Akaoraia Mai i te “Uki Tangata Kikino”

“Aue ïa uki akarongo kore, e te māro e! mei te aa te roa o toku noo anga ki o kotou nei, e te akakoromaki anga atu kia kotou?”​—LUKA 9:41.

1. (a) Eaa te akairoia maira e to tatou au tuatau tumatetenga nei? (e) Eaa ta te au Tuatua Tapu tuatua no te aronga te ka ora atu?

TE NOO nei tatou i te au tuatau kino. Te au ngaruerue enua, te au vaipuke, au onge kai, maki-mate, te rave kino, au pomuanga, au tamaki mataku​—ko teia e te maata atura te koropini nei i te au tangata i to tatou 20 anere mataiti nei. Inara, ko te tumatetenga maata rava te akakoko maira i te tuatau vaitata ki mua. Eaa te reira? Koia te “mate maata tei te reira tuatau, kare ïa mei muatangana mai i teianei ao, e tae rava akenei i teianei rā, e kare oki a muri atu.” (Mataio 24:21) Inara, e manganui i o tatou nei te ka akara atu ki tetai tuatau rekareka ki mua! No teaa ra? No te mea te akataka maira ta te Atua uaorai Tuatua e “e aronga maata rava, kare takiri e pou kia tatau, no te pa enua ravarai, e te au kopu ravarai, e te au iti-tangata ravarai, e te au reo katoa oki . . . Ko te aronga teia i aere mai mei roto i te mate maata . . . Kare ratou e pongi akaou, kare oki e kaki vai akaou . . . E na te Atua e orei i to ratou roi-mata katoa i to ratou mata.”​—Apokalupo 7:1, 9, 14-17.

2. Eaa te tupu anga totou akamata anga i te au irava akamataanga o Mataio 24, Mareko 13, e Luka 21 ra?

² Te oronga maira te tataanga akauruia ia Mataio 24:3-22, Mareko 13:3-20, e Luka 21:7-24 i ta Iesu ra totou akataka anga i “te openga o te akatereanga o te au mea nei.”a (NW) Kua tupu momua mai teia totou ki rungao i te akatereanga viivii o te au mea a te ngati Iuda i te anere mataiti mua o to tatou Tuatau Noa Nei, e kua akaopeia ki roto i tetai “mate maata” kare i aiteia i mua ana, ki runga i te au ngati Iuda ra. Kua uriia ki raro te akapapa anga akonoanga Atua e te akaaere poritiki katoa oki o te akatereanga ngati Iuda, tei akanooia ra i te iero i Ierusalema, kare ia e akaora akaouia.

3. Eaa ra i rapurapu ei no tatou kia akarongo i ta Iesu totou i teia tuatau nei?

³ E akamanako ana tatou i teianei i te au turanga tei koropini ra i taua tupuanga mua o ta Iesu totou ra. Na teia e tauturu ia tatou kia meitaki atu te kite i te tu aiteite o te tupu anga i teia tuatau nei. Na te reira e akaari mai kia tatou i te tu rapurapu kia rave i te angaanga papu i teianei kia ora atu ei i te mate maata rava te akakoko maira i te au tangata ravarai.​—Roma 10:9-13; 15:4; 1 Korinetia 10:11; 15:58.

“Te Openga”​—Aea?

4, 5. (a) Eaa ra te au ngati Iuda mataku i te Atua o te anere mataiti mua o te T.N. i akamanako maataʼi i te totou ia Daniela 9:24-27? (e) I akapeea te akatupu anga i teia totou?

⁴ Vaitata i te mataiti 539 M.T.N., kua orongaia ki te peroveta a te Atua ra kia Daniela tetai orama no te au apinga te ka tupu i te tuatau o te “ebedoma” openga o te “itu ngauru anga i te ebedoma” mataiti ra. (Daniela 9:24-27) Kua akamata teia “au ebedoma” i te 455 M.T.N. i te ikuiku anga a te Ariki ko Aretekasaseta o Peresia kia patu akaouia te oire o Ierusalema ra. Kua akamataia mai te “ebedoma” openga ra ma te mama mai anga te Mesia, a Iesu Karaiti, i tona papetito angaia e te akatainuanga i te 29 T.N.b Kua kite meitaki te au ngati Iuda mataku i te Atua o te anere mataiti mua ra i teia tuatau akatakaia i te totou a Daniela ra. E akatau anga, no runga i te aronga tini tei aere atura kia akarongo i te tutuanga a Ioane Papetito i te 29 T.N., kua akakite maira a Luka 3:15 e: “Te tapapa ua ra te au tangata katoa, e te akaeatu anake ïa i roto i to ratou ngakau ia Ioane, ko te Mesia aina aia me kare aina?”

