To Iesu Oraanga e te Angaanga Orometua

Te Oroa Akamaaraanga

I MURI ake i ta Iesu orei anga i te vaevae o te au apotetoro ra, kua taiku atura aia i te tuatua tataia ra ia Salamo 41:9, i te nako anga: “Tei kai katoa i taku nei kai, ko tei akateitei i tona poo vaevae iaku nei.” Ei reira, kua taitaia atura tona vaerua, e kua akataka maira aia: “Ka pikikaa tetai o kotou nei iaku.”

Kua taitaia rava atura te au apotetoro e kua taki tai maira ratou ravarai i te ui anga kia Iesu: “E te Atu, ko au ainei?” E kua ui katoa oki a Iuda Ikariota. Ko Ioane, tei takoto ra i te pae ia Iesu i te kaingakai, kua urunga atu ki runga i te umauma o Iesu e kua ui atura: “E te Atu, koai?”

Kua karanga atura Iesu: “No te tino ngauru ma rua nei, ko tei tutou kapipiti o maua rima ki roto i te kapu nei. Te aere nei rai oki te Tamaiti a te tangata nei mei tei tataia nona ra: ko taua tangata ra e pikikaa mai i te Tamaiti a te tangata nei, e ae oki aia! e ngari ake te reira tangata naringa kare i anau mai.” I muri ake i te reira, kua tomo akaou atura Satani ki roto ia Iuda, no te tuera ua tona ngakau, tei riro ra kia kino roa. I te roa ake anga taua po ra, kua tapa atura Iesu ia Iuda “te tamaiti o te mate ra.”

Kua karanga atura Iesu kia Iuda: “Taau e rave, kia vave te rave anga.” Kare etai atu o te au apotetoro ra i kite i te aiteanga o ta Iesu tuatua. Kua manako tetai papaki e i te mea te mou ra Iuda i te pia moni, te akaue atura Iesu kiaia e: “Ka oko i tei tau no taua oroa ra,” me kare e apai atu aia i te apinga na te aronga putaua.

Aere atura Iuda, kua oronga a Iesu i tetai oroa ou tikai, me kare akamaaraanga ki tana au apotetoro tiratiratu ra. Kua rave iora aia i te manga, akameitaki atura, vavaʼi iora, tuku atura kia ratou, na ko atura: “Ka rave, ka kai.” Kua akataka atura aia: “Ei akaaite anga teia no toku kopapa te ka orongaia no kotou. E akapera kotou ei akamaara anga iaku.”​—NW.

I te oti anga ratou tatakitai i te kai i te manga, kua rave iora Iesu i te kapu uaina, penei ko te a ia o te kapu tei akonoia i te oroa Pasa ra. Kua pure akameitaki katoa aia i te reira, e kua oronga atura kia ratou, akaue atura kia inu ratou i te reira, e kua na ko atura: “Ei akaaite anga teia kapu no te koreromotu ou i toku nei toto, te ka akamaringiia no kotou na.”​—NW.

Ko te tika, e akamaara anga teia no to Iesu matenga. I te au mataiti tatakitai katoa, ia Nisana 14, ka rave akaouia te reira, mei ta Iesu i tuatua ra, ei akamaara anga iaia. Na te reira e akamaara i te aronga e akono, i ta Iesu e tona Metua i te rangi ra i rave ei akaora i te au tangata mei te akautunga o te mate. No te ngati Iuda te ka riro ei pipi na te Mesia, ka riro te reira oroa ei mono i te Pasa ra.

Ka riro te koreromotu ou, tei akamanaia e te toto akamaringiia o Iesu, ei mono ia no te Ture koreromotu taito ra. Ko Iesu Mesia te rotopu no nga tuanga e rua​—i tetai tua ko te Atua ko Iehova, e i tetai tua, ko te 144,000 Kerititiano tei anauia i te vaerua ra. Kapiti atu ki te akakore anga ara, te akatika katoa ra te reira koreromotu i te akanoo anga i tetai patireia kau taunga ki te rangi. Mataio 26:21-29; Mareko 14:18-25; Luka 22:19-23; Ioane 13:18-30; 17:12; 1 Korinetia 5:7.

◆ Eaa te totou no te Puka Tapu ta Iesu i taiku no tetai taeake, e eaa te aiteanga tana i akakite no te reira?

◆ Eaa ra te au apotetoro ra i taitaia oonu ei, e eaa ta ratou tatakitai i ui?

◆ Eaa ta Iesu i karanga atu kia Iuda kia rave, inara akapeea te akataka anga a etai atu o te au apotetoro ra i teia akauenga?

◆ Eaa te oroa ta Iesu i oronga i muri ake i te aere ke anga a Iuda ra, e eaa te akakoro anga ta te reira i rave?

◆ Koai nga tuanga o te koreromotu ou ra, e eaa ta te reira koreromotu te ka akono?