Pene 1
Taokotaiia te Akamori Anga—Eaa Tona Aite Anga Noou?
1, 2. (a) Na runga i teea tumuanga te akatupu angaia mai te taokotai anga mou i te akamori anga i to tatou tuatau nei? (e) Akapeea ta te Puka Tapu akataka anga i te tupu nei?
E KAKO rava ake i te ao katoa nei e akaaere anga rekareka tikai tetai te akono ra kia taokotai te akamori anga. Te akaputu maira i te au tangata no te pa enua ravarai e te au kopu ravarai e te au reo katoa oki. Kare to ratou taokotai anga i tupu mai mei te tuku ua anga ki etai au irinaki anga. Kare katoa oki i rauka na roto i te kore ua e akaapaanga i te au tu oraanga te tau kore ra ki te Tuatua a te Atua. Na teaa ra i raukaʼi kia tupu te reira? Ko te tika ko te au tangata no te au tu ravarai te akamata maira i te kite ia Iehova e koia anake te Atua mou e te mareka ua ra ratou i te akono i to ratou oraanga kia tau ki tona au mataara no te tuatua tika.—Akaaiteia atu kia Apokalupo 15:3, 4.
2 E tupu anga teia no te totou tei tataia e te peroveta ko Mika i etai mataiti e 2,700 kua topa ki muri. I te taiku anga i “te au rā openga ra,” kua tata aia e: “E manganui te enua e aere, ma te tuatua e, Aere mai, ka aere tatou ki runga i te maunga o Iehova, e ki te are o te Atua o Iakoba, e nana e apii mai ia tatou i tona au aerenga; e ka aere tatou na tona ra au arataa.” (Mika 4:1, 2) Te kite nei ainei koe i te reira i te tupuanga?
3, 4. (a) Akapeea i tikai e te ariu atu nei te au “enua” kia Iehova? (e) Eaa te au uianga kia ui tatou kia tatou uaorai?
3 Kare e “enua” okotai i oronga katoatoa ia ratou uaorai ki te are vaerua o Iehova no te akamori. Inara e aronga tatakitai etai no te reira au enua te rave akapera ra. Ia ratou e apii ra no runga i te akakoroanga aroa e te tu inangaroia o te Atua ko Iehova, kua akakeu oonuia to ratou au ngakau. E kua kimi taakaaka kia kite eaa ta te Atua e umuumu ia ratou kia rave. E aiteite ta ratou pure ki ta Davida, koia te tangata akarongo tei tuatua ra: “E apii mai koe iaku kia rave au i toou anoano, ko koe oki toku Atua.”—Sa. 143:10, NW.
4 Te kite ra ainei koe ia koe uaorai i rotopu i te reira urupu maata o te aronga te akamori ra ia Iehova? Te akapapu ra ainei taau akono anga i te apii anga tei orongaia maira e te ariki tika ra koe e ko Iehova tikai te tumu o te reira? Eaa te maata o taau ‘aaere anga na tona ra au arataa’?
Akapeea e Raukaʼi te Reira
5. (a) Eaa te maata o te taokotai anga i te akamori te ka rauka kia akatupuia? (e) Eaa ra e kia ngakoikoi ei i te akamori ia Iehova i teianei, e akapeea e raukaʼi ia tatou te tauturu ia etai ke kia rave i te reira?
5 Ko ta Iehova akakoroanga kia taokotai te au mea kite katoa tei angaia i te akamori—kare rava tetai e akavareia e te ravenga pikikaa, kare tetai e kimikimi ua no te kore e kitea te aiteanga tika tikai no te oraanga. Mei teaa ra to tatou umuumu no te tuatau e akameitaki ei i te Atua mou te aronga katoa e ora! (Sa. 103:19-22) Inara i mua ake ka tupu ei te reira, ka tau a Iehova kia rave i te takore atu i te aronga te kopae ke ra i tona ariki anga aroa e te rave tamou ra i te akakinoanga i te oraanga o etai ke. E mea aroa ua ra kua oronga mai aia i te akamatakite na mua e eaa tana ka rave. E tuatau to te au tangata i te au ngai ravarai no te taui ke i to ratou mataara. No reira rai i to tatou uaorai tuatau nei te orongaia ra te pati anga rapurapu ki te ao katoa e: “E mataku i te Atua e oronga i te kaka kiaia no te mea kua tae oki te ora akavaanga nana ra, no reira e akamori i Tei maani i te rangi e te enua e te tai e te au vai pupui ra.” (Apokalupo 14:6, 7, NW) Kua ariki ainei koe i te reira pati anga? Me koia ia, tei ia koe te tika i teianei i te angaanga kapiti ma ta Iehova akaaerenga i te tauturu i etai atu kia rave katoa oki i te reira.
