Au Uianga a te Aronga Tatau

I etai au taime e rongo ana tatou i te au taeake e tuatua ra me kore e pure ra no te Patireia o te Atua kia aere mai ki te enua nei. E tuatua tano ainei teia?

I te tuatua tikai anga, kare e na reira ana ta te Tuatua Tapu tuatuaanga i te au mea. No te rangi mai te Patireia o te Atua. No reira, i raukaʼi i te apotetoro Paulo i te tata: “E na te Atu rai e akaora iaku i te au kino katoa ra, e tiaki mai iaku e tae ua atu ki tona basileia i te ao ra: ei iaia te kakā e tuatatau ua atu. Amene.”​—2 Timoteo 4:18; Mataio 13:44; 1 Korinetia 15:50.

Kua akatumuia te Patireia i te rangi i te 1914, e kare rava te reira e tukuia mai ki te enua Parataito nei tei akaouia me kore ki tetai atu ngai ke. Ko Iesu Karaiti te Ariki o te Patireia. Ei Ariki, e mana taoonga to Iesu ki rungao i te au angera. No reira, ko tona ngai tau meitaki no te tutara anga koia oki i te rima katau o te Atua i te au rangi ra. Ka piri atu te au Kerititiano akatainuia ma ia ra ei au ariki e te au taunga ra i te rangi.​—Ephesia 1:19-21; Apokalupo 5:9, 10; 20:6.

Ko te aiteanga ainei, i reira, e kare tatou e tuatua akaou ki te Atua i te au pati anga akatenga tei kitea i roto i te tuanga o te Pure a te Atu e karanga ra: “Kia tae toou basileia. Kia akonoia toou anoano i te enua nei, mei tei te ao katoa na”? (Mataio 6:10) Kare ko te reira te manako anga, te tau meitaki ra te reira pure e te ki nei rai i te aite anga puapinga maata.

Kare e roa atu ana ka tu atu te Patireia o te Atua na roto i tetai tu tika rava no te enua nei, e ko teia ta tatou e manako ra me pure tatou e e tuatua i te au tuatua tei aite ki te au putunga tuatua o te Pure a te Atu. Ei akaraanga, te akakite ra a Daniela 2:44 e ka “aere mai” te Patireia no te takore i te au pa enua katoatoa e ka rave i te tutara anga i te enua nei. Kua tuatua a Apokalupo 21:2 no Ierusalema Ou e eke maira mei te rangi mai. Te Ierusalema Ou ra ko te 144,000 ia, o te au Kerititiano akatainuia te ka riro mai ei vaine akaipoipo na Karaiti. E au kopu ariki katoa ratou ma Iesu ra i te Patireia. No reira te akakite ra a Apokalupo 21:2 i to ratou uri anga ki te enua, ma te au akameitakianga maata te ka tupu ki te au tangata akarongo.​—Apokalupo 21:3, 4.

Kia akatupu roaia teia nei e tetai atu au totou umere, ka tau meitaki ua atu rai no te pure ki te Atua ko Iehova kia tau ki ta Iesu au tuatua, “Kia tae toou basileia.” Inara kia akamanako tamou tatou e kare te Patireia e aere mai ki te paraneta Enua tikai nei. Ka noo te kavamani Patireia i te rangi, kare i te enua nei.

[Akameitakianga no te Tutu i te kapi 31]

Te enua: Akatumuia ki runga i ta NASA tutu