Na te Manakonako i Tutau, i Akakeuia e te Aroa

“Te vai nei te akarongo, te manakonako, e te aroa, e toru ra; ko tei maata ra i taua toru nei, ko te aroa ïa.”​—1 KORINETIA 13:13.

1. Eaa te akamatakiteanga a te apotetoro ko Paulo i oronga mai kia tatou?

KUA akamatakite mai te apotetoro ko Paulo kia tatou e, mei tetai pai rai, ka rauka kia akangaaia to tatou akarongo. Kua tuatua aia no “te tamou marie anga i te akarongo, e te akava-ngakau meitaki; i tei kopaeia e tetai papaki, e kua akangaa pai oki i te akarongo.” (1 Timoteo 1:19) I te anere mataiti T.N., kua patuia te au pai tai i te rakau. Kua riro to ratou tu tau ki runga i te tu meitaki o te rakau ra e ki runga oki i te tu karape o tei patu ra.

2. Eaa i tikai kia tau meitaki te patu anga i te pai o to tatou akarongo, e eaa te umuumuia maira e teianei ia tatou?

² Penei ko tei tapaia ko te pai o to tatou akarongo ka tika kia panu ua ki roto i te tai kino oripu ua o te tangata. (Isaia 57:20; Apokalupo 17:15) No reira ka tika kia meitaki te patu anga, e tei runga oki teianei ia tatou. I te riro anga te “au tai” o nga ao ngati Iuda e to Roma kia kino no te au Kerititiano mua ra, kua tata a Iuda: “E aku au akaperepere e, i te patu anga ia kotou uaorai, i to kotou akarongo tapu maata ra, i te pure anga ma te Vaerua Tapu. Tamou tikai kotou i to kotou uaorai inangaro i te Atua, i te tatari anga i te aroa o to tatou Atu o Iesu Mesia, e tae ua atu ki te ora mutu kore ra.” (Iuda 20, 21) I te mea kua tuatua katoa a Iuda i te taumaroanga no ‘te akarongo i tukuia mai i te aronga tapu ra,’ ko te tuatua “akarongo tapu maata ra” penei te taiku ra i te papaanga katoa o te au apiianga Kerititiano, kapiti katoa te tuatua meitaki no te ora. (Iuda 3) Ko Karaiti te pange o taua akarongo ra. Te umuumuia ra te akarongo maroiroi me kia mou tatou i te akarongo Kerititiano mou ra.

Akakoromakianga i te Uriia “Akonoanga Tamataku”

3. Akapeea ta tetai papaki taangaanga i te “akonoanga tamataku”?

³ I te au mataiti ua akenei, e manganui te au tupu anga kikino o te au ta anga maata ia ratou uaorai, te au ta tangata, e te ravenga takinokino i te tangata tei kapiti ra i te au akonoanga pupu rikiriki ua. E mea matauia e e manganui te aronga tataki tai, kapiti katoa te au arataki poritiki ngakau tae, kua akaari i te manako no te paruruanga i te aronga apakore ua, e maata oki i te aronga mapu, i taua au akonoanga rave kino ra. Kare e ekoko anga ko “te atua o teianei ao ra,” te turu ra i teianei au ravenga kikino, kua akatupu i te tetai papaki kia tapa e e akonoanga tamataku, e te taangaanga nei aia i teia kia patoi i te au tangata o Iehova. (2 Korinetia 4:4; Apokalupo 12:12) Kua akapapa tetai papaki i teianei turanga kia akakeu i te patoianga ki ta tatou angaanga. I etai enua, kua tamata ratou i tetai ravenga tei akakoroia ei paruruanga te au tangata mei te “au akonoanga rave kikino” inara kua tapa tarevake i te Au Kite o Iehova e no reira te akaapa ua ra ia tatou na te tuatua pikikaa ua. Kua akariro teia i te tutuanga mei tera are ki tera are kia raveanga ngata i etai enua i Europa e kua akariro i etai au tangata tei apii ra i te Pipiria ma tatou katoa kia akamutu i ta ratou apii. No reira, kua akatupu teianei i tetai tu akaparuparu ki runga i tetai papaki o to tatou au taeake.

