Te Au Metua e te Au Tamariki: E Tuku i te Atua i te Ngai Mua!

“Ko te Atua te mataku atu, e akono oki i tana au akauenga.”​—KOHELETA 12:13.

1. Eaa te tu mataku te anoanoia ra te au metua e te au tamariki kia tatanu, e eaa ta te reira ka apai mai no ratou?

KUA karanga tetai totou no runga ia Iesu Karaiti e “e maata oki tona rekareka i te mataku ia Iehova.” (Isaia 11:3, NW) Tona mataku e tu ngateitei puapinga tikai te reira e te umere no te Atua, te mataku anga i te akamareka kore i te Atua no te mea e inangaro tona iaia. Te anoanoia ra te au metua e te au tamariki kia tatanu i teia tu mataku i te Atua mei to Karaiti ra, te ka apai mai i te rekareka kia ratou mei tei tupu ra kia Iesu. Te anoanoia ra ratou kia tuku i te Atua i te ngai mua i to ratou oraanga na te akarongoanga i tana au akauenga. I tau ki tetai tata Puka Tapu, “ko ta te tangata katoa ïa e pini ua ake.”​—Koheleta 12:13.

2. Eaa te akauenga puapinga rava atu o te Ture, e kua oronga tikaiia te reira kiaai ma?

² Te akauenga maata rava atu o te Ture, koia tikai, kia ‘inangaro tatou ia Iehova ma to tatou ngakau katoa, vaerua katoa, e te maroiroi katoa,’ kua oronga tikaiia ki te au metua. Kua akaariia teia na roto i tetai atu au tuatua o te Ture: “E ka apii tamou tikai koe i te reira [au tuatua no runga i te inangaroanga ia Iehova] ki taau au tamariki, ko taau ïa e tuatua kia noo ua koe i roto i to are, e kia aere ua koe na te arataa ra, e kia akāvai koe ra, e kia tu koe ki runga ra.” (Deuteronomi 6:4-7; Mareko 12:28-30) No reira kua akaueia te au metua kia tuku i te Atua i te ngai mua na to ratou uaorai inangaroanga iaia e te apiianga i ta ratou tamariki kia pera katoa.

E Apainga Kerititiano

3. Akapeea a Iesu i te akaari anga i te puapinga o te orongaanga i te manako atu i te au tamariki?

³ Kua akaari a Iesu i te puapinga o te orongaanga i te manako katoa atu i te au tamariki ­rikiriki. I tetai atianga i te openga o ta Iesu angaanga orometua i te enua nei, kua akamata te au tangata i te apai mai i ta ratou tamariki varevare kiaia. Te irinaki tikai anga e e maata roa ta Iesu angaanga no te tamanata atu iaia, kua tauta te au pipi i te tapu i te au tangata. Inara kua ako pakari atu a Iesu i tana au pipi: “Ka tuku mai ana i te tamariki mea riki, kia aere ua mai kiaku nei, auraka e akakoreia atu.” Kua rave katoa a Iesu ‘i te tamariki e ikiiki iora ia ratou,’ i reira te akaarianga na roto i te tu aroa i te puapinga o te inangaro anga i te au tamariki rikiriki.​—Luka 18:15-17; Mareko 10:13-16.

4. Koai ma tei orongaia te akauenga “e akariro i to te pa enua katoa ei pipi,” e eaa ta teia ka umuumu ia ratou kia rave?

⁴ Kua akataka meitaki katoa a Iesu e e apainga ta tana au pipi no te apii i tetai atu i te pae i ta ratou uaorai au tamariki. I muri ake i tona matenga e te tuakaouanga, kua “kitea [a Iesu] e te au taeake e rima katoa anere e e ara”​—kapiti mai etai au metua. (1 Korinetia 15:6) Te akaraanga kua tupu teia i tetai maunga i Galilea te ngai e 11 au apotetoro tei akaputuputu katoa mai. I reira kua raurau a Iesu ia ratou pouroa: “E teianei, ka aere kotou, e akariro i to te pa enua katoa ei pipi; . . . Ma te apii atu ia ratou, kia akono i te au mea katoa taku i akaue atu kia kotou.” (Mataio 28:16-20) Kare e tau kia akangaropoina tetai Kerititiano i teia akauenga! E rave ei te au metua tane e te au metua vaine i te reira te umuumuia ra kia akono ratou i ta ratou au tamariki pera katoa te piri atu ki roto i te angaanga tutu aere e te apiianga i te ngai papuriki.

