Te Ngai Tau Tikai no te Akamori Anga ia Iehova i to Tatou Oraanga
“Ka akameitaki rai au ia koe i te au rā katoa nei; ka akapaapaa au i to ingoa e tuatau e tuatau ua atu.”—SALAMO 145:2.
1. No runga i te akamori, eaa ta Iehova e umuumu maira?
“KO AU ko Iehova ko toou Atua e Atua te umuumu ra i te akamori anga noku anake ua.” (Exodo 20:5, NW) Kua akarongo atura Mose i taua tuatua anga mei ko mai ia Iehova ra, kua tuatua aia i te reira i muri iora i te tuatua atu anga ki te iti tangata o Iseraela ra. (Deuteronomi 5:9) Kare e ekoko anga i te manako o Mose e kua manakonako mai te Atua ko Iehova i Tona au tavini kia akamori Iaia anake ua.
2, 3. (a) Na teaa i manako ei te ngati Iseraela e e mea tuke roa tei tupu vaitata ra i te Maunga Sinai? (e) Eaa te au uianga ta tatou ka akara matatio no te akamori a to Iseraela e ta te au tavini o te Atua i teia tuatau?
2 I te noo anga puakapa i vaitata i te Maunga ko Sinai, kua kite to Iseraela ratou ko “te tangata ke ke katoa e manganui” tei akaruke ra ia Aiphiti ma ratou katoa, i tetai apinga tuke roa. (Exodo 12:38) Kare ia i te akatutu anga i te akamori anga i te au atua o Aiphiti, tei taakaakaia i teianei na nga tumatetenga e tai ngauru ra, me kare nga mate. I to Iehova akakite anga i tona parutia kia Mose, kua tupu tetai tupuanga mataku: e mangungu, e uira, e te tangianga maata roa o tetai pu tei akariro i te puakapa katoa kia rutetetete. I muri mai kua aere mai te ai e te auai e kua ngaueue roa atura taua maunga katoa ra. (Exodo 19:16-20; Ebera 12:18-21) Me kua anoano tetai ua atu Iseraela i tetai atu akapapu anga e te tupu ra te apinga tuke roa, kare i roa kua tae mai te reira. I muri poto akera i to Mose eke anga mai mei te maunga ra i muri ake i te raukaanga iaia te rua o nga kopi ture a te Atua ra. Kia tau ki ta te tataanga akauruia ra, “te kakā maira te kiri mata [o Mose]; mataku akera [te au tangata] kia akavaitata atu kiaia.” E tika tikai, ko tetai tupuanga tere atu i ta te tangata nei e kare e rauka kia akangaropoinaia ia!—Exodo 34:30.
3 No taua iti tangata akatutuia o te Atua ra, kare e ekoko anga no runga i te ngai o te akamori anga ia Iehova ra. Koia to ratou Akaora. E kaiou ta ratou kiaia no to ratou au oraanga. Koia katoa oki to ratou Tuku Ture. Inara i mou ainei ratou i te akamori anga ia Iehova ki te ngai mua ra? E akapeea ra te au tavini o te Atua i teia tuatau nei? Eaa te ngai te mou ra te akamori anga ia Iehova i roto i to ratou au oraanga?—Roma 15:4.
To Iseraela Akamori Anga ia Iehova
4. Eaa te akapapa anga o te puakapa o Iseraela i te tuatau o to ratou aaere anga i te metepara ra, e eaa tei rotopu o te puakapa ra?
4 Me i akara ana koe mei runga mai i te noo anga puakapa o to Iseraela i te metepara ra, eaa taau ka kite? E akaputu papa anga maata, tau meitaki te au puakapa ei nooanga no te au tangata penei e tere atu i te toru mirioni katoa, e kua akapupuia kia tau e toru kopu i te veeanga i te pae tokerau, te pae tonga, te pae itinga ra, e te pae opunga ra. I te akaraanga vaitata atu, ka kite katoa koe i tetai atu akapupuanga i vaitata ki rotopu o te akaputu anga puakapa ra. Ko teia nga pupu meangiti mai e a o te au puakapa no te au pamiri o te kopu o Levi. I rotopu tikai o te akaputu anga puakapa, i tetai ngai akatakaia na tetai paruru anga kakau, ko tetai ngai takake ia tei akatuia ra. Ko teia te “Are uipaanga,” me kare tapenakara, ta te au Iseraela “ngakau pakari” i akatu ra kia tau ki ta Iehova ra parani.—Numero 1:52, 53; 2:3, 10, 17, 18, 25; Exodo 35:10.
