Te Au Puku Maunga o Karamela

Te ingoa Karamela tona aite anga “One Ua Rakau.” Teia ngai uua ki te apatokerau, no etai 50 kiro mita te roangarere, kua ki i te au aua vine, te au rakau orive, e te au ua rakau. Te ngai teitei o teia ngai puku maunga e mea kare rava e ngaropoinaia tona meitaki e te manea. Te tuatua ra a Isaia 35:2 i “te manea o Karamela” ei akatutu anga o te kaka uua o te enua akaouia o Iseraela.

Te ki ra rai te au puku maunga o Karamela i te au ua rakau, te au rakau orive, e te au vine. I te taime o te tuatau tupu anga rakau, ka tapokiia teia au puku maunga e tetai akaari anga tiare manea tikai. “To upoko i runga ia koe ra, e tau ïa kia Karamela,” i na Solomona ei ki te tamaine Sulami, penei te manakoanga i te manea tikai o tona rauru me kore te tu anga o tona upoko tau ua e te manea mei tona kaki.​—Imene a Solomona 7:5.

Te riro ra te manea tau tikai o te au puku maunga o Karamela ei akamaara mai ia tatou te manea vaerua ta Iehova i tuku ki rungao i tana akaaerenga i teia tuatau o te aronga akamori. (Isaia 35:1, 2) Te noo tikai ra te Au Kite o Iehova i roto i tetai parataito vaerua, e te akatika ra ratou ki te au manako ngakau o te Ariki ko Davida, tei tata: “Kua topa akenei taku tuanga i te ngai meitaki; e te meitaki nei au i toku nei kainga.”​—Salamo 16:6.