Pene 38

I Ngere Ainei a Ioane i te Akarongo?

KUA rauka ia Ioane Papetito, tei vaira i roto i te are tapekaanga no te tai mataiti i teianei, te ripoti no te tuakaouanga o te tamaiti a te vaine takaua i Naina ra. Inara kua anoano a Ioane kia rongo tika aia mei ia Iesu no runga i te aiteanga o te reira, e no reira kua tono atura aia e toko rua o tana au pipi ra kia ui kiaia: “Ko koe aina te tae mai? e ko tetai ke aina ta tatou e tapapa atu?”

Penei e akara anga tuke te reira uianga, no te mea i kite ana a Ioane i te vaerua o te Atua i te toanga ki rungao ia Iesu e i akarongo katoa aia i te reo mareka anga o te Atua ra i tona papetitoanga ia Iesu e vaitata i te rua mataiti i mua akera. Penei ka manako tetai papaki e kua apikepike mai to Ioane akarongo no tana uianga. Kare ra ia. Kare a Iesu e tuatua akangateitei ia Ioane, mei tana i rave i te reira atianga ra, me kua akamata a Ioane i te ekoko. Eaa ra, a Ioane i ui ei i te reira uianga?

Penei te anoano ua ra a Ioane i te akataka anga na Iesu e Koia te Mesia ra. Ka riro te reira ei akamaroiroianga ia Ioane iaia e noo ra i te are tapekaanga. Inara i te akara anga e maata atu te aiteanga no ta Ioane uianga i te reira. Te papu ra e te anoano ra aia kia kite me te aere akaou maira tetai atu, ei mono iaia, te ka riro nana e akaoti i te akatupu anga i te au mea ravarai tei totouia ra e na te Mesia e rave kia oti.

Kia tau ki ta te au totou o te Puka Tapu ta Ioane i kite ra, ka riro Tei Akatainuia e te Atua ra ei ariki ia, ei akaora. Inara te vaira a Ioane ei mou auri, e manganui te au marama i muri ake i to Iesu papetito angaia ra. No reira e papu e te ui ra a Ioane kia Iesu e: ‘Ko koe tikai ainei te ka akanoo i te Patireia o te Atua i te mana o vao, me kare te vaira ainei tetai ke, ei mono, no ta matou ka tau kia tapapa atu ei akatupu i te au totou umere katoatoa te tuatua ra i te kakā o te Mesia?’

Kare aia i akakite ki te au pipi a Ioane e, ‘Ko au rai te ka tae mai!’ Kua rave ra a Iesu i te reira ora tikai i te akakite anga umere tikai na te akaoraanga i te au tangata e manganui katoa, ma te rapakauanga ia ratou i te au tu maki ravarai e te au tu apikepike katoa oki. I reira aia i tuatuaʼi ki tana au pipi: “Ka aere korua, e akakite atu kia Ioane i te au mea ta korua e akarongo nei, e ta korua e kite nei; e te kite nei te matapo, te aere nei te pirikoki, kua tamāia te lepera, kua akarongo te turi, kua akatuia tei mate, kua tuatuaia atu te evangelia ki te tangata rikiriki.”

Mei te reira te tu, penei te akataka maira te uianga a Ioane e e manakonako anga tona e ka tere atu ta Iesu ka rave, e penei ka tatara katoa ia Ioane uaorai. Inara, kua akakite atura a Iesu kia Ioane e auraka kia manakonako e ka tere atu ta Iesu ka rave i tana au semeio i rave ra.

I te akaruke anga te au pipi a Ioane ra, kua ariu atura a Iesu ki te aronga tini ra e kua akakite atu e ko Ioane te “karere” a Iehova tei totouia maira ia Malaki 3:1 e koia katoa oki te peroveta ta Elia i totou maira ia Malaki 4:​5, 6. Kua akapaapaa aia ia Ioane e i aiteite aia ki etai atu au peroveta tei ora ana i mua ake iaia ra, kua akataka mai e: “Tika tikai taku i karanga atu kia kotou, Ko ta te vaine i anau ra, kare ia i maata atu ia Ioane Papetito ra: ko tei meangaiti rava i te patireia o te rangi ra, e maata atu ia iaia. E mei ia Ioane Papetito e tae mai ki teianei ko te patireia o te au rangi ra ta te au tangata e akakoro ra kia taea atu.”​—⁠NW.

Te akakite maira a Iesu e kare a Ioane e tae ki te Patireia o te rangi, i te mea ko tei iti rava i reira ra e maata atu aia ia Ioane. Na Ioane i teateamamao te mataara no Iesu inara kua mate aia i mua ake i ta te Mesia akairo anga i te koreromotu, me kare akatikaanga, ma tana au pipi, kia riro ratou ei taeake tutara ma ia katoa i tona Patireia i te rangi ra. No reira a Iesu i karangaʼi e kare a Ioane e o atu ki te Patireia o te rangi ra. Kareka ra, ka riro a Ioane ei tangata no raro ake i te Patireia o te Atua ra. Luka 7:​18-30; Mataio 11:​2-15.

▪ Eaa a Ioane i ui ei me ko Iesu te Aere Maira me kare e tangata ke atu ainei tetai ka tau kia tapapaia atu?

▪ Eaa nga totou ta Iesu i karanga e na Ioane i akatupu?

▪ Eaa a Ioane Papetito ka kore ei e tae ki te rangi ma Iesu katoa?