Kite Anga i te Manakonakoanga i Roto i Tetai Ao Ki i te Tumatetenga

“E AKAKEU anga maata atu to te au tangata noa ua i te rave anga i tetai apinga meitaki i te ngai tangata e te akatikatika anga i te au manamanata noa ua i to mua ana i roto i te tuatua enua o te tangata nei.” Na te peretiteni o mua ana o Marike ko Bill Clinton i tuatua i taua tuatua i ko i tetai uipaanga i Ottawa, Kanata, i roto ia Mati 2006. Kua taopenga aia e kua akatupuia mai tetai tu no te au angaanga meitaki i te pa enua mei te tunami i te mataiti 2004 e kua karanga, ma tetai manga manako papu e, tei roto te ao i teianei i “tetai tuatau te irinaki anga tetai ki tetai, kare i tupu ana i mua ana.”

Ka rauka ainei ia tatou i te tapapa atu e ka akakeu te au tumatetenga natura i te au tangata i te au ngai ravarai kia tauta i te akatupu i tetai tuatau meitaki ki mua? E tumu irinakiia ainei te “irinaki anga tetai ki tetai, kare i tupu ana i mua ana” no te manakonakoanga i tetai tuatau ki mua no te au tikai e te tinamou mutu kore?

Tumu no te Manakonakoanga Tikai

Te akaari maira te papaanga tuatua enua no te au tauta anga a te tangata tei tere atu e ono tauatini mataiti e kua akataitaia putuputuia e te au tangata tetai e tetai. No te tumu meitaki, i reira, te ako maira te au Tuatua Tapu akauruia ia tatou e: “Auraka e irinaki ki te ui ariki, i te tamaiti a te tangata nei, kare oki ona ora.” (Salamo 146:3) Na te tuku anga i to tatou manakonakoanga ki runga i te au akaaerenga o teianei ao, ma ta to reira au apinga materia, e ta to reira au anoano te arataki anake ra ki te taitaia. No teaa ra? No te mea “te ngaro ke nei teianei ao, ma ta to reira katoa e anoano nei.”​—1 Ioane 2:17.

Inara, i te au anere mataiti ko te Atua te manakonakoanga ope kore no te au tangata tuatua tika. Te tapa ra te Pipiria iaia e ko “te manako anga o Iseraela [taito]” e “te irinakianga o to [Iseraela] au metua ra,” e e manganui te au akakiteanga no te manakonakoanga, te irinaki anga, e te irinaki papu iaia. (Ieremia 14:8; 17:13; 50:7) E tika rai, te akamaroiroi maira te au Tuatua Tapu ia tatou kia “tiaki ia Iehova.”​—Salamo 27:14.

Te raurau maira a Maseli 3:5, 6 ia tatou e: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” Tei ia koe te tumu anga ravarai kia irinaki papu tikai i roto i taua taputou ra no te mea e Atua taui kore e te irinakiia a Iehova, e e tika tikai ki tana ra tuatua. (Malaki 3:6; Iakobo 1:17) Te inangaro ra aia i te mea meitaki noou, e me ka akarongo ua rai koe i tei tuatuaia i roto i tana Tuatua, i te Pipiria, ka arataki meitaki te reira ia koe na roto i teia au tuatau matakuia nei.​—Isaia 48:17, 18.

Ko tetai tangata te aru ngakau katoa ra i te aratakianga a te Atua ka rauka i te irinaki i teia taputou e: “Auraka e mataku, te vaitata katoao au ia koe: auraka e taitaia, ko au oki toou Atua: e akamaroiroi au ia koe; koia ïa, e tauturu au ia koe; koia ïa, e mou au ia koe i toku rima katau tuatua tika ra.” (Isaia 41:10) E akapumaana anga tikai te pure akatenga ma te manako oonu anga no runga i teia akapapuanga ki te katoatoa o te aronga tei inangaro tikai i te Atua ko Iehova, na te reira e tauturu ia ratou kia akakoromaki i te au turanga ngata e te au tu apiapi.

E akamanako ana ia Andrea, koia tetai o te Au Kite o Iehova e e metua vaine ki nga tamariki e rua. Kua karanga aia e: “Na te pure anake e te akamanako oonu anga i te au taputou a Iehova i rauka ai iaku te akamaroiroi akaou anga me tupu mai te au tuatau papu kore i roto i toku oraanga. Me ka tuku au ia Iehova e koia te mea puapinga i roto i toku oraanga, e mama ua ake i te akono tamou i te tu ngaueue kore.”

