Aronga Pakari, e Akava ma te Tuatua Tika

“Me raveia tetai akarongoanga i rotopu i to kotou au taeake, kia akava kotou ma te tuatua tika.”​—DEUTERONOMI 1:16, NW.

1. No runga i te akavaanga, eaa te pupu akaaere tei raveia, e eaa te aite anga o te reira no te au akava tangata nei?

EI AKAVA Teitei Rava, kua orongaia e Iehova te mana akava anga ki tana Tamaiti. (Ioane 5:27) Ei muri iora, ei Upoko no te putuputuanga Kerititiano, kua taangaanga a Karaiti i te tavini akono meitaki e te pakari e tona Pupu Akaaere ei iki i te aronga pakari, i etai tuatau kua riro ko ratou ei au akava. (Mataio 24:45-47; 1 Korinetia 5:12, 13; Tito 1:5-9) Ei au akava komono, tei raro ake teia aronga i te apainga kia aru vaitata i te akaraanga a nga Akava i te rangi ra, koia a Iehova raua ko Iesu Karaiti.

Ko Karaiti​—Te Akava Akaraanga Meitaki

2, 3. (a) Eaa te totou no te Mesia te akakite maira i to Karaiti au tu ei Akava? (e) Eaa etai tumu meitaki ra no te akamanakoia?

² Kua oti te tata anga totou no Karaiti ei Akava: “Ka noo ua mairai te Vaerua o Iehova ki runga iaia, te Vaerua o te pakari e no te karape; te Vaerua o te ako e no te mana; te Vaerua no te kite, e no te mataku ia Iehova. E maata oki tona kite i te mataku ia Iehova; kare aia e akava ua i ta ona mata i akara ra, kare katoa e akatika ua i ta ona taringa i akarongo ra: I te tuatua-tika ra ka akava mai ei aia i te aronga ao ra, e akatika oki aia ma te tuatua-tau, no te aronga maru o te enua nei.”​—Isaia 11:2-4.

³ E akamanako ana i taua totou ra i te au tu e raukai ia Karaiti i te “akava mai ei aia i to te ao katoa nei ma te tuatua-tika.” (Angaanga 17:31) Ka akava ra aia kia tau ki te vaerua o Iehova ra, te pakari no te atua, te karape, te ako, e te kite. E akara katoa oki, e ka akava ra aia ma te mataku ia Iehova. E no reira, ko “te nooanga akava anga o te Karaiti” e akatutu anga ia no, “te nooanga akava anga o te Atua ra.” (2 Korinetia 5:10, NW; Roma 14:10, NW) E matakite aia i te akava anga i te au tumu kia tau ki ta te Atua ra akava anga ia ratou. (Ioane 8:16) Kare aia e akava na te akara mata ua me kare na te akarongo anga anake ua. Te akava ra aia ma te tuatua tau i te aronga maru e te aronga akaaka. Mei teaa ra te umere i teia Akava meitaki! E mei teaa ra te akaraanga umere no te au tangata apa ua nei tei kapikiia kia rave i te angaanga akava anga i teia tuatau nei!

Au Akava o te Enua Nei

4. (a) Eaa tetai angaanga a te 144,000 a te Tauatini Mataiti Tutara anga o Karaiti? (e) Eaa te totou te akaari maira e ka ikiia tetai papaki o te au Kerititiano akatainuia ra ei au akava i te tuatau te vaira ratou i te enua nei?

⁴ Te akakite maira te Au Tuatua Tapu e e tokoiti ua te au Kerititiano akatainuia ra, akamata mai i te 12 au apotetoro ra, te ka taokotaiia atu ei au akava ma Iesu Karaiti i te tuatau o te Tauatini Mataiti. (Luka 22:28-30; 1 Korinetia 6:2; Apokalupo 20:4) E toenga to te au mema o te aronga akatainuia ra o te Iseraela vaerua i runga i te enua nei tei akavaia e kua akaoraia ratou i te 1918-19. (Malaki 3:2-4) No teia akaora anga o te Iseraela vaerua ra, kua oti te totouia mai e: “E akaoki mai au i to au akava ra mei tei muatangana ra, e te au tumu korero naau ra mei tei te akamataanga ra.” (Isaia 1:26) E no reira mei tana i rave i “te akamataanga ra” o te Iseraela kopapa, kua oronga katoa a Iehova i te au akava tuatua tika e te au tumu korero no te toenga o te aronga akaoraia ra.