6. I muri ake i te kiteanga i te au apiianga tumu o te Puka Tapu, eaa atu tetai tupu anga tau no tatou kia tauta pakari i te rave?
6 Kare to te Atua akakoroanga e kia rave mai i te au tangata ki roto i tana akaaerenga tei karanga ua ra e te irinaki ra ratou ia Iehova e te anoano ra ratou kia noo ki roto i te Parataito mari ra i te reira taime tikai te rave ua atu ra i ta ratou uaorai au ravenga noinoi. Te anoano ra aia i te au tangata kia rauka te “kite tika tikai i tona anoano,” e e mea tau kia akaariia mai te reira i roto i to ratou oraanga. (Kolosa 1:9, 10, NW) I muri ake i te kite anga o te aronga manako ariki i te au apiianga mua o te Puka Tapu, ka inangaro rai ratou kia aere ua atu ki mua i te pakari Kerititiano ra. To ratou inangaro kia kite i te piri anga oa tikai ma Iehova, kia akamaata atu e te akaoonu atu i to ratou kite i tana Tuatua, e kia akono i te reira ki roto i to ratou oraanga. Te tauta ra ratou kia aite atu ki to ratou Metua i te rangi ra, i te akaataanga i tona au tu e pera katoa te manakoanga i te au mea katoa mei tana i manako. Na teia i akakeu ia ratou kia kimi i te au mataara e maata atu i te rave anga i tana angaanga e rave ia ra i te enua nei i to tatou tuatau nei. Ko taau ainei te reira e rave na?—Ephe. 5:1; Ebera 5:12–6:3; 1 Timo. 4:15.
7. Na teea au mataara e raukaʼi te taokotai anga mou i teianei, e akapeea e tupu ei te reira?
7 Te akakite maira te Puka Tapu e ka tau te aronga katoa te tavini ra ia Iehova ei au tangata taokotaiia ratou. (Ephe. 4:1-3) E mea tika kia tupu teia taokotai anga i teianei, noatu rai e te noo nei tatou i roto i te ao tatakake e te rave ngata nei i to tatou uaorai au tu apa ua. Kua pure akatenga a Iesu kia riro tana au pipi katoa ei okotai, kia rekareka i te taokotai anga mou. Eaa ra te aite anga o teia? Ko te mea mua kia rauka te piri anga meitaki no ratou kia Iehova e ki tana Tamaiti katoa. Pera katoa oki kia taokotaiia ratou tetai ki tetai. (Ioane 17:20, 21) Te rauka nei teia ia ratou i te mea te akono ra ratou i te apii anga tei rauka mai no ko i te “are” o Iehova.
Eaa te au Tika Tauturu no te Taokotai?
8. (a) Eaa ta tatou ka akatupu me rave tatakitai tatou i te Puka Tapu ei kimikimi i te au pau anga ki te au uianga te piri maira kia tatou? (e) Na te pauanga i te au uianga tei akapapaia i runga akenei, e akara matatio i te au tika tauturu i te taokotai anga Kerititiano.
8 Kua tareia ki raro akenei etai au tika tauturu i teia taokotai anga. Ia koe e pau ra i teia au uianga te aru maira i teia, e tamanako e akapeea te reira i te akatuke ia koe i toou uaorai piri anga kia Iehova e toou au taeake Kerititiano. Na te akamanakoanga no runga i teia au tumu i roto i te marama anga o te au tuatua tapu tei tataia na te reira e tauturu i taau akatupu anga i te manako e te kite no ko mai i te Atua ra, e au tu te reira te umuumuia nei e tatou katoatoa. (Maseli 5:1, 2; Philipi 1:9-11) No reira e tamanako ana i teia au tika tatakitai:
(1) Te akamori nei tatou katoatoa ia Iehova e te akatika ra i tana tika no te akanoo i te turanga o te meitaki e te kino.