4. Eaa i tau kore ei kia mataku tatou i te patoianga?

⁴ Inara, e mamao ke atu i te akaparuparuanga ia tatou ka tau te patoianga kia akamaroiroi i to tatou irinaki anga e te akono nei tatou i te Kerititiano mou. (Mataio 5:11, 12) Kua akaapaia te au Kerititiano mua ra ei akonoanga patoi i te aronga mana, e kua “akakinoia ïa” e kare e ngai toe. (Angaanga 24:5; 28:22) Inara kua akapapu atu te apotetoro ko Petero i tona au oa akarongo, i te tataanga: “E aku au akaperepere e, auraka e poitirere i te takinga-kino maata i roto ia kotou ei timata anga ia kotou, mei te mea e kua rokoia kotou i tetai mea ke: E rekareka ra, i te mea te rave katoa ra kotou i te au mate o te Mesia: e kia akakiteia mai tona kakā, kia rekareka katoa kotou i te pereperekavana maata.” (1 Petero 4:12, 13) Mei te reira oki, kua tata tetai mema o te pupu akaaere o te anere mataiti mua ra: “E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa; Kua kite oki kotou e, na taua timata anga i to kotou akarongo ra e akatupu i te akakoromaki. E tuku atu i ta te akakoromaki ra angaanga kia tika rava, kia meitaki rava kotou, ma te apa kore, auraka e ape toe.” (Iakobo 1:2-4) Mei ta te matangi uriia ririnui e timata i te tau o tetai pai ra, ka akakite mai te uriia patoi anga i tetai ua atu tu paruparu i to tatou pai o te akarongo ra.

Akatupu te Tumatetenga i te Akakoromaki

5. Akapeea ka papu ei ia tatou e e ngaueue kore to tatou akarongo i raro ake i te tumatetenga?

⁵ Ka papu i te au Kerititiano to ratou akakoromaki anga e te ngaueue kore o to ratou akarongo i muri anake i te na roto anga i te au uriia no te tumatetenga. Ka ‘tika rava te angaanga’ a to tatou akakoromaki anga i roto i te au tai uriia anake me “kia meitaki rava tatou, ma te apa kore, auraka e ape toe” kapiti katoa te akarongo maroiroi. Kua tata a Paulo: “Te akakite ua nei ra matou ia matou uaorai e e rave angaanga na te Atua i te au mea katoa nei, i te akakoromaki maata, i te mate, i te apiapi, i te tumatetenga.”​—2 Korinetia 6:4.

6. Eaa tatou i tau ei ‘kia rekareka i te au tumatetenga,’ e akapeea ta te reira akamaroiroi i to tatou manakonako?

⁶ Te au matangi uriia ririnui no te tumatetenga penei te tupu ra kia tatou i etai taime ka tau kia manakoia ei tuatau akakite e te tau ra e te ngaueue kore oki to tatou pai no te akarongo. Kua tata a Paulo ki te au Kerititiano i Roma: “Te rekareka katoa nei ra tatou i te tumatetenga; kua kite oki tatou e, na te au tumatetenga e akatupu i te akakoromaki; E na te akakoromaki e akatupu i te kite; e na te kite e akatupu i te tatari: Kare oki te tatari e taakama mai.” (Roma 5:3-5) Na te tu ngaueue kore i raro ake i te au timataanga e apai mai i to Iehova marekaanga kia tatou. Na teianei e akamaroiroi mai i to tatou akarongo.

Eaa Etai i Mamae ei i te Akangaa Pai

7. (a) Mei ta Paulo au tuatua i akaari maira, i akapeea tetai papaki i kite ei i te ngaa pai i te pae vaerua? (e) Akapeea tetai papaki i teia tuatau i tapae ke ei mei te tuatua mou?