5. Eaa te akakoroanga ta te tapenakara i rave i Iseraela ra?
5 I te au ngai tataki tai e vaitata i te 40 i akatuiaʼi te au puakapa i to ratou aaere anga i te metepara, kua akatuia e to Iseraela te tapenakara, e kua riro te reira ei ngai manako maataia i to ratou nooanga puakapa. (Numero, pene 33) E mea tau, te akataka maira te Puka Tapu ia Iehova i te nooanga ki roto i tona iti tangata i te rotopu tikai o to ratou puakapa ra. Kua ki te tapenakara i tona kaka. (Exodo 29:43-46; 40:34; Numero 5:3; 11:20; 16:3) Te tuatua maira te puka Our Living Bible e: “Ko teia ngai akatapuia tei apai aereia ra ko tetai mea puapinga maata roa ia, no te mea kua riro te reira ei tetai ngai akonoanga no te au kopu katoa ra. Na te reira i taokotaiia ratou i taua au mataiti roa i te aaere anga i te metepara e na te reira i akariro kia rauka te angaanga taokotai anga.” E tere atu i te reira, kua akamaaraara tamou mai te tapenakara ra e ko te akamori anga a to Iseraela i Tei Anga mai ia ratou ra ko te mea rotopu ia i to ratou au oraanga.
6, 7. Eaa te are akatuia no te akamori ei mono i te tapenakara ra, e akapeea te reira i te rave anga i te akamori anga a te iti tangata o Iseraela ra?
6 I muri ake i te taeanga to Iseraela ki te Enua Taputouia ra, kua tamouia te manako anga i te tapenakara ei ngai no te akamori anga o to Iseraela. (Iosua 18:1; 1 Samuela 1:3) I muri akera, kua akakoro te Ariki ko Davida kia patuia tetai are no te tuatau roa. Kua riro te reira e ko te iero, tei patuia i muri akera e tana tamaiti ko Solomona. (2 Samuela 7:1-10) I te akatapu anga i te reira kua to maira tetai tumurangi ei akakite i ta Iehova ra ariki anga i taua are ra. “Kua akatu tika au i tetai are nooanga noou,” ta Solomona i pure, “ei ngai nooanga tikai noou e tuatau ua atu.” (1 Ariki 8:12, 13; 2 Paraleipomeno 6:2) Kua riro te iero akatu ouia ra i reira ei ngai rotopu no te au akamorianga a te iti tangata ra.
7 E toru taime i te mataiti, kua aere atu te au tane Iseraela katoa ra ki Ierusalema kia akono i te au akono anga rekareka i te au oroa i te iero i te akatika anga i ta te Atua ra akameitakianga. E mea tau ra, kua tapaia teia au akaputu anga e ko “te au oroa a Iehova,” ma te tukuanga i te manako ki runga i te akamori anga i te Atua. (Levitiku 23:2, 4) Kua aere atu te au vaine akarongo ma etai atu au mema o to ratou ngutuare tangata ra.—1 Samuela 1:3-7; Luka 2:41-44.
