Pene 58

Nga Manga e te Akaopue

E ARONGA maata tei aere mai kia Iesu i te Dekapoli. E manganui tei aere mai no te ngai mamao ki teia ngai maata tei nooia e te Etene i te akarongo kiaia e kia akaoraia to ratou au maki. Kua apai mai ratou i ta ratou kete mamaata, me kare e pia, e matauia ana i te apai aere i ta ratou apinga na te ngai o te au Etene ra.

Inara, i muri akera, kua karanga atura Iesu ki tana au pipi na ko atura: “Te tangi nei au i teianei aronga maata, i te mea ka po toru akenei ratou iaku nei, e kare e manga kia kai: E kia tuku au ia ratou i to ratou ngutuare ma te pongi, e paruparu ratou i te ara: E ngai mamao mai oki tetai papaki.”

Kua ui atura te au pipi: “Eiea te kai e raukaʼi i te medebara nei e ravaʼi i teianei aronga maata?”

Kua ui atura Iesu: “Eia a kotou manga?

E itu,” e na ratou ei, “e puke ika rikiriki oki ta ratou.”

Kua akaue atura Iesu i te au tangata ra, e noo ki raro, e kua rave iora aia i nga manga e nga ika ra, kua pure atura ki te Atua, vavaʼi iora, e tuku atura ki tana au pipi. Na ratou i tua atu ki te au tangata tini ra, kai iora ratou, e pangia rava akera. I muri akera, kua akaputuia te ungaunga kai toe ra, e itu kete ki, noatu rai e vaitata e 4,000 tane, pera katoa oki e au vaine e te au tamariki etai atu, tei kaikai i reira!

Tuku atura Iesu i te reira aronga tini kia aere, kua na te pai atura Iesu ma tana au pipi, kua tapae atura ki taatai i te opunga ra o te Tai i Galilea ra. I reira te au Pharisea, kua kapiti atu ki te au mema o te akono anga Sadukea ra, e kua tamata i te timata ia Iesu na te pati anga kiaia e akakite atu i tetai akairo no runga i te rangi.

No tona kite i ta ratou tauta anga e timata iaia, kua na ko atura Iesu: “Kia tae ki te aiai, te karanga na kotou, kua muramura te rangi, ka rangi marie. E i te popongi ra, ka uriia akonei; kua muramura oki te rangi e kua takapakapa. . . . Te kite nei kotou i te tu o te rangi nei; kare ra e kite i te akairo o teianei tuatau.”

No te reira tu, kua tapa a Iesu ia ratou e e uki tangata kikino e te akaturi e kua akamatakite atu ia ratou, mei tana i tuatua atura ki te au Pharisea i mua akera, e kare e akairo e orongaia atu, mari ra te akairo ia Iona ra. I te akaruke anga, kua aere atura Iesu e tana au pipi na te pai ki Betesaida i te pae taatai tokerau i te itinga ra i te Tai i Galilea ra. I te aere anga kua kite te au pipi e kua ngaropoina ia ratou i te apai i te manga, e okotai ua ta ratou manga i rotopu ia ratou katoa.

I te manako anga i tona aravei anga i te au Pharisea e te au Sadukea tei turuturu ia Heroda ra, kua akamaroiroi atura Iesu kia ratou: “E matakite oki i te akaopue a te au Pharisea, e te akaopue a Heroda.” Penei no te taiku anga i te akaopue kua manako te au pipi e te tuatua ra a Iesu no tei ngaropoina ia ratou te apai mai i te manga, no reira kua akamata ratou i te taumaro no te reira tumu. I te kite anga i to ratou manako tarevake ra, kua karanga atura Iesu: “Eaa kotou e akaeatu ei, i te mea kare a kotou kai?”

I mua ua akera, a Iesu i oronga ei i te semeio no te manga na te au tauatini ua atu tangata, kua rave aia i te reira semeio openga ra i nga ra e tai me kare e rua i mua akera. E mea tau kia kite ratou e kare aia i manako ana no te kore e manga tikai. Kua akamaara atura aia e: “Kare aina o kotou manako? Iaku i vavaʼi i nga manga e rima i nga tausani e rima ra, eia a kotou tapora i akaki i te toenga kai ra?”

Kua pau maira ratou: “Okotai ngauru ma rua.”

“E nga manga oki e itu i nga tausani e ā ra, eia a kotou tapora i akaki i te toenga kai ra?”

Ta ratou i pau mai: “E itu.”

Kua ui atura Iesu: “Kare ainei kotou i kite i te aiteanga?” (NW) “Eaa kotou i kore ei i kite e kare no te kai taku i tuatua kia kotou na e, e matakite ia kotou i te akaopue a te au Pharisea e te au Sadukea?”

I te openga kua kite te au pipi i te aiteanga. Te akaopue, e apinga ei akakavakava e ei akariro kia opue te manga, e tuatua no te akakite i te tu viivii. Ei reira kua kite te au pipi e te tuatua akatutu ra a Iesu, e te akamatakite ra aia ia ratou kia paruru ia ratou i “te apiianga a te au Pharisea e te au Sadukea,” e apiianga tarurike te reira. Mareko 8:​1-21; Mataio 15:​32–​16:12.

▪ Eaa te au tangata i rave ei i te au tapora mamaata ia ratou katoa ra?

▪ I muri ake i te akaruke anga i te Dekapoli ra, eaa nga tere pai ta Iesu i aere ana?

▪ Eaa te manako tarevake o te au pipi ra no te tuatua anga a Iesu no te akaopue ra?

▪ Eaa te aiteanga o ta Iesu tuatua no runga i “te akaopue a te au Pharisea e te au Sadukea” ra?