E Aroa Pakari Roa Atu i to Tetai Mama

I TE au ngai rerue, i roto i te au are repo, me kare na runga i te au mataara rapurapu aere, te akaruke ra te au mama i ta ratou au pepe anau ouia. I tetai taime, kua kitea e te au tangata koi tita te au pepe meangiti ua i roto i te au taramu tita, kua roi i te aue no to ratou au mama. Kia tau ki te O Estado de S. Paulo, “te maata mai nei te au tupu anga o te au pepe tei akarukeia ki runga i te au mataara.” E tika, penei ka tataraara te mama ou i tana ikianga a muri ake. Inara te rave uatu ra aia, noatu e penei ka tutaki atu te oraanga o te pepe.

Penei ka manako koe, ‘Akapeea tetai mama i manako ei i te akaruke i tana pepe ki tetai oraanga papu kore?’ Te taangaanga ra te Pipiria i taua au turanga ei akatauanga kia oronga mai i tetai tu tuke pakari o to tatou Anga e tona manako ki tona uaorai iti tangata: “E tika ainei i te vaine kia akangaropoina i tana tamaiti kai u, e kare atura e tangi ki te tamaiti a tona uaorai kopu? a, e tika ia ratou kia akangaropoina, kare ra au e akangaropoina ia koe.”​—Isaia 49:15.

Ae, e maata ua atu i to tetai mama tangata nei, e aroa oonu tikai to te Atua no tatou e te akaari maira aia i te tu kite pumaana ki to tatou au anoano. Noatu e mapu koe me e tangata pakari, noatu eaa te manamanata te aro mai nei ia koe, kare e ko koe anake ua. Ka inangaro toou Anga i te tauturu ia koe e te manako maira aia i toou meitaki. Na roto i te au tuatua a te tata taramo, “akaruke ua toku metua tane e toku metua vaine iaku, ei reirā Iehova e rave mai ei iaku.”​—Salamo 27:10.

E takapini i teianei ao, kua neneiia te Punanga Tiaki e te Awake! ei oronga mai i te kite o “te Atua mou,” ko Iehova, e tana Tamaiti, ko Iesu Karaiti, e rauka mai ei te ora mutukore kia ratou tei ariki i te reira ma te tu meitaki ra.​—Ioane 17:3.