Pene 64

Apiianga no te Akakore Anga Ara

I TE akara anga tei roto rai a Iesu i te ngutuare i Kaperenauma ma tana au pipi katoa oki. No te uriuri kapiti aia ma ratou ra e akapeea me akono i te au pekapeka i rotopu i te au taeake ra, e kua ui atura Petero: “E te Atu, kia putuputu taku taeake i te takinga-kino anga mai kiaku, kia takiia toku akakore anga i tana ara?” I te mea ta te au orometua ngati Iuda e toru ua taime te akakore anga ara, kua manako a Petero e e mea maoraora tikai kia karanga aia “kia taki itu aina?”

Inara e tarevake te reira manako kia tareia te reira. Kua ako atura Iesu ia Petero: “Kare au e karanga atu kia koe e, kia taki itu ua, kia itu ngauru ma itu taime.” Te akakite atura aia e auraka e kotingaia te au taime no Petero i te akakore anga i te ara a tona taeake.

Ei akaketaketa anga ki runga i tana au pipi i ta ratou apainga kia akakore ua i te ara, kua tuatua atura Iesu i tetai akatutu anga kia ratou. No tetai ariki tei anoano ra kia tutakiia te kaiou a tona au tavini kiaia. Kua takiia mai kiaia tetai tavini e maata tana kaiou e 60,000,000 tenari. Kare e ravenga e raukai iaia i te tutaki i te reira kaiou. No reira, mei ta Iesu i akataka maira, kua ikuiku te ariki kia okoia aia e tana vaine e tana au tamariki ei tutaki.

I reira kua tipapa iora taua tavini ra ki raro ki mua i tona pu e kua pati akatenga: “Aua na koe e rapurapu iaku, e naku e akaoki atu i te oko naau, e ope rava ake.”

Kua tangi maira iaia, e kua akakore te pu i te kaiou maata a tona tavini ra ma te aroa. Kua akakite maira Iesu e, koi oti ua akera te rave anga i te reira, kua aere atura taua tavini ra, kitea atura tetai taeake tavini kaiou nana e 100 ua tenari. Kua opu atura i te karaponga o taua taeake tavini nona ra e kua nati atura iaia, ma te karanga atu anga: “E oko mai koe i taku ou ia koe na.”

Inara kare e moni a te reira taeake tavini ra. E kua tipapa iora aia ki mua i nga vaevae o te tavini i kaiou ra aia, kua pati akatenga atura: “Aua na koe e rapurapu iaku, e naku e akaoki atu i taau.” Kare rai i aite ki tona pu, kare te tavini ra i tangi, kua tiria atura tona taeake tavini ki roto i te are tapekaanga.

Kua tuatua ua atura Iesu e, kua kite etai atu au tavini i tei tupu ra e kua akakite atura ki te pu. Kua pati riri atura aia kia aere mai te reira tavini. Kua na ko atura: “E teianei tavini kino e, i akakore ana au i taku ou katoatoa ia koe, ko koe i aue mai kiaku; e auraka koe e aroa katoa atu i te taeake tavini noou ra, mei iaku i aroa ia koe ra?” No te riri anga, kua tuku atu te pu i te tavini aroa kore ra ki te aronga tiaki mou auri, e kia ope takiri tana kaiou i te tutakiia e ia.

Kua tuatua akaope atura Iesu: “E akapera katoa mai taku Metua i te [rangi, NW] ra ia kotou katoa, kia kore kotou e akakore ma te ngakau katoa i te apa a tona taeake.”

Mei teaa ra te apiianga meitaki no te akakore anga ara! Kia akaaiteia atu ki te kaiou maata no te ara ta te Atua i akakore mai no tatou, noatu eaa te apa tei raveia mai kia tatou e tetai taeake Kerititiano ra e mea ngiti ua ia. Pera katoa oki, e au tauatini ua atu ta te Atua ko Iehova ra akakore anga mai i ta tatou ara. E putuputu rai e kare ua tatou i kite i ta tatou ara kiaia ra. No reira rai, kare ainei e tau ia tatou kia akakore ua atu i te ara toko iti ua a to tatou taeake, noatu e e tumu tikai ta tatou no te akaapa anga? Kia maaraara, i ta Iesu i ako maira i te Tuatua i runga i te Maunga ra, e “akakore mai [te Atua] i ta matou ara, mei ia matou i akakore i ta tei ara ia matou nei.” Mataio 18:​21-35; 6:12; Kolosa 3:13.

▪ Na teaa i akakeu i ta Petero uianga no te akakore anga i te ara a tona taeake, e eaa ra aia ka tau ei kia manako i tana tuatua e kia akakore i te ara a ­tetai ke ra e itu taime ei mea maoraora?

▪ Eaa te tuke o te akono anga a te ariki ra i te pati anga a tona tavini kia aroaia mai aia, i te tu akono a te tavini i te pati anga a tona taeake tavini ra?

▪ Eaa ta tatou i kite mei te akatutu anga a Iesu?