia rave mari ra kia tavini i te Atua.”

20. (a) Eaa te akaraanga meitaki tei akanooia e te au mapu e raungauru ua atu ra tauatini? (e) Eaa te manako anga tau no te reira takainga?

²⁰ E raungauru ua atu tauatini te au mapu ou tei oti ua akenei i te papetitoia. Kua apii ratou i te Tuatua a te Atua e kua kite i tona au mataara, ei reira, na te papetitoanga i te vai, kua kapipiti rekareka atu ratou ki te aronga e manganui kua pakari mai, i te akakite akatutuanga ki te au tangata i to ratou akatapuanga ki te Atua. Kua kite ratou e kare te papetitoanga i te openga mari ra ko te akamataanga ua ia i te mataara no te oraanga tei akatapu tikaia, e kua manako papu ratou kia aru i ta Iehova angaanga e tuatau ua atu.

[Au Tataanga Rikiriki i Raro]

Akapeea Koe Me Pau?

◻ Eaa i puapingaʼi kia kite i te Tuatua a te Atua ra?

◻ Akapeea e raukai ia koe kia maata atu taau mei te au uipaanga Kerititiano maira?

◻ Eaa te au akameitakianga mei ko mai i te Atua ra te ka tau kia akakeu ia tatou kia akarongo kiaia?

◻ Akapeea e raukai kia tere koe ki mua i roto i ta te Atua ra angaanga?

◻ Aea e tau ei tetai kia papetitoia?