5. (a) Koai ma tei “tukua atura ei au akava” i muri ake i te akaora anga o te Iseraela vaerua ra, e akapeea te akatutu anga mai ia ratou i te puka Apokalupo ra? (e) Naai e tauturu ana i te au akaaere akatainuia ra i teianei i te angaanga akava anga, e akapeea te akamatau anga i teia aronga kia riro ei au akava meitaki atu?

⁵ I te akamata anga, ko te ‘au tangata pakari’ tei “tukua atura ei au akava” e aronga pakari akatainuia te katoatoa, me kare e aronga kua pakari. (1 Korinetia 6:4, 5) Te akatutuia maira i te puka Apokalupo te aronga akaaere akatainuia tei akangateiteiia, e tiratiratu oki ratou, te mou ra a Iesu i roto i tona rima katau, koia oki, i raro ake i tana akatereanga e tana arataki anga. (Apokalupo 1:16, 20; 2:1) Mei te 1935 mairai kua rauka mai i te aronga akatainuia ra te turu anga tiratiratu a tetai “urupu maata” e manakonako anga to ratou ra kia ora atu i “te tumatetenga maata” e kia ora e tuatau ua atu ki runga i tetai enua parataito. (Apokalupo 7:9, 10, 14-17, NW) I te vaitata anga “te akaipoipo anga a te Punua-mamoe” te maata atura to teia aronga tei ikiia ra e te Pupu Akaaere akatainuia ra kia tavini ei aronga pakari e ei au akava i roto i te au putuputuanga o te Au Kite o Iehova ra e tere atu i te 66,000 takapini i teianei ao.a (Apokalupo 19:7-9) Na te au apii taka ke, te tereniia ra ratou i te akono i te apainga i roto i te totaiete o te “enua ou.” (2 Petero 3:13) Kua akaketaketa maira te Apii Angaanga Orometua no te Patireia, tei raveia i te openga o te 1991 i te au enua e manganui, i te akonoanga tika i te au akava anga. Kua tika te aronga pakari te akono ra ei au akava kia aru ia Iehova e Iesu Karaiti, te mou ra ta ratou au akavaanga e te tuatua tika katoa oki.​—Ioane 5:30; 8:16; Apokalupo 19:1, 2.

Au Akava Tei ‘Akono ra ia Ratou Uaorai ma te Mataku’

6. Eaa i tau ei te aronga pakari te tavini ra i roto i te au kumiti akava anga ‘kia akono ia ratou uaorai ma te mataku’?

⁶ Me te akava ra a Karaiti uaorai ma te mataku ia Iehova e ma te tauturu oki a Tona vaerua, ka tau i reira kia maata atu to te aronga pakari apa ua ra rave anga i te reira tu! Me akatakaia kia tavini i roto i tetai kumiti akava anga, ka tau ratou kia ‘akono ia ratou uaorai ma te mataku’ ma te kapikianga “ki rungao i te Metua tei akava ma te kore e tu papakitai” kia tauturu ia ratou i te akava anga na roto i te tuatua tika. (1 Petero 1:17, NW) Ka tau ratou kia maara e te akono ra ratou i te au oraanga o te au tangata, to ratou “au meta,” e na ratou oki “e akakite i to kotou tu.” (Ebera 13:17, NW) I te reira tu manako, e mea tika katoa oki e e apainga ta ratou ki mua ia Iehova no etai ua atu tareva ke i te akavaanga te ka rauka ua ra ia ratou i te akakore. I tana tuatua no runga ia Ebera 13:17, kua tata a J. H. A. Ebrard e: “Tei runga i te tiaki te angaanga no te tiaki i te au meta tei orongaia ra nana e utuutu, e . . . nana e oronga i te akakite anga no to ratou tu katoa ra, e to te aronga katoa oki tei ngaro na tona tareva ke ra. E tuatua teiaa tikai teia. E akamanako te au orometua ravarai o te tuatua ra, e nana uaorai i oronga ua kia rave aia i teia apainga ngata tikai.”​—Akaaiteia atu kia Ioane 17:12; Iakobo 3:1.

