Au Uianga a te Aronga Tatau
Ko te aite anga ainei o Mataio 28:17 e kua ekoko ua atu rai etai au apotetoro i muri roa mai i to Iesu tuakaou anga i te mama anga mai kia ratou?
Kare, kare tatou e tau kia itae i te reira taopenga anga no runga ia Mataio 28:16, 17, te tatau ra e: “Aere atura te au pipi tino ngauru ma tai ra ki Galilea, i tetai maunga ta Iesu i tuatua mai kia ratou ra. E kite akera ratou iaia, kua akamori atura; kareka tetai papaki, kua ekoko ïa.”
Kua tauta a Iesu i mua roa atu ana i te tauturu i te au pipi kia kite e “e aere aia ki Ierusalema e tikaʼi, e e rai tona rave kino angaia e te aronga pakari ra, e te kau taunga nunui ra, e te au tata tuatua, e e tamate ravaia oki, e akatu akaouia ra kia tae ki te po toru.” (Mataio 16:21) Inara, i tona tapeka angaia e te tamate angaia kua ati ngakau e kua manako oripu ua tana au pipi. Te akaraanga e kua riro tona tuakaou anga ei mea poitirere. E i tona akaari anga iaia uaorai i te tu tangata ra, i te akamata anga “kare rai oki ratou i akarongo tikai i te rekareka ma te umere.” (Luka 24:36-41) Inara kua riro tona mama anga mai i muri ake i tona tuakaou anga, ei tauturu i tana au pipi piri vaitata kia ariki i te tika o tona tuakaou anga; pera katoa kua akakeuia te apotetoro ko Toma e kua akatuia a Iesu.—Ioane 20:24-29.
I muri mai kua “aere atura te au pipi tino ngauru ma tai ra ki Galilea.” (Mataio 28:16; Ioane 21:1) Ia ratou i reira, kua “kitea aia e te au taeake e rima katoa anere e e ara, okotai rai kite anga.” (1 Korinetia 15:6) I roto oki i teia akanooanga i to Mataio 28:17 taiku anga e ‘kua ekoko tetai papaki.’ No reira ko te aronga tei ekoko ra penei e ko te aronga i rotopu i te 500 au pipi.
Ka akara ana i te tuatua meitaki ta C. T. Russell, te peretiteni mua o te Totaiete Punanga Tiaki i maani no runga i teia:
“Ko te aronga tei ekoko ra kare tatou e tau kia manako e ko tetai ua atu o te au apotetoro tino ngauru ma tai ra, no te mea kua merengo tikai ratou, ma te akakeu tikaiia, e kua akakite tikai ratou uaorai i mua atu ana. E tau tatou kia manako e ko te aronga tei ekoko ra, ko te ‘rima anere au taeake’ tei tae maira ki teia uipaanga tei akanooia, e kare rava i piri tikai ana kiaia mei tona tuakaou anga mai, e ko etai pae, ta tatou ka tamanako ra, e e paruparu atu to ratou akarongo i to te au apotetoro e te au taeake takake tei tuatua aia ra. Te tuatua e ‘kua ekoko tetai papaki’ e akakite anga te reira o te tu tika i te papaanga a te Evangeria. Te akaari katoa maira te reira kia tatou e, kare te au pipi a te Atu i irinaki ua atu, mari ra kua inangaro ratou i te iri e te akara i te au tika tei orongaia, e te oronga maira te maroiroi tei aru maira, te matutu e te vaerua akaatinga uaorai o te aronga tei irinaki ra i te au tika anga maata o te tu ngakau tae o ta ratou akapapu anga no runga i te tuakaou anga o to tatou Atu, koia oki kua kite ratou e tatou katoa e ko te taviri tikai te reira i to tatou akarongo ki roto iaia. Naringa kare a Karaiti i tuakaou mai kua puapinga kore to tatou akarongo e tei roto rai tatou i ta tatou au ara.—1 Ko. 15:17.”—Zion’s Watch Tower and Herald of Christ’s Presence, May 1, 1901, kapi 152.
Penei ka kite tatou i te patianga e ko te tu i ta Mataio taiku anga i teia manako te oronga maira i tetai tika anga o te tu papu tikai e te tiratiratu o te Puka Tapu. I te mea e te maani ua ra tetai tangata i tetai papaanga tua, ka rave aia i te oronga i te au tuatua te ka akariro i tana tua kia akara anga e ka irinakiia; te akara anga e penei ka manako aia e na te au tuatua tei kiritiia me kore te au ngai va e akatupu i te ekoko anga ki runga i tana maani ua anga. Akapeea a Mataio?
Kare aia i manako ana no te oronga mai i tetai akamarama anga maata no tana tuatua e ‘kua ekoko tetai papaki.’ Kare e ngai i roto i te au papaanga a Mareko, Luka, e Ioane te tuatua ra no runga i teia, no reira ko ta Mataio tuatua me rave anake uaia mai, te akaraanga e te akakite maira e ko te au apotetoro tai ngauru ma tai, e koia katoa oki tetai. Inara, kua rave a Mataio i te tuatua poto ua ma te kore i oronga mai i tetai ua atu akapapu anga. No etai 14 mataiti i muri mai, kua tata te apotetoro a Paulo i te puka o Tai Korinetia. I te marama anga i te tuatua tana i oronga i roto ia 1 Korinetia 15:6, ka rauka ia tatou te taopenga anga e ko te aronga tei ekoko ra kare ratou i te au apotetoro mari ra ko te au pipi i Galilea koia oki kare a Iesu i mama ake kia ratou. No reira, ko ta Mataio tuatua e ‘kua ekoko tetai papaki’ kua tika te reira; kua tano tikai te reira no tetai tangata tata tiratiratu i te orongaanga i tetai papanga tika ma te kore te tautaanga i te akamarama i te au tuatua ravarai.