“E Akariro ei Pipi te Au Tangata no te Pa Enua Katoa”
“E TEIANEI ka aere kotou e akariro ei pipi te au tangata no te pa enua katoa, ka papetito atu ia ratou i te ingoa o te Metua e no te Tamaiti e no te vaerua tapu.” Ko teianei te uri anga a te New World Translation i ta Iesu ra akauenga ia Mataio 28:19. Inara, kua akaapaia teia urianga. Ei akatauanga, te karanga ra tetai aenga pepa na te akonoanga: “Ko te urianga anake te akatikaia ra e te tataanga Ereni koia oki: ‘E akariro i to te pa enua katoa ei pipi!’” Ko te tika ainei teia?
Ko te urianga, “E akariro i to te pa enua katoa ei pipi,” te mama maira i roto i te au tataanga Pipiria e manganui e e urianga tikai ia no te reo Ereni. No reira, eaa te tumu anga no te tatauanga, “E akariro ei pipi te au tangata no te pa enua katoa, ka papetito atu ia ratou”? Te au tuatua takapini. Te takiota tuatua “ka papetito atu ia ratou” te akataka maira i te aronga tataki tai, kare i te au pa enua. Kua tuatua tetai tangata Tiamani apiipiiia ra ko Hans Bruns e: “Ko te [tuatua] ‘ratou’ kare e taiku ana i te pa enua (te akataka meitaki maira te tuatua Ereni), mari ra i te au tangata i roto i te au pa enua ra.”
Pera katoa oki, ka tau kia akamanakoia te tu o te rave anga i ta Iesu ra akauenga. No runga i te angaanga orometua a Paulo raua ko Banaba i Derebe, ko tetai oire ia i Asia Minora, ka tatau tatou: “E kia tuatua raua i te evangelia i te reira oire, e manganui oki tei apiiia, ooki akaou maira raua ki Lusetera, e Ikonio, e ki Anetioka.” (Angaanga 14:21) E akara e kua apiiia e kua akariro a Paulo raua ko Banaba i etai ei pipi, kare i te oire o Derebe, mari ra i tetai papaki o te au tangata o Derebe ra.
Mei te reira katoa, no te tuatau o te openga, kua totou mai te puka Apokalupo, kare e ko te au pa enua katoatoa te ka tavini atu i te Atua, mari ra “e aronga maata rava . . . no te pa enua ravarai, e te au kopu ravarai, e te au iti-tangata ravarai, e te au reo katoa oki” te ka rave i te reira. (Apokalupo 7:9) E no reira te vai mou ra te New World Translation kua akatikaia ei tetai urianga tei tau ra kia irinakiia no ‘te au Tuatua Tapu katoa e mea akauruia e te Atua.’—2 Timoteo 3:16.