5. (a) Eaa te akaari maira e ko te maata anga, me kare te katoa anga, e kua akaipoipo te au apotetoro e penei e tamariki ta ratou? (e) Eaa te ako anga tei anoanoia te au upoko ngutuare tangata kia akamanako tikai?

⁵ Ma te puapinga, kua aka aite katoa rai te au apotetoro i ta ratou au apainga ngutuare tangata ma te apainga o te tutu aere anga pera katoa te tiaki anga i te anana a te Atua. (Ioane 21:1-3, 15-17; Angaanga 1:8) Te tumu no te mea kua akaipoipo, te maata anga ia ratou, me kare ra te katoa anga ia ratou. No reira te apotetoro Paulo i akataka ei: “Kare aina e tika ia matou kia arataki aere i te tuaine vaine mou ra, mei tetai papaki aposetolo katoa ra, e mei te au taeake oki o te Atu ra, e mei ia Kepha?” (1 Korinetia 9:5; Mataio 8:14) Penei e e tamariki katoa ta etai au apotetoro. Kua karanga te au tata tuatua enua o mua ana, mei ia Eusebius rai, e e tamariki rai ta Petero. Kua anoanoia te au metua Kerititiano o mua ana kia aru i te ako anga Tuatua Tapu: “Ko te tangata oki kare i takinga-meitaki i tona uaorai, e maata ua atu rai i tona uaorai ngutuare, kua akaruke ïa aia i te akarongo, e e maata atu ïa tona kino i to te tangata akarongo kore ra.”​—1 Timoteo 5:8.

Te Apainga Mua

6. (a) Eaa te akaaoanga o te aronga pakari Kerititiano ma te au ngutuare tangata? (e) Eaa ta tetai tangata pakari apainga mua?

⁶ Tei roto te aronga pakari Kerititiano e au ngutuare tangata to ratou, i tetai turanga te aiteite ra ki to te au apotetoro. E tau ratou kia aka aite i ta ratou apainga no te akono i te au anoano pae vaerua e te pae kopapa o to ratou au ngutuare tangata ki ta ratou apainga o te tutu aere i te ngai papuriki e te tiaki i te anana a te Atua. Ko teea angaanga e tau kia na mua? Kua akakite The Watchtower o Mati 15, 1964 e: “[Ta te metua tane] apainga mua ko tona ngutuare tangata, e kare e rauka iaia, te tika, i te tavini me kare aia e akono ana i tana apainga.”

7. Akapeea te au metua tane Kerititiano i te tuku anga i te Atua i te ngai mua?

⁷ No reira e te au metua tane e tuku i te Atua i te ngai mua na te aruanga i te akauenga ‘e apii i ta kotou tamariki kia pakari ma te ako a te Atu ra.’ (Ephesia 6:4) Kare te reira apainga e tau kia orongaia atu ki tetai tangata ke, noatu e penei e tuku anga angaanga katoa ta tetai metua tane no te akono i te au angaanga i roto i te putuputuanga Kerititiano. Akapeea teia au metua tane i te akono anga i ta ratou au apainga​—te akono anga i te au mema ngutuare tangata i te pae kopapa, te pae vaerua, e te pae o te manako ngakau—​e i taua taime rai, te akaaere anga e te akono anga i te putuputuanga?

Orongaanga i te Turu Anga Tei Anoanoia

8. Akapeea te vaine a tetai tangata pakari i te turu anga iaia?

⁸ Ma te taka meitaki, ka puapingaia te aronga pakari ma te au apainga ngutuare tangata, mei te turu anga. Kua akakite te Watchtower tei taikuia atu i runga ake nei e ka riro tetai vaine Kerititiano ei turu anga ki tana tane. Kua karanga te reira e: “Ka rauka iaia i te akariro i te reira kia rauka meitaki tikai i te tane i te akapapa i tana au angaanga tu ke ke, e te tauturu iaia i te akono i te au taime akaperepereia nona e no tana vaine uaorai na te maanianga i tetai akapapaanga meitaki i roto i te ngutuare, te akapapa vave anga i te au kai, te vai papa ua anga no te aere vave atu ki te au uipaanga putuputuanga. . . . I raro ake i te arataki anga a tana tane, e maata te ka rauka i te vaine Kerititiano i te rave no te tereni i te tamariki na roto i te tu tei anoanoia no ratou kia akamareka ia Iehova.” (Maseli 22:6) Ae, kua angaia te vaine ei “tauturu tau,” e ka ariki tana tane i tona tauturu ma te tu pakari ra. (Genese 2:18) Ka riro tana turu anga e raukaʼi i tana tane i te akono meitaki rava atu i tona ngutuare tangata e tana au apainga putuputuanga.