Akapeea ta Iehova akara anga me ka kopae tikai tatou i tana apiianga no runga i tetai mea te manako ra tatou e e mea ngiti ua? (Luka 16:10; akaaiteia atu kia Malaki 1:6-8.)
Ka riro ainei ei kino no etai ke me kare tatou e tamou i te akarongo i ta Iehova au akauenga? (Akaaiteia atu kia Roma 5:12; Iosua 7:20-26; 1 Ariki 14:16.)
(2) Noatu e tei ea tatou i teianei ao, tei ia tatou te Tuatua a te Atua ei arataki ia tatou.
Me tuku tatou i te au tika anga, eaa te kino te vaira no te rave ua anga i ta tatou i “manako” e ko te tika ia? (Iere. 17:9; Maseli 14:12)
Me kare tatou e kite e eaa ta te Puka Tapu ako anga no runga i tetai mea, eaa ta tatou ka rave? (Maseli 2:3-5)
(3) Te puapinga nei tatou katoatoa mei taua porokarama kaikaianga vaerua okotai.
Eaa te au turanga te vaira i rotopu i te aronga kare e ariki ana i ta Iehova au akanoo anga no te kaikaianga vaerua? (Akaaiteia atu kia Isaia 1:3; 9:16; 65:14.)
(4) Ko Iesu Karaiti, e kare ko tetai tangata, to tatou Arataki e na roto anake iaia e tae atu ei ta tatou akamori kia Iehova.
E tumu tau ainei no etai o tatou kia irinaki e ei au peretana e meitaki atu tatou ia etai ke? (Roma 3:23, 24; 12:3; Mata. 23:8-10)
(5) Noatu tei ea to tatou ngai noo anga, te akara nei tatou ki to te Atua Patireia anake ua ei manakonakoanga no te au tangata katoa.
Akapeea ta te reira paruru anga ia tatou i te au mana akatatakake ra? (Mata. 6:9, 10; Mika 4:3)
(6) Te akatupu ra te vaerua tapu i te au tu puapinga tikai ki roto i te aronga akamori ia Iehova no te taokotai anga Kerititiano.
Akapeea ta tatou akatuera anga i te mataara no te vaerua o te Atua kia akatupu i tona au ua ki roto ia tatou? (Sa. 1:2; Maseli 22:4; Apokalupo 3:6; Angaanga 5:32)
Akapeea ta te au ua o te vaerua i roto ia tatou akatupuanga i to tatou piri anga kia Iehova? E pera katoa ki to tatou au taeake? (Gala. 5:22, 23)
(7) E apainga ta tatou pouroa i te tutu aere i te tuatua meitaki o te Patireia o te Atua.
Akapeea ta tatou rave tamou anga i te angaanga tutu aere ma to tatou au taeake Kerititiano i te akatupuanga i to tatou manako ngakau no ratou? (Akaaiteia atu kia Kolosa 4:7, 11.)
9. Eaa te ka tupu me ka rave papu tikai tatou i teia au tuatua mou i to tatou au oraanga?
9 Te akatikaanga i teia au tika nei e mea okotai ia. Ko te akono ra kia rotai ki te reira au mea e maata atu tei anoanoia. Inara me rave akapera tatou, te akapiri vaitata atura tatou kia Iehova. Ka riro katoa oki to tatou kapiti anga ki te au taeake akarongo ra ei tumu no te mataora. Mei ta Salamo 133:1 e tuatua ra: “I na oki, te meitaki e te mataora, kia noo katoa te au taeake ma te tau tikai!” Kare ainei koe uaorai i kite i te mataora kia atea ke mai mei to te ao nei, ma tona katoa ra au tu noinoi, e kia tae atu ki te au uipaanga kapiti atu ki te aronga inangaro tikai ia Iehova?
