Pene 101

I Betania, i te Are o Simona

I TO Iesu akaruke anga i Ieriko, kua aere atu aia ki Betania. Kua pou te maata anga o te reira ra i te aere anga, no te mea e kake aere anga na te ngai ngata no etai 19 kiro mita. E vaitata i te 250 mita te akaaka o Ieriko ra i te ngai o te tai pi, e ko Betania e vaitata i te 760 mita ki runga ake i te tai pi. Penei te maara ra koe, e ko Betania, ko te kainga ia o Lazaro e tona nga tuaine. E vaitata i te toru kiro mita te reira oire rikiriki ia Ierusalema, i te tuanga itinga ra o te Maunga i Oliveta ra.

E manganui te aronga kua tae atu no te Pasa i Ierusalema ra. Kua aere vave mai ratou e tama ia ratou uaorai. Penei kua amiri ratou i tetai kopapa mate me kare kua rave i tetai atu mea tei akariro ia ratou kia viivii. No reira kua aru ratou i te au ravenga akapapaia no te tama ia ratou uaorai kia tau ei no te akono i te Pasa. I te putuputu anga teia aronga tei tae vave atura ki te iero, e manganui o ratou ra i manakonako me ka tae atu a Iesu ki te Pasa ra.

E ngai veravera tikai a Ierusalema no te tauetono anga no runga ia Iesu. E mea matauia e te anoano ra te au arataki akonoanga akamori kia mou iaia e tamate. Ko te tika ra, kua oronga ke ana ratou i te akaue anga e me kite tetai e teiea aia, e akakite atu kia ratou. E toru taime i nga marama ua kua topa​—⁠i te Oroa Puakapa, i te Oroa Akatapuanga, e i muri ake oki i tana akatu anga ia Lazaro⁠—​kua tauta te reira aronga arataki kia tamate iaia. No reira, kua tamanako te au tangata ra, e aere atea ua mai ainei a Iesu no tetai atu taime? “Eaa toou na manako?” kua ui ratou tetai ki tetai.

I reira rai, kua tae mai a Iesu ki Betania e ono ra i mua ake i te Pasa, tei raveia ia Nisana 14 kia tau ki te karena a te ngati Iuda ra. Kua tae atu a Iesu ki Betania i te aiai Varaire, ko te akamata anga ia o te ra 8 o Nisana ra. Kare e rauka iaia i te aere atu ki Betania i te Maanakai no te mea ko te aere i te Tapati​—⁠mei te opunga ra i te Varaire ki te opunga ra i te Maanakai⁠—​kare e akatikaia e te ture a te ngati Iuda ra. Penei kua aere atu a Iesu ki te ngutuare o Lazaro ra, mei tana i rave ana i mua ana, e kua noo ki reira i te po Varaire ra.

Inara, kua pati tetai atu tangata no Betania ra e aere atu a Iesu e tona au oa no te kaikai anga aiai i te aiai Maanakai ra. Ko Simona te reira tangata, e tangata i tu ana i te maki repera i mua ana, penei na Iesu aia i akaora i mua akera. I te tamou anga i tona tu raverave, te tavini atura a Mareta i te au manuiri ra. Inara, mei tei matauia ana te akarongorongo ra a Maria kia Iesu, i teia tuatau na te mataara tei akatupu ra i te pekapeka.

Kua eeu maira a Maria i tetai pia arapata, me kare e moina mea ngiti, te ki ra vaitata e apa kiro karama i te manongi, e “manongi narido.” E apinga oko maata ia. E tika rai, e vaitata tona moni oko ko te katoa o te moni angaanga no te mataiti okotai ra! I to Maria riringi anga i te reira manongi ki runga i te upoko o Iesu e ki runga katoa oki i tona nga vaevae e kua orei atura i tona nga vaevae ki tona rauru, kua akaki te reira i te are katoa ra i te kakara reka ra.

Kua riri nga pipi ra e kua ui: “Eaa teianei manongi i kaimoumouiaʼi?” I reira kua tuatua a Iuda Ikariota e: “Naringa i okoia, e rauka mai e toru anere i te denari, e e maata atu oki, kia oronga atu na te putaua?” Inara kare o Iuda manako no te putaua, no te mea no te keia aia i te moni no te pia tei akonoia e te au pipi ra.

Kua paruru atura a Iesu ia Maria. Kua karanga atura e “Vaio atu iaia, eaa kotou i tamanamanata atu ei iaia? e ravenga meitaki tana i rave mai iaku nei. Te noo tamou nei te putaua ki o kotou nei, e kia inangaro ra, e tika ïa kia takinga-meitaki atu: ko au nei ra, kare au e noo tikai ki o kotou. Kua rave aia i te tika iaia nei, kua aere takere mai aia e akamainu i toku kopapa nei, no toku tanumanga. Koia mou taku e karanga atu kia kotou nei, Te au ngai katoa e tuatuaiaʼi teianei evangelia i te ao katoa nei, e tuatua katoaia ta teianei vaine i rave nei, ei manako anga atu iaia.”

I teianei kua tere atu i te 24 ora a Iesu ki Betania, e kua totoa aere te tuatua e tei reira aia. No reira, e manganui tei aere mai ki te are o Simona ra kia kite ia Iesu, e kua aere katoa mai oki ratou kia kite ia Lazaro. No reira kua akapapa te au taunga maata ra kia tamate kare ia Iesu anake ua mari katoa oki ia Lazaro. Ko te reira no te mea e manganui te aronga tei akarongo ia Iesu no to ratou kite anga te ora ra ta Iesu i akatu mei te mate maira! E tika tikai, e kino pakari to teia aronga arataki o te akonoanga atua ra! Ioane 11:​55–​12:11; Mataio 26:​6-13; Mareko 14:​3-9; Angaanga 1:12.

▪ I na ea a Iesu i tae ei ki Betania ra, e penei i ea aia i noo ei i te Tapati ra?

▪ Eaa te uriuri anga te raveia ra i te iero, e no teaa ra?

▪ Eaa ta Maria i rave tei akatupu i te pekapeka ra, e i akapeea ta Iesu paruru anga iaia?

▪ Eaa te akatutu maira i te kino maata o te au taunga maata ra?