• Ko te Pope Ainei te “Mono o te Tangata Tapu ko Petero”?
    Te Punanga Tiaki—2011 | Okotopa 1

    • Ko Petero Ainei te Pope Mua?

      Ei akapapu e i akatumuia te akonoanga ki runga ia Petero, kua roa te Akonoanga Katorika i te tou anga ki te tuatua a Iesu i roto ia Mataio 16:18 e: “Ko Petero koe; e ki runga i teianei papa e patu ei au i taku ekalesia.” Tera ra, i tataia taua tuatua ra i roto i te reo Ratino, i roto i te Are Pure o St. Peter i Roma.

      I mua ana, karanga a Augustine, e Metua akangateiteiia, e i patuia te ekaretia ki runga ia Petero. Inara, vaitata ki te openga o tona oraanga, kua taui aia i tona manako no runga i te aiteanga o ta Iesu tuatua. Roto i tetai tataanga tei karangaia e ko te Retractations, kua maro a Augustine e kua patuia te ekaretia, koia oki te putuputuanga Kerititiano ki runga ia Iesu, kare ia Petero.a

      Tika rai e, e tangata tuatua maataia a Petero i roto i te au Evangeria. Kua taiku mai a Iesu e toru o tana au apotetoro​—ko Ioane, Iakobo, e Petero—​tei aru iaia ki tetai au akakoroanga puapinga. (Mareko 5:37, 38; 9:2; 14:33) Oronga a Iesu i “te au taviri o te basileia o te ao,” ta Petero i taangaanga ei akatuera i te mataara ki te Patireia​—na mua ki te ngati Iuda e te au poroteraita, e oti ki to Samaria, e te openga ki te au Etene. (Mataio 16:19; Angaanga 2:5, 41; 8:14-17; 10:45) No tona tu maoraora, i tetai au taime ko Petero te vaa tuatua no te au apotetoro. (Angaanga 1:15; 2:14) Na teia au tika ainei i akariro ia Petero ei upoko no te putuputuanga i mua ana?

      Kua tata rai te apotetoro ko Paulo e kua orongaia kia Petero “te taoonga aposetolo i te peritome ra.” (Galatia 2:8) Tera ra, kare te katoaanga o ta Paulo tuatua e karanga ra e ko Petero te akatere ra i te putuputuanga. No runga te tuatua a Paulo i ta Petero tuanga angaanga i roto i te tutu anga ki te ngati Iuda.

      Noatu e maata te apainga tei orongaia na Petero, kare e ngai i roto i te Pipiria ka kite tatou iaia e karanga ra e koia te upoko o te putuputuanga, e nana e rave ana i te au tukuanga tika no te au pipi ei pupu katoa. Roto i tana reta, kapiki aia iaia uaorai ei “aposetolo” e te “orometua”​—kare i tetai apinga ke atu.​—1 Petero 1:1; 5:1.