8. Akapeea ta Salamo 84:1-12 akakite anga i te puapinga maata o te akamori ia Iehova ra?
8 Kua akatika pu maira te tata taramo akauruia ra i te akamanako anga puapinga maata i te akamori anga i roto i to ratou au oraanga. “E mea mataora toou ra [“tapenakara mekameka,” NW], e Iehova Sabaota!” ta te tamariki a Kora i imene. Kare tikai ratou i akapaapaa ana i tetai are maata ua. Kareka ra, kua akateitei ratou i to ratou au reo i te akapaapaa i te Atua ra ia Iehova, i te na ko anga: “Te [“maeva,” NW] nei toku ngakau e toku kopapa i te Atua ora ra.” Kua apai mai te angaanga a te ngati Levi i te mataora maata no ratou. “E ao to te aronga i noo i toou ra are,” ta ratou i tuatua. “Kare ratou e akapaki i te akapaapaa ia koe.” Ko te tika, e kua rauka i to Iseraela katoatoa i te imene: “E ao to te au tangata ko koe to ratou maroiroi ra; tei to ratou ngakau te au arataa. . . . Ka aere rai oki ratou mei te maroiroi ki te maroiroi, e kitea atura ratou ki mua i te aroaro o te Atua i Ziona.” Noatu rai e roa e te roiroi te aerenga o tetai Iseraela ki Ierusalema, kua akaouia tona maroiroi i tona tae anga ki te oire maata ra. Kua ki tona ngakau i te rekareka i tona akateitei anga i tona tika i te akamorianga ia Iehova: “E meitaki maata to te rā okotai i roto i te au paepae noou ra, i to te au rā e tausani ua atu. E anoano maata toku i te tiaki i te ngutupa i te are o taku Atua, i te noo i te au puakapa o te aronga kino ra. . . . E Iehova Sabaota e, e ao to te tangata e irinaki ia koe ra.” Na taua au tuatua ra i akakite mai i te ngai mua ta to Iseraela i oronga ki te akamori anga ia Iehova ra.—Salamo 84:1-12.
9. Eaa tei tupu ki te iti tangata o Iseraela ra i tona kore anga e tuku tamou i te akamori ia Iehova ki te ngai mua ra?
9 E mea mii ra, kare to Iseraela i tuku i te akamori mou ei mea mua i te oraanga. Kua tuku ua ratou i te akamori anga i te au atua pikikaa kia akakore i to ratou maroiroi no Iehova. E no reira, kua akaruke atu a Iehova ia ratou ki to ratou au enemi, ma te akatikaanga kia raveia atu ratou ki Babulonia. I to ratou akaoki angaia ki to ratou enua kainga i muri ake i te 70 mataiti, kua oronga atu a Iehova kia Iseraela te au akamaroiroi anga a nga peroveta tiratiratu ko Hagai, ko Zekaria, e Malaki. Kua akakeu te taunga ko Ezera raua ko te Kavana ko Nehemia i te au tangata o te Atua kia patu akaou i te iero e kia tamata akaou i te akamori mou ki reira. Inara i te topa anga etai anere mataiti, kua riro akaou te akamori mou ki tetai ngai akaaka i roto i te iti tangata ra.
Maroiroi no te Akamori Mou i te Anere Mataiti Mua
10, 11. Eaa te ngai o te akamori ia Iehova i roto i te au oraanga o te aronga tiratiratu ra i to Iesu tuatau i te enua nei?
10 I ta Iehova tuatau tau, kua mama mai te Mesia. Kua akara atura te aronga tiratiratu tataki tai kia Iehova no te ora. (Luka 2:25; 3:15) Kua akataka marama mai te Evangeria a Luka ia Ana e 84 mataiti e ei vaine takaua “kare rava aia i akaruke i te iero, e tika ra i te akamori anga i te Atua, ma te pure e te akakoreanga kai i te po e te ao.”—Luka 2:37.
11 “Teia taku kai,” e na Iesu ei, “ko te akono i tona anoano, to tei tono mai iaku ra, ma te akaoti i tana angaanga.” (Ioane 4:34) E tamanako ana e eaa ta Iesu i rave i tona tuaru anga i te aronga oko atura e oko maira i roto i te iero. Kua tatipoki atura aia i te au papa a te aronga oko moni e te au nooanga o te aronga oko kukupa ra. Kua akakite maira Mareko: “Kare rava [a Iesu] i tuku i te tangata, kia apai i te kapu āriki apinga na roto i te iero ra. Kua apii atura aia ia ratou, na ko atura, Kare aina kua tataia e, ‘Toku nei are, e karangaia ïa e are pure no te pa enua ravarai?’ kua akariroia io nei ra e kotou ‘e ana no te aronga keia ra.’” (Mareko 11:15-17) Ae, kare ua a Iesu i akatika i tetai ua atu tangata kia aere na roto atu i te paepae o te iero ma te apaianga apinga ki tetai atu tuanga o te oire ra. Kua akaketaketa ta Iesu au angaanga i tana apii i oronga mai i mua akera: “Na mua ra kotou i te kimi i te basileia o te Atua, e te tuatua-tika [na te Atua].” (Mataio 6:33) Kua akaruke mai a Iesu i te akaraanga meitaki no tatou kia akono i te akamori kia Iehova anake ua. Kua rave tikai aia i tana i tutu ra.—1 Petero 2:21.