⁷ I ta Paulo akamatakite anga i te tupu anga te “akangaa pai,” kua manako aia i tetai papaki tei “kopae ia” i to ratou akava ngakau meitaki e kua ngaro to ratou akarongo. (1 Timoteo 1:19) I roto ia ratou ko Humenaio raua ko Alekanedero tei topa ki roto i te apoteiti, tei ariu ke i te tuatua mou e kua tuatua akaapa ua. (1 Timoteo 1:20; 2 Timoteo 2:17, 18) I teia tuatau, te au apoteiti, tei ariu ke mei te tuatua mou, kua papa ma te tuatua i “te tavini akono meitaki e te pakari,” ko te tika kua kakati ratou i te rima tei angai atura ia ratou i te pae vaerua. Tetai papaki te akatutu maira i te “tavini kino,” na te tuatua anga, “Kare taku pu e tae vave mai.” (Mataio 24:44-49; 2 Timoteo 4:14, 15) Ka akakore ratou i te tika e te vaitata maira te openga o te akatereanga kino o te au mea nei e ka akaapa i te pupu tavini matakite ra i te pae vaerua no te tamou marieanga i te tu rapurapu i roto i te au tangata o Iehova. (Isaia 1:3) Ka autu taua aronga apoteiti ra i te “akatatipoki i te akarongo o tetai papaki ra,” ma te akatupu anga i te ngaa pai i te pae vaerua ra.​—2 Timoteo 2:18.

8. Na teaa i akariro i tetai papaki kia akangaa me kare kia akatomo i te pai o to ratou ra akarongo?

⁸ Etai atu au Kerititiano akatapuia ra kua akangaa i te pai o to ratou akarongo na te kopae keanga i to ratou akava ngakau e te raveanga oki i te kimianga mataora tapupu koreia e tona ainga tau kore oki. (2 Petero 2:20-22) Te vaira etai tei akatomo i to ratou pai akarongo no te mea i to ratou manako kare te meitaki o te akatereanga ou o te au mea nei i mama mai i runga ake i te ionga. No te kore e rauka te tatau anga i te tuatau akatupu anga o etai au totou, e te tuku atuanga i te ‘rā a Iehova’ ki vao i te manako, kua akaruke ratou i te akamori mou. (2 Petero 3:10-13; 1 Petero 1:9) Kare i roaia kua kite ratou ia ratou uaorai kua oki ki roto i te au vai repo, e te taitaia o te akatereanga apinga o teianei tuatau. (Isaia 17:12, 13; 57:20) Te irinaki ra rai etai aronga tei akamutu i te taokotai mai ki te putuputuanga Kerititiano e te rave ra te reira i te akonoanga mou. Inara, kua ngere ratou i te tu akakoromaki e te tamou marie no te tatari i te ao ou ta te Atua ko Iehova i taputou mai. Kare te oraanga i roto ia Parataito i tae viviki mai no ratou.

9. Eaa ta etai tokoiti Kerititiano akatapuia e rave nei, e eaa ta teianei au tika ka tau kia taki atu kia akamanako tatou?

⁹ Ko etai au Kerititiano akatapuia e tokoiti ua i etai tuanga o te ao nei i te akaraanga kua aere marie te tere anga o to ratou pai akarongo. Te papanu ra te pai, inara kare e tere ana ki mua i te akarongo ki katoa, kua akono i tetai aereanga marie. I te akakeu anga na te manakonako e “kare e roa te Parataito” kua teateamamao tetai papaki kia aere maroiroi ki mua kia rauka te reira​—e totomapu i te angaanga tutuanga e te putuputu oki i te au uipaanga katoatoa, te au akaputuanga e te au uruoaanga. I teianei i te manakoanga e e mamao ke atu te tupu anga o to ratou manakonakoanga, kua tuku mai ratou i te tutaki ki raro ake i ta ratou i anoano kia oronga. Kua kiteia teianei i te topa anga te angaanga tutu aere, kare e putuputu te aere uipaanga, e kua ngoie ua te kore e tae ki etai tuanga akaputuanga me kare te au porokaramu uruoaanga. Ko etai te akapou ra e maata atu te taime no te tamataora e kia rauka mai te au apinga kopapa kia pumaana. Na teianei au tika i taki ia tatou kia akamanako e eaa te mana tau no te akakeu i to tatou oraanga kia tau ma to tatou akatapu anga kia Iehova. Ka tau ainei to tatou maroiroi i tana angaanga kia akatanoia ki runga i te manakonako kia “vaitata mai a Parataito”?

