Akapeea e Kitea’i te Rekareka i te Maanianga Pipi

KO TETAI tu rekareka tikai te ka kiteaia e tetai tangata koia oki te riro anga ei oa angaanga ma te Atua. I teia tuatau, ta te Atua angaanga te kapitiia maira te akaputuputuanga i te au tangata tei inangaro i te tuatua tika ki roto i te putuputuanga Kerititiano e te terenianga ia ratou no te oraanga Kerititiano i teianei e pera katoa kia ora atu i roto i te ao ou.​—Mika 4:1-4; Mataio 28:19, 20; 2 Petero 3:13.

Kua riro ei tumu rekareka maata ki te Au Kite o Iehova i Ratini Marike i te kite anga i tetai mirioni au tangata i te riro anga ei au pipi na Iesu Karaiti mei te 1980 mai. I teia ngai uua, e ngai e manganui te akangateitei ra e te irinaki ra i te Puka Tapu, kua rauka i tetai au orometua tamou i te tauturu i te au tatini ua atu kia akatapu i to ratou au oraanga kia Iehova. Ma te maata o te tupu anga, penei ka rauka ia ratou te akakite mai ia tatou i tetai apinga no runga i te rekareka o te maanianga pipi. Penei ka riro etai o to ratou au manako ei tauturu ia koe kia kite i te rekareka i te maanianga pipi i te ngai e noo ra koe.

Kiteanga i te Aronga i Tau ei “Mamoe”

“E te oire e te vila ta kotou e tomo, e ui atu i to reira tangata e tau,” ta Iesu ia i tuatua i tona tono anga i tana au apotetoro kia aere e tutu aere. (Mataio 10:11) Me aere koe i te atoro i te au tangata, akapeea e raukaʼi ia koe te kite i te aronga te ka rauka i te tauturuia i te pae vaerua? Kua karanga a Edward, e orometua tamou tere atu i te 50 mataiti, e: “Te akaari ra ratou i te reira na roto i ta ratou au uianga oonu e to ratou tu merengo i te orongaia atu anga te au pauanga mei roto mai i te au Tuatua Tapu.” Kua kapiti katoa mai a Carol e: “Me akakite mai tetai tangata i tona uaorai manamanata kiaku me kore ra taitaia, e patianga tikai te reira no te tauturu. Ka tauta au i te kimi i te manako tauturu i roto i te au puka a te Totaiete Punanga Tiaki. Ko te reira tu manako uaorai no tetai e putuputu te taime te arataki atura ki tetai apii anga Puka Tapu.” Inara, kare i te mea ngoie ua te kite i te aronga ngakau tae. Kua akakite a Luis e: “Tetai pae tei manakoia e kua inangaro tikai kua kiteaia mai e kare takiri i inangaro, inara ko etai papaki tei patoi mai i te akamata anga kua taui i to ratou akarongo anga i ta te Puka Tapu tikai e tuatua ra.” I te mea e te akangateitei ra te au Ratini Marike i te Puka Tapu, kua karanga katoa aia e, “Te kite nei au i te aronga te ka rauka i te tauturuia i te pae vaerua me papa ua ratou i te ariki i ta te Puka Tapu e apii ra i muri ake i taku akaari anga i te reira kia ratou.” Te tauturuanga i taua aronga “tau” ra kia tere ki mua i te pae vaerua te apai maira i te rekareka tika tikai e te merengo anga. Akapeea koe i te rave anga i teia?

Akono Anga Kia Akamataia te Au Apii Puka Tapu

Te taangaangaanga i te au puka tauturu apii Puka Tapu tei neneiia e te “tavini akono meitaki e te pakari” ko te ravenga meitaki tikai ia i te tauturu i te au tangata kia marama i te tuatua mou o te Puka Tapu. (Mataio 24:45) Akapeea koe i te akamaata anga atu i te ariki anga no te puapinga o taua au puka tauturu apii Puka Tapu ra? Kua karanga a Edward e: “I te mea e te tuke rava ra te au turanga, te au tu, e te au akara anga o te au tangata, ka tauta au kia ngoie ua i te taui i te akamataanga i te au apii.” Kare e rauka ia koe te taangaanga i taua ravenga rai ma te au tangata katoatoa.

