Au Uianga a te Aronga Tatau

Kua kite ainei a Iesu i teianei te ora tikai o Aramakito?

Te akara anga e mea tau i te irinaki e kua kite aia.

Penei ka manako etai pae te tumu i tupu mai ei te uianga. Te akara anga no te mea no ta Iesu tuatua tei kitea ia Mataio 24:36: “No runga i taua ra e te ora kare okotai i kite, kare te au angera o te au rangi ra e kare katoa te Tamaiti, mari ra te Metua anake.” (NW) Ka akara ana i te tuatua “kare katoa te Tamaiti.”

E tuanga teia irava no ta Iesu pauanga ki te uianga a te au apotetoro: “E akakite mai koe ia matou i te tupu anga o taua au mea nei, e te akairo o toou aerenga mai, e te openga o teianei ao.” (Mataio 24:3) I roto i tana totou rongonui i teianei no runga i te au akaari anga tika te akatupu ra i “te akairo,” kua totou aia i te au tamaki, te onge, te au ngaruerue enua, te takinokino anga o te au Kerititiano mou, e tetai atu au mea i te enua te ka akakite mai i tona tae anga mai. Na roto i teia akairo e kite ei tana au pipi e te vaitata maira te openga. Kua akatutu aia i teia vaitata anga ki te tuatau me akamata tetai rakau tuke i tona au rau, te akakiteanga e te vaitata maira te tuatau maana. Kua tuatua katoa aia: “Koia katoa kia kite kotou i taua au mea katoa nei, kua vaitata ïa, tei te pae ngutupa, kia kite oki kotou.”​—Mataio 24:33.

Inara kare a Iesu i karanga tikai ana e aea te openga e tae mai ei. Mari ra, kua akakite aia i ta tatou ka tatau ia Mataio 24:36. Ko te tatau anga te reira o te New World Translation of the Holy Scriptures, e te pera katoa ra te tatau anga o tetai atu au Pipiria e manganui o teia tuatau. Inara, i tetai au urianga taito kare te tuatua “kare katoa te Tamaiti” i roto.

Ei akaraanga, te tatau ra te Douay Version Katorika e: “Inara kareka te ra e te ora kare okotai i kite, kare te au angera o te rangi, mari ra te Metua anake.” Te aiteite katoa ra te tatau anga o te King James Version. Eaa ra te tuatua “kare katoa [me kore, kare oki] te Tamaiti” i kiritiiaʼi ki vao, noatu e te kiteaia ra te reira ia Mareko 13:32? No te mea me oki tatou ki te akamataanga o te 17 anere mataiti i te akapapa angaia teia nga urianga e rua, te au tataanga ta te aronga uri i angaanga ra kare te reira tuatua i roto. Inara, mei te reira taime mai, e manganui te au tataanga Ereni taito atu tei kiteaia mai. Ko teia ra, tei piri vaitata maata atu ki te tuatau o ta Mataio au tuatua mua ra, tei roto i reira te tuatua “kare katoa te Tamaiti” ia Mataio 24:36.

Tei kiteaia mai, kua kapiti mai te Jerusalem Bible Katorika i te tuatua, ma tetai tataanga i raro ake te na ko anga e kua kiriti te Vulgate Ratini i te tuatua “penei no te au tumu apii anga akonoanga.” Ae oki! Te aronga uri me kore te aronga kopi tei irinaki i te Toru Tai penei ka timataia no te kiriti i tetai tuatua tei akakite ra e kua ngere a Iesu i te kite tei rauka ra i tona Metua. Akapeea a Iesu te kore anga e kite i tetai tika i te mea kua riro ana raua ko tona Metua ei Atua toru tai?

Pera katoa, A Textual Commentary on the Greek New Testament, na B. M. Metzger, te karanga ra: “Te au tuatua ‘kare katoa te Tamaiti’ kare te reira i roto i te maata anga o te au kite [tataanga] a Mataio, kapiti mai te tataanga Byzantine o muri mai. I tetai tua, te au komono meitaki roa atu o te au tu tataanga Alexandria, te Opunga, e te Kaisarea tei roto i reira te tuatua. Te kiriti anga o te au tuatua no te mea no te ngata o te apiianga ta te reira e oronga ra e mea papu maata atu ia i te manako e kua tapiriia kia” Mareko 13:32.​—Na matou te tuatua arara.

Taua “au komono meitaki roa atu” o te au tataanga mua te turu ra i te tatauanga tei akanoo ra i tetai tupuanga tau ki te kite anga. Kare te au angera i kite i te ora o te openga: kare katoa te Tamaiti; mari ra te Metua anake. E te rotai ra teia ki te au tuatua a Iesu tei kitea ia Mataio 20:23, te ngai i akakite ei aia e kare ona mana tika anga kia oronga i te au ngai teitei o te Patireia, mari ra no te Metua te reira.

No reira, te akaari maira ta Iesu uaorai au tuatua e i te enua nei kare aia i kite i te ra no te ‘openga o teianei ao.’ Mei te reira taime mai kua kite ainei aia?

Te akatutu ra a Apokalupo 6:2 ia Iesu tei akanooia ki runga i tetai oroenua teatea e te aere ra ki mua ma te “upokotu atu e kia upokotu atu rai.” A muri akera te aerenga mai o te au tangata akaoro oroenua te akatutu anga i te au tamaki, te au onge, e te au maki mate, mei ta tatou i kite mei te Tamaki I o Teianei Ao mai tei akamata i te 1914. Te irinaki ra te Au Kite o Iehova e i te 1914, kua akateronoia a Iesu ei Ariki no te Patireia o te Atua i te rangi, e nana e arataki i te tamaki e aere maira te patoi anga i te kino i te enua nei. (Apokalupo 6:3-8; 19:11-16) I te mea kua akamanaia a Iesu ei upokotu na roto i te ingoa o te Atua, te akara anga e e mea tau e kua akakite tona Metua kiaia e aea te openga e tae mai ei, e aea aia e “upokotu” ei.

Kare tatou i te enua nei i akakiteia mai te ra, no reira te tau ra rai te au tuatua a Iesu no tatou: “E matakite oki ia kotou, e akamaroiroi, e e pure; kare oki taua tuatau ra i kitea e kotou. . . . E taku e karanga atu kia kotou nei, te karanga atu nei au ki te tangata ravarai, Ka ara.”​—Mareko 13:33-37.