To Iesu Oraanga e te Angaanga Orometua

Kua Ora Mai a Iesu!

I TE kitea anga e nga vaine ra e kare te kopapa i roto i te menema o Iesu, kua oro maira a Maria Magadala e akakite atu kia Petero raua ko Ioane. Inara, kua noo atu etai o aua vaine ra ki te menema. Kare i roa ana, kua mama maira tetai angera e kua pati atura ia raua kia aere mai ki roto.

I reira kua kite aua vaine ra i tetai atu angera, e kua tuatua maira tetai o aua angera ra kia raua: “Auraka korua e mataku, no te mea kua kite au e te kimi na korua ia Iesu i patitiia ra ki runga i te rakau. Kare aia i konei, kua akatuia aia, mei tana i tuatua ra. Ka aere mai, ka akara i te ngai i takoto ei aia. E aere viviki atu korua e akakite atu ki tana au pipi e kua akatuia aia mei te mate maira.” (NW) No reira no te mataku e te rekareka maata, kua oro katoa atu teia nga vaine nei.

I teia taime, kua kitea e Maria a Petero raua ko Ioane, e kua akakite atura aia kia raua: “Kua apai keia e ratou te Atu i te [menema akamaaraanga, NW] ra ki vao, e kare ua matou i kite i te ngai i vaioia aia e ratou ra.” I reira tikai kua oro atura nga apotetoro e rua ra. E viviki tikai a Ioane​—papu no tona mapu—​koia tei tae na mua ki te menema. I tera taime kua akaruke atu nga vaine i reira, e no reira kare e tangata i reira. Kua piko atura Ioane, kua akara atu ki roto i te menema e kua kite i te takai i te vai ua anga, kare ra aia i tomo atu ki roto.

I to Petero tae anga atu, kare aia i tapupu e kua aere tika atu ki roto. Kua kite aia i te takai te vaira i reira e pera katoa oki te kakau i vaiiaʼi to Iesu upoko. Kua porotakaia ki tetai ngai i reira. Kua tomo katoa atura a Ioane ki roto i te menema, e kua irinaki katoa oki aia i ta Maria i tuatua atura. Inara kare a Petero raua ko Ioane i kite e kua akatuia a Iesu, noatu rai e i putuputu Aia i te akakite atu kia ratou e ka akatuia mai Aia. No te manako ekoko, kua oki atu ra raua tokorua ki te kainga, inara ko Maria, kua oki mai ki te menema, e kua noo i reira.

I te reira tuatau tikai, te aere viviki atura etai o aua vaine ra e akakite atu ki te au pipi e kua akatuia mai a Iesu, mei ta te angera i akaue atura ia raua kia rave. Ia raua e oro atura ma te viviki katoa tei rauka ia raua, kua aravei atura Iesu ia raua e kua na ko atu: “Kia ora na”! Kua akatopa iora ki tona nga vaevae, e akangateitei atura iaia. E kua tuatua atura Iesu: “Auraka e mataku: ka aere, ka akakite atu ki taku au taeake, e aere ratou ki Galilea; ei reira ratou e kite mai ei iaku.”

I mua ua akera, i te tupu anga te ngaruerue enua e te mama mai anga nga angera ra, kua rutetetete te aronga vaeau tiaki e kua riro mei te tangata mate ra te tu. I te ora anga i te reira tu, kua aere maira ratou ki te oire e kua akakite maira ki te kau taunga nunui ra i te au mea i tupu ra. I muri ake i te uriuri manako anga ma te “aronga pakari” o te ngati Iuda ra, kua tuku ratou i te tika e kia tauta i te uuna i te reira na te tutaki anga i taua aronga vaeau ra. Kua akaueia atura kia ratou: “E karanga atu kotou e, Na tana uaorai au pipi i tiki mai e keia iaia i te po, te moe ra oki matou.”

I te mea e ka akautungaia te au vaeau Roma ra i te mate no te moe anga i te tuatau angaanga ra ei tiaki, kua taputou atura te kau taunga: “E kia tae atu teianei tuatua [e i moeana kotou] i te taringa o te tutara ra, na matou e akamaru atu iaia, kia ora kotou.” No te maata o te moni tutaki ra, kua rave taua aronga vaeau ra i tei akaueia kia ratou. Ko tei tupu, kua totoa atea taua tuatua pikikaa ra i rotopu i te ngati Iuda e i keiaia te kopapa o Iesu.

Kareka ko Maria Magadala, kua vai atu aia i te menema ra, te aue ua ra. Teiea ra a Iesu? Kua piko iora aia kia akara atu ki roto i te menema, kite atura aia e toko rua nga angera ma te kakau teatea, kua mama akaou maira raua! Te noo ra tetai ki te ngai i te upoko e ko tetai i te vaevae i te ngai i vaioiaʼi te kopapa o Iesu ra. “Eaa koe i aue ei, e maine?” ta raua i ui atu kiaia.

“No toku Atu i apai keia e ratou nei,” ta Maria ia i pau atu, “e kare au i kite i te vaio angaia e ratou ra.” Kua anga atura aia ki muri e kite atura i tetai tei ui akaou maira i taua uianga rai: “E maine, eaa koe i aue ei?” E kua ui katoa oki teia kiaia: “Koai taau e kimi na?”

I tona manakoanga e ko te tangata tiaki i taua kainga i te ngai o te menema ra, kua karanga atura kiaia: “E tama, naau aia i apai ke ra, ka akakite mai koe i te vaio angaia e koe na, e naku aia e tiki e apai ke.”

“E Maria”! ta taua tangata ia i tuatua atu. Kua kite pu atura aia, no te tu tei matauia no tana tuatua anga kiaia, ko Iesu ia. “E Raboni!” (tona aiteanga “E te Orometua”!) ko tana i aue atura. Ei te maata tikai tona rekareka, kua mou atura iaia. Inara kua tuatua maira Iesu kiaia: “Auraka koe e akatukia mai iaku; kare rai au i tae ki runga i toku Metua ra: e aere ra koe ki toku au taeake ra, e karanga atu kia ratou e, Te aere nei au ki toku Metua ra, e ki to kotou Metua ra; ki toku Atua, e ki to kotou Atua ra.”

Kua oro atura Maria ki te ngai i akaputu maira te au apotetoro e te au taeake pipi katoa ra. E kua kapiti katoa atu aia i tana tuatua ki ta nga vaine i tuatua ra e kua kite ratou ia Iesu tei akatuia maira. Inara, ko teia aronga kare ra i irinaki i taua nga vaine mua ra, kua kore katoa i irinaki ia Maria. Mataio 28:3-15; Mareko 16:5-8; Luka 24:4-12; Ioane 20:2-18.

◆ I muri ake i tona kiteanga e kare e kopapa i te menema ra, eaa ta Maria Magadala i rave, e eaa oki te tupu anga tei kite atu etai o nga vaine ra?

◆ Eaa ta Petero raua ko Ioane i rave i te kiteanga e kare e kopapa i te menema ra?

◆ Eaa tei tupu i te aere anga etai nga vaine ra e akakite atu ki te au pipi e kua akatuia mai a Iesu ra?

◆ Eaa tei tupu ki te aronga vaeau tiaki ra, e eaa te pauanga no ta ratou i akakite atura ki te kau taunga ra?

◆ Eaa tei tupu ia Maria Magadala e vaira ko ia anake ua i te menema ra, e eaa te manako o te au pipi ra i te au akakite anga a nga vaine ra?