⁵ Kua akatakaia te 70 anga o te “ebedoma” ei itu mataiti no te akaperepere anga taka ke tei orongaia atu ki te au ngati Iuda ra. Akamata mai i te 29 T.N., kua kapiti te reira i to Iesu papetito anga e tana angaanga orometua, e tona matenga ei atinga “e i rotopu oki i taua ebedoma ra” i te 33 T.N., e tetai atu ‘apa ebedoma’ kia tae ki te 36 T.N. I teia tuatau o te “ebedoma” nei, kua orongaia mai te tuatau tau kia riro te au pipi a Iesu kia akatainuia ko te aronga ngati Iuda mataku i te Atua anake e ta ratou au pipi ei ngati Iuda. Ei reira i te 70 T.N., e tuatau kare i kiteia i mua akera, kua akapouia e te au nuku no Roma i raro ake ia Titus te akatereanga ngati Iuda akarongo kore ra.​—Daniela 9:26, 27.

6. Akapeea “te mea rikarika” te akamata anga i te angaanga i te 66 T.N., e i akapeea te au Kerititiano i te ariu anga atu?

⁶ E no reira kua akapouia atu te kautaunga ngati Iuda, tei taviivii ra i te iero i Ierusalema e tei akapapa ra i te ta anga i te Tamaiti a te Atua uaorai. Takore katoaia atu, te au tataanga no te iti tangata e to te au kopu katoa oki. I muri iora, kare e rauka i tetai ngati Iuda i te akapapu kia tau i te ture e e tuanga tona i te kau taunga me kare i te ui ariki ra. Inara, e mea mataora kua akatakaia te au ngati Iuda vaerua tei akatainuia ra ei kau taunga ariki “kia akakite ua [ratou] i te meitaki” o te Atua ra ko Iehova. (1 Petero 2:9) I te koropini anga mua te vaeau o Roma ia Ierusalema e kua ko atu i raro ake i te tu anga o te iero ra i te 66 T.N., kua kite te au Kerititiano e ko te nuku vaeau ra ko “te mea rikarika e taneaʼi ra, tei tuatuaia mai e Daniela peroveta, i te tu anga i te ngai-tapu ra.” I te akarongo anga i ta Iesu akauenga i totou maira, kua oro te au Kerititiano i Ierusalema e Iudea ra ki te au maunga ra ei ngai paruru anga.​—Mataio 24:15, 16; Luka 21:20, 21.

7, 8. Eaa te “akairo” ta te au Kerititiano i akarongo, inara eaa ta ratou kare i kite?

⁷ Kua akara taua au Kerititiano ngati Iuda tiratiratu ra i te tupu anga o te totou a Daniela ra e kua riro oki ei aronga kite mata i te au tamaki kikino ra, te au onge kai, au maki-mate, au ngaruerue enua, e te au rave anga kikino ta Iesu i totou ra ei tuanga no te “akairo . . . o te openga o te akatereanga o te au mea nei.” (Mataio 24:3, NW) Inara i akakite ana ainei a Iesu kia ratou aea tikai a Iehova e rave ei i te akava anga ki runga i taua akatereanga viivii ra? Kare. Ko tana i totou no te take o tona parutia ei Ariki i te tuatau ki mua ra papu e ka tau katoa ia ki te “mate maata” o te anere mataiti mua ra: “Kareka te reira rā e te reira ora, kare rava tetai e kite, kare oki te au angela o te rangi, ko toku Metua anake ra.”​—Mataio 24:36.