Akaketaketa i Toou Manakonakoanga ia Iehova

Na te akakite anga i te puapinga no te manakonako anga ia Iehova, kua tuatua tetai tata taramo e: “E au maata to te aronga i inangaro i taau ture; kare o ratou e turorianga.” (Salamo 119:165) Ka rauka i tetai apii ngakau tae i te Tuatua a te Atua i te tauturu tikai ia koe kia akaki i toou manako e te ngakau ki te ‘au mea mou, tau meitaki, tika, viivii kore, rekarekaia, rongo meitaki, meitaki, e te paapaaia.’ E tupuanga tau e te akamaroiroi anga i te pae vaerua teia kia koe. Me rave koe i tetai tauta anga ma te manako akava ngakau kia akarongo, kia apii, kia ariki, e kia rave i taua au mea ra, ‘e noo ei te Atua au ra kia koe.’​—Philipi 4:8, 9.

I te tuatua anga mei tona uaorai kite no tetai ngauru ua atu mataiti, kua karanga a John e: “E taui ei i toku au manako no runga i te tuatau ki mua, e puapinga tikai i te kite e te umuumuia ra tetai tauianga maata i roto i toku tu e te manako i mua ake ka manako ei au i te akatupu i tetai pirianga ki tetai Atua apa kore e te kitea koreia. Ko te mataara anake e rauka ai iaku i te akatupu i taua pirianga ra koia oki na te riro anga mai ei tangata manako i te pae vaerua. Te o maira te taui anga kia kite meitaki i te Atua, i te kite anga i to te Atua manako no runga i te au tumu na te tatau anga i tana Tuatua akauruia e te akamanako oonu anga i te reira.”

Me akono koe i te au vai akaangaroianga, te vai oronga mai i te ora i te tuatua mou i roto i te au Tuatua Tapu akauruia, ka taangaanga koe i tetai ravenga timataia e te tau i te patoi atu i te au mea kino tei oronga putuputuia mai i te au ra ravarai na roto i te nuti. Na te akono anga i ta te Pipiria e tuatua maira ka akaketaketa katoaia te au tatua o toou ngutuare tangata e ka tauturu i te akaiti mai i te tu apiapi. Tei runga ravao, te taputou maira te Atua e te papa ua ra aia i te “oronga mai [i tona] maroiroi ki te aronga i tika te ngakau iaia.” (2 Paraleipomeno 16:9) Ka akatikatika aia i te au mea na roto i tetai tu e kare tikai aau apinga e mataku atu.

Kua karanga a Phinehas, tei ora ana i te tuatau tamaki e te tamateanga maata e: “Kua apiiia au kia tuku i toku oraanga ki roto i te nga rima aroa o Iehova. I te aru anga i te au kaveinga Pipiria kua tauturuia au kia kopae i te au manamanata e manganui.” Me irinaki tikai koe i te Atua ko Iehova, ka tauturu aia ia koe kia autu i tetai ua atu turanga ngata. (Salamo 18:29) Te irinaki pu tikai ra tetai manga tamaiti e pirianga vaitata tona ki tona nga metua e te tinamou ra no ta raua utuutu anga noatu e kua makiia aia me kore te manamanata ra i roto i etai tu. Ka rauka ia koe tetai manako ngakau mei te reira rai me rave koe i tetai tauta anga e te ariki anga i te patianga no toou manakonakoanga ia Iehova.​—Salamo 37:34.

E Pange Ngaueue Kore no te Manakonakoanga

Kua akakite a Iesu Karaiti ki tana au pipi e: “Na ko kotou kia pure: E to matou Metua i te ao ra, Kia tapu toou ingoa. Kia tae toou basileia. Kia akonoia toou anoano i te enua nei, mei tei te ao katoa na.” (Mataio 6:9, 10) Ko taua Patireia i te rangi​—te kavamani i roto i nga rima o Iesu Karaiti​—ko te ravenga ia na te Atua no te akakiteanga i Tona tu ngateitei tikai ki runga i te enua.​—Salamo 2:7-12; Daniela 7:13, 14.

Te au tu e manganui no te mataku te akakeu ra i te au tu ravarai o te oraanga i teia tuatau nei e akakiteanga taka meitakiia e te anoanoia ra te akaoanga mai a te Atua. Ma te mataora, te vaitata maira taua akaoanga ra! Ei Ariki Mesia kua akateronoia i teianei e te Atua, kua orongaia kia Iesu Karaiti te mana taoonga kia akatika i to Iehova tu ngateitei e kia akatapu i Tona ingoa. (Mataio 28:18) Kare e roa atu, ka akara mai te tutara Patireia ki te enua nei kia takore atu i te au mea katoatoa te akatupu ra i te mataku e te apiapi. Te akakite maira a Isaia 9:5 i te au akapapu anga te akaari maira e e Tutara tau a Iesu koia te ka akamaru ia tatou mei to tatou au mataku. Ei akatauanga, kua tapaia aia ko te “Metua no te tuatau mutu kore,” te “Umere, Tumu korero,” e te “Ariki no te au.”