Akaaiteia te Manakonakoanga ki Tetai Tutau

10, 11. Eaa ta Paulo i akaaite atu i to tatou manakonakoanga, e eaa ra i tau ei teianei akaaite anga?

¹⁰ Kua taiku a Paulo e kua papau a Iehova i tetai taputou no te au akameitakianga kia aere mai na roto ia Aberahama. I reira kua akataka mai te apotetoro ra: “Koia oki te Atua . . . akatinamou atura i te taputou. Kia maata to tatou rekareka i aua nga tuatua tu ke kore e rua ra [tana tuatua e tana taputou], ko tei kore e tika i te Atua kia pikikaa ra, ko tatou, ko tei oro i te irinakianga i tukuia mai ki mua ia tatou, kia rauka ei akapuanga. Ko ta tatou ïa tutau no te vaerua, e mea mauti kore e te mou meitaki.” (Ebera 6:17-19; Genese 22:16-18) Te manakonakoanga tei akanooia ki mua i te au Kerititiano akatainuia ra ko te oraanga mate kore ki te rangi. I teia tuatau nei, ko te maata anga o te au tavini o Iehova tei ia ratou te manakonakoanga meitaki no te ora mutu kore ki runga i tetai enua parataito. (Luka 23:43) Me kare taua manakonako ra, kare e akarongo no tetai ra.

¹¹ E tutau tetai apinga ririnui no te meitaki, kare e rauka kia akakoreia no te tamouanga i tetai pai ki tona ngai e te tapuanga i te reira kia kore e panu ke atu. Kare e tangata teretere aere i runga i te tai e akaruke mai i te uapu e kare e tutau. I te mea e manganui to Paulo ngaa pai angaia, kua kite aia mei te tupu anga e e putuputu te au oraanga o te aronga teretere aere i te tai i te irinaki ki runga i te tutau o te pai ra. (Angaanga 27:29, 39, 40; 2 Korinetia 11:25) I te anere mataiti mua ra, kare e matini o te pai kia raukai i te rangatira ra te akatere aere ki tana ngai i anoano. Ko te au manua anake na te oe ra i akatere aere, ko etai atu pai na te matangi i akatere aere. Me tei roto tetai pai i te tu kino e penei ka u atu ki te au toka, ta te rangatira ravenga anake kia tuku i te tutau ki raro e ka akakoromaki ei i te uriia, ma te irinakianga e kare e mauti te mou anga o te tutau ki raro i te tai ra. No reira kua akaaite atu a Paulo i te manakonako o te Kerititiano ki tetai “tutau no te vaerua, e mea mauti kore e te mou meitaki.” (Ebera 6:19) Me ka rokoia tatou e te au uriia no te patoianga me kare etai atu tupu anga timataanga, ko to tatou manakonakoanga meitaki te aite ra ki tetai tutau tei akangaueue kore ra ia tatou ei au tangata ora, kia kore ei to tatou pai no te akarongo e panu atu ki runga i etai au toka akakino ra no te ekoko anga me kare etai au toka akakino no te apoteiti ra.​—Ebera 2:1; Iuda 8-13.

12. Akapeea ka raukai ia tatou kia kopae ke i te akaruke anga ia Iehova ra?

¹² Kua akamatakite atu a Paulo i te au Kerititiano Epera ra: “Kia matakite, e te au taeake, ko te vai aea te ngakau kino akarongo kore katoa ki roto i tetai o kotou, i te akaruke anga i te Atua ora.” (Ebera 3:12) I te tataanga Ereni, “te akaruke anga” tona aite anga tikai “kia tu takake atu,” koia oki, kia akaapoteiti. Inara ka rauka ia tatou kia kopae ke atu i taua ngaa pai kino ra. Na te akarongo e te manakonako ka rauka ia tatou kia mou piri tikai kia Iehova noatu i te tuatau kino o te uriia timataanga. (Deuteronomi 4:4; 30:19, 20) Kare to tatou akarongo e aite ki tetai pai tei tauriuriia, e tei akapeke aereia e te matangi no te apiianga apoteiti ra. (Ephesia 4:13, 14) Ma te manakonako ei tutau no tatou, ka rauka ia tatou kia akakoromaki i te au uriia o te oraanga ei au tavini no Iehova.