⁸ Penei kua rauka i te au ngati Iuda i te akataka mai te tuatau o to Iesu ra mamaanga mai ei te Mesia mei roto mai i te totou anga a Daniela. (Daniela 9:25) Inara kare e ra no te “mate maata” i orongaia ana kia ratou e i te openga ra te akataneaia anga te akatereanga ngati Iuda tei akaruke ra i te akarongo. No muri ua ake i te akapouanga o Ierusalema e tona iero i kite ei ratou i te ra e e 70 T.N. Inara, kua kite takere ratou i te au tuatua totou a Iesu: “Kare e ope teianei uki, e ope ei teianei au tuatua ravarai i te tupu.” (Mataio 24:34) Te akara anga, e na te taangaanga anga i te tuatua “uki” i konei e tuke te reira mei to roto ia Koheleta 1:4, tei tuatua ra no runga i te au uki a muri ake e aere maira e e tae roa atu ki tetai tuatau.

“Teianei Uki”​—Eaa Ia?

9. Akapeea ta te au tikitinari akataka anga i te tuatua Ereni ge·ne·aʹ?

⁹ I te akarongo anga nga apotetoro e a tei noo ra ma Iesu katoa ki runga i te Maunga Oliveta i tana totou no “te openga o te akatereanga o te au mea nei,” i akapeea to ratou marama anga i te tuatua “teianei uki”? I roto i nga Evangeria ra kua uriia mai te tuatua “uki” no te tuatua Ereni ge·ne·aʹ, koia ta te au tikitinari ou i akataka mai ra na roto i teianei au tuatua: “E tika tikai ko te aronga e uanga no tetai tupuna okotai maira.” (Greek-English Lexicon of the New Testament na Walter Bauer) “Ko tei anauia mai, e ngutuare tangata; . . . e au mema akapapaia mai no tetai papaanga tupuna . . . me kare no tetai kopu tangata . . . me kare no te au tangata tini katoatoa tei ora ana i te tuatau okotai ra, Mata. 24:34; Mareko 13:30; Luka 1:48; 21:32; Philipi 2:15, e mea taka meitaki oki no te aronga o te iti tangata ngati Iuda tei ora ra i te tuatau okotai rai.” (Expository Dictionary of New Testament Words na W. E. Vine) “Ko tei anauia mai, e au tangata no te kopu okotai, e ngutuare tangata; . . . te au tangata tini katoatoa tei ora ra i te tuatau okotai: Mt. xxiv. 34; Mk. xiii. 30; Lk. i. 48 . . . kua tuatua taka meitakiia no te kopu ngati Iuda tei ora ra i te tuatau okotai ra.”​—Greek-English Lexicon of the New Testament na J. H. Thayer.

10. (a) Eaa te akataka anga aiteite te orongaia maira e nga mana e rua i te taiku anga ia Mataio 24:34? (e) Akapeea ta tetai tikitinari akonoanga e etai urianga Puka Tapu i te turu anga i teia akataka anga?

¹⁰ No reira kua tuatua a Vine raua ko Thayer ia Mataio 24:34 i te akatakaanga i “teianei uki” (he ge·ne·aʹ hauʹte) ei “te katoatoa o te au tangata tini ravarai tei ora ra i te tuatau okotai.” Te turu maira te Theological Dictionary of the New Testament (1964) i teianei akataka anga, i te na ko anga: “Ko ta Iesu ra taiku anga i te ‘uki’ te akakite maira i tana akakoro anga tikai: te akataka maira aia i te au tangata ravarai i to ratou tu ara to te katoatoa ra.” E tika tikai e “tu ara to te katoatoa ra” tei kiteia ra i te iti tangata ngati Iuda i to Iesu ra tuatau i te enua nei, mei ta te reira e akairo nei i te akatereanga o te ao nei i teia tuatau.c

11. (a) Eaa te mana maata tau ei arataki ia tatou i te akatakaanga e akapeea te taiku anga i te he ge·ne·aʹ hauʹte? (e) Akapeea ta teia mana taangaanga i taua tuatua ra?

¹¹ Inara, te au Kerititiano te apii ra i teia tumu ka arataki i to ratou manakoanga te mea mua na te tu o ta te aronga tata Evangeria akauruia ra tuatua anga i te tuatua Ereni he ge·ne·aʹ hauʹte, me kare “teianei uki,” i te ripotianga i ta Iesu au tuatua. Kua tuatua putuputuia te tuatua na tetai tu tau kore. No reira, kua tapa a Iesu i te au arataki akonoanga ngati Iuda ra ei “te au ovi nei, e ta te vipera anaunga” e kua tuatua ua atu e e akatupuia taua akava anga o Keena ra ki runga i “teianei uki.” (Mataio 23:33, 36) Inara, i kotingaia ainei teia akava anga ki te au orometua pikikaa ra? Kare rava ia. I etai au atianga, kua akarongo atu ta Iesu au pipi iaia i te tuatua anga no “teianei uki,” ma te taikuanga aiteite i taua tuatua ra na roto i tetai tu atea ke atura. Eaa ra te reira?