7. (a) Eaa te mea tau kia maaraia e te au akava o teia tuatau nei, e eaa te akakoroanga tika na ratou? (e) Eaa te au apiianga tau na te aronga pakari kia rave mei ia Mataio 18:18-20 maira?

⁷ E mea tau ra no te aronga pakari te akono ra i te akava anga kia maara e ko nga Akava tikai o te au akavaanga tataki tai katoa ra, ko Iehova raua ko Iesu Karaiti. E akamanako ana i tei tuatuaia atu ki te au akava i Iseraela ra: “Kare na te tangata ta kotou e akava na, na Iehova ra, tei vaitata oki aia ia kotou i te tuatua akava anga ra. E tenana, kia vai rai te mataku ia Iehova ki runga ia kotou, . . . E akapera kotou, e kare kotou e tatipake.” (2 Paraleipomeno 19:6-10) Ma te mataku tapu, ka tau te aronga pakari kia rave i tetai akavaanga ma to ratou tu maroiroi katoa kia papu e ko Iehova tikai tetai ‘ia ratou ra i te rave anga i te akava anga.’ E mea tau ta ratou tuku anga tika kia akaata papu tikai i ta Iehova raua ko Karaiti akamanako anga i taua tumu ra. Ko ta ratou i akatutu ‘e akamou’ ra (kua kitea te apa) me kare ta ratou ‘e tuku’ (kare e apa) i runga i te enua nei e tau e kua akamouia me kare kua tukuia i te rangi ra​—mei tei akakiteia maira i tei tataia i te Tuatua akauruia a te Atua ra. Me ka pure ratou kia Iehova na roto i te ingoa o Iesu, ka vai rai a Iesu ‘i rotopu ia ratou’ ei tauturu ia ratou. (Mataio 18:18-20, tataanga i raro ake; Te Punanga Tiaki, Engarani, Peperuare 15, 1988, kapi 9) Ka tau ra te reva i te akarongorongoanga i tetai akava anga kia akaari e ko Karaiti tikai tetai i rotopu ia ratou ra.

Au Tiaki i te Au Tuatau Katoa

8. Eaa tikai te angaanga maata a te aronga pakari ra ki te anana, mei tei akakiteia maira e Iehova e Iesu Karaiti? (Isaia 40:10, 11; Ioane 10:11, 27-29)

⁸ Kare te aronga pakari e akava i te au tuatau katoa ra. E aronga tiaki ra ratou i te au tuatau katoa. E aronga rapakau ratou, kare i te aronga akautunga. (Iakobo 5:13-16) Ko te manako tumu anga o te tuatua Ereni no te akaaere (e·piʹsko·pos) e akono i te utuutu anga paruru. Te karanga ra te Theological Dictionary of the New Testament e: “Te akaki anga i te tuanga tiaki [ia 1 Petero 2:25], te akakite maira te tuatua [e·piʹsko·pos] i te angaanga angai no te tiakianga i rungao me kare te paruruanga.” Ae, ko ta ratou apainga tikai ko te tiakianga i rungao i te mamoe e te paruruanga ia ratou ra, te akonoanga ia ratou ki roto i te anana.

9, 10. (a) Akapeea ta Paulo akaketaketa anga mai i te angaanga mua a te aronga pakari ra, e no reira eaa te uianga tau kia uiia? (e) Eaa te akakiteia maira e te au tuatua a Paulo ia Angaanga 20:29, e no reira ka akapeea te aronga pakari i te tauta anga kia akameangiti mai i te numero o te au akava anga ra?