Akakeuia e te Aroa e te Vaerua Tapu Oki

13, 14. (a) Eaa ra i kore ei te tutau o to tatou manakonako i kore ei e rava koia anake ua? (e) Eaa tikai te mana akakeuanga i te raveanga angaanga tapu kia Iehova, e no teaa ra?

¹³ Kare tetai Kerititiano e aere atu ki te akatereanga ou me ko tona akakeu anga anake no te tavinianga ia Iehova ko te manakonako i te oraanga mutu kore ki runga i te enua parataito. I te tamou marieanga i tona tutau no te manakonako ei tetai tumu akangaueue kore i tona oraanga, ka tau aia kia kapiti atu ki te reira e ki tona akarongo oki i te mana akakeuanga aroa. Kua akaketaketa mai a Paulo i teianei tika i tana tataanga: “Te vai nei te akarongo, te manakonako, e te aroa, e toru ra; ko tei maata ra i taua toru nei, ko te aroa ïa.”​—1 Korinetia 13:13.

¹⁴ To tatou mana akakeuanga i te tavinianga tapu ka tau ei te inangaro manako ngakau no Iehova, i te akamanako anga i tona aroa maata rava no tatou. Kua tata te apotetoro ko Ioane: “Ko tei kore e aroa ra, kare ïa i kite i te Atua; ko te Atua oki te aroa. Kua kitea to te Atua aroa ia tatou nei, koia i tono mai i tana Tamaiti anau tai ki te ao nei, kia ora tatou iaia. Te anoano nei tatou iaia, no te mea koia ana tei anoano mai ia tatou nei.” (1 Ioane 4:8, 9, 19) No te ngakau akameitaki ia Iehova, ka tau to tatou manako mua, kare e kia rauka te ora no tatou uaorai, mari ra kia kite i te akatapu anga i tona ra ingoa tapu e te akatika anga i tona tu ngateitei tuatua tika ra.

15. Akapeea te pirianga to tatou inangaro no Iehova ki te ui anga no tona ra tu ngateitei?

¹⁵ Te anoano ra Iehova ia tatou kia tavini atu iaia no to tatou inangaro iaia, kare ia Parataito ua. Te tuatua ra te enetaikoropitia Pipiria Insight on the Scriptures:a “Te akakaka ra Iehova i te tika e ko tona tu ngateitei e te turu anga oki i te reira na tana au mea ora kua akatumuia ki runga i te aroa ei mea mua. Kua anoano anake aia i te aronga tei inangaro i tona ngateitei no tona au tu meitaki e no te tuatua tika o te reira, tei inangaro ra i tona ngateitei ki runga ake i tetai ua atu. (1 Ko 2:9) Kua iki ratou kia tavini i raro ake i tona tu ngateitei kare kia tauta i te akaaere ia ratou uaorai​—ko teianei no to ratou kite iaia e tona aroa, tuatua tau, e te pakari oki, ta ratou i kite e tere roa atu i to ratou uaorai. (Salamo 84:10, 11)”​—Voriumu 2, kapi 275.

16. Akapeea te inangaro no Iesu i riro ei ei mana akakeuanga i to tatou au oraanga?

¹⁶ Ei au Kerititiano, ka akaari katoa tatou i te inangaro no Iesu i tona aroa mai ia tatou. Kua akamanako a Paulo: “Te riro nei oki matou i te aroa o te Mesia ra, no te mea te karanga nei matou e, i mate te tangata okotai no te tangata ravarai, e mate to te tangata katoa nei i reira; E i mate oki aia no te tangata ravarai, kia kore te aronga e ora ra e akono akaou ia ratou uaorai i te ora anga nei, kia akono ra iaia i tei mate e tei tu akaou no ratou ra.” (2 Korinetia 5:14, 15) Ko Karaiti tikai te pange i patuia ra to tatou au ora anga i te pae vaerua, to tatou akarongo, e to tatou manakonakoanga ki rungao. No to tatou aroa no Iesu Karaiti i turu ake i to tatou manakonako e te akamou i to tatou akarongo, e maata oki i te au tuatau no te timataanga maata ra.​—1 Korinetia 3:11; Kolosa 1:23; 2:6, 7.

