“Tetai Akairo i Runga i te Rangi”

KUA karanga tetai pee taito e: “Muramura te tiao i te po, rekareka te au mataro,/​Muramura te tiao i te popongi, rave atura te au mataro ma te matakite.” I teia ra, te au tateraiti, te au apii anga vaito anga tei raveia e te komopiuta, te rata Doppler, e tetai atu au ravenga taineti tei raveia no te akakite i te reva. I te maata anga o te taime te rotai ra te au tamanako anga ki te pee tei taiku uaia atu.

Kua taumaro to Iesu Karaiti au enemi akonoanga mei iaia ra “tetai akairo i runga i te rangi,” tetai akaari anga tuke no te akapapu e koia te Mesia. Kua karanga aia, “kia tae ki te aiai, te karanga na kotou, Kua muramura te rangi, ka rangi marie. E i te popongi ra, Ka uriia akonei; kua muramura oki te rangi e kua takapakapa. E te au pikikaa e, te kite nei kotou i te tu o te rangi nei; kare ra e kite i te akairo o teianei tuatau. Te kimi nei te uki tangata kikino e te akaturi i te akairo, kare ra e akairo e orongaia atu, mari ra te akairo i te peroveta ra ia Iona.”​—Mataio 16:1-4.

Ka rauka i te au enemi o Iesu i te akakite i te reva inara kare e marama i te au mea pae vaerua. Ei akaraanga, akapeea ‘te akairo ia Iona’? I muri ake i te akapouanga mei te toru ra i roto i te kopu o tetai ika maatamaata, kua tutu aere ta te Atua peroveta ko Iona ki Nineve e i reira i riro mai ei ei akairo ki te reira oire kapitara o Asuria. Kua rauka i to Iesu uki ‘te akairo ia Iona’ i to Karaiti akapou anga i tetai tuanga o te toru ra i roto i te tanumanga e akatuia akera. Kua akakitekite tana au pipi i te tika o te reira rave anga, e no reira e akairo a Iesu no te reira uki.​—Mataio 12:39-41.

I tetai atu ati anga, kua ui ta Iesu au pipi kiaia no “te akairo” o tona “parutia” i te tuatau ki mua ma te mana Patireia. I te pau anga atu, kua oronga aia i tetai akairo kapiti anga ma te au tuanga tukeke, kapiti mai te au tamaki kare e tupu akaou, te au ngaruerue enua maata, te rava kore o te kai, e te tutu aere anga i te au enua katoa no runga i te Patireia akatumuia o te Atua i te rangi.​—Mataio 24:3-14.

Te kite ra ainei koe i te akairo o to Karaiti parutia ei Ariki kitea koreia i te rangi? Te au tuanga o te reira akairo te akatupuia ra ki rungao i teia uki. (Mataio 24:34) E akapeea te tuatau ki mua? Kare te Puka Tapu e akaari anake ua maira e te vaitata maira te openga o teia akatereanga o te au mea nei mari katoa ra te akakite ra i ta te Atua ra ou tei taputouia e kare e roa atu ana te vaitata maira ma te kiteaia e te marama no te au tangata nei.​—2 Petero 3:13.