9. Koai ma i roto i te putuputuanga Tesalonia tei akamaroiroiia kia tauturu i tetai atu au mema o te putuputuanga?

⁹ Inara, kare ko te au vaine anake ua a te aronga pakari Kerititiano te ka piri atu ki roto i te angaanga te turu ra i tetai akaaere te ka “angai i te anana a te Atua” e te akono i tona uaorai ngutuare tangata. (1 Petero 5:2) Koai atu tetai? Te raurau ra te apotetoro Paulo i te au taeake i Tesalonia kia akamanako i te aronga e “akaaere ra” ia ratou. Inara, i te tuatua ua atu anga ki teia au taeake nei​—te aronga tikai kare e akaaere ana—​kua tata a Paulo e: “Te akamaroiroi atu nei matou ia kotou, e te au taeake, kia ako i te aronga marikonga kore, kia tuatua ma te pumaana ki te au meta tei taitaiaia, kia turu i tei apikepike, kia roa te akakoromakianga i te katoatoa.”​—1 Tesalonia 5:12-14, NW.

10. Eaa te akakeu anga meitaki a te tauturu aroa o te au taeake katoatoa ki rungao i te putuputuanga?

¹⁰ Mei teaa atura i te meitaki me e aroa to te au taeake i roto i tetai putuputuanga te ka akakeu ia ratou kia akapumaana i tei taitaiaia, no te turu i tei apikepike ra, no te akamaroiroi i te aronga marikonga kore ra, e kia roa te akakoromakianga i te katoatoa! Te au taeake i Tesalonia, tei mou ou ra i te tuatua mou Puka Tapu noatu te mamae ra i te au mamae maata, kua taangaanga ratou i ta Paulo ako anga no te rave i teia. (Angaanga 17:1-9; 1 Tesalonia 1:6; 2:14; 5:11) Ka akamanako ana i te akakeu anga meitaki ta to ratou taokotai anga aroa i akatupu o te akamaroiroianga e te akataokotaianga i te putuputuanga katoa! Ma te aiteite, me akapumaana, me turu, e te akamaroiroi te au taeake i teia tuatau ia tetai e tetai, ka akariro te reira i te au apainga tiakianga a te aronga pakari, e au ngutuare tangata to ratou ka akono, kia ngoie maata atu i te rave.

11. (a) Eaa ra i tau ei kia taopenga tatou e kua kapitiia mai te au vaine ki roto i te tuatua “au taeake”? (e) Eaa te tauturu ta tetai vaine Kerititiano pakari ka oronga ki te au mapu vaine o teia tuatau?

¹¹ Kua kapitiia ainei te au vaine ki roto i te “au taeake” ta te apotetoro Paulo e tuatua ra? Ae, kua kapitiia mai ratou, mei te mea e e manganui te au vaine tei riro mai ei aronga irinaki. (Angaanga 17:1, 4; 1 Petero 2:17; 5:9) Eaa te tu tauturu te ka rauka i te au vaine i te oronga? Te vaira tetai au mapu vaine i roto i te au putuputuanga e manamanata to ratou o te akatereanga i to ratou “au akakeu anga ainga” me kore tei riro maira ei “au meta tei taitaiaia.” (1 Timoteo 5:11-13, NW) E au manamanata to etai au vaine i teia tuatau mei teia rai. Penei ta ratou e anoano maata ra koia oki ko tetai tangata te ka akarongo mai i to ratou au manamanata ma te tu tangi. I te maata anga o te taime ka riro tetai vaine Kerititiano pakari ei peretana tano meitaki no te oronga i teia tu tauturu. Ei akaraanga, ka rauka iaia i te uriuri i te au manamanata uaorai ki tetai atu vaine penei kare e rauka i tetai tangata Kerititiano uaorai i te rave atu ma te tau. Te akakite maata anga i te puapinga o te oronga anga i teia tu tauturu, kua tata a Paulo e: “Koia katoa te au vaine pakari . . . Kia ako marie ratou i te au vaine ou ra kia aroa i ta ratou au tane, kia aroa oki i ta ratou au tamariki, kia maru ua, kia meitaki, kia noo i te ngutuare, kia takinga-meitaki, kia kauraro marie i ta ratou uaorai au tane, kia kore e akakinoia te tuatua a te Atua.”​—Tito 2:3-5.