No etai pae, penei ka anoanoia tetai au uriurianga akakoro koreia no runga i te au Tuatua Tapu i mua ake ka oronga atu ei i tetai puka apii Puka Tapu. Noatu rai, kua ripoti tetai nga mitinari akaipoipo e: “E mea matauia e maua i te oronga i tetai apii anga i te atoro anga mua rai.” Mei te reira rai, kua karanga tetai Kite tei tauturu e 55 au tangata e tae roa ki te akatapu anga e: “Taku ravenga maata no te akamataanga i te au apii Puka Tapu koia oki na te akamata anga i reira rai i te akamanako atu i te au manako i roto i te puka Ka Rauka ia Koe te Ora Mutukore i Paradaiso i te Enua Nei.” Noatu e kare etai pae e mareka ana i te manako o te apiianga i tetai ua atu apinga, te inangaro tikai ra tetai papaki i te apii i tetai ua atu apinga ta ratou i irinaki e ka tauturu i to ratou oraanga. Te oronga anga no tetai au apii Puka Tapu oronga ua i te kainga e putuputu te taime te tangi reka ra ki teia aronga. Kua akamarama tetai au mitinari i teia oronga anga e kua karanga e: “Ka inangaro au i te akaari atu kia koe akapeea matou i te raveanga i teia. Me ka reka koe i te reira, ka rauka ia koe te tamou ua atu. Me kare ra koe e reka ana, naau rai ia ikianga.” Me raveia na te reira mataara, kare te au tangata e mataku i te ariki.

Tetai atu Kite, tei tauturu i te manganui kare e maata ana te apinga e kare i maata te kite, kua karanga e: “Kua kitea e au te au aenga pepa ei puapinga tikai i te akamataanga i te au apii Puka Tapu.” Noatu e eaa ta ratou puka e taangaanga ra, kua tauta te au puapii tamou i te akaketaketa i te Puka Tapu. Kua karanga a Carola e: “I te apii mua, ka taangaanga ua au i te au tutu e mei te rima au irava, kia kitea uaia te au tumu maata e kare te Puka Tapu e akara anga ngata.”

Tamouanga i te Inangaro Kia Oraora Ua

Te rekareka ra te au tangata i te manako e te tere ra ki mua, no reira te akamaroiroi maira a Jennifer e: “E akaoraora i te apii. E tamou ua atu kia tere te apii ki mua.” Te rave putuputu anga i te apii ma te kore e topa tetai au epetoma te tauturu katoa ra ia ratou kia kite e te tere ra ratou ki mua. Kua akamarama tetai painia takake tei tupu mai i te au ngai mamao i te puapinga o te tamamaanga i te au akamarama anga e te akamanako oonu anga atu i te au tumu maata, kia rauka katoa i te aronga e meangiti ua to ratou kite te tere ki mua. Kua karanga aia e: “I roto i toku vira, ka pipi matou i te one i te vai i muri ake i te ruruanga i te au ua. Me akapuke matou i te au ngai tanuanga, ka akatupu te one i tetai paka pakari kare i reira e rauka i te ua e tupu maira i te o mai, e kua mate atu ratou. Mei te reira katoa, me akaki koe i te aronga ou i te au manako e manganui, penei ka akaraanga ngata roa e ka akamutu ratou.” Ka tau rai te au tangata e au manako kimikimi to ratou i te apii kia akamanako oonu atu okotai tumu tuatua i te taime okotai e tere ei to ratou marama ki mua. Kua karanga a Iesu ki tana au apotetoro e: “E manganui ra taku tuatua e akakite atu kia kotou, kare ra e tika ia kotou i teianei.”​—Ioane 16:12.

