Eaa Taau Tu Ingoa e Akono ra Noou Uaorai?

KUA tatau ana ainei koe i tetai pa akakiteanga i roto i taau nuti pepa me kore kua kite ana i tetai ripoti roa no runga i te oraanga e te au mea i rauka i taua tangata i mate ra? Kua ui ana ainei koe kia koe uaorai, ‘Eaa ta te tangata ka tuatua no runga iaku.’ E ia i akamanako ana e ka akapeea ratou me akamaaraia me mate ratou? No reira, e akamanako i teia au uianga: Eaa ta te tangata e tuatua ra noou i teia ra me kua mate koe i nanai? Eaa taau tu ingoa e akono ra noou uaorai? Akapeea koe me inangaro kia akamaaraia e te aronga tei kite ia koe e te Atua?

Kua tuatua te tangata tata pakari o te puka Pipiria o Koheleta e: “E meitaki maata to te rongo meitaki i to te manongi meitaki ra; e te rā e mate ei ra i te rā anau anga.” (Koheleta 7:1) Eaa ra i meitaki atu ei te ra i mate ei tetai i te ra i anauia ei? No te mea i te anau angaia mai tetai tangata kare i akanooia ake tona ingoa. Kare ona tua oraanga. Ka akatupu mai tona aerenga oraanga i te ingoa meitaki me kore te ingoa kino. Ko te aronga tei akanoo ke i te ingoa meitaki no tetai au mataiti, e meitaki ia te ra i mate ei i te reira tu i te ra i anauia ei.

No reira e ikianga ta tatou. Ko te tika, i te au ra ravarai e manganui ta tatou au ikianga te ka akataka mai i to tatou ingoa i te ra e mate ei tatou, i te mea tikai e ka akapeea tatou me akamaaraia mai e te Atua. No reira, kua tata taua tangata tata pakari Epera: “E akameitakiia te aronga tuatua-tika kia maaraia ra: kareka te ingoa o te aronga kino ra, ka pe ïa.” (Maseli 10:7) Kia akamaaraia e te Atua no tetai akameitakianga​—e akangateiteianga ia!

Me pakari tatou, ko to tatou akakoroanga koia oki kia akamareka i te Atua na te akono anga ma te rotai ki tana au turanga. Tera te aiteanga ko te aru anga i te au kaveinga puapinga ta Karaiti i akakite mai: “‘E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.’ Ko te akauenga mua teia e tei maata. E mei te reira katoa ra te rua, ‘E aroa atu koe i toou tangata tupu mei te aroa ia koe uaorai.’ Te ture katoa e te au peroveta ra, tei teianei puke ture e rua nei.”​—Mataio 22:37-40.

Te akamaaraia ra etai ei aronga oronga ua i te meitaki ki te au tangata, ei aronga turuturu i te tu oraanga tangata, ei aronga akakitekite i tei tau no te tangata, me kore i tei rauka ia ratou i roto i te pitiniti, te taineti, te rapakauanga, me kore i roto i tetai atu au angaanga? Akapeea, ra, koe me inangaro kia akamaaraia?

Kua tuatua te tangata atu Tekotia ko Robert Burns (1759-96) tei varevare ua atu e kia oronga mai tei teitei i te tu kite kia tatou kia akara ia tatou uaorai mei ta tetai ke e kite maira. Ka rauka ainei ia koe i te akara tika ua ia koe uaorai e ka tuatua e e ingoa meitaki toou ki tetai tangata e te Atua? I te openga ra, e puapinga maata atu to tatou pirianga ki tetai ke i tetai au raukaanga poto ua ka rauka ia tatou i roto i te ngai tarekarekaanga me kore te pitiniti. No reira ko te uianga i reira: Akapeea ta tatou akonoanga i tetai ke​—ta tatou uriurianga, to tatou tu, to tatou tu komunikeiti anga—​i te akakeu anga ia ratou? Te manako ra ainei ratou ia tatou ei aronga aravei uaia me kore ei aronga manako kore? Ei aronga takinga meitaki me kore ei aronga tu kino? Ei aronga tu tau ua me kore ei aronga tu maro? Ei aronga tu maanaana e te aroa ua me kore ei aronga tu oaoa kore e te atea ke? Ei tangata akaapa akamamae me kore ei tangata ako tau ua? Ka akara ana tatou i etai au akaraanga mei te tuatau i topa e i teianei kia kite i te ka rauka ia tatou i te apii mai.

[Tutu i te kapi 3]

Kua varevare ua atu a Robert Burns e kia oronga mai tei teitei i te tu kite kia tatou kia akara ia tatou uaorai mei ta tetai ke e kite maira

[Akameitakianga]

From the book A History of England