Ka Aru Ainei Koe i to Iesu Aroa?

“Na te aroa o te Karaiti i akakeu ia tatou.”​—2 KORINETIA 5:14, NW.

1. Akapeea te akataka anga i te aroa o Iesu ra?

E TIKA tikai, e mea umere roa to Iesu aroa! Me ka akamanako tatou i tona mamae anga kare e rauka kia akatakaia i tana oronga anga i te oko, na te reira anake ra e raukai ia tatou te ora mutu kore, e mea tika kia akakeuia to tatou au ngakau ma te ariki anga nona ra! Na te Atua ko Iehova raua ko Iesu uaorai i rave te akamata anga. Na raua i aroa mua mai ia tatou nei, ia tatou e vaira i roto i te tu ara. (Roma 5:6-8; 1 Ioane 4:9-11) Te kiteanga i “te aroa o te Karaiti,” ta te apotetoro ko Paulo i tata, “e taea koreia ia e te kite tangata nei.” (Ephesia 3:19, NW) E tika, tei runga roa atu te aroa o Iesu i te kite o te upoko tangata nei. Te aere ra te reira ki runga roa atu i etai ua atu apinga tei akaraia me kare tei kiteia e te tangata nei.

2. Eaa te ka kore e rauka kia arai ia Iesu kia kore e aroa mai ia tatou nei?

² I tana tataanga ki te aronga Kerititiano o Roma, kua ui a Paulo: “Naai e akataka ke atu ia tatou i te aroa o te Karaiti? Na te mate aina me kare na te tumatetenga me kare na te takinga kino na te pongi aina me kare na te noo apinga kore me kare na te tu kino e na te koke aina?” Kare taua au mea ra e rauka kia arai i to Iesu aroaanga mai ia tatou nei. “Kua kite papu oki au,” ta Paulo i tuatua maira, “e kare te mate kare oki te ora kare te au angera kare katoa oki te au kavamani kare te au mea e vai nei kare oki te au mea te ka tupu a muri atu kare te au mana kare te teitei kare te oonu kare katoa oki etai ua atu apinga angaia mai e tika kia akataka ke ia tatou i te aroa o te Atua ra i roto i to tatou Atu ia Iesu Karaiti ra.”​—Roma 8:35-39, NW.

3. Na teaa anake e akariro ia Iesu e tona Metua kia akaruke ia tatou?

³ Ko te reira te tu ririnui o te aroa o te Atua ko Iehova raua ko Iesu noou. E okotai ua apinga ei akakore i to raua aroa mai anga ia koe, e ko te reira na toou uaorai akakoroanga kia kopae ke atu i to raua aroa na te kore e akatika kia rave i ta raua i pati mai ia koe. I tetai tuatau kua akataka atu tetai peroveta na te Atua ki tetai ariki o Iuda: “Tei ia kotou a Iehova, ko kotou i piri mai kiaia ra; kia kimi kotou iaia, ka kitea aia e kotou; kia akaruke ra kotou iaia, ka akaruke aia ia kotou.” (2 Paraleipomeno 15:2) Koai io tatou nei te ka inangaro kia ariu ke atu i te reira nga oa vavaria, ma te aroa mei te Atua ko Iehova ra raua ko tana Tamaiti, koia a Iesu Karaiti?

Rave Anga Tau ki to Iesu Aroa Ra

4, 5. (a) Eaa ta te aroa o Iesu ka akatupu ki to tatou au pirianga ma etai atu au tangata katoa? (e) Koai atu etai ka tau tatou kia akakeuia kia aroa atu no to Iesu aroa mai anga ia tatou nei?

⁴ Eaa te akatupu anga kia koe uaorai no to Iesu aroa tapupu kore noou? Ka akapeea koe? Kua akaari maira Iesu e eaa te tupu anga tau no to tatou pirianga ma etai atu au tangata katoa na tana akakite anga mai i te aroa. I muri ake i te tavini taakaaka anga i tana au apotetoro i te tamaanga i to ratou vaevae, kua na ko atura Iesu: “Kua tuku atu na oki au i te akaraanga na kotou, ko taku i raveo ia kotou nei, kia akapera katoa kotou.” Kua tuatua katoa atu aia: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou i kotou uaorai.” (Ioane 13:15, 34) Kua apiiia tana au pipi, e kua akakeuia ratou kia tauta i te rave mei tana i rave ra. “Na teia tatou i kite ei i te aroa,” ta te apotetoro ko Ioane i tata, “no te mea kua oronga aia i tona meta no tatou; e e mea tau no tatou kia oronga i to tatou uaorai au meta no to tatou au taeake e tikai.”​—1 Ioane 3:16, NW.