Ko tetai ravenga i te tamou i te inangaro kia oraora ua koia oki ko te akamaroiroi anga i taau aronga e atoro atura kia tamou ua atu i te akamanako i te Tuatua a te Atua i muri ake i toou aere anga. Te akamaroiroi maira a Yolanda e: “E akaruke i tetai uianga kare i pauia. E oronga atu i tetai angaanga na ratou no te ngutuare, mei te tatauanga i tetai tuanga o te Puka Tapu me kore ra kimikimi matatio anga i tetai tumu tuatua te manako tikai ra ratou.”

Akatupuanga i te Aroa no Iehova

Ka maata atu toou rekareka me tauturu koe i taau aronga e apii ra kia riro mai ei ‘aronga rave i te tuatua nei, auraka ei aronga akarongo ua.’ (Iakobo 1:22) Akapeea koe i te rave anga i te reira? Te akakeuia ra te au Kerititiano e te aroa no Iehova. Kua akamarama a Pedro, no Meiko mai e: “Kare e rauka i te au tangata i te aroa i tetai tangata kare ratou i kite, no reira mei te akamataanga tikai o te apii, ka apii au ia ratou i te ingoa o te Atua mei roto mai i te Puka Tapu, e ka kimi au i te au atianga ei akaketaketa i te au tu o Iehova.” I te tuatua anga, ka rauka ia koe te akatupu i te ariki anga no Iehova na te akakiteanga i toou au manako nona. I karanga ei a Elizabeth e: “Ka tauta ua rai au i te taiku i te tu meitaki o Iehova. I te tuatau o taku apii anga, me kite au i tetai tiare akaieie, i tetai manu manea, me kore ra i tetai kiore niao kangakanga, ka taiku ua rai au e e angaanga te reira na Iehova.” “E tuatua no runga i te ao ou ta te Atua e taputou maira mei taau tikai e kite ra e ko te tika ia,” i tuatua mai ei Jennifer. “E ui e eaa ta ratou ka inangaro i te rave i roto i te ao ou.”

Me akamanako oonu ua rai tetai tangata ma te ariki i tana e apii ra no runga ia Iehova, ka opu te reira ki roto i tona ngakau e ka akakeu iaia kia rave i tetai angaanga. Inara kare e rauka iaia i te akamanako oonu atu kia maara roa iaia. Te akara poto akaou anga i tetai au manako maata e toru me kore ra e a i muri ake i te au apii anga tataki tai ka riro ei tauturu anga ki te manako. E manganui te au puapii o te Puka Tapu te maani ra i te aronga ou kia tata i te au irava maata ki raro kapiti atu tetai tataanga ki muri i ta ratou Puka Tapu. Kua akamarama tetai mitinari no Engarani mai i tetai atu puapinga o te akara akaou anga: “Ka ui au e akapeea ratou i te puapinga angaia e te manako. Ka maani teia ia ratou kia akamanako oonu atu ma te ariki i ta Iehova au ravenga e te au ture.”

Tetai Kite tiratiratu tei karatuati mai mei te pupu toru o Gileada kua karanga e: “Ka tau tatou kia oraora. Ka tau ta tatou aronga e apii ra kia kite e te irinaki ra tatou i ta tatou e apii ra.” Te akarongo tei akariro ia koe ei ‘tangata mataora i te rave i taua angaanga ra’ ka riro ei mea piri me akaari koe i te reira.​—Iakobo 1:25.

“Te kite ra au e te vaitata atura te au tangata ki te Atua me tauturu au ia ratou kia kite i te au pauanga i ta ratou au pure,” i na ko ei tetai Kite tei tauturu i te manganui kia akamori ia Iehova. “Ka oronga au kia ratou i te au akaraanga mei taku uaorai i kite, mei teia rai: I te tae anga atu maua ko toku tokorua ki ta maua angaanga ou ei nga painia, e tokoia ua ake rai a maua kai rau rakau, okotai peketi pata, e kare e moni. Kua akapou maua i te kai i te aiai e kua karanga e: ‘I teianei kare a taua no apopo.’ Kua pure maua no runga i te reira, e kua aere atu i te moe. I te maiata rai i tera mai popongi kua aere mai tetai Kite o te reira ngai e kua akaaravei mai iaia uaorai, i te na koanga e, ‘Kua pure ana au e kia tono mai a Iehova i tetai au painia. I teianei ka rauka iaku i te aru atu ia korua i te maata anga o te ra, inara i te mea e e noo ana au i uta, ka kai au i te kaikai anga avatea ma korua, no reira kua apai mai au i teia kai na tatou katoatoa.’ E potonga puakatoro maata tikai e te au kai rau rakau. Ka akakite ua rai au i taku aronga e apii ra e kare rava a Iehova e akaruke ia tatou me kimi tatou i tona Patireia na mua.”​—Mataio 6:33.