⁹ I te tuatuaanga ki te aronga pakari o te putuputuanga i Ephesia ra, kua tuku te apotetoro ko Paulo i te akaketaketa anga ki te ngai tau no te reira: “Kia matakite ia kotou uaorai e te anana katoa oki i ikiia ra kotou e te vaerua tapu ei akaaere i rungao, kia tiaki i te putuputuanga a te Atua, tana i oko ra i te toto o tana uaorai Tamaiti.” (Angaanga 20:28, NW) Te akakite maata maira a Paulo i te tiakianga, kare ko te akautungaanga. Penei ka tau tetai papaki o te aronga pakari kia tamanako ana ki rungao i te uianga te aru mai nei: ‘E rauka ainei ia tatou te akariro kia kore e kaimoumou i te taime te akapouia ra i te kimikimi anga e te akono anga i te au akava anga me ka akapou tatou kia manga tere atu te tuatau e te tauta anga i te angaanga tiakianga?’

¹⁰ E tika rai, e kua akamatakite mai a Paulo i te au “luko taae.” Inara kare aina aia i akakino atu i taua aronga ra no te ‘kore te akaperepere i te anana ra’? (Angaanga 20:29) E noatu rai te akakite maira aia e ka tau te au akaaere tiratiratu kia akaatea ke atu i teia au “luko,” kare ainei tana au tuatua e akaari mai ana e ka tau te aronga pakari kia akono i te au mema o te anana ma te “akaperepere”? Me ka apikepike mai tetai mamoe e ka topa ki te pae mataara eaa te anoanoia ra kia raveia kiaia​—e papaanga me e rapakauanga, e akautungaanga me e tiakianga? (Iakobo 5:14, 15) No reira, e tau te aronga pakari kia akapapa putuputu i te tuatau no te angaanga tiakianga. Penei na teia e apai mai i te tupu anga mataora o te akameangiti anga mai i te taime tei akapouia ki roto i te au akava anga akapou taime te o atura te au Kerititiano tei topa ki roto i te ara. E tikai, to te aronga pakari manako mua kia oronga atu i tetai tumu anga no te akamaru e te akaoraora anga, i reira e akamaataiaʼi te au, te tu maru, e te tinamou i rotopu i to Iehova iti tangata.​—Isaia 32:1, 2.

Tavinianga ei Au Tiaki e te Au Akava Oronga Ua

11. Eaa ka anoanoiaʼi te aronga pakari tei akono ra i roto i te kumiti akava anga kia kore e akara i te tu o te tangata e kia akono ra i “te pakari no runga maira”?

¹¹ Me maata atu te angaanga tiakianga i mua ake i to te Kerititiano rave anga i te takainga tareva ke ra penei ka meangiti mai te numero o te au akava anga i roto i te au tangata o Iehova ra. (Akaaiteia atu kia Galatia 6:1.) Inara, no te tu ara e te apa ua o te tangata nei, ka akono rai te aronga akaaere Kerititiano i te au akavaanga i etai tuatau no te au tu raveanga tareva ke. Eaa ra te au kaveinga tau no te arataki ia ratou? Kare teia i tauiia ake mei te tuatau mai ia Mose ra me kare i to te aronga Kerititiano mua ra. Ta Mose au tuatua i tuatuaia atura ki te au akava o Iseraela ra te vai nei e te mana katoa nei: “Me raveia tetai akarongoanga i rotopu i to kotou au taeake, kia akava kotou ma te tuatua tika . . . Auraka kotou kia papakitai i te akava anga.” (Deuteronomi 1:16, 17, NW) Ko te tu papakitai kore ko te tu ia o “te pakari no runga maira,” ko te pakari ia e puapingaʼi te aronga pakari i te akonoanga i te au kumiti akava anga. (Iakobo 3:17; Maseli 24:23) Na te reira pakari e tauturu ia ratou kia kite i te tuke anga i rotopu i te tu apikepike e te rave kino ra.

12. No teea tu i umuumuiaʼi te au akava e kare ei au tangata tuatua tika anake ua mari ra ei au tangata meitaki katoa oki?

