I mua ake i te 607 M.T.N., kua oronga a Iehova i tetai orama te ka tupu kia Ierusalema i mua ake ka takoreia ai. I roto i te orama, e maata ta Ezekiela au mea kino i kite e tupu ra. I reira kua kite aia e ono tangata “ma tona taoonga ta tangata ra i tona rima.” E tangata tetai i rotopu ia ratou “e orongā te kakau” ma “te āriki inika a te tata tuatua ra.” (Ezekiela 8:6-12; 9:2, 3) Kua akakiteia ki teia tangata kia aere na roto i te oire “ka tuku ei i te akairo ki runga i te rae o te au tangata i aue ua, e kua kapiki ua, i te au mea viivii katoa i raveia i roto ra.” E oti kua akakiteia ki te tangata toko ono kia tamate i te aronga i roto i te oire kare e akairo i runga i to ratou rae. (Ezekiela 9:4-7) Eaa ta tatou ka apii mai mei teia orama, e koai te tata tuatua ma te āriki inika ra?

Kua kite a Ezekiela i teia orama i te 612 M.T.N. E totou te reira tei akatupuia no te taime mua e rima mataiti i muri mai te akatika anga a Iehova i te nuku vaeau o Babulonia kia takore ia Ierusalema. Na teia tu, kua taangaanga a Iehova ia Babulonia kia akautunga i tona iti tangata akarongo kore. (Ieremia 25:9, 15-18) Inara akapeea te au ngati Iuda meitaki tei patoi i te au mea kino e tupu ra i roto i te oire? Kua akapapu a Iehova e ka ora ratou.

I roto i te orama, kare a Ezekiela i akairo tikai i tetai ua atu e kare aia i piri ana ki te takore anga o te oire. Mari ra, na te au angera i arataki i te takore anga ia Ierusalema. No reira na roto i teia totou e kite ei tatou i tei tupu i te rangi. Kua akakite a Iehova ki tana au angera kia akatere i te takore anga i te aronga kino e kia akapapu kia ora te aronga meitaki.a

Ka akatupu katoaia teia totou i te tuatau ki mua. I tuatua ana tatou e kua akatutuia te tangata ma te āriki inika a te tata tuatua e ko te aronga akatainuia te ora nei rai i te enua nei. Kua tuatua katoa tatou e ka akairoia te tangata kia ora me akarongo ratou e te āriki i te nuti meitaki ta tatou e tutu aere ra. Inara kua papu meitaki mai e kua anoanoia kia taui i ta tatou akamārama anga i teia totou. Kua apii mai tatou mei ia Mataio 25:31-33 e na Iesu e akava i te tangata. Ka rave aia i teia a te tuatau ki mua i te tuatau o te mate maata. A te reira taime, te aronga tei akavaia ei mamoe ka ora ratou, e te aronga tei akavaia ei puakanio ka takoreia.

3.  Te aronga tei akaoraia i to Ezekiela tuatau, kare o ratou akairo i runga i to ratou rae. Te aronga te ka akaoraia i te tuatau ki mua, kare katoa o ratou akairo. Eaa ta te tangata ka rave e ora ai i te mate maata? Me rongo ratou i te akamatakite anga, kia apii ratou i te aru ia Iesu, te akatapu ia ratou uaorai ki te Atua, e te turu i te au taeake o Iesu na te tutu aere anga i te nuti meitaki. (Mataio 25:35-40) I te tuatau o te mate maata, ka akairoia teia aronga koia oki ka ikiia ratou kia ora atu.

4.  Te akatutu ra te tangata ma te āriki inika ia Iesu. I te tuatau o te mate maata, ka akairo a Iesu i te urupu maata me akava aia ia ratou ei mamoe. I reira e rauka ai ia ratou i te noo e tuatau ua atu i te enua nei.​—Mataio 25:34, 46b