17. Eaa te mana ririnui ta Iehova e oronga maira kia tatou, e akapeea te akaarianga mai i tona puapinga ia Angaanga 1:8 e ia Ephesia 3:16?

¹⁷ Noatu rai e ko te inangaro no te Atua e no tana Tamaiti te mana maata te akakeu ra i to tatou au oraanga ei au Kerititiano, te oronga katoa maira Iehova i tetai atu apinga te akakeu ra ia tatou, te akaririnui maira ia tatou, e te oronga maroiroi maira kia tatou kia aere ua atu ki mua i tana angaanga. Ko tona mana rave angaanga ia, me kare vaerua tapu. Nga tuatua Epera e te Ereni tei uriia ra e “vaerua” te taiku tumu ra i te oriori anga o te reva, mei te matangi rai. Te au pai takie mei ta Paulo i aere ra na runga kua irinaki i te mana akara koreia o te matangi e tae ei ki ta ratou ngai i aere ra. Mei te reira katoa, ka umuumu tatou i te aroa e te angaanga a to te Atua ra mana rave angaanga akara koreia me kia rave atu to tatou pai no te akarongo kia aere atu tatou ki mua i te tavini anga ia Iehova.​—Angaanga 1:8; Ephesia 3:16.

Aere ua Atu ki to Tatou Ngai Akakoroia!

18. Eaa te ka tauturu ia tatou kia akakoromaki i etai ua atu au timataanga i to tatou akarongo?

¹⁸ Penei ka timata ketaketaia to tatou akarongo e te aroa i mua ake ka itae ei tatou ki te akatereanga ou o te au mea nei. Inara kua orongaia mai e Iehova kia tatou tetai tutau “mea mauti kore e te mou meitaki”​—koia to tatou manakonako meitaki roa. (Ebera 6:19; Roma 15:4, 13) Me ka papaia tatou na te patoianga me kare etai atu timataanga, ka rauka ia tatou kia akakoromaki me te tutau tinamouia ra tatou na to tatou manakonakoanga. Me akamutu mai tetai uriia inara i mua ake ka rokoia mai ei tetai ke atu, kia manako papu tatou kia akaketaketa i to tatou manakonakoanga e kia akamaroiroi i to tatou akarongo.

19. Akapeea ka raukai ia tatou kia tere te pai o to tatou akarongo ki runga i te aerenga e itae ei ki te akapuanga ao ou o te Atua?

¹⁹ I mua ake i te taikuanga i te “tutau no te vaerua,” kua tuatua Paulo: “E te inangaro nei matou kia akakite tamou marie rai kotou katoa i taua maroiroi ra, kia rauka te irinaki kite pu tikai e tae ua atu ki te openga: Kia kore e akatau, ei aru ra i te aronga i rauka tei tuatuaia maira i te akarongo e te akakoromaki.” (Ebera 6:11, 12) Akakeuia na te inangaro no Iehova e no tana Tamaiti e te akamaroiroi anga a te vaerua tapu, e tamou marie tatou i te pai o to tatou akarongo ki runga i te aerenga tae roa kia itae tatou ki te akapuanga o to te Atua ao ou taputouia maira.

[Tataanga Rikiriki i Raro]

Na te Akamanako Akaou Anga

◻ No runga i to tatou akarongo, eaa te akamatakiteanga ta Paulo i oronga mai kia tatou?

◻ Akapeea tetai papaki i rokoiai e te ngaa pai, e akapeea oki etai ke i aere taroaroai?

◻ Eaa te tu tau i te Atua te tau ra kia kapitiia atu ma to tatou akarongo?

◻ Eaa te ka tauturu ia tatou kia itae ki te akapuanga o to te Atua ao ou tei taputouia maira?

[Tutu i te kapi 16]

Ka tika te pai o to tatou akarongo kia tau meitaki te patu anga kia raukai kia akakoromaki i te au uriia o te oraanga

[Tutu i te kapi 17]

Ka rauka kia rokoia to tatou akarongo e te ngaa pai

[Tutu i te kapi 18]

Ko te manakonakoanga tetai tutau no to tatou oraanga ei Kerititiano