• ‘I Na, te Vaitata ua ra Au ia Kotou’
    Te Punanga Tiaki—2013 | Tiurai 15

    • 13. Eaa ta tatou i kite mai i roto ia Apokalupo 18:7 no runga i te tu o te vaine akaturi, ko Babulonia Maata, e ia Kerititome?

      13 Te toru, te aue e te pakati anga nio. Me oti i te au angera i te ruru i te titania, eaa te ka tupu? No runga i te turanga o “te zizania,” kua karanga a Iesu e: “Tei reira te aue e te pakati anga nio.” (Mata. 13:42) Te tupu ra ainei te reira i teia tuatau? Kare. Ko Kerititome tetai tuanga o te vaine akaturi tei akatakaia i roto ia Apokalupo pene 18. I teia tuatau, te karanga ra a Kerititome no runga iaia uaorai e: “Te noo ariki vaine nei au, kare au i te takaua, e kare au e kite i te aue.” (Apo. 18:7) Te manako nei aia e koia teia e akaaere nei e te tauta ra aia kia riro ei “ariki vaine” i runga ake i te au arataki poritiki. No reira, te akapaapaa nei rai te au Kerititiano pikikaa, tei akatutu mai i te titania, i teia tuatau. Kare ratou i aue ake, inara kare e roa atu ana ka taui te reira.

      [Tutu i te kapi 13]

      Kare e roa atu ana ka kore te pirianga vaitata i rotopu ia Kerititome e te au arataki poritiki (Akara i te parakarapa 13)

      14. (a) Aea te au Kerititiano pikikaa e ‘pakati ei i to ratou nio,’ e no teaa ra? (e) Akapeea to tatou marama ou no runga ia Mataio 13:42 te rotaianga ki te tuatua i roto ia Salamo 112:10? (Akara i te au manako poto.)

      14 I muri ake i te takoreia anga te au akonoanga pikikaa, ka kimi te aronga tei aru ana i teia au akonoanga i tetai ngai pipinianga. Inara, kare e kitea e ratou tetai ngai tinamou. (Luka 23:30; Apo. 6:15-17) Me kite ratou e kare o ratou ngai e oro ei, ka aue ratou no to ratou turanga e ka pakati, me kore, ka kakati i to ratou nio no to ratou riri. Mei ta te totou a Iesu no runga i te mate maata e akaari maira, ko te tuatau te reira e “aue ei” ratou.e​—Mata. 24:30; Apo. 1:7.

      15. Eaa te ka tupu ki te titania, e aea te reira e tupu ei?

      15 Te a, ka titiriia ki roto i te umu ai. Eaa te ka tupu ki te au ruru titania? “Ka titiri atu ei [te au angera i te reira] ki roto i te umu ai.” (Mata. 13:42) Koia oki, ka takore takiriia ratou. No reira, te aronga tei turuturu ana i te au akaaerenga o te akonoanga pikikaa, ka takoreia ratou i te tuatau o te tuanga openga o te mate maata, i Aramakito.​—Mala. 4:1.