¹² “E akatau marie [te aronga pakari] i te tuatua-tika,” kia tau ki ta Iehova au turanga no te tika e te tareva ke. (Salamo 19:9) Inara, ia ratou e tauta ra kia riro ei au tangata tuatua tika, ka tau katoa ratou kia tauta kia riro ei au tangata meitaki, i te tu o ta Paulo akataka anga ia Roma 5:7, 8 ra. I te tuatua anga no eia nga irava i roto i tana tumu tuatua no te tu “Tuatua-tika,” te karanga ra i te angaanga a te puka Insight on the Scriptures (Akara Oonu Anga i te Au Tuatua Tapu) e: “Te akaari maira te tuatua Ereni e ko te tangata meitaki, me kare tei akatakaia e te, tu meitaki koia tei meitaki (tei inangaro i te rave i te meitaki me kare tei apai i te puapinga kia etai ke ra) e te oronga ua (ka akakite i te reira tu meitaki na te angaanga). Kare aia e manako ua i te raveanga i ta te tuatua tau e umuumu maira mari ra ka rave kia tere atu i te reira, i te akakeu anga a te akamanako anga meitaki no etai ke ra ma te anoano kia puapinga e kia tauturu atu ia ratou.” (Voriumu 2, kapi 809) Ko te aronga pakari tei kare i te aronga tuatua tika anake ra mari ra e meitaki katoa ka akono ratou i te aronga rave tareva ke ra ma te manako anga takinga meitaki. (Roma 2:4) E tau ratou kia inangaro i te akaari i te tu akaroa e te tangi. E tau ratou kia rave i ta ratou ka rauka no te tauturu i tei rave tareva ke ra kia kite i te anoano no te tataraara, noatu e kare i te akara anga e te ariu maira aia ki ta ratou tauta anga.

Tu Manako Tika i te Akarongoanga

13. (a) Me ka akono tetai tangata pakari ei akava aia, eaa tana kare e akaruke? (e) Eaa te ako a Paulo te piri katoa ra ki te au akarongo anga akava anga?

¹³ Me ka umuumuia tetai akarongo anga akava anga no tetai turanga, kare e tau te aronga akaaere kia akangaropoina e te vaira ratou ei tiaki, i te akonoanga i te au mamoe a Iehova, i raro ake i “te tiaki mamoe meitaki.” (Ioane 10:11) Ko te ako ta Paulo i oronga ra no te tauturu putuputu i te mamoe te o atura ki roto i te au tu ngata te piri katoa ra ki te akarongo anga i te akava anga. Kua tata aia: “E te au taeake ra, kia rokoia tetai e te apa ra, ka akaora kotou ko tei akono i ta te Vaerua ra i te reira, ma te ngakau maru; ma te manako ia koe uaorai, ko te timata katoaia aea koe. Ka rave atu tetai i ta tetai apainga, kia pera kotou i te akatika i te ture a te Mesia.”​—Galatia 6:1, 2.b

14. Eaa te manako tau no te aronga pakari no te au akarongo anga akava anga, e eaa te tu manako tika no ratou i tetai tei rave ra i te tareva ke?

¹⁴ Kare e kia akamanako ia ratou uaorai ei au akava teitei te uipa atura kia tuku i te akautunga, ko te aronga pakari te akono ra i tetai kumiti akava anga ka tau kia manako i taua akarongo anga ra ei tuanga no ta ratou angaanga tiakianga. Kua o atu tetai mamoe na Iehova ki roto i te manamanata. Eaa ta ratou ka rave kia akaora mai iaia ra? E tureti takiri ainei i te tauturu i teia mamoe tei aere ke mei te anana ra? E tau kia manako tatou e kare. E tau te aronga pakari kia tamou i te manako papu no te akaarianga i te tu akaroa i te ngai tei tau. Kare ra mei te mea e ka tuku ratou i ta Iehova au turanga i akanoo ki raro ake me e rave anga ara kino tei raveia ana. Inara na to ratou kite anga i etai ua atu tu te ka tauturu ia ratou kia oronga i te tu akaroa i te ngai te ka rauka. (Salamo 103:8-10; 130:3) E mea mii ra kia tuatuaia e, ko tetai papaki o te aronga rave tareva ke e ngakau marokiakia to ratou tu e ka riro i reira te aronga pakari kia akaari i te tu ngaueue kore, mari ra kare i te aroa kore.​—1 Korinetia 5:13.