12. Naai te arataki anga puapinga kia aru te katoatoa i roto i te putuputuanga?

¹² Mei teaa atura me riro mai te au tuaine akaaka ei akameitakianga i roto i tetai putuputuanga me turu taokotai ratou i ta ratou au tane e te aronga pakari! (1 Timoteo 2:11, 12; Ebera 13:17) Te aronga pakari ma te au apainga ngutuare tangata ka puapinga tikaiia ratou me taokotai te katoatoa no te tauturu i tetai e tetai na roto i tetai vaerua aroa e me kauraro marie te katoatoa ki te arataki anga a te au tiaki akataoongaia.​—1 Petero 5:1, 2.

E te Au Metua, Eaa ta Kotou e Tuku ra i te Ngai Mua?

13. Akapeea te au metua tane e manganui i te autu kore anga i to ratou au ngutuare tangata?

¹³ I te au mataiti i topa kua kite tetai tangata tamataora rongoia e: “E kite ana au i te au tangata autu e akatere ra i te au pitiniti ma te anere ua atu au tangata; kua kite ratou akapeea i te raverave atu i te au turanga katoatoa, e akapeea i te ako atu e te tutaki atu i roto i te ao angaanga pitiniti. Inara ta ratou pitiniti maatamaata rava atu e akatere ra ko to ratou uaorai ngutuare tangata e te autu kore ra ratou i te rave i te reira.” No teaa ra? No te mea ainei te tuku ra ratou i te pitiniti e tetai atu au inangaro na mua e te ngaropoina ra i ta te Atua ako anga? Te karanga ra tana Tuatua e: “E teianei au tuatua taku e akaue atu . . . E ka apii tamou tikai . . . ki taau au tamariki.” E kua anoanoia kia raveia teia i te au ra ravarai. Te anoanoia ra te au metua kia oronga karapii kore ua i to ratou taime​—e to ratou aroa tikai e te manako anga oonu.​—Deuteronomi 6:6-9.

14. (a) Akapeea tikai te au metua me akono i ta ratou tamariki? (e) Eaa te kapiti maira ki roto i te tereni meitaki anga i te tamariki?

¹⁴ Te akamaara maira te Puka Tapu ia tatou e e tuanga te tamariki no ko mai ia Iehova. (Salamo 127:3) Te akono ra ainei koe i taau tamariki ei tuanga apinga na te Atua, e apinga aroa nana i oronga atu kia koe kia akono? Te akara anga e ka ariu atu taau tamaiti me kore tamaine me apai koe ma te ikiiki atura iaia, i reira te akaarianga i taau akono anga e te manako anga aroa. (Mareko 10:16) Inara te ‘apii i te tamaiti i te arataa e tikaʼi iaia kia aere’ e maata atu te umuumuia ra i te oronga ngoie ua i te au takave anga e te au ongi anga. E papa ei ma te tu pakari no te matakite atu i te au vaarua manamanata o te oraanga, te anoano katoa ra tetai tamaiti i te ako anga aroa. Ka akaari tetai metua i te aroa ngakau tae na te ‘ako anga i tana tamaiti.’​—Maseli 13:1, 24; 22:6.

15. Eaa te akaari maira i te anoano no te ako anga a te metua?

¹⁵ Te anoano o te ako anga a te metua ka kiteaia mei te akatutu anga a tetai vaine ako no te apii no runga i te tamariki tei aere mai ki tona opati: “Ka tangiia ratou, kua taitaiaia, e kua ngaro. Te aue ra ratou ia ratou e tuatua ra e mei teaa tikai te tu o te au mea. E manganui​—e manganui atu i tei manakoia e tetai—​kua tauta i te tamate ia ratou uaorai, kare e no to ratou mataora maata kare e rauka ia ratou i te akakoromaki; inara no te mea no to ratou mataora kore, te manako kore angaia mai, e te taitaiaia no te mea i te mataiti mapu ra te ‘akatere’ ra ratou e e maata roa no te akakoromaki.” Kua tuatua katoa aia e: “E mea mataku no tetai mapu ou i te manako e te akatere ra aia i te au mea.” E tika, penei kare te au tamariki e reka ana i te ako anga, inara te ariki tikai ra ratou i te au arataki anga e te au arairai anga a te metua. Te mataora ra ratou e te manako maata maira to ratou au metua i te akanoo mai i te au kotinga no ratou. “Kua apai ke atu te reira i tetai apainga maata mei toku manako,” i na tetai mapu ou ei ki tona nga metua tei pera ra.