“Teianei Uki Tangata Kikino”

12. I akapeea ta Iesu akaaite atu anga i “te tangata tini ra” ma “teianei uki” i te atianga te akarongo atura tana au pipi iaia?

¹² I te 31 T.N., i te tuatau o ta Iesu angaanga orometua maata i Galilea e i muri poto ake i te Pasa ra, kua akarongo atura tana au pipi iaia i te tuatua anga ki “te tangata tini ra”: “E akaarite au i teianei uki ki te aa? E tau ia ki te tamariki e noo i te ngai okoanga ra, i te kapiki anga atu ki to ratou ra, E te na ko anga e, I akatangi atu na matou i te koê, e kare kotou i ura mai; i tuporo atu ana matou i te peʼe tangi, e kare kotou i tangi mai. I aere mai nei oki a Ioane [Papetito] ma te kaikai kore, e te inu kore, e te karanga nei ratou e, E demoni tona. I aere mai te Tamaiti a te tangata [ko Iesu] ma te kaikai e te inu, e te karanga nei ratou, I na, e tangata kaikai e te inu wina, e oa no te au telona e te tangata ara.” Kare e akamarekaanga i taua aronga “tangata tini ra” no te kaveinga koreia!​—Mataio 11:7, 16-19.

13. I mua i te aroaro o tana au pipi, koai ma ta Iesu i akataka e i akaapa ei “teianei uki tangata kikino”?

¹³ I muri akera, i te 31 T.N., i to Iesu aerenga ratou ko tana au pipi i te rua o to ratou tere tutu aere anga i Galilea, kua pati atura “te aronga tata tuatua, ma te Pharisea” kia Iesu no tetai akairo. Kua tuatua atu aia kia ratou e “te aronga tini” katoa oki i reira ra: “E uki tangata kikino teia e te akaturi, te kimi nei i te akairo, kare ra e orongaia atu te akairo, mari ra te akairo i te peroveta ra ia Iona. Mei ia Iona oki, e toru ona po, e toru oki ao, i roto i te kopu o te ika maata ra; ka riro katoa te Tamaiti a te tangata nei, e toru ona po ki raro i te enua, e toru oki ao. . . . Koia katoa oki teianei uki tangata kikino.” (Mataio 12:38-46) No reira rai, “teianei uki tangata kikino” kapiti katoa te au arataki akonoanga e “te aronga tini” kare ra i ariki i te akairo tei akatupuia ra i to Iesu matenga e te tuakaouanga.d

14. I akarongo atu ta Iesu au pipi iaia i te akaapa anga i te au Sadukea e te au Pharisea no teaa?

¹⁴ I muri ake i te Pasa o te 32 T.N., i te aere anga a Iesu ratou ko tana au pipi ki te pae enua i Magadala i Galilea ra, kua pati akaou atura te au Sadukea e te au Pharisea kia Iesu i tetai akairo. Kua tuatua akaou atura aia kia ratou: “Te kimi nei te uki tangata kikino e te akaturi i te akairo, kare ra e akairo e orongaia atu, mari ra te akairo i te peroveta ra ia Iona.” (Mataio 16:1-4) Ko taua aronga akonoanga pikikaa ra te aronga maata rava te apa ei au arataki i roto i “te aronga tini” tiratiratu kore ta Iesu i akaapa ra ei “teianei uki tangata kikino.”

15. I mua poto ake e pera katoa oki i muri ua ake i to Iesu akatuke angaia, eaa te tupu anga kia Iesu i tana au pipi, ma to ‘teianei uki’?

