E Tuanga Taau i te Akamatutu i to Tatou Taokotaianga Kerititiano​—Akapeea Ra?

1. Mei te akamataanga mai, eaa te akataka maira i te au angaanga a te Atua?

KUA taokotai a Iehova raua ko Iesu mei te akamataanga mai o te au mea ta raua i anga. Kua anga a Iehova ia Iesu na mua ake i te au mea ravarai. E oti, kua angaanga kapiti a Iesu ki tona Metua e kua ‘vaitata katoa kiaia mei te tamaiti angai ra.’ (Maseli 8:30) Kua angaanga kapiti katoa te au tavini o Iehova ki tetai e tetai i te rave anga i te au angaanga ta ratou i anoanoia kia rave. Ei akaraanga, kua angaanga kapiti a Noa e tona ngutuare tangata i te akatu i te araka. Muri mai, kua angaanga kapiti to Iseraela i te akatu i te tapenakara, te taratara i te reira, e te apai aere mei tera ngai ki tera ngai. I ko i te iero, kua imene kapiti ratou e kua akatangi i te au apinga akatangi ei akapaapaa ia Iehova na roto i te au imene tangi reka tikai. Kua rauka i te iti tangata o Iehova i teia au mea pouroa no te mea kua angaanga kapiti ratou ki tetai e tetai.​—Genese 6:14-16, 22; Numero 4:4-32; 1 Paraleipomeno 25:1-8.

2. (a) Eaa te mea umere no runga i te putuputuanga Kerititiano mua? (e) Eaa te au uianga ta tatou ka akamanako?

² I te anere mataiti mua, kua angaanga kapiti te au Kerititiano mua ki tetai e tetai. Kua akamārama mai te apotetoro ko Paulo noatu e tukeke to ratou karape e ta ratou au apainga, kua taokotaiia ratou. Kua aru pouroa ratou i to ratou Arataki ko Iesu Karaiti. Kua akaaite a Paulo ia ratou mei te kopapa e tukeke tona au mero e te angaanga taokotai ra. (E tatau ia 1 Korinetia 12:4-6, 12.) Akapeea i to tatou tuatau? Akapeea tatou te angaanga kapiti anga ki tetai e tetai i roto i te angaanga tutu aere, te putuputuanga, e te ngutuare tangata?

ANGAANGA KAPITI I ROTO I TE ANGAANGA TUTU AERE

3. Eaa te orama ta te apotetoro ko Ioane i kite?

³ I te anere mataiti mua, kua kite te apotetoro ko Ioane i tetai orama e itu angera e akatangi ra i te au pu. Te akatangi anga te rima o te angera i tana pu, kua kite atu a Ioane “i tetai etu no runga mai i te rangi i te topa anga mai ki runga i te enua nei.” Kua taangaanga te reira “etu” i te taviri ei akatuera i te ngutupa o te vaarua takere kore. Mea mua, kua peke akera te auai no taua vaarua ra, e oti kua rere te tāpaki no roto mai i taua auai ra. Kare te au tāpaki e rave kino atu i te ngangaere e te au rakau e tupu ra, mari ra kua rave kino i “te au tangata ra kare te akairo a te Atua ki runga i to ratou rae.” (Apokalupo 9:1-4) Kua kite a Ioane e ka rauka i te au pupu tāpaki i te akatupu i te kino maata; mei tei raveia i Aiphiti i te tuatau ia Mose. (Exodo 10:12-15) Te au tāpaki ta Ioane i kite, te akatutu maira i te au Kerititiano akatainuia e tutu aere ra i te karere ririnui te ka patoi atu i te au akonoanga pikikaa. E mirioni ua atu aronga e manakonakoanga to ratou i te enua nei, ka kapiti katoa atu kia ratou. Kua taokotai ratou i roto i te angaanga tutu aere. Ka tauturu teia angaanga i te manganui kia akaruke i te akonoanga pikikaa e kia matara mai mei raro ake i ta Satani akatere anga.

4. Eaa te angaanga ta te iti tangata o te Atua ka rave, e eaa te ravenga anake e rauka ai teia?

⁴ E apainga ta tatou kia tutu i “te evangelia” ki te au tangata takapini i teia ao i mua ake ka tae mai te openga. E āka angaanga tikai teia! (Mataio 24:14; 28:19, 20) Ka anoanoia tatou kia pati i “tei kaki ra” kia inu i “te vai ora,” koia oki, ka anoanoia kia apii i te tuatua mou Pipiria ki te aronga tei inangaro kia mārama i te reira. (Apokalupo 22:17) Inara ka rauka anake me “piri ei oki” tatou, e me angaanga kapiti ki tetai e tetai i roto i te putuputuanga.​—Ephesia 4:16.