E Kopae i te au tu Akatatakake
10. Eaa ra i anoanoiaʼi kia matakite tatou i te kopae i te vaerua akatakake?
10 Kia riro ei ei mea iro koreia te reira taokotai anga puapinga, ka tau tatou kia kopae i te au tu akatatakake ra. Ko tetai o te au mea maata rava ko te vaerua akatakake. Te tauturu maira a Iehova ia tatou i te kopae ke atu i te reira na te kiritianga i te arai i tei akamata mai i te reira, koia a Satani te Tiaporo. Nana i akavare ia Eva kia manako e ka puapingaia aia me akarongo kore i ta te Atua i tuatua ra e nana uaorai e tuku tana au tika. Kua piri atu a Adamu kiaia i taua mataara meameaau ra. Ko tei tupu e tumatetenga no raua e tatou katoa oki. (Ge. 2:16, 17; 3:1-6, 17-19) Te noo nei tatou i te ao tei ki roa i te reira vaerua o te akatakake, no reira kare e tau kia poitirere ua tatou me ka anoanoia kia akakore atu i te reira vaerua i roto ia tatou uaorai. Te tauturu aroa ua ra a Iehova ia tatou i te rave i te reira na roto i te ako anga a tana akaaerenga.
11. Eaa te ka akaari mai e me te teateamamao ngakau tae ra tatou no te oraanga ki roto i te Akatereanga Ou a te Atua no te tuatua tika?
11 Na roto mai i te reira akaaerenga kua kite tatou i ta Iehova taputou meitaki kia mono i te au mea takapini ki te au rangi ou e te enua ou i te “vai tika anga o te tuatua-tika ra.” (2 Pe. 3:13) Te mataora ra tatou i te manakonakoanga e kare e roa atu ana e kore atu ei teia ao kino nei e ka akariroiaʼi te enua katoa ei Parataito. Inara te akaari nei ainei te tu o to tatou uaorai oraanga e te teateamamao nei tatou ma te ngakau tae tikai no te oraanga ki roto i te ao e vai tamou ei te rave anga i te tuatua tika? Te akakite papu maira te Puka Tapu kia tatou e: “Auraka e anoano i teianei ao, e te au mea ravarai o teianei ao. Ko te tangata i anoano i teianei ao ra, kare te anoano o te Metua i roto iaia ra.” (1 Ioane 2:15) E tika rai e e manganui te au mea no teianei ao kare anake tetai ia tatou e anoano atu. Inara te reka kore ra ainei tatou i te au mea anake o teianei ao te arai ra i to tatou uaorai rekareka anga no te oraanga? Me kare te akakore katoa ra ainei tatou i tona vaerua—i tona tu akatakake, te maata o tona ra manako iaia uaorai? Te rave papu ra ainei tatou i te akarongorongo atu kia Iehova e i te akarongo kiaia mei to tatou ngakau, noatu eaa te au anoano tarevake o te kopapa nei? Ko te mataara katoa o to tatou oraanga—noatu tei ea tatou, noatu eaa ta tatou e rave ra—ka tau kia oronga mai i te akapapuanga e ko to tatou manako e ta tatou au akakoroanga na te Atua anake i akatika mai.—Maseli 3:5, 6.
12. (a) Eaa ra i puapinga maataʼi i teianei kia mou i te tuatau no te apii i ta Iehova au mataara e kia aru i te reira i to tatou oraanga? (e) Eaa te aite anga o te au tuatua tapu tei tataia ki roto i te parakarapa, kia tatou tatakitai?
12 Kia tae mai ra ta Iehova tuatau i akataka no te akapou i teia akatereanga kino o te au mea nei e te aronga katoa tei anoano i tana ravenga, kare rava aia e taroaroa. Kare roa aia e akaroa atu i te reira tuatau me kare e taui i tona au turanga kia o mai ei te aronga te tauta ra i te mou ki teianei ao, te aronga e ngakau rua ua ra no te apiianga i te anoano o te Atua e te raveanga i te reira. Ko teia te tuatau no te angaanga! (Luka 13:23, 24; 17:32; 21:34-36) Mei teaa ra te pumaanaanga i te ngakau, i te kite i te “urupu maata” o te aronga te mou ra i teia tuatau puapinga, i te kimi matatioanga i te apii anga ta Iehova i oronga mai na roto i tana akaaerenga aroa e te aaereanga taokotaiia i tona ra au arataa!
Uriuri Akaou Anga
● Eaa ta Iehova akakoroanga no runga i te akamori anga?
● I muri ake i te kite anga i te au apiianga tumu o te Puka Tapu, eaa tetai atu tupu anga te ka tau tatou kia tauta i te rave?
● Eaa te ka rauka ia tatou tatakitai i te rave, kia riro ei te au tika no te taokotaianga ta tatou i uriuri ana, kia mana ki roto i to tatou oraanga i te mea tau ra?
[Tutu maata i te kapi 4]