16. (a) Eaa te tupu ana ki etai au tamariki tei utuutuia mai i roto i te au kainga Kerititiano? (e) Eaa ra te kaveinga taringa turi o tetai tamaiti ka kore ei i te aiteanga e kare te terenianga tei orongaia e te au metua e meitaki ana?

¹⁶ Inara, noatu te au metua tei inangaro ra ia ratou e tei oronga ra i te terenianga memeitaki, ko etai au mapu ou, mei te tamaiti kaimoumou apinga rai i roto i ta Iesu akatutu anga, te patoi ra i te arataki anga a te metua e kua aere ke atu. (Luka 15:11-16) Inara, kare te aiteanga e kare te au metua i rave ana i ta ratou apainga no te tereni meitaki anga i ta ratou tamaiti, mei ta Maseli 22:6 e arataki ra. Te akakite anga no runga i te ‘apii anga i te tamaiti i te arataa e tikaʼi iaia kia aere; kare e akaruke i taua arataa ra’ kua orongaia ei arataki anga ua nei. Ma te taitaia ra, mei te tamaiti kaimoumou apinga ra, ka ‘akavaavaa etai au tamariki i te ako a te metua.’​—Maseli 30:17.

17. Noea mai te akapumaana anga penei ka rauka i te au metua e tamariki taringa turi ta ratou?

¹⁷ Kua mii te metua tane o tetai tamaiti taringa turi e: “Kua tauta pakari au i te itae i tona ngakau. Kare au e kite eaa taku ka rave no te mea e manganui taku au mea i rave no te tauta. Kare e mea i angaanga ake.” Ma te manako meitaki ra, penei a muri akera, ka maara i teia au tamariki taringa turi i te terenianga aroa tei rauka ra ia ratou e ka oki mai mei te tamaiti kaimoumou apinga ra. Inara, te vaira te tika, e te patoi ra etai au tamariki e ka rave i te au mea akono tau kore ei mamae anga maata ki to ratou au metua. Penei ka pumaana te au metua i te kite e kua kite te puapii maata rava atu tei ora ana i te enua nei, i tana pipi tei roa ra ko Iuda Ikariota i te pikikaa anga iaia. E kare e ekoko anga kua taitaia a Iehova uaorai i tana uaorai au tamariki vaerua e manganui i te patoi anga i tana ako anga e kua meameaau atura kare ua nei Nona te apa.​—Luka 22:47, 48; Apokalupo 12:9.

E te Tamariki ​—Koai ta Kotou ka Akamareka?

18. Akapeea te tamariki te akaari anga e te tuku ra ratou i te Atua i te ngai mua?

¹⁸ Te raurau ra a Iehova ia kotou e te au mapu ou: “E akarongo atu i to kotou au metua i tei tau i te Atu ra.” (Ephesia 6:1) Te tuku ra te aronga mapu ou i te Atua i te ngai mua me rave ratou i teia. Auraka e akaneneva! Te tuatua ra te Tuatua na te Atua e: “E akavaavaa te neneva i te apii a tona metua tane.” Auraka katoa koe e manako akateitei ua e te meitaki ua ra koe ma te kore e ako anga. Ko te tika oki “te vaira tetai uki te vai ma ua ra i to ratou uaorai mata, e inara kare i tamaia mei to ratou repo ra.” (Maseli 15:5; 30:12, American Standard Version) No reira e aru i te arataki anga tu-Atua​—“e akarongo,” “kia vaio marie,” “auraka e akangaropoina,” “e akono marie,” “e tāpu meitaki,” “auraka e akaruke” i te au akauenga e te ako anga a te au metua.​—Maseli 1:8; 2:1; 3:1; 4:1; 6:20.

19. (a) Eaa te au tumu maata rava a te au tamariki no te akarongo kia Iehova? (e) Akapeea te au mapu ou i te akaari anga e te akameitaki ra ratou i te Atua?