Te Akakoroanga o te Akarongoanga Akava Anga

15. Me tu mai tetai manamanata kino i rotopu i etai nga tangata tataki tai ra, eaa te mea mua kia akamanakoia?

¹⁵ Me tupu mai tetai manamanata kino i rotopu i etai ra, ka na mua te aronga pakari karape ra i te tamanako me kua tauta aua nga tangata ra i te akaoti i te reira, raua uaorai, na roto i te vaerua ia Mataio 5:23, 24 me kare ia Mataio 18:15. Me kare te reira i puapingaia, penei ka rava ua te ako anga na tetai o te aronga pakari me kare kia rua raua. Ka anoano anake uaia te rave anga akava anga me kua raveia tetai ara kino te ka taki atu ki te akaateaanga. (Mataio 18:17; 1 Korinetia 5:11) Na tetai tumu anga tau anake no te Tuatua Tapu ra e anoanoiaʼi kia akapapaia tetai kumiti akava anga. (E akara i Te Punanga Tiaki, Engarani, Tepetema 15, 1989, kapi 18.) Me akatupuia tetai, e tau kia ikiia te aronga pakari tau meitaki no te turanga tikai.

16. Eaa ta te aronga pakari te ka tauta kia rauka na roto i te akarongo anga akava anga?

¹⁶ Eaa ta te aronga pakari ka tauta kia rauka na te akarongo anga akava anga? Ko te mea mua, kare e rauka te rave i te akava anga ma te tuatua tika me kare i kitea ake te au tika. Mei to Iseraela rai, kua tau kia raveia te ‘kimi anga marie’ i te au tumu teiaa katoa ra. (Deuteronomi 13:14; 17:4) E no reira ko tetai akakoroanga no te akarongo anga kia kitea te au tika no te reira akava anga. Inara ka rauka e ka tau katoa oki kia raveia na roto i te aroa. (1 Korinetia 13:4, 6, 7) Me kitea anake te au tika katoa ra, ka rave te aronga pakari i reira i tei anoanoia ei paruru i te putuputuanga e kia tamou ki roto i te reira i ta Iehova ra au turanga teitei e kia rere ua tona vaerua na roto i reira. (1 Korinetia 5:7, 8) Inara, ko tetai o te au akakoroanga oki o te akarongo anga kia akaora i tei rave i te ara ra, me ka rauka, mei roto mai i te tu kino.​—Akaaiteia atu kia Luka 15:8-10.

17. (a) Eaa te tu akono tau i tetai tei akaapaia ra i te tuatau o tona akava anga, e eaa te akakoroanga? (e) Eaa te umuumuia ra i te reira i te tuanga a te au mema katoa o te kumiti akava anga ra?

¹⁷ Kare roa e tau tetai tei akaapaia ra kia akonoia kia tuke i tetai mamoe na te Atua ra. E mea tika kia akonoia aia ma te tu maru. Me kua raveia tetai ara (me kare etai ara), ko te akakoroanga na te au akava tuatua tika ra kia tauturu i tei ara ra kia akatikatika iaia uaorai, kia kite i te tareva ke o tona mataara, kia tataraara, e kia aoia mai kia ora i “te ereere a te diabolo ra.” Ka umuumuia “te apii marie anga atu,” ma “te apii maru marie atu.” (2 Timoteo 2:24-26; 4:2) Akapeea me ka kite tei rave i te ara e kua apa aia, e kua puta tikai tona ngakau, e kua pati kia Iehova e akakore mai i tana ara? (Akaaiteia atu kia Angaanga 2:37.) Me kua papu i te kumiti e te anoano tikai ra aia i te tauturu ma te ngakau tae, ma te tau kare aia e anoanoia kia akaateaia.​—E akara i Te Punanga Tiaki, Engarani, Tianuare 1, 1983, kapi 31, parakarapa 1.