⁵ Inara, ka aere ke tatou i te akakoro anga o to Iesu oraanga e tana angaanga orometua me na tona akaraanga ua i akakeu ia tatou kia aroa e kia tavini atu i te au mea tika o to tatou au taeake tangata nei. Kare ainei te aroa o Iesu no tatou e tau kia akariro ia tatou kia aroa katoa atu iaia e pera katoa oki kia aroa atu i tona Metua, tei apii atura iaia i te au mea ravarai tana i kite ra? Ka rave ainei koe kia tau ki te aroa o Karaiti e ka tavini atu ei i tona Metua mei tana i rave ra.​—Ephesia 5:1, 2; 1 Petero 1:8, 9.

6. Eaa te tupu anga ki te apotetoro ko Paulo no to Iesu aroa kiaia ra?

⁶ E akamanako ana ia Saula, tei matauia i muri akera e ko Paulo. I tetai tuatau kua takinga kino aia ia Iesu, “tana tuatua akamataku e te ta i te au pipi.” (Angaanga 9:1-5; Mataio 25:37-40) Inara i to Paulo riro anga tikai kia kite ia Iesu, kua akameitaki aia no tei akakoreia tana ara e kare aia i rekareka anake kia tamamaeia no Iesu mari ra kua akatika katoa kia tamateia aia no Iesu. “Kua patiti ia au ma te Karaiti Katoa ki runga i te rakau,” ko tana ia i tata. “Kare ra ko au te ora nei . . . E tika, ko te oraanga te ora nei au i teianei i te kopapa te ora nei au na te akarongo i te Tamaiti a te Atua, koia tei aroa maira iaku e kua oronga iaia uaorai noku.”​—Galatia 2:20, NW.

7. Eaa te mea tau kia akakeuia tatou kia rave e to Iesu ra aroa no tatou nei?

⁷ Mei teaa ra te mana akakeuanga i to tatou oraanga tei tau i te aroa ta Iesu i oronga mai no tatou nei! “Na te aroa o te Karaiti i akakeu ia tatou,” ta Paulo i tata ki to Korinetia, ‘kia ora tatou kare no tatou uaorai, mari ra nona tei mate ra no tatou e kua akatuia mai.’ (2 Korinetia 5:14, 15, NW) E tika, na te akameitaki anga ia Iesu no te orongaanga i tona oraanga no tatou ka tau ia kia akakeu ia tatou kia rave noatu eaa tana ka pati mai. Na teia mataara anake ka raukai ia tatou te akapapu e e aroa tikai to tatou iaia. “Kia aroa kotou iaku nei, ka akono kotou i taku au akauenga,” ta Iesu i karanga. “Tei iaia taku au akauenga e te akono ra i te reira, koia te aroa maira iaku nei.”​—Ioane 14:15, 21, NW; akaaiteia atu kia 1 Ioane 2:3-5.

8. Eaa te tupu anga ki te au oraanga o te aronga rave kino e manganui no te aroa o Iesu ra?

⁸ I te kiteanga i te au akauenga a Iesu, kua akono te aronga kanga, akaturi, e te totoma te keia, te kona kava, e te morimori apinga i Korinetia i taito ra kia tau ki to Iesu aroa na te akarukeanga i taua au ravenga ra. Kua tata a Paulo no ratou e: “Kua oreiia kotou kia ma, . . . kua akatikaia kotou i te ingoa o to tatou Atu o Iesu Karaiti.” (1 Korinetia 6:9-11, NW) Mei te reira katoa, na te aroa o Iesu i akakeu i te aronga e manganui i teia tuatau kia akono i te au taui anga umere tikai i to ratou oraanga. “Kua kitea te autu anga tika tikai o te akonoanga Kerititiano i te akariroanga ei tangata meitaki te aronga tei aru ra i tana au apiianga,” ko ta John Lord i tata koia te tata tuatua enua ra. “E akakite anga ta tatou i to ratou oraanga apa kore ra, to ratou tu akono kino kore, to ratou tu tangata enua meitaki, e pera katoa to ratou aroa Kerititiano.” Mei teaa ra te tuke anga tei akatupuia e te au apiianga a Iesu ra!