E akamanako ana i te tuatua akaperepereia no te “Metua no te tuatau mutu kore.” No te reira, tei ia Iesu te ririnui e te mana​—pera katoa te anoano​—i te oronga ki te au tangata akarongo te manakonako anga no te ora mutu kore i runga i te enua na roto i te tumu anga o tona atinga oko. Ko te aiteanga teia e i te openga ra ka tataraia mai ratou mei te ara e te tu apa tei akatuangaia mai e te tangata mua tei ara ra, ko Adamu. (Mataio 20:28; Roma 5:12; 6:23) Ka taangaanga katoa a Karaiti i tona mana tei orongaia mai e te Atua kia akatu akaou mai i te manganui tei mate.​—Ioane 11:25, 26.

Iaia i te enua nei, kua akapapuia mai a Iesu e ko te “Umere, Tumu korero.” No tona kite i te Tuatua a te Atua e tona marama maata tikai i te tu o te tangata, kua kite a Iesu e ka akapeea i te akatikatika anga i te au manamanata o te oraanga i te au ra ravarai. Mei tona akateronoia anga i te rangi, kua riro rai a Karaiti e ko te “Umere, Tumu korero,” i te tavini anga ei peretana puapinga maata na roto i ta Iehova ravenga no te komunikeitianga ki te au tangata. E pakari e te apa kore te akoanga a Iesu, tei tataia i roto i te Pipiria. I te kite anga e te irinaki anga i teia, ka arataki atu ia koe ki tetai oraanga kare e manako papu kore e te mataku anga kino.

Te akataka katoa maira a Isaia 9:5 ia Iesu e ko te “Ariki no te au.” I roto i taua tu, kare e roa atu ka taangaanga a Karaiti i tona ririnui i te takore pouroa anga i te tu aiteite kore​—i te pae porotiki, te au turanga, e te tu puapinga. Akapeea ra? Na te tuku anga i te tangata ravarai ki raro ake i tetai tutara au o te Patireia Mesia.​—Daniela 2:44.

I raro ake i te tutaraanga Patireia, ka vai ua rai te au mutu kore ki roto i te ao katoa. Eaa koe i papu ei i teia? Kua akakiteia mai te tumu i roto ia Isaia 11:9, i reira ka tatau tatou e: “Kare ratou [te au tangata o te Patireia] e kanga, kare oki e mea e mate ei, i toku katoa nei maunga tapu: no te mea, ka ki te enua i te kite ia Iehova, mei te vairanga tai e ki i te tai ra.” I te openga ra, ka rauka i te au tangata ravarai i te enua nei te kite tika tikai i te Atua e ka akarongo iaia. Kare ainei tera manakonakoanga e akapumaana ana i toou ngakau? Me koia ia, auraka e taroaroa i te apii i te “kite ia Iehova” e mea akaperepere maataia.

E oronga koe ia koe uaorai no te akaketaketa anga i te akarongo e te oronga anga i te kite te oronga maira i te ora a te Atua na te akara matatio anga e eaa tikai ta te Pipiria e apii maira no runga i te au tupuanga no to tatou tuatau e te tuatau meitaki ki mua tei taputouia mai i roto i te Pipiria. No reira te raurau atu nei matou ia koe kia oronga mai koe ia koe uaorai ki te porokaramu no te apii Pipiria kare e tutakiia ta te Au Kite o Iehova e oronga ra i roto i toou oire. Ko te mataara teia i te akamaru mai i te mataku e te kite anga i te manakonakoanga tika tikai i roto i tetai ao ki i te tumatetenga.

[Pia/​Au Tutu i te kapi 7]

Akakeu te Kavamani Patireia i te Manakonakoanga

Kua orongaia kia Iesu Karaiti, ei Ariki no te Patireia o te Atua, te kite e te tika kia taangaanga i te mana i te ao katoa e pini ua ake. (Mataio 28:18) Ka akaoki akaou aia i te turanga o te enua ki te turanga apa kore. Kua autu katoa aia i runga ake i te au maki. Te au angaanga ririnui ta Iesu i rave ana i runga i te enua e akaraanga no te tuatau ki mua no te au akameitakianga umere roa atu te ka aere mai ki raro ake i tana tutaraanga ei Ariki apa kore e te irinakiia. Eaa te au tu o teia Ariki Mesia tei akapapaia i raro akenei te reka ra tikai koe?

▪ Oaoa.​—Mareko 10:13-16.

▪ Tau ua e kare e papakitai.​—Mareko 10:35-45.

▪ Irinakiia e te karapii kore.​—Mataio 4:5-7; Luka 6:19.

▪ Tuatua tika e te tuatua tau.​—Isaia 11:3-5; Ioane 5:30; 8:16.

▪ Manako meitaki, manako tau, e te akaaka.​—Ioane 13:3-15.

[Tutu i te kapi 4]

Te tatau anga e te akamanako oonu anga i te Pipiria ka rauka i te tuku mai ki roto ia tatou i te manakonakoanga ia Iehova