Maara Ainei ia Koe?

Kua akamanako matakite ainei koe i te au itiu i ou ake nei o Te Punanga Tiaki? Me koia ia, ka reka koe i te akamaara i te ka aru mai:

◻ Eaa te au uianga penei ka ui ia e tetai nga Kerititiano i mua ake ka akamata ei raua i te manako i te tapao anga?

‘Kua papu ainei iaku te turanga i te pae vaerua o tetai e te akono anga ki te Atua? Ka rauka ainei iaku i te akamaara ia maua e tavini ra i te Atua e tuatau ua atu? Kua kite meitaki ainei maua tataki tai i to tetai au tu tangata? Kua papu ainei iaku e kua tau tikai maua? Kua rava ainei ta maua i kite no runga i te au raveanga i te tuatau i topa e i teianei o te au atianga o tetai e tetai?’​—8/15, kapi 31.

◻ Eaa te aiteanga o ta Iesu tuatua ki tana au pipi: “Ko kotou te tai no te enua”? (Mataio 5:13)

Ko te aiteanga, o teia tuatua a Iesu, ko ta ratou angaanga tutu aere ki tetai atu no runga i te Patireia o te Atua ka riro ei akonoanga, me kare ei akaoraanga, ki te aronga tei akarongo ra. E tika, ko te aronga tei rave i te au tuatua a Iesu ka paruruia mei te pe o te tu tau e te pae vaerua i roto i te ao nei.​—8/15, kapi 32.

◻ Akapeea tetai tokorua tapao e kopae ei i te ereere o te ainga tau kore?

Me ko koe tetai te aere kapiti ra ma tetai taau e inangaro ra, e kite pakari koe kia kopae i te taka keanga ko korua anake ko toou tokorua e inangaro atura i raro ake i te au turanga tau kore. No reira penei e meitaki atu kia rekareka i to korua kapiti anga i roto i tetai pupu ra me kare i tetai ngai tangata. E tuku i te au kotinga no te akakite anga inangaro, ma te akangateitei anga tetai i te au manako ngakau e te akava ngakau oki o etai ke ra.​—9/1, kapi 17, 18.

◻ Eaa te tuatua kite?

Ko te tu ia kia akara i tetai tumu e te kite karape i tona tu na te opu anga i te au kapiti anga i rotopu i tona au tuanga e te katoa anga, te marama anga i te reira. (Maseli 4:1)​—9/15, kapi 13.

◻ Eaa ta Iehova e pati maira no tatou i teia tuatau?

Ko te mea ua, te pati maira Iehova ia tatou kia akarongo ki Tana Tamaiti e kia aru i tana akatauanga e te au apiianga. (Mataio 16:24; 1 Petero 2:21)​—9/15, kapi 22.

◻ Koai ua te ka kite i te au?

I te mea e ko Iehova “te Atua au,” ka rauka anake kia tupu te au ki te au tangata te inangaro ra i te Atua e te akangateitei oonu ra i tana au kaveinga tuatua tika ra. (Roma 15:33)​—10/1, kapi 11.

◻ Akapeea i raukai ia Iosepha te maroiroi maata kia tuatua e kare ki te vaine a Potiphara i te au ra?

Kua akaperepere a Iosepha i tona pirianga kia Iehova e ko tetai mea puapinga maata i te au navenave poto ua. E pera katoa, noatu e kare aia i raro ake i te papaanga ture tu-Atua, kua marama meitaki tikai a Iosepha i te au kaveinga akono. (Genese 39:9)​—10/1, kapi 29.

◻ Mei teaa ra to tatou anoano maata kia akakore i to tatou au taeake?

To tatou manakonakoanga no te rauka anga mutu kore ta te Atua ra akakore anga ara te vaira te maataanga ki runga i to tatou akatikaanga kia akakore i te ara a tetai ke. (Mataio 6:12, 14; Luka 11:4)​—10/15, kapi 17.

◻ Ko teea tu ara ainei ta Mataio 18:15-17 i tou ra, e eaa te akakite maira i te reira?

Te au ara ta Iesu i taiku ra kua rava tona kino e ka rauka i te reira i te taki atu i tei tarevake ra kia manakoia “aia mei te etene ra e te telona.” Kare te au ngati Iuda i kapiti atu ki te au Kenitara, e kua kopae ke ratou i te au terona. No reira te taiku ra Mataio 18:15-17 ki te au ara kikino, kare i te au mea akariri tangata ua me kare akamamae te ka rauka ua ia koe kia akakore atu e kia akangaropoina oki. (Mataio 18:21, 22)​—10/15, kapi 19.

◻ Eaa te kapiti maira i te inangaroanga i te Tuatua a te Atua?

Te taki atura te inangaro anga i te Tuatua a te Atua ra i tetai kia noo rotai ma tona au umuumu anga. (Salamo 119:97, 101, 105) Ka umuumu teia i te akatikatika anga tamou marie o te manakoanga o tetai e tona tu oraanga oki.​—11/1, kapi 14.

◻ I te mea e maata tei rauka mai mei te rima o Iehova ra, eaa ta tatou ka oronga ki te Ariki maata roa atu e Tei Oronga?

Te akakite maira te Pipiria e ko te apinga aroa meitaki roa atu ka rauka ia tatou i te oronga kia Iehova koia oki kia “apai i te atinga ra i te akameitaki.” (Ebera 13:15) No teaa ra? No te mea te piri atura teia atinga ki te akaoraanga i te oraanga, e manako anga maata no Iehova i roto i teia tuatau openga. (Ezekiela 18:23)​—11/1, kapi 21.

◻ Eaa to Solomona manako i te tata anga aia e: “E tau te tuatua a te aronga pakari ra ki te ko”? (Koheleta 12:11)

Ko te au tuatua a te aronga e pakari tau i te Atua to ratou te ko ra i te aronga tatau me kare te aronga akarongorongo kia akatere ki mua kia rotai ma te au tuatua pakari tei tatauia me kare tei akarongorongoia ra.​—11/15, kapi 21.

◻ Eaa te kite karape tu Atua?

Ko te tu kia rauka i te akatakake i te tika mei te tarevake e oti kia iki i te aerenga tau. Te apii anga e te taangaanga anga i ta te Atua Tuatua te oronga maira i te kite karape.​—11/15, kapi 25.

◻ Ka tau tetai tu puareinga i te ariki i te au apainga kia akaaiteiteia ki teaa? (2 Timoteo 3:1)

Ka tau kia akaaiteiteia ma te au akavaanga meitaki. Kare tetai e tau kia rave ua i te au apainga e manganui e ka ngere iaia tona tu rekareka i roto i ta Iehova angaanga. E meitaki te tu puareinga, inara kia akaata katoa te tu puareinga i te tu tau e te “tau meitaki.” (Tito 2:12; Apokalupo 3:15, 16)​—12/1, kapi 28.

◻ Akapeea te metua i te aro atu anga i te akaaoanga akono tamariki?

Kua ako mai te Atua i te au metua kia riro mai ei au akaraanga, ei au oa, ei aronga komunikeiti, e ei au puapii. (Deuteronomi 6:6, 7)​—12/1, kapi 32.