9. Eaa te kapitiia maira ki te akarongorongoanga kia Iesu?

⁹ E tika rava, kare e apii e rauka kia raveia e tetai tangata i teia tuatau nei te ka maata atu te puapinga i to te oraanga e te angaanga a Iesu Karaiti. “Akara tamou ia Iesu,” ta te apotetoro ko Paulo i raurau mai: “Akamaara marie oki iaia.” (Ebera 12:2, 3) I to Iesu akatu ke angaia ra, kua akaue maira te Atua uaorai no runga i tana Tamaiti: “E akarongo kotou iaia.” (Mataio 17:5) E mea tau kia akaketaketaia e, noatu, ko te akarongoanga ia Iesu te kapiti ra kia maata i te akarongorongo ua i tana tuatua. Tona aiteanga kia rave i tana au akauenga, ae, kia aru iaia na te raveanga i tana i rave ra na te mataara tana i rave i te reira. Ka akono tatou kia tau ki to Iesu aroa na te aruanga iaia ei akara anga no tatou, na te aru vaitata anga i tona au tapuae.

Ta Iesu i Anoano ia Tatou kia Rave

10. Koai ma ta Iesu i akamatau ra e eaa te akakoro anga?

¹⁰ Ta Iesu angaanga mei ko mai i te Atua ra e tutu aere i te Patireia o tona Metua, e kua akamatau aia i tana au pipi kia rave katoa i taua angaanga ra. “Ka taki aere tatou i te au oire i vaitata nei,” ko tana i tuatua atu ki tana au pipi mua ra, “kia apii katoa atu au i to reira; ko toku ïa tere i aere mai ei au nei.” (Mareko 1:38; Luka 4:43) I muri iora, i te oti anga tana akamatau marie anga e 12 au apotetoro, kua akaue atura Iesu ia ratou: “E aere kotou, e tutu aere, na ko atu, ‘Te vaitata mai nei te patireia o te au rangi ra.’” (Mataio 10:7, NW) I etai marama i muri mai, i te oti anga te akamatauanga e 70 etai ke atura, kua tono atura aia ia ratou katoa ma te akauenga: “E karanga atu kia ratou, ‘Kua vaitata mai nei te basileia o te Atua kia kotou na.’” (Luka 10:9) Te taka meitaki ra, i anoano a Iesu kia riro tana au pipi ei aronga tutu aere e ei au orometua.

11. (a) Na teea mataara ta te au pipi a Iesu rave anga i te au angaanga maata atu i tana i rave ra? (e) Eaa tei tupu ki te au pipi ra i muri ake i to Iesu tamate angaia?

¹¹ Kua rave ua atu a Iesu i te akamatauanga i tana au pipi no teia angaanga. I te aiai openga i mua ake i tona matenga, kua akamaroiroi atura aia ia ratou ma te au tuatua: “Ko te akarongo mai iaku ra, ka rave katoa aia i teianei au angaanga taku e rave nei: e maata ua atu rai tana e rave i teia.” (Ioane 14:12) Ka maata ua atu te au angaanga a tana au pipi i tana i rave no te mea i ta ratou angaanga orometua e maata atu te au tangata ta ratou ka itae atu i te ngai maata roa atu e no te tuatau roa rava atu. Inara, i muri ake i to Iesu tamate angaia, kua noo angaanga kore ua tana au pipi no te mataku. Kua pipini ua ratou e kare i rave i te angaanga tana i akamatau ia ratou ra kia rave. Kua oki akaou tetai papaki o ratou ra ki te pitiniti tautai. Inara, na roto i te mataara kare e ngaropoinaia, kua akatinamou atura aia ki te manako o teia aronga e itu i tana i anoano ia ratou, e pera katoa oki te katoatoa o tana au pipi, kia rave.

12. (a) Eaa te temeio ta Iesu i rave i te Tai i Galilea ra? (e) Eaa tikai, te aiteanga o ta Iesu i ui atura kia Petero me te ‘maata ra tona anoano Iaia i teia’?