12. Akapeea te akakite anga ta Iesu au pipi i ta ratou tuku anga i te akamori ia Iehova ki te ngai mua ra?
12 Kua akanoo katoa oki a Iesu i tetai akaraanga no tana au pipi kia aru, na te tu o tana akatupu anga i tana angaanga kia tatara mai i te aronga ngati Iuda tiratiratu tei takatakaiia ki raro mei te au apainga teiaa o te au ravenga akonoanga pikikaa ra. (Luka 4:18) I te akarongo anga ki ta Iesu akauenga kia akariro i te au tangata ei pipi e ka papetito atu ia ratou, kua akakitekite mataku kore te au Kerititiano mua ra i to Iehova anoano no to ratou Atu tei akatuakaouia ra. Kua mareka tikai a Iehova i ta ratou tuku anga i te akamori Iaia ki te ngai mua ra. No reira, kua tatara temeio maira ta te Atua uaorai angera i nga apotetoro ko Petero raua ko Ioane mei te tapekaanga e kua akaue atura ia raua: “Ka aere ki roto i te iero ra tu ei, ka akakite atu ei ki te tangata i te au tuatua ravarai o teianei ora.” I te akamaroiroi akaou angaia, kua akarongo rai raua. I te au ra ravarai, i te iero i Ierusalema e i tera are i tera are “kare e rā i tukua ia ratou, i te apii anga atu e te tuatua anga atu ia Iesu Mesia.”—Angaanga 1:8; 4:29, 30; 5:20, 42; Mataio 28:19, 20.
13, 14. (a) Mei te tuatau mua mairai o te akonoanga Kerititiano, eaa ta Satani i tamata kia rave ki te au tavini o te Atua ra? (e) Eaa ta te au tavini tiratiratu o te Atua i rave tamou ua atu?
13 I te tupu anga te patoi anga i ta ratou tutu aereanga, kua arataki atura te Atua i tona au tavini tiratiratu kia tata i te apii tau. “E uri i to kotou tumatetenga katoa ki runga [ia Iehova]; koia oki te tiaki mai ia kotou,” ta Petero i tata i muri poto ake i te 60 T.N. “E akono meitaki, e matakite, te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia: Ko tei patoi atu ïa ma te akarongo turori kore, kua kite oki kotou e, tei to kotou au taeake katoa i te ao nei taua au mate ra.” Kare e ekoko anga kua kite te au Kerititiano mua ra i te manako papu i taua au tuatua ra. Kua kite ratou e i muri ake i to ratou mamae anga no tetai tuatau poto, ka akatinamou te Atua i to ratou akarongo. (1 Petero 5:7-10) I taua tuatau openga o te akatereanga o te au mea a te ngati Iuda ra, kua akateitei te au Kerititiano mou i te akamori anga aroa o Iehova ki tetai ngai teitei ou.—Kolosa 1:23.
14 Mei ta te apotetoro ko Paulo i totou maira, kua tupu te akaruke anga akarongo mou, koia te ariu ke anga mei te akamori mou ra. (Angaanga 20:29, 30; 2 Tesalonia 2:3) Kua akaputuia mai te au akakite anga mei te raungauru mataiti openga o te anere mataiti mua ra i te akapapu anga i teia. (1 Ioane 2:18, 19) Kua autu a Satani i te ruru anga i te au Kerititiano akameamea ua ki roto i te au Kerititiano tika tikai, ma te akariroanga kia ngata te akataka anga i teia au “zizania” mei te au Kerititiano titona rai te tu. Inara, i te au anere mataiti i topa, kua tuku tetai papaki i te akamori anga i te Atua ra ki te ngai mua, noatu rai te tu kino no to ratou oraanga. Inara kia tae roa mai ki nga raungauru openga o “te tuatau akatakaia no to te pa enua” no reira te Atua i akaputu akaou mai ei i tona au tavini ki te akamori mou akateiteiia ra.—Mataio 13:24-30, 36-43; Luka 21:24, NW.