18. (a) Eaa te tuatau tau no te kumiti akava anga kia akaari i te tu ngaueue kore i te akaateaanga i tetai te rave tareva ke ra? (e) I roto i teea turanga mamaeanga ngakau i tau ei te aronga pakari kia akamaroiroi ia ratou uaorai kia akono i te au mamoe te aere ke ra?

¹⁸ I tetai pae, kia aravei atu te au mema o tetai kumiti akava anga i tetai tei taka meitaki ra tona akaruke anga i te tuatua mou ma te kore e mii, e meameaau akakoroia i te au ture a Iehova me kare e rave anga kino takiri, ko ta ratou apainga e paruru i etai atu au mema ke o te putuputuanga na te akaatea anga i taua tangata rave kino ra ma te kore e tataraara. Kare e anoanoia te mumiti akava anga kia aravei putuputu ma tei rave i te tareva ke ra me kore te tuku i te au tuatua ki roto i tona vaa, te tauta anga i te maro iaia kia tataraara, i te mea e te kitea ra e te ngere ra aia i te tu tangi ma te tu atua.c I teia au mataiti i topa akenei kua tae te akaatea anga i te ao katoa e vaitata i te 1 patene o te aronga tutu aere. Tera te aite anga e vaitata i te anere au mamoe tei vai mai ki roto i te koro, e okotai i ngaro​—penei no te tuatau poto. I te akamanakoanga i te tuatau i pou e te tauta anga i te apai mai i tetai tangata ki roto i te koro, kare ainei i te mamaeanga ngakau kia kite e e raungauru ua atu tauatini te ‘tukuia atura kia Satani’ i te au mataiti ravarai?​—1 Korinetia 5:5.

19. Eaa te mea tau kia kore rava e akangaropoinaia e te aronga pakari te tavini ra i roto i tetai kumiti, e no reira eaa ta ratou ka akakoro?

¹⁹ E mea tau kia manako te aronga pakari te akamata ra i tetai akava anga e ko te maata anga o te akava anga apa i roto i te putuputuanga no te tu apikepike i tupu ei, e kare no te rave kino. Kare roa e tika kia ngaropoina ia ratou ta Iesu akatutu anga no te mamoe i ngaro ra, tei akaope ra aia ma tana au tuatua: “E akakite atu oki au kia kotou, E rekareka maata to runga i te rangi i te tangata ara okotai kia tataraara, i te aronga tuatua-tika, e kia iva ua atu te ngauru anga ma iva, te kore e tau ia ratou te tataraara.” (Luka 15:7) E tika tikai, “kare a Iehova . . . e anoano kia akapouia tetai mari ra te anoano ra aia kia rauka te tataraara i te katoatoa.” (2 Petero 3:9, NW) Kapiti atu ma te tauturu a Iehova, e rave maroiroi te au kumiti takapini te ao katoa nei kia akatupu i te rekareka i te rangi na te tauturuanga i te aronga rave i te tareva ke kia kite i te anoano no te tataraara e kia tuku i to ratou vaevae kia tau akaou tikai ki runga i te mataara o iti te taki atura ki te ora mutu kore.​—Mataio 7:13, 14.

[Au Tataanga Rikiriki i Raro]

Au Uianga no te Uriuri Akaou

◻ I te aruanga i te akaraanga a te Tiaki Maata e te Tiaki Meitaki, eaa tikai te manako tau no te aronga pakari ra?

◻ Na teea mataara e raukai i te aronga pakari i te akameangiti mai i te numero o te au akava anga ra?

◻ Na teea tu e tau ei te aronga akava kare kia tuatua tika anake mari katoa oki kia meitaki?

◻ Akapeea te akono anga tau i tei rave i te tareva ke i te tuatau o te akava anga, e ma teea akakoroanga?

◻ Eaa te akaateaanga i tau ei ei ravenga openga ia?

[Tutu i te kapi 16]

Me ka raveia te tiakianga i mua ake, e manganui te au akava anga te ka akakoreia

[Tutu i te kapi 18]

Noatu rai i te tuatau te akonoia ra te akarongoanga akava anga, ka tau te aronga pakari kia tauta i te akatikatika i tei rave tareva ke ra na roto i te vaerua maru