¹² Kua mama maira a Iesu na roto i te tu kopapa tangata i te Tai i Galilea ra. Tera nga apotetoro e itu i vao atu i runga i te pai e kare i rauka e ika na ratou i te po roa katoa. Kua kapiki atura Iesu mei taatai: “Ka tuku i te kupenga ki te pae katau i te pai na, ka rauka ïa ta kotou.” I te ki anga te kupenga i te ika na te tu temeio e vaitata i te motu, kua kite taua aronga i runga i te pai ra e ko Iesu tera i te pae roto ra, e kua rapurapu ratou kia tae atu ki tona ngai i tiaki maira. I muri ake i te orongaanga kai na ratou ra, penei kua akara atu a Iesu i taua au ika mamaata i mou maira, e kua ui atu kia Petero: “E Simona a Iona e, te maata na toou anoano kiaku i teia?” (Ioane 21:1-15) Kare e ekoko anga e te aiteanga o ta Iesu tuatua, te maata atura ainei toou manako ki te pitiniti tautai i te angaanga tutu aere taku i teateamamao ra ia koe kia rave?

13. Akapeea ta Iesu akakite anga ririnui ki tana au pipi i te mataara no ratou kia akono tau ki tona aroa?

¹³ Kua pau atura Petero: “A, e te Atu, kua kite koe e, te anoano atu nei au ia koe.” Kua pau maira Iesu: “Ka angai i taku au punua mamoe.” I te rua o te taime kua ui a Iesu: “E Simona a Iona e, te anoano na koe iaku?” Kua pau akaou atura Petero, kare e ekoko anga e ma te manako papu katoa: “A, e te Atu, kua kite koe e, te anoano atu nei au ia koe.” Kua akaue akaou atura Iesu: “Ka tiaki i taku au mamoe.” Kua ui atura Iesu i te toru o te taime: “E Simona a Iona e, te anoano na koe iaku?” I teianei kua aue tikai a Petero. E tokoiti ua nga ra i mua akera, e toru taime tona uuna anga e kua kite aia ia Iesu, e no reira penei kua manako aia e te ekoko ra a Iesu i tona tu tiratiratu. I reira, i te toru o te taime, kua pau atura Petero, penei na te reo patianga te tangi: “E te Atu, kare ua e mea toe i te kitea e koe; kua kite koe e, te anoano atu nei au ia koe.” Kua pau ua atu a Iesu e: “Ka angai i taku au mamoe.” (Ioane 21:15-17) E tumu ainei tetai no te ekoko anga e eaa ta Iesu i anoano ia Petero e tona au oa kia rave? E ririnui tikai tana akatinamou anga ki to ratou manako​—e pera katoa to etai ke atu te ka riro mai ei pipi nana i teia tuatau nei—​e me te inangaro ra ratou iaia, ka rave ra ratou i te angaanga akariro i te au tangata ei pipi!

14. I te au atianga ke atu akapeaa a Iesu i te akaari anga i te mataara no tana au pipi kia akono kia tau ki tona aroa?

¹⁴ E tokoiti ua nga ra i muri ake i taua tuatua anga i te pae tai ra, kua mama maira Iesu i tetai maunga i Galilea e kua akaue atura i tetai uruoaanga mataora e vaitata i te 500 au pipi: “E teianei, ka aere kotou, e akariro i to te pa enua katoa ei pipi; . . . Ma te apii atu ia ratou, kia akono i te au mea katoa taku i akaue atu kia kotou.” (Mataio 28:19, 20; 1 Korinetia 15:6) E tamanako ana i te reira! Te au tane, te au vaine, e te au tamariki aiteite ua te angaanga i rauka na ratou katoatoa. I muri ua ake ra, i mua poto ake i tona kakeanga ki te rangi, kua tuatua atura Iesu ki tana au pipi: “E ei kite oki kotou noku . . . e tae ua atu ki te openga o te enua ra.” (Angaanga 1:8) I muri ake i te reira akamaroiroi anga katoa ra, no reira a Petero, i etai mataiti i muri roa maira, i tuatuaʼi: “E kua ikuiku maira [a Iesu] ia matou e tuatua aere matou ki te tangata, e akakite ua atu.”​—Angaanga 10:42.

15. Eaa tei kore i tau kia manako ekokoia?

¹⁵ Kare e tika kia ekoko e eaa ta tatou ka tau kia akono ei pau anga i to Iesu ra aroa. Mei tana i tuatua ki tana au apotetoro ra: “I akono kotou i taku au akauenga, e vai akaperepereia atu kotou e au; . . . Ko kotou toku oa, kia akono kotou i te au tuatua katoa taku i akaue atu ia kotou na.” (Ioane 15:10-14) Ko te uianga ra, Ka akaari ainei koe i te ariki anga no te aroa o Iesu na te raveanga i tana akauenga kia o atu i te angaanga akariro i te au tangata ei pipi? E tika, penei kare teia i te mea ngoie ua noou no etai au tumu tuke tuke. Inara kare katoa oki i ngoie ua no Iesu. E akamanako ana i te au taui anga tei umuumuia nona kia rave.

