Pene 52

E au Tauatini ta Iesu i Angai na te Semeio

KUA rekareka te 12 apotetoro ra i to ratou tere umere tikai i te tutu aere anga takapini ia Galilea. I muri poto ake i to Ioane tamate angaia, kua oki maira ratou kia Iesu e kua akakite mai i te au mea umere ta ratou i rave. I te kite anga e te roiroi ra ratou e e manganui te aronga te aere maira e te aere atura e kare o ratou e tuatau no te kaikai, kua karanga atura Iesu: ‘Ka taki aere tatou ko tatou anake ua i tetai ngai motutaa, e akaangaroi kotou.’

Kua aere atura ratou na runga i te pai, penei te vaitata ra ki Kaperenauma, kua aere atu ki tetai ngai motutaa, penei ki te pae itinga ra i Ioridana i mamao atu ia Betesaida. Inara e manganui te aronga tei akara i to ratou aere anga, e kua kite katoa etai atu i te reira. Kua oro katoa atu teia aronga na mua ia ratou na uta, e i te tae atu anga te pai, tei reira taua aronga tini ra i te aravei ia ratou.

I tona aere mai anga mei te pai ra e te akara atu anga i te reira aronga tini, kua aroa atura Iesu no te mea mei te mamoe tiaki kore rai ratou. No reira kua akaora aia i to ratou maki e kua akamata i te apii atu ia ratou i te au mea e manganui.

E viviki ua te tuatau i te aere, e kua aere maira ta Iesu au pipi kiaia kua na ko maira: “E ngai motutaa teia, e kua parepare oki te rā. Ka tuku atu ia ratou nei, kia aere ana ratou i te au ngai are ra, e te au vila vaitata nei, e oko i te kai na ratou.”

Inara, kua na ko atura Iesu: “Na kotou e apai atu i te kai na ratou.” Ei reira, i te mea kua kite ke ana a Iesu eaa tana ka rave, kua timata aia ia Philipa na te ui anga kiaia: “Eiea tatou ka oko ei i te kai, ei angai anga i teia aronga?”

I ta Philipa akaraanga kare rava e rauka kia rave i te reira. Eaa ra, e vaitata e 5,000 au tane, e penei e tere atu i te 10,000 te katoatoa te au vaine e te au tamariki katoa oki! Kua karanga maira Philipa e “Kia rua ua atu rai anere i te denari ei oko i te manga [okotai tenari ko te tutaki ia no te ra okotai i reira, NW], kare ua e rava kia taki tai ungaungā kai i te tangata okotai.”

Penei ei akaari i te kore e rauka kia angai i tera aronga e manganui, kua karanga maira Anederea: “Tera ake tetai tamaiti, e rima ana manga kerite, e rua oki ika,” kua kapiti katoa maira aia, “eaa ra te reira e ravaʼi i teianei aronga maata?”

I te mea ko te tuatau tupu anga rau, i mua ua ake i te Pasa o te 32 T.N., e maata te matie i reira. No reira kua karanga atura Iesu i tana au pipi e akatakoto aere ana i te au tangata ki raro i runga i te matie i te au pupu e 50 e te 100 katoa. Kua rave akera aia i nga manga e rima e nga ika e rua, nana akera i te rangi, e kua akameitaki atura. Ei reira kua akamata aia i te atiati i nga manga e i te tua katoa i nga ika. Kua oronga atura ki tana au pipi, na ratou i tua ki taua aronga tini ra. E mea umere tikai, kua kai taua aronga tini katoatoa ra e pangia rava akera ratou!

I muri akera kua karanga atura Iesu ki tana au pipi: “Ka akaputu ana i te ungaūnga kai mea riki i toe ra, eiaa tetai vaʼi e akarukeia [e kaimoumouia, NW].” I ta ratou rave anga i te reira, kua ki ia ratou e 12 tapora i te toenga o ta ratou i kaikai ra! Mataio 14:​13-21; Mareko 6:​30-44; Luka 9:​10-17; Ioane 6:​1-13.

▪ Eaa ra a Iesu i kimi ei i tetai ngai motutaa no tana au apotetoro ra?

▪ Kua taki atura Iesu i tana au pipi kiea, e eaa i kore ei i rauka kia tupu ta ratou i anoano ra kia akaangaroi ratou?

▪ E parepare akera te ra, eaa ta te au pipi i raurau maira, inara i akapeea ta Iesu akono anga i taua aronga tini ra?