5, 6. Akapeea tatou me taokotaiia i te tutu aere i te nuti meitaki?

⁵ Kia itaeia te manganui anga o te tangata, ka anoanoia kia akaaere meitakiia ta tatou angaanga tutu aere. Ka riro te aratakianga mei ta tatou putuputuanga ei tauturu ia tatou kia akapera. Me oti te uipa no te angaanga tutu aere, ka aere tatou ki vao i te akakitekite ki te tangata te nuti meitaki o te Patireia. Ka oronga katoa tatou i te au puka no runga i te Pipiria. Te tika, kua oronga tatou e mirioni ua atu puka takapini i teianei ao. Tetai taime, ka patiia tatou kia piri ki roto i tetai angaanga takake no te tutu aere. Me rave koe i teia angaanga, te taokotai ra koe ki te mirioni ua atu o te au taeake takapini i teia ao e tutu aere ra i teia karere aiteite! Te angaanga kapiti katoa ra koe ki te au angera, tei tauturu i te iti tangata o te Atua kia tutu aere i te nuti meitaki.​—Apokalupo 14:6.

⁶ E mea umere tikai me tatau tatou i te Yearbook no te au tupuanga o te angaanga tutu aere takapini i teia ao! Akamanako katoa i teia, kua taokotaiia tatou i te ao katoa me pati i te tangata kia piri mai ki ta tatou au uruoaanga. I ko i te uruoaanga, te akarongo ra te katoatoa i taua porokaramu aiteite ra. Ka riro te au akoanga, te nuku, e te au akatutuanga ei akamaroiroi ia tatou kia oronga kia Iehova i ta tatou ka rauka. Kua taokotai katoa tatou ki te au taeake e te au tuaine takapini i teia ao me piri tatou ki te Akamaaraanga i te mate o Iesu i te au mataiti ravarai. (1 Korinetia 11:23-26) Ka uipa kapiti tatou i te rā okotai, ia Nisana 14, i muri ake i te opunga rā ei akaari i to tatou āriki rekareka no ta Iehova i rave no tatou e kia akarongo ki te akauenga a Iesu. I te au epetoma i mua ake i te Akamaaraanga, ka angaanga kapiti tatou i te pati i te manganui anga o te tangata kia piri mai kia tatou i teia akakoroanga puapinga.

7. Ia tatou e angaanga kapiti ra, eaa ta tatou ka rauka i te rave?

⁷ Me e okotai ua tāpaki, kare e maata te kino tana ka akatupu. Pera katoa, me ko taua anake ua, kare e rauka i te tutu aere ki te au tangata ravarai. Inara no te mea te angaanga kapiti nei tatou, ka rauka ia tatou i te akakite ki te mirioni ua atu tangata no runga ia Iehova, e te tauturu i tetai pae kia akapaapaa e kia akangateitei iaia.

ANGAANGA KAPITI I ROTO I TE PUTUPUTUANGA

8, 9. (a) Eaa te akatutuanga ta Paulo i taangaanga ei apii i te au Kerititiano kia vai taokotai? (e) Akapeea tatou me angaanga kapiti ki tetai e tetai i roto i te putuputuanga?

⁸ Kua akamārama a Paulo ki to Ephesia akapeea te putuputuanga te akaaereia anga, e kua akakite aia e ka anoanoia te katoatoa i roto i te putuputuanga ‘kia tupu i te au mea katoa.’(E tatau ia Ephesia 4:15, 16.) Kua taangaanga a Paulo i te akaraanga o te kopapa ei akamārama e ka rauka i te au Kerititiano tataki tai i te tauturu i te putuputuanga kia noo taokotai e kia aru ia Iesu, te Arataki o te putuputuanga. Karanga aia e kua angaanga kapiti te au mero o te kopapa “no te meitaki o te au pirianga katoa i te pakari ou o te au ngai katoa kia tau.” No reira noatu e e mapu me kore e pakarikari tatou, e ma te oraanga kopapa meitaki e me kare, eaa ta tatou tataki tai ka rave?