E Aru i to Iesu Akaraanga

16. Eaa te akaraanga meitaki ta Iesu i oronga maira?

¹⁶ I rekareka ana te Tamaiti anau tai a te Atua i tetai turanga teitei no te kaka i te rangi ra i maata atu i to te au angera katoatoa ra. E apinganui tikai aia ra! Inara kua rekareka aia i te taakaaka anga iaia uaorai, e kua anauia mai ei mema no tetai ngutuare putaua, e kua tupu ake aia takapiniia e te aronga tangata maki e te mate atura. Kua rave aia i te reira no tatou, mei ta Paulo i akataka maira: “Kua kite oki kotou i te aroa ua o to tatou Atu ra o Iesu Mesia, e e apinga maata tona, no kotou ra, riro mai nei aia ei apinga kore, kia maata to kotou apinga i taua apinga kore nona ra.” (2 Korinetia 8:9; Philipi 2:5-8) Mei teaa ra te akaraanga meitaki! Mei teaa ra te akakite anga i te aroa! Kare tetai ke atu i akaruke kia maata atu me kare kia tere atu te mamae anga no etai ke ra. Kare roa tetai i rave kia rauka no etai ke ra te rekareka anga i te apinganui maata atu, ae, te ora mutu kore i roto i te tu apa kore ua.

17. Eaa te ravenga tau tei akanooia mai ki mua ia tatou nei, e eaa te ka tupu mai i te aruanga i te reira?

¹⁷ Ka rauka ra ia tatou kia aru i to Iesu akaraanga e kia aite katoa oki te puapinga ki etai ke ra. E putuputu a Iesu i te raurau i te au tangata kia akariro ia ratou ei pipi nana. (Mareko 2:14; Luka 9:59; 18:22) Ko te tika, kua tata a Petero: “I kapikiiaʼi oki kotou; i mate katoa oki te Mesia uaorai no kotou; e kua vaoo oki i te akaraanga na kotou, kia aru kotou i tona takainga vaevae.” (1 Petero 2:21) Ka akono ainei koe kia tau ki te aroa o Karaiti kia tae roa ki te mamaeanga kia raukai te tavini atu i tona Metua mei tana i rave ra? Mei teaa ra te puapinga anga kia etai ke ra no taua mataara nei! Ae, na te aruanga i ta Iesu akaraanga, na te rave katoaanga i te au apiianga tana i rauka mei tona Metua maira, “e oraʼi koe, e te aronga katoa e akarongo mai ia koe ra.”​—1 Timoteo 4:16.

18. (a) Eaa te akaraanga ta Iesu i akanoo mai no to tatou tu akono ki te au tangata katoa ra? (e) Eaa ta te au tangata i rave no to Iesu ra tu?

¹⁸ Ei tauturu i te maataanga o te au tangata ra, ka tau katoa tatou kia manako atu ia ratou mei ta Iesu i rave ra. Kua tuatua maira tetai totou nona e: “Ka akaperepere aia i tei apikepike ra e tei putaua.” (Salamo 72:13) Kua kite ra tana au pipi e i “aroa” a Iesu i te aronga tana i tuatua atura e kua anoano tikai aia kia tauturu atu ia ratou. (Mareko 1:40-42; 10:21) “E kia akara akera aia i te maata o te tangata,” e na te Puka Tapu ei, “aroa atura aia i ratou, no te mea kua mate ratou i te roiroi, e kua pueurikiriki keia, mei te mamoe tiaki kore ra.” (Mataio 9:36) Noatu rai ko te aronga rave maata i te ara kua kite i tona tu aroa e kua akavaitata atura kiaia. Na te tangi anga o tona reo, te tu akono, e te apiianga, kua akaangaroi ua ratou. E no reira, noatu ko te aronga koi tero akavaavaaia ra e te aronga akaturi oki kua kimi katoa kia kite iaia ra.​—Mataio 9:9-13; Luka 7:36-38; 19:1-10.

