‘Kare Rai to Solomona Manea i Arite i Tetai o Ratou Nei’
TE TIARE tupu aere ra te kiteaia nei i konei te kite uaia ra i te pae i te au mataara i Aperika tonga. Kua kapikiia ratou e cosmos e no toropika Marike mai. Penei te apai maira taua au tiare manea ki to tatou manako i tetai apiianga ta Iesu i apii. Te aronga tei akarongorongo kiaia ra e manganui e putaua, e kua taitaia ratou no runga i to ratou au anoano i te pae kopapa, no ta ratou kai e te kakau.
“E eaa kotou e apiapi ei,” i ui ei a Iesu, “i te kakau? Ka maara na i te au lili o te enua, te peea nei to ratou tupu; kare ratou i angaanga, kare oki i iro: E karanga atu au kia kotou, E tae ua atu ki te manea ope o Solomona, kare rai tona manea i arite i tetai o ratou nei.”—Mataio 6:28, 29.
E tuke tuke te au manako tei orongaia mai no runga i te tu tikai o te tiare te tupu aere ra ta Iesu i manako ana. Inara, kua akaaite a Iesu i te reira ki te rakau rikiriki tei matauia, i te karanga anga e: “I pera oki te Atua i te akamanea anga i te rakau rikiriki o te enua, akonei te vai ra, e apopo kua uriia ki roto i te umu; ka tanga atu ei oki ia kotou, e kotou, te aronga akarongo mea ngiti nei!”—Mataio 6:30.
Noatu e kare no Iseraela mai te cosmos, te turu papu tikai ra ratou i te apiianga ta Iesu e apii ra. Me te akaraia maira mei te ngai mamao me kare te akara vaitataia ra, e manea tikai ratou e e mea reka na te aronga nenei tutu e na te aronga peni tutu. E tikai, kare a Iesu i tuatua akamaata ua atu i tona tuatua anga e, “te manea ope o Solomona, kare rai tona manea i arite i tetai o ratou nei.”
Eaa te apiianga no tatou i teia tuatau? Te aronga te tavini ra i te Atua kua papu e ka tauturu aia ia ratou kia rauka te au mea anoanoia i te au tuatau manamanata. Kua akataka mai a Iesu e: “E kimi ra kotou i te basileia o te Atua, e kapiti katoaia mai taua au mea [mei te kai te anoanoia ra e te kakau] katoa ra ia kotou.” (Luka 12:31) Ae, e au akameitaki anga tikai te aere maira no te kimi anga i te Patireia o te Atua. Inara kua kite ainei koe eaa te Patireia o te Atua e eaa ta te reira ka rave no te au tangata? Te rekareka ra te Au Kite o Iehova i te tauturu ia koe kia kite i te au pauanga no roto mai i te Pipiria.