Pene 95

Au Apiianga no te Kopae e no te Aroa i te Tamariki

TE AERE atura a Iesu e tana au pipi ki Ierusalema e akono i te Pasa i te 33 T.N. Kua aere atura ratou ki tetai pae o te Kauvai i Ioridana e kua na roto atu i te mataara o te tapere o Perea ra. I Perea rai a Iesu i etai epetoma i mua akera, inara kua patiia aia kia aere atu ki Iudea no te mea e maki tona taeake a Lazaro. Iaia i Perea ra kua tuatua a Iesu ki te au Pharisea no runga i te kopae, e i teianei kua taiku akaou maira ratou i te reira tumu.

I rotopu i te au Pharisea e au apiianga tuke tuke te manako no runga i te kopae. Kua karanga a Mose e ka rauka te kopae i te vaine no “tetai ravenga viivii nana i rave.” (NW) Kua irinaki tetai papaki e te tuatua ra te reira no te pirianga viivii anake i te pae no te ainga. Inara ko tetai papaki te akamanako ra e ko “tetai ravenga viivii” (NW) te kapiti katoa ra i etai apa rikiriki ua. No reira, i te manako anga kia timata ia Iesu, kua ui atura te au Pharisea: “E tau aina i te ture kia kopae atu te tane i tana vaine i te au apa katoa nei?” Kua papu ia ratou e noatu eaa ta Iesu ka tuatua e akao atu iaia ki te turanga ngata ma te au Pharisea tei mou ra i te manako tuke.

Kua akono ra a Iesu i te reira uianga ma te tau tikai, kare i tapae ki tetai manako tangata ua, mari ra kua taiku mai i te akapapa anga no te akaipoipo anga mei te akamata anga mairai. Kua ui atura aia: “Kare rai kotou i tatau e, ko tei anga ia raua i muatangana, i anga ïa i te tane okotai e te vaine okotai; E kua na ko akera, ‘E akaruke ei te tangata i tona metua tane e tona metua vaine, ka piri atu ei ki tana vaine; e ka riro oki raua ei kopapa okotai?’ E teianei, kare atura raua i te toko rua, kua kopapa okotai ra. E ta te Atua i topiri ra, auraka te tangata e akataka ke atu.”

Te akaari maira a Iesu i ta te Atua akakoroanga akamataanga, e kia vai tamou te pirianga o nga tokorua akaipoipoia, e auraka raua e rave i te kopae. Me koia ia, e na te au Pharisea ei, “eaa iorā Mose i akaue mai ei, e kave atu i tetai tuatua kopae, ka tuku atu ei iaia?”

“No te māroketaketa o to kotou ngakau i tuku ua mai ei a Mose i te kopae i ta kotou au vaine,” ta Iesu ia i pau atu, “kare ra i pera i muatangana.” Ae, i ta te Atua ra akanoo anga i te turanga tika no te akaipoipo i te kainga i Edene ra, kare aia i oronga mai i tetai tika no te kopae.

Kua tuatua ua atu a Iesu ki te au Pharisea ra: “Tei kopae i tana vaine, auraka ra no te akaturi [reo Ereni, por·neiʹa], ka akaipoipo ei i tetai, kua akaturi ïa.” Kua akaari mai aia e ko te por·neiʹa, koia oki te rave tau kore tikai i te ainga, ko te reira anake ua te tumu tei akatikaia e te Atua no te kopae.

I te kite anga e ko te akaipoipo e taokotai anga mutu kore e ko teia anake ua te tumu no te kopae, kua akakeuia te au pipi ra kia tuatua: “Ko ta te tane ïa akono anga i te vaine, kare e meitaki te akaipoipo.” Kare e ekoko anga e me akamanako tetai kia akaipoipo e mea tau kia tamanako pakari i te tamou anga i te tapeka o te akaipoipo anga.

Kua rave atu a Iesu i te tuatua no te noo takaua. Kua akataka maira aia e e au tamaroa etai tei anauia mai e eunuka, kare e tau ratou kia akaipoipo no te kore o ratou tupu anga no te ainga. Ko tetai papaki na te tangata i akariro ei eunuka, na te rave anga kino kia kore e rauka te rave i te ainga. I te openga, kua akakore tetai papaki i te inangaro akaipoipo e te rekareka anga i te piri anga ainga kia rauka ia ratou te oronga ia ratou uaorai kia maata te tuatau no te au angaanga no te Patireia o te au rangi ra. “Ko te tika iaia kia āriki i teianei tuatua [no te noo takaua] nona ïa,” kua taopenga maira Iesu.

Kua akamata te au tangata i te apai mai i ta ratou tamariki mea riki kia Iesu. Inara, kua kauvae atura te au pipi i te tamariki e kua tauta i te tono ia ratou kia aere ke atu, kare e ekoko anga te anoano ra kia kore a Iesu e tamanata tau koreia. Inara kua tuatua atu a Iesu: “Ka tuku mai ana i te tamariki mea riki, kia aere ua mai kiaku nei, auraka e akakoreia atu; mei ia ratou nei oki to te basileia o te Atua. Koia mou taku e karanga atu kia kotou na, Te kore e āriki i te basileia o te Atua mei te tamariki mea riki ra, kare takiri aia e o ki reira.”

Mei teaa ra te meitaki o te au apiianga ta Iesu e oronga maira i konei! Kia ariki i te Patireia o te Atua ra, ka tau tatou kia aru i te tu taakaaka e te ngoie kia apiiia mei te tamariki mea riki rai. Inara te akatutu katoa maira te akatauanga a Iesu i te puapinga, no nga metua, kia akapou i te tuatau ma ta ratou tamariki. Kua akaari a Iesu i reira i tona aroa no te tamariki mea riki ra na te mou anga ia ratou ki roto i tona nga rima e te akameitaki anga ia ratou. Mataio 19:​1-15; Deuteronomi 24:1, NW; Luka 16:18; Mareko 10:​1-16; Luka 18:​15-17.

▪ Eaa nga manako tuke tuke o te au Pharisea no runga i te kopae, e akapeea ratou i te timata anga ia Iesu?

▪ Akapeea ta Iesu akono i te tauta anga a te au Pharisea i te timata iaia, e eaa tana i akakite atu e ko te tumu anake ia no te kopae?

▪ Eaa ra te au pipi a Iesu i tuatuaʼi e e meitaki atu eiaa e akaipoipo, e eaa te mea tau ta Iesu i akakite atu?

▪ Eaa ta Iesu i apii mai ia tatou no tana akono anga i te tamariki mea riki ra?