E Oronga i te Tauturu Anga Tau Tikai

E maata atu te o maira i te maanianga i te au pipi a Karaiti i te raveanga i tetai apii anga Puka Tapu. Kua karanga tetai mitinari tei tavini ana no tetai au mataiti e manganui ei akaaere tutaka e: “E oronga i tetai taime no ratou. Auraka e rapurapu i te oki mei te apii atu me oti te reira. Me ka tau, e noo e tuatua atu no tetai taime.” Kua karanga a Elizabeth e: “E akamanako ana au no ratou no te mea te o maira te oraanga. E manganui te taime e manamanata ana au no ratou mei te mea atura e e tamariki ratou naku.” Kua oronga mai etai au Kite i teia au akamaroiroi anga: “E atoro atu ia ratou me maki ratou.” “Me vaitata atu koe ki to ratou kainga, ei akaraanga me tei runga i te angaanga orometua, e atoro poto ua atu ia ratou i te akaaravei atu i etai au Kite kia ratou.” Kua karanga a Eva e: “E akarongo meitaki kia marama koe i te tu o tetai tangata e te turanga i te oraanga. Te akakeu ra teia au mea i te tu e ariu maira te au tangata ki te tuatua mou e ka riro ei arai i to ratou tere anga ki mua. Kia riro ei oa no ratou, kia rauka ua ia ratou te tuatua i to ratou au manamanata.” Kua kapiti mai a Carol e: “Te inangaro tikai i tetai tangata e mea puapinga tikai i te mea e ko te au taui anga ta te tuatua mou ka apai mai ki tona oraanga ka riro mai i tetai taime e ka ngere aia i te pamiri e te au oa. Te mea matauia, e mea meitaki e kia kite te tangata apii e e noo ana tatou kiea e kia rauka ua iaia te aere mai kia tatou i tetai ua atu taime.” E tauturu iaia kia akara i te putuputuanga ei pamiri ou nona.​—Mataio 10:35; Mareko 10:29, 30.

“Kia viviki i te oronga atu i te tauturu tau. E noo ma ratou i te au uipaanga, e e tauturu atu ia ratou ma ta ratou au tamariki,” i karanga ei a Yolanda. Te akaarianga i te aronga ou akapeea i te tereni anga i ta ratou tamariki, te akameitaki anga mai i to ratou au turanga ma, te akapapa anga i te au pauanga no te au uipaanga, e te oronga anga i te au tuatua i te Apii Orometua Teokaratiki e tuanga katoatoa ia no te angaanga maanianga pipi. Kua kapiti mai tetai tuaine e: “E mea puapinga tikai te tereni i te aronga ou no te angaanga orometua. Me akangaropoinaia teia tuanga o te terenianga, ka tamou ua atu tetai papaki i te mataku i te angaanga tutu aere, ka kore to ratou rekareka i te tavinianga ia Iehova, e kare e rauka te akakoromaki.” No reira e oronga i te terenianga mako i roto i te angaanga mei tera are ki tera are, te raveanga i te au atoro akaou anga, e te akamataanga i te au apii Puka Tapu. Ka maata toou rekareka me kite koe i taau tangata e apii ra i te tere anga ki mua ma taau tauturu e te arataki anga.