⁹ Kua akanoo a Iesu i te aronga pakari kia rave i te aratakianga i roto i te putuputuanga, e ka inangaro aia ia tatou kia akangateitei ia ratou e kia aru i te aratakianga ta ratou ka oronga mai. (Ebera 13:7, 17) Kare i te mea māmā ua i te rave i teia. Inara ka rauka ia tatou i te pati kia Iehova no te tauturu. Ka tauturu mai tona vaerua tapu ia tatou kia akono i tetai ua atu aratakianga ta te aronga pakari ka oronga mai. E akamanako ana mei teaa te maata ka tauturu tatou i te putuputuanga me vai akaaka tatou e me angaanga kapiti ki te aronga pakari. Ka taokotaiia ta tatou putuputuanga, e ka akaketaketaia to tatou inangaro no tetai e tetai.

10. Akapeea te au tavini tauturu te tauturu anga kia vai taokotai ua te putuputuanga? (Akara i te tutu mua.)

¹⁰ Ka tauturu katoa te au tavini tauturu kia vai taokotai ua te putuputuanga. Ka angaanga pakari ratou i te tauturu i te aronga pakari, e te āriki rekareka nei tatou i ta ratou e rave ra. Ei akaraanga, ka akapapu te au tavini tauturu e kua rava te au puka no te angaanga orometua, e ka turou ratou i te au manuiri tei tae mai ki ta tatou uipaanga. Ka angaanga pakari ratou i te akaou i te Are Uipaanga Patireia e kia tāmā i te reira. Me angaanga kapiti tatou ki teia au taeake, ka taokotai tatou e ka tavini ia Iehova na roto i te mataara tei akaaereia.​—Akaaite ia Angaanga 6:3-6.

11. Eaa ta te au mapu ka rave ei tauturu i te putuputuanga kia vai taokotai?

¹¹ Tetai aronga pakari kua roa ratou i te angaanga pakari no te putuputuanga. Inara penei kare e maata ana te angaanga ta ratou e rave ana mei to mua ana no te mea te pakari atura ratou. Ka rauka i te au taeake mapu i te tauturu atu. Me tereniia ratou, ka rauka ia ratou i te akono i te au apainga maata i roto i te putuputuanga. Pera katoa me angaanga pakari te au tavini tauturu, penei ka riro mai ratou ei aronga pakari i te tuatau ki mua. (1 Timoteo 3:1, 10) Tetai aronga pakari tei mapu, kua tere ki mua i te pae vaerua. Teianei te tavini nei ratou ei akaaere kotinga e te tauturu nei i te au taeake e te au tuaine i roto i te au putuputuanga. E mataora tikai tatou me puareinga ua te au mapu i te tavini i te au taeake e te au tuaine.​—E tatau ia Salamo 110:3; Koheleta 12:1.

ANGAANGA KAPITI I ROTO I TE NGUTUARE TANGATA

12, 13. Eaa te ka tauturu i te ngutuare tangata kia angaanga kapiti ki tetai e tetai?

¹² Akapeea tatou me tauturu i te au mema o te ngutuare tangata kia angaanga kapiti ki tetai e tetai? Ka tauturuia tatou i roto i te akamorianga a te ngutuare i te au epetoma. Me akapou kapiti te au metua e te tamariki i te tuatau kia apii no runga ia Iehova, ka akaketaketaia to ratou inangaro no tetai e tetai. I taua tuatau ra, ka apiipii ratou i ta ratou ka tuatua i roto i te angaanga orometua, e ka tauturuia te katoatoa kia papa meitaki. E me akarongo ratou i tetai e tetai e tuatua ra i te tuatua mou e te inangaro ra te ngutuare tangata katoa ia Iehova, ka akarekareka ratou iaia e ka akapiri vaitata atu tetai ki tetai.

¹³ Akapeea te tane e te vaine te angaanga kapiti ki tetai e tetai? (Mataio 19:6) Me inangaro raua ia Iehova e kia tavini kapiti iaia, ka mataora raua e ka taokotaiia to raua oraanga akaipoipo. Ka tau katoa raua kia akaari i te tu takinga meitaki ki tetai e tetai, mei ia Aberahama raua ko Sara, Isaaka raua ko Rebeka, e Elikana raua ko Hana. (Genese 26:8; 1 Samuela 1:5, 8; 1 Petero 3:5, 6) Me akapera tetai tane e te vaine, ka taokotaiia raua e ka akavaitata atu kia Iehova.​—E tatau ia Koheleta 4:12.