19. Akapeea a Paulo i te aru anga ia Iesu, e eaa te ka tupu me ka rave tatou i te reira tu?

¹⁹ Kua aru katoa ta Iesu au pipi o te anere mataiti mua ra i tana akaraanga aroa. I tata atu a Paulo ki tetai papaki o te aronga tana i apii ra: “I maru ua ra matou i rotopu ia kotou: mei te metua i matuapuru i tana tamariki; . . . Kua kite oki kotou i ta matou ako anga atu e te akapumaana anga atu e te akaue anga atu ia kotou ravarai, mei te metua i tana tamariki.” (1 Tesalonia 2:7-11) Te aite ra ainei toou manako ngakau tae tikai no te aronga i toou ngai mei ta te au metua e manako ngakau ra no ta ratou tamariki akaperepere ra? Te akakiteanga i te reira manako ngakau i te tangi o to reo, te tu akara anga o toou mata, e taau angaanga katoa oki ka akatupu kia inangaroia mai te tuatua no te Patireia e te aronga mei te mamoe rai te tu.

20, 21. Eaa etai au tupu anga i teia tuatau nei no te au peretana tei aru ra i ta Iesu akaraanga no te aroa?

²⁰ I tetai ra anu i Hisepania kua aravei atu nga Kite vaine e rua i tetai vaine ruaine e nga tokotoko tona, e anu kino tona ngutuare no te mea kua pou tana vaie. Te tiaki ra aia i tana tamaiti kia oki mai mei te angaanga e kia tipu akaou mai i etai. Kua tipu atura teia nga Kite i te vaie, e kua akaruke katoa atu i etai makatini nana ei tatau. I te oki anga mai tana tamaiti, kua puta tona ngakau i te manako aroa o aua nga Kite ra i tona metua vaine e kua tatau aia i te au puka, kua akamataia te apiianga i te Puka Tapu, e kua papetitoia, e kare i roa kua tomo atu ki te angaanga ei painia.

²¹ I Otereria kua akakite atu tetai tangata e tana vaine ki nga Kite te tutaka aere ra e kare a raua moni no te angai i ta raua anau. Kua aere atura nga Kite tokorua e kua oko mai i etai kai, kapiti katoa mai i etai rore na te tamariki. Kua aue nga metua e kua akakite mai no to raua tu taitaia i te ngere kua manako raua i te tamate atu ia raua uaorai. Kua akamata aua nga tokorua ra i te apii te Puka Tapu, kare i roa akenei kua papetitoia te vaine. E akaapa anga ta tetai vaine i te Unaite Teite i te Au Kite o Iehova ra kua akakite mai i muri ake i tona araveianga i tetai Kite: “Kare e maara tika ana iaku eaa ta maua i tuatuaʼi, inara ko taku i maara ko te tu takinga meitaki nona kiaku, e maoraora mai e te tu taakaaka katoa oki tona. Kua manako akavaitata tikai au kiaia ei peretana. Te akaperepere nei au iaia ei oa tae mai ki teia tuatau nei.”

22. I muri ake i te akara anga matatio i to Iesu ra oraanga, eaa to tatou manako taope anga nona ra?

²² Me akono tatou kia tau ki to Iesu aroa na te raveanga i te angaanga tana i rave i te tu tana i rave ra i te reira, mei teaa ra te au akameitakianga te ka rekarekaia e tatou! Te kitea uaia ra e te maata ra oki to Iesu tu maata rava. Te akakeuia ra tatou kia tuatua i te au tuatua a te kavana o Roma ra koia a Ponotio Pilato: “Ka akara mai ana i taua tangata nei!” Ae, “Taua tangata” tikai ra, koia te tangata maata rava atu tei ora ana.​—Ioane 19:5.

Akapeea Koe me Pau?

◻ Akapeea te maata o to Iesu ra aroa?

◻ Koai ma tei tau tatou kia aroa atu no to Iesu ra aroa anga, e eaa ta tona aroa ka tau kia akakeu ia tatou nei kia rave?

◻ Eaa te angaanga ta Iesu e anoano ra ia tatou kia rave?

◻ Akapeea a Iesu i apinganui ei, e eaa aia i riro ei kia apinga kore?

◻ Akapeea tatou i te aru anga ia Iesu i te mataara tana i matuapuru atu i te au tangata ra?

[Tutu i te kapi 15]

Na Iesu i akanoo mai te akaraanga no te akaarianga i te aroa

[Tutu i te kapi 17]

Na Iesu rai i akatutu ririnui mai e akapeea te akakite anga tau na tana au pipi i te aroa nona