¹⁵ I te vaitata anga ki te openga o tana angaanga orometua i Galilea, kua kapiki a Iesu i te aronga tini ma tana au pipi katoa kia aere mai kiaia e kua na ko atura: “E teianei, ko te akama iaku, e taku nei tuatua, i teianei uki akaturi, e te rave ara, koia katoa, ta te Tamaiti a te tangata nei e akama.” (Mareko 8:34, 38) No reira e mea tau e ko te aronga tini o te au ngati Iuda tataraara kore o taua tuatau ra ko ratou to te “uki akaturi, e te rave ara.” I etai ra i muri iora, i muri ake i to Iesu akatuke angaia, kua aere maira a Iesu e tana au pipi “ki taua urupu maata ra,” e kua pati maira tetai tangata iaia kia rapakau i tana tamaiti. Kua tuatua atura a Iesu: “Aue ia uki māro, e te akarongo kore e! mei te aa te roa o toku noo anga ki o kotou nei? mei te aa te roa o toku akakoromaki anga atu ia kotou?”​—Mataio 17:14-17; Luka 9:37-41.

16. (a) Eaa te akaapa anga i “te aronga tini ra” ta Iesu i tuatua akaou i Iudea? (e) I akapeea te aronga o “teianei uki” i riro ei kia rave i te rave anga kino rava o te au rave anga kikino ravarai?

¹⁶ Penei i Iudea, i muri ake i te Oroa patia anga puakapa i te 32 T.N., “e kononinoni rava maira te tangata i vaitata iora” takapini ia Iesu, i tuatua akaou atu ei aia i tana akaapa anga ia ratou, i te na ko anga: “E uki tangata kikino teia: te kimi nei ratou i te akairo, e kare e orongaia atu te akairo, mari ra te akairo i te peroveta ra ia Iona.” (Luka 11:29) I te openga ra, i ta te au arataki akonoanga apai mai anga ia Iesu kia timataia, kua akatika a Pilato kua tuku uaia aia. Te tuatua ra te tataanga: “Kua ako atura te kau taunga nunui, e te aronga pakari, i te tangata tini, kia pati ratou ia Baraba, kia taiā Iesu. . . . Kua tuatua mairā Pilato kia ratou, Akapeea atu au ia Iesu, ko tei karangaia i te Mesia nei? Kua karanga atura ratou ravarai kiaia, Kia akasatauroia ia. Kua na ko maira te tutara, Eaa oki tana ara i rave? Kua maata ua atura to ratou kapiki, na ko atura, Kia akasatauroia aia!” Kua pati taua “uki tangata kikino ra” i te toto o Iesu!​—Mataio 27:20-25.

17. I akapeea tetai papaki o “teianei uki māro” i te akarongo anga i ta Petero tutu anga i Penetekote ra?

¹⁷ No reira na tetai “uki māro e te akarongo kore,” tei akakeuia e to ratou au arataki akonoanga ra, i rave te tuanga taviri i te akatupu anga i te matenga no te Atu ra no Iesu Karaiti. E rima ngauru ra i muri iora, ia Penetekote i te 33 T.N., kua to mai te vaerua tapu ki runga i te au pipi ra e kua akamata ratou i te tuatua i te au reo ke ke. I te akarongo anga i taua tangianga reo ra, “kua uipa maira te tangata ravarai,” e kua tuatua atura te apotetoro ko Petero kia ratou ei “te au tangata o Iudea nei, e te aronga katoa e noo i Ierusalema nei,” i te na ko anga: “Koia ra [ko Iesu] . . . i raukaʼi ia kotou, akasatauro iora, e tamate takiri atura i te rima o te akono kore ra.” I akapeea te manako o tetai papaki o taua aronga i akarongorongo atura? “Puta atura to ratou ngakau.” Kua pati atura a Petero ia ratou i reira kia tataraara. E kua “ako atura, na ko atura, Kia ora kotou i teianei uki māro.” Ei tupu anga, e toru katoa paa tauatini “i āriki marie i tana tuatua, bapetizoia iora ïa.”​—Angaanga 2:6, 14, 23, 37, 40, 41.