¹⁹ E au tumu maata rava taau no te akarongo ia Iehova. Te inangaro ra aia ia koe, e kua oronga mai aia i tana au ture, kapiti mai i te ture no te au tamariki kia akarongo i to ratou au metua, no te paruru ia koe e te tauturu ia koe kia rekareka i tetai oraanga mataora. (Isaia 48:17) Kua oronga katoa mai aia i tana Tamaiti kia mate noou e raukaʼi ia koe te ora mei te ara e te mate e te rekareka i te oraanga mutu kore. (Ioane 3:16) Te rekareka ra ainei koe ma te akameitaki? Te akara maira te Atua mei te au rangi ra, te akara matatio ra i toou ngakau no te akara e me te inangaro tikai ra koe iaia e te ariki ra i tana au apinga oronga ua mai. (Salamo 14:2) Te akara katoa maira a Satani, e te akakino nei i te Atua, te karanga anga e kare koe e akarongo Iaia. Ka akarekareka koe ia Satani e ka “akaongoongo” ia Iehova me akarongo kore koe i te Atua. (Salamo 78:40, 41) Te pati nei a Iehova ia koe: “E taku tamaiti, kia pakari koe, kia rekareka toku ngakau [na te akarongo anga mai kiaku nei], kia tika iaku kia patoi atu i tei akakino mai iaku nei.” (Maseli 27:11) Ae, teia te uianga, Koai taau ka akamareka, ko Satani me ko Iehova?

20. Akapeea tetai mapu ou i te tamou ua anga i te tu mataku kore no te tavini ia Iehova noatu e me rokoia aia e te mataku?

²⁰ Kare i te mea ngoie i te rave i to te Atua anoano i roto i te au taomi anga ta Satani e tana ao ka akakeu ki rungao ia koe. Ka riro te reira ei mea matakuia. Kua akakite tetai mapu ou e: “Te aiteite ra te mataku ki te tu anu. Ka rauka ia koe i te rave i tetai mea no te reira.” Kua akataka aia e: “Me anu koe, ka aao koe i tetai pereue maanaana. Me te anu ra rai koe, ka aao akaou koe i tetai na runga ake. E ka rave ua atu koe i te aao i tetai mea e maana ua atu koe e kare koe e anu akaou ana. No reira na te pureanga kia Iehova me mataku koe te aite ra te reira ki te aaoanga i tetai pereue maanaana me anu koe. Noatu i muri ake i te pure mua te mataku ra rai au, ka pure akaou au, e akaou, e akaou, e tae ua atu ki te taime kare au e mataku akaou ana. E te angaanga ra te reira. Kua riro te reira ei tauturu iaku kia kore e o ki roto i te manamanata!”

21. Akapeea a Iehova i te turu anga ia tatou me tauta tikai tatou i te tuku iaia i te ngai mua i to tatou oraanga?

²¹ Me te inangaro tikai ra tatou i te tuku i te Atua i te ngai mua i to tatou oraanga, ka tauturu a Iehova ia tatou. Ka akamaroiroi aia ia tatou, te orongaanga mai i te tauturu a te au angera me anoanoia te reira, mei tana i rave ra no tana Tamaiti. (Mataio 18:10; Luka 22:43) Auraka e mataku e te au metua e te au tamariki katoatoa. E rave kia rauka te mataku mei to Karaiti ra, e ka apai mai te reira i te rekareka kia koe. (Isaia 11:3) Ae, “ko te Atua te mataku atu, e akono oki i tana au akauenga: ko ta te tangata katoa ïa e pini ua ake.”​—Koheleta 12:13.

Ka Rauka Ainei Ia Koe i te Pau?

◻ Eaa te au apainga tei anoanoia te au pipi mua a Iesu kia aka aite?

◻ Eaa te apainga kia akatupu te au metua Kerititiano?

◻ Eaa te tauturu te vaira no te aronga pakari Kerititiano ma te au ngutuare tangata?

◻ Eaa te angaanga puapinga penei ka rauka i te au tuaine i te rave i roto i te putuputuanga?

◻ Eaa te ako anga e te arataki anga puapinga e tau te tamariki kia aru?

[Tutu i te kapi 15]

I te maata anga o te taime ka rauka i tetai vaine Kerititiano pakari i te oronga i te tauturu tei anoanoia ki tetai mapu vaine

[Tutu i te kapi 17]

Eaa te akapumaana anga te ka rauka i te au metua mei te au Tuatua Tapu no runga i te au tamariki taringa turi?