Akateiteiia te Akamori ia Iehova i Teia Tuatau
15. Mei te 1919 maira, i akapeea te akatupu anga i te au totou ia Isaia 2:2-4 e Mika 4:1-4?
15 I te 1919, kua akamana atura Iehova i te toenga o te aronga akatainuia kia rave mataku kore i tetai angaanga akakiteanga ki te ao katoa tei akateitei ra i te akamori anga i te Atua mou ra ki runga. Ma te aerenga maata mai te au “mamoe ke atu” tei akatutuia ra mei te 1935 mairai, kua tupu e kua tupu ua atu te urupu tangata tei aere ki “te maunga ra o te are o Iehova” i te pae vaerua. I te tuatau o te angaanga i te mataiti 1993, e 4,709,889 Au Kite o Iehova tei akapaapaa iaia na te patianga ia etai ke ra kia kapiti atu ki tona akamori anga akateiteiia. Mei teaa ra te akariro anga a teia i te tuke anga ki te tu akaaka i te pae vaerua o te “au tuaivi” o te patireia akonoanga pikikaa o teianei ao, e maata oki i to Kerititome!—Ioane 10:16; Isaia 2:2-4; Mika 4:1-4.
16. Eaa te tau ra kia raveia e te au tavini ravarai o te Atua i te manako anga i tei totouia ra ia Isaia 2:10-22?
16 Te manako ra te aronga o te au akonoanga pikikaa i to ratou au are pure e te au ngai akamori anga mamaata pera katoa to ratou au orometua e “teitei,” ma te orongaanga i te au taoonga mekameka e te au akangateitei anga kia ratou. Inara e tamanako ana i ta Isaia i totou maira: “Te mata teitei o te tangata nei, e taakaakaia ïa, e te teitei o te tangata nei, e tukuia ïa ki raro, e ko Iehova anake ra te ka akateiteiia i te reira ra.” Aea te reira ka tupu ei? A te mate maata te aere viviki mai nei e riro ei “te au idolo ra, e ngaro ke roa ïa iaia.” I te manako anga i papu o taua tuatau akauru mataku ra, ka tau te au tavini katoatoa o te Atua kia akara matatio tikai e eaa te ngai o te akamori anga ia Iehova i roto i to ratou au oraanga ra.—Isaia 2:10-22.
17. Akapeea te au tavini o Iehova i teia tuatau nei i te akakite anga i ta ratou tuku anga i te akamori ia Iehova ki te ngai mua ra?
17 Ei akataeake anga no te pa enua ravarai, te matau puia ra te Au Kite o Iehova no to ratou maroiroi i te tutu aereanga i te Patireia. Kare ta ratou akamori anga i te akonoanga noa nei, tei akatakaia no tetai ora ua i te epetoma. Kare, ko ta ratou ravenga ia i to ratou oraanga katoa. (Salamo 145:2) E tika oki, i teia mataiti i topa akenei e tere atu i te 620,000 Au Kite tei akapapa i to ratou oraanga kia rauka ia ratou i te rave i te angaanga orometua Kerititiano i te au taime ravarai. Kare te toenga atu i akakore i te akamori ia Iehova. Ko te reira tetai apinga maata i ta ratou au tuatua anga i te au ra ravarai e i ta ratou tutu aereanga i te ngai tangata katoa, noatu rai me te umuumuia ra ratou kia rave maroiroi i etai au angaanga ei turu i to ratou ngutuare tangata.
18, 19. E akakite mai i etai au akaraanga akamaroiroi anga tei rauka ia koe no te tatauanga i te au tua tataia no te oraanga o te Au Kite ra.