Akatakaia “Teianei Uki”

18. Ta Iesu taiku anga i te tuatua “teianei uki” te tuatua tamou ra i teaa?

¹⁸ Eaa, i reira, te “uki” tei putuputu ra ta Iesu taiku anga ki mua i tana au pipi? Eaa ta ratou i marama i tana au tuatua: “Kare e ope teianei uki, e ope ei teianei au tuatua ravarai i te tupu”? E mea tika ra, e kare a Iesu e tapae ke ana i tana taangaanga i akanoo no te tuatua “teianei uki,” tana i tuatua tamou ra no te au aronga tini ma to ratou “au arataki matapo ra” tei kapiti katoaia ra ki te iti tangata ngati Iuda ra. (Mataio 15:14) Kua kite “teianei uki” i te au mate katoatoa tei totouia ra e Iesu e i muri akera kua ngaro ke atu na roto i tetai “mate maata” aite koreia ki runga ia Ierusalema ra.​—Mataio 24:21, 34.

19. I naea e i akapeea te “rangi e te enua” o te akatereanga ngati Iuda ra i te kore atu anga?

¹⁹ I te anere mataiti mua ra, kua akava a Iehova i te au tangata ngati Iuda ra. Te aronga tei tataraara, tei akono ra i te akarongo i ta Iehova ravenga aroa na roto ia Karaiti, kua ora ratou i taua “mate maata ra.” Kua tau tikai ki ta Iesu au tuatua, kua tupu te au mea ravarai tei totouia ra, i reira kua takoreia atu “te rangi e te enua” o te akatereanga ngati Iuda o te au mea ra​—te iti tangata katoa, ma tona au arataki akonoanga e te totaiete o te au tangata kikino ra. Kua akonoia e Iehova te akava anga!​—Mataio 24:35; akaaite ia 2 Petero 3:7.

20. Eaa te akamaroiroi anga tau te piri atu ra ma te tu rapurapu ki te au Kerititiano ravarai?

²⁰ Kua kite taua au ngati Iuda tei akamanako ra i ta Iesu au tuatua totou e kare to ratou ora i runga i te tautaanga tatau anga i te roa o te “uki” me kare i etai “au tuatau e te au atianga,” mari ra tei runga i te akataka keanga mei te uki rave kino o taua tuatau ra e ma te rave maroiroi anga i te anoano o te Atua ra. Noatu rai e ko te au tuatua openga o te totou a Iesu te taiku ra i te tupu anga maata i to tatou tuatau nei, kua tau katoa ra te au Kerititiano ngati Iuda kia akarongo i te akamaroiroi anga: “E tenana, e ara kotou, e tamou tikai i te pure, kia tau ia kotou te ora i teianei au mea katoa e vaitata mai nei, e kia tu kotou ki mua i te aroaro o te Tamaiti a te tangata.”​—Luka 21:32-36; Angaanga 1:6-8.

21. Eaa te tupu anga viviki te ka tau tatou kia tapapa atu i te tuatau vaitata ki mua?

²¹ I teia tuatau, “kua vaitata te rā maata o Iehova, . . . e te rapurapu roa maira.” (Zephania 1:14-18; Isaia 13:9, 13) Ma te tu viviki ua, i ta Iehova uaorai “rā e te ora,” ka tuku mai aia i tona riri otooto ki rungao i te au akonoanga, te au akaaerenga poritiki, e te au aronga okooko ra o teianei ao, kapiti katoa te au tangata tau kore tei akatupu ra i to teia tuatau nei “uki akaturi o te au tangata kikino ra.” (Mataio 12:39; 24:36; Apokalupo 7:1-3, 9, 14) Ka akapeea koe e oraʼi i “taua mate maata ra”? Na ta tatou atikara i muri akenei e pau e e akakite mai i te manakonako anga mekameka no te tuatau ki mua ra.

[Au Tataanga Rikiriki i Raro]

Akapeea Koe me Pau?

◻ Eaa ta tatou i kite mei te tupu anga o ta Daniela 9:24-27?

◻ Akapeea ta te au tikitinari o teia tuatau akataka anga i “teianei tuatau” tei taikuia ra i te Puka Tapu?

◻ Akapeea ta Iesu ra taiku anga tamou i te tuatua “uki”?

◻ Akapeea te akatupu anga ia Mataio 24:34, 35 i te anere mataiti mua ra?

[Tutu i te kapi 12]

Kua akaaite atura Iesu i “teianei uki” ki te au tamariki tini rave tau kore ra

[Tutu i te kapi 15]

Ko Iehova anake ua tei kite i mua ake i te ora no te akonoanga i te akava anga ki runga i te akatereanga ngati Iuda rave kino ra