14. Me kare taau tane me kore vaine e tavini ra ia Iehova, eaa taau ka rave ei akaketaketa i toou oraanga akaipoipo?

¹⁴ Te akakite tikai maira te Pipiria auraka e akaipoipo i tetai ua atu tei kore i tavini ia Iehova. (2 Korinetia 6:14) Inara, te vai ra te au taeake e te au tuaine tei akaipoipo i tetai kare i te Kite no Iehova. Kua apii tetai pae i te tuatua mou i muri ake i te akaipoipo anga, e kare to ratou tokorua i riro mai ei Kite. Tetai pae, kua akaipoipo i tetai tavini o Iehova, inara kua akaruke ta ratou tane me kore vaine i te putuputuanga. I teia au turanga, ka rave te au Kerititiano i te ka rauka i te akono i to ratou oraanga akaipoipo kia vai ketaketa ua na te akarongo anga ki te ako a te Pipiria. Kare teia i te mea māmā ua. Ei akaraanga, kua tavini kapiti a Mary e tana tane ko David ia Iehova. Inara, kua akamutu a David i te aere ki te au uipaanga. Kua tauta rai a Mary kia riro ei vaine meitaki e te akaari i te au tu Kerititiano. Kua apii katoa aia i ta raua tamariki e ono no runga ia Iehova e kua aere ua rai ki te au uipaanga e te au uruoaanga. I te au mataiti i muri mai, kua mamaata mai te tamariki e kua akaruke i te kainga, kua tavini ua rai a Mary ia Iehova noatu e ngata i te rave i te reira. Inara, kua akamata a David i te tatau i te au makatini ta Mary i vaoo mai. Muri mai, kua akamata a David i te oki akaou ki te uipaanga. Kua tapao tana mokopuna i tetai nooanga nona, e me kare a David e tae mai, ka karanga te tamaiti, “E Papa, kare au i kite ana ia koe i te uipaanga i teia rā.” I muri ake i te 25 mataiti, kua oki a David kia Iehova e te mataora nei raua ko tana vaine i te tavini kapiti akaou ia Iehova.

15. Akapeea te au tokorua pakarikari te tauturu anga i te au tokorua mapu?

¹⁵ Te tamaki nei a Satani i te ngutuare tangata i teia tuatau. Ko teia tetai tumu ka anoanoia te tane e te vaine kia angaanga kapiti i te tavini ia Iehova. Noatu eaa te roa i toou akaipoipoanga, e akamanako ana eaa taau ka tuatua e ka rave kia akaketaketa i toou oraanga akaipoipo. Me e tokorua akaipoipo pakarikari korua, e akanoo i te akaraanga meitaki no te au tokorua mapu. Penei ka pati koe i tetai nga tokorua mapu kia piri atu ki taau akamorianga ngutuare. Ka kite mai raua e noatu eaa te roa i to raua akaipoipoanga, ka akaari raua i te tu takinga meitaki no tetai e tetai ma te taokotai.​—Tito 2:3-7.

“KA AERE TATOU KI RUNGA I TE MAUNGA O IEHOVA”

16, 17. Eaa ta te au tavini taokotaiia o te Atua e tapapa atura?

¹⁶ Te aere anga te ngati Iseraela ki te oroa i Ierusalema, kua angaanga kapiti ratou ki tetai e tetai. Kua akapapa ratou i te au mea ka anoanoia no to ratou tere. E oti, kua aere kapiti ratou e kua tauturu i tetai e tetai. I ko i te iero, kua akapaapaa e kua akamori kapiti ratou ravarai ia Iehova. (Luka 2:41-44) I teia tuatau, ia tatou e akapapa ra no te oraanga i te ao ou, ka anoanoia tatou kia taokotaiia e kia tauta i te angaanga kapiti ki tetai e tetai. Ka rauka ainei ia koe i te akamanako i tetai atu mataara kia akamaata atu i taau ka rave?

¹⁷ Kare te au tangata i teianei ao e āriki ana i tetai e tetai e e tatā ana ratou no tetai ua atu apinga. Inara te mataora nei tatou kua tauturu mai a Iehova ia tatou kia akatupu i te au e kia mārama i te tuatua mou! Tona iti tangata takapini i teianei ao, te akamori nei iaia i te mataara tana e anoano maira. I roto tikai i teia au rā openga, kua taokotai meitaki te iti tangata o Iehova. Mei ta Isaia e Mika i totou, te aere kapiti nei tatou “ki runga i te maunga o Iehova.” (Isaia 2:2-4; e tatau ia Mika 4:2-4.) Mei teaa atura to tatou mataora no te tuatau ki mua me “piri ei oki” te tangata ravarai i te enua nei e me angaanga kapiti ki tetai e tetai i te akamorianga ia Iehova!