18 Te au tua no te au oraanga o te Au Kite tei neneiia ki roto i Te Punanga Tiaki te oronga maira i te kite oonu ki roto i te au mataara i rave tamou ei te au taeake e te au tuaine ke ke i te akamori anga ia Iehova ei mea mua i to ratou au oraanga. Kua akanoo tetai tuaine ou tei akatapu ra i tona oraanga kia Iehova i tana akakoro anga i te tuatau e ono ona mataiti kia rave aia i te angaanga mitinari. Te au taeake tungane e te au tuaine ou ra, eaa te akakoro anga ka iki kotou te ka tauturu ia kotou kia tuku tamou i te akamori anga ia Iehova ei mea mua i to kotou oraanga?—E akara i te atikara “Aruaruanga i Tetai Akakoroanga Tei Akanooia i te Ono Mataiti Anga,” i Te Punanga Tiaki o Mati 1, 1992, nga kapi 26-30.
19 Kua orongaia mai e tetai tuaine pakari takaua tetai atu akaraanga no te tukuanga i te akamori ia Iehova ki tona ngai tau tikai. Kua rauka mai iaia te akamaroiroi anga maata kia akakoromaki marie mei ko mai i te aronga tana i tauturu ra kia kite i te tuatua mou. Ko ratou tana “pamiri.” (Mareko 3:31-35) Me ka kite koe ia koe uaorai i roto i te au turanga mei te reira rai te tu, ka ariki ainei koe i te turu anga e te tauturu a te aronga ou i roto i te putuputuanga? (E tamanako ana ine i akapeea te Tuaine ko Winifred Remmie i te tuatua anga nona uaorai i roto i te tumu tuatua “Kua Akarongo Au i te Tuatau Kokoti Anga,” tei neneiia i roto i Te Punanga Tiaki o Tiurai 1, 1992, nga kapi 21-3.) Ko kotou te au tavini rave angaanga i te au tuatau ravarai, e akaari e ko te akamori ia Iehova tikai te apinga mua i to kotou au oraanga na te tavinianga taakaaka ua i te ngai i ungaia atu kotou, ma te kauraro rekareka anga ki te aratakianga teokaratiki. (E tamanako ana i ta te Taeake ko Roy Ryan akaraanga ine, tei akakiteia maira i roto i te atikara “Piri Vaitata Anga ki ta te Atua Akaaerenga,” i roto i Te Punanga Tiaki o Titema 1, 1991, nga kapi 24-7.) Kia maara e me ka oronga tatou i te manako mua ki te akamori ia Iehova, tei ia tatou te akapapu anga e ka akono aia ia tatou. Kare tatou e tau kia apiapi e ka aere mai te au apinga no te oraanga mei ea mai. Te akatutu maira te au tupuanga ki nga Tuaine ko Olive raua ko Sonia Springate i teia.—E akara i te atikara “Kua Kimi Matou i te Patireia Na Mua,” i roto i Te Punanga Tiaki o Peperuare 1, 1994, nga kapi 20-5.
20. Eaa te au uianga puapinga maata ka tau tatou kia ui kia tatou uaorai?
20 Kare ainei e tau kia ui tatou tataki tai ia tatou uaorai i etai au uianga akatomoanga? Eaa te ngai ta te akamori ia Iehova e mou nei i toku oraanga? Te akono nei ainei au i toku oraanga kia tau ki toku akatapuanga kia rave i to te Atua anoano i te meitaki te ka rauka iaku? I teea au ngai o te oraanga te ka rauka iaku i te rave kia meitaki atu? Na te akamanako marie anga i te atikara te ka aru mai nei e oronga i te tuatau kia tamanako e akapeea tatou i te taangaanga i ta tatou au apinga kia tau ki ta tatou iki anga i te apinga mua i to tatou oraanga—koia te akamori anga i te Atu Ngateitei ko Iehova, to tatou Metua aroa.—Koheleta 12:13; 2 Korinetia 13:5.
Ei Manako Akaou Anga
◻ No runga i te akamori, eaa ta Iehova e akara maira?
◻ Eaa ta te tapenakara i rave ei akamaaraara anga mai?
◻ I te anere mataiti mua o te T.N., koai ma te au akaraanga meitaki no te maroiroi i te akamori mou ra, e i akapeea?
◻ Mei te 1919 maira, akapeea te akateitei angaia te akamorianga ia Iehova ra?