E Akamaroiroi ia Ratou Kia Akakoromaki

“Te matauia ra e ka kopaeia te apii me papetitoia ana tetai tangata e apii ra,” i akamatakite mai ei tetai vaine kite i te maani pipi. Ka tau te puapii e te tangata e apii ra i te akamaara e e mamao roa atu tetai Kerititiano ou i papetitoia mei te tu pakari i te pae vaerua. E maata tikai tana ka rave kia tupu tona akarongo, tana ariki anga i ta te Atua ture, e tona aroa no Iehova. E mea puapinga tikai i te akamaroiroi atu iaia kia akatupu i te au tu apii anga meitaki nana uaorai kia tamou ua atu aia i te tere ki mua.​—1 Timoteo 4:15.

Penei ka anoano te tangata ou i te tauturu kia tere ki mua e kia riro mai ei mema meitaki no te taokotaianga o te au taeake. Penei ka anoano aia i te arataki anga i te akonoanga atu i te au tu apa ua o te au taeake iaia e akavaitata atura kia ratou. (Mataio 18:15-35) Penei ka anoano aia i te tauturu kia riro mai ei puapii karape, kia rauka ua iaia te rave i tana uaorai kimikimi anga. Kua akakite tetai mitinari e: “I muri ake i te papetito anga kua inangaro tetai vaine e apii ra i te akameitaki atu i tona kite ei puapii, no reira kua karanga mai aia kiaku, ‘Ka rave au i tetai apii anga ou a teia epetoma ki mua, inara ka anoano au i te akaoraora i toku manako no runga i te au pene mua taku i apii ana. Ka rauka ainei ia koe i te apii akaou mai i teia au pene kiaku, okotai i te taime, ine, kia rauka iaku te tata i te au akamarama anga o te au irava e te au akatutu anga, e i reira ka rauka iaku te taangaanga ia ratou me aere atu au ki taku apii?’ Kua riro mai aia ei puapii meitaki tikai, e a ana aronga apii i papetitoia i tetai akaputuputuanga okotai.”

Eaa i Riro ei te Maanianga Pipi ei Angaanga Puapinga Tikai

“Te maanianga pipi te akamaata atura i te aronga akapaapaa ia Iehova. Te riro ra te reira ei ora no te aronga e ariki ra i te tuatua mou,” i karanga ei Pamela. “E inangaro tikai toku i te apii i te tuatua mou ia etai ke​—e mea manea tikai te reira! Te kite ra tetai i te aronga e apii ra i te tupu marie anga, te raveanga i te au taui anga i roto i to ratou au oraanga e te autuanga atu i te au arairai anga tei akara anga maata naringa kare te vaerua o Iehova. E manganui te aronga tei rauka te aroa ia Iehova kua riro mai ei au oa akaperepere noku.”

“Me akamanako atu au i te aronga taku i tauturu kia riro mai ei au pipi,” i akakite ei tetai mitinari mei Tiamani mai, “te kite nei au i tetai au tangata mataku tei tere tikai ki mua ei au tavini no te Atua e te ngata nei iaku te irinaki i te reira. Te kite nei au i te au tangata tei autu atu i te au arairai anga ngata, i te akara anga ma ta Iehova tauturu. Te kite nei au i te au pamiri tei takake ana inara i teianei kua taokotai akaouia​—te tamariki mataora ma te au metua tau. Te kite nei au i te au tangata e rekareka ra i te oraanga puapinga, te akapaapaaanga ia Iehova. Ko te rekareka teia o te maanianga pipi.”

Ae, te riro anga ei oa angaanga ma te Atua ko Iehova i roto i te angaanga maanianga pipi e tumu ia no te rekareka akaaite koreia. Kua riro te au mea i kiteaia e te au mitinari e te au painia ei akapapu mai i te reira. Ka rauka katoa ia koe te kite i te reira tu rekareka e te merengo anga me taangaanga koe i te au akamaroiroi anga e kia rave i te reira ma te ngakau katoa. Ma ta Iehova akameitakianga, ka ope takiri toou rekareka.​—Maseli 